Aníkena reduda Jehová neperdonaha

1, 2. ¿Mbaʼépa Jehová ojapo ñañarrepentíramo ñande pyʼaite guive? (Ehecha pe taʼanga).

RRÉI David oñeñandu vaieterei kuri umi mbaʼe vai ojapo vaʼekuére (Sal. 40:12; 51:3; introduksión). Péro haʼe oñarrepenti vaʼekue ipyʼaite guive ha okambia, upévare Jehová operdona chupe (2 Sam. 12:13). Upéi David ipyʼaguapýma oikuaágui Jehová operdonáma hague chupe (Sal. 32:1).

² Ñande avei tuicha ñandepyʼaguapy jaikuaávo Jehová ñandeporiahuvereko ha ñaneperdonaha. Oimérõ jepe japeka vai raʼe, Jehová ikatu ñaneperdona ha upéva ñanekonsola, péro upearã tekotevẽ ñañarrepenti ñande pyʼaite guive, ñañemboʼe Jehovápe ñaneperdona hag̃ua, ñamombeʼu umi ansiánope la jajapo vaʼekue ha ñañehaʼãmbaite ani hag̃ua jajapo la mísma kósa (Prov. 28:13; Hech. 26:20; 1 Juan 1:9). Javyʼaiterei jaikuaávo Jehová ñaneperdonaiteha voi, upévare japyta henondépe ku ndajajapoirõguáicha mbaʼevete ivaíva (Ezeq. 33:16).

3, 4. a) ¿Mbaʼéichapa oñeñandu vaʼekue peteĩ ermána ojevautisa rire? b) ¿Mbaʼépa jahecháta ko artíkulope?

³ Sapyʼánte ikatu ijetuʼu ñandéve jarovia hag̃ua Jehová ñaneperdonáma hague. Jahechamína Jennifer káso. Ituakuéra omboʼe vaʼekue chupe la Biblia michĩete guive péro imitãkuñáme haʼe oñepyrũ vaʼekue ojapo umi mbaʼe vai kañyháme. Unos kuánto áño upe rire, Jennifer oñemoag̃ui jey Jehováre ha kon el tiémpo ojevautisa. Haʼe heʼi: “Yma pyʼỹinte cherekovai vaʼekue, akaʼu, aiko vaʼekue chepochyháre ha pe plátante voi la iñimportanteve vaʼekue chéve g̃uarã. Che aikuaa Jesús sakrifísio rupive Jehová ikatuha operdona umi mbaʼe che ajapo vaʼekue, péro ijetuʼu vaʼekue chéve aguerovia hag̃ua che pyʼaite guive Jehová cheperdonáma hague”.

⁴ Ikatu oime repensa jepi Jehová osegiha gueteri ipochy nendive umi mbaʼe vai rejapo vaʼekuére yma. Péro nemanduʼákena rréi David oñeñandu hague trankílo oikuaávo Jehová oiporiahuvereko ha operdonáma hague chupe, ha Jehová ningo oipota avei ñande ñañeñandu péicha. Ko artíkulope jahecháta mbaʼérepa tekotevẽterei ñaĩ segúro Jehová ñaneperdonaha ha mbaʼéichapa ikatu jajapo upéva.

¿MBAʼÉREPA IÑIMPORTÁNTE JAGUEROVIA JEHOVÁ ÑANEPERDONAHA?

5. ¿Mbaʼépa Satanás ogueroviakase ñandéve? Emombeʼu peteĩ ehémplo.

⁵ Jagueroviáramo Jehová ñaneperdonaha ndajaʼamoʼãi Satanás ñuhãme. Satanás oñehaʼã ipy ha ipópe anivéma hag̃ua ñande jaservi Jehovápe. Upearã ogueroviakase ñandéve Jehová ndaikatuiha operdona ñane rembiapo vaikue. Ñanemanduʼamína la oiko vaʼekuére pe kuimbaʼe Corintoguáre. Haʼe ou vaʼekue hekovai ha upévare oñenohẽmante chupe kongregasióngui (1 Cor. 5:​1, 5, 13). Kon el tiémpo pe kuimbaʼe oñarrepenti péro Satanás ndoipotái vaʼekue umi ermáno kongregasionpegua operdona ha orresivi jey upe kuimbaʼépe. Avei Satanás oipota vaʼekue pe kuimbaʼe opensa núnka ndaikatumoʼãiha oñeperdona chupe. ¿Maʼerãpa? Pórke péicha pe kuimbaʼe ‘oñembyasyetereígui oñentregáta’ kuri ha ndoservimoʼãvéima Jehovápe. Satanás koʼág̃a peve oipuru pe ñuhã. Haʼe oipota ñapensa Jehová ndaikatuiha ñaneperdona, péro ‘ñande jaikuaa porãiterei umi mbaʼe Satanás oipurúva ñanemoñuhã hag̃ua’ ha upévare ikatu ñandepuʼaka hese (2 Cor. 2:​5-11).

6. ¿Mbaʼépa tekotevẽ jajapo anivéma hag̃ua ñañeñandu vai la jajapo vaʼekuére?

⁶ Jagueroviáramo Jehová ñaneperdonaha ndajaikomoʼãvéima ñañeñandu vai la jajapo vaʼekuére. Japekáramo, upéi ñañeñandu vaítante voi (Sal. 51:17). Amo ipahápe upéva oĩ porã, pórke ñañeñandu vaírõ ñane konsiénsia ikatu ñanemomýi ñakambia ha jajapo hag̃ua la iporãva (2 Cor. 7:​10, 11). Péro oimérõ ñañarrepentíma raʼe ha lomímonte jasegi ñañeñandu vaieterei, upéva ipeligróso pórke ikatu jaju ñañentrega. Upévare iñimportánte jaguerovia Jehová ñaneperdonáma hague. Péicha vyʼápe jasegíta jaservi Jehovápe konsiénsia potĩ reheve. Upéva ningo la Jehová oipotáva ñandéve g̃uarã (Col. 1:​10, 11; 2 Tim. 1:3). ¿Péro mbaʼépa ikatu jajapo ñaĩ hag̃ua segúro Jehová ñaneperdonáma hague?

¿MBAʼÉPA JAJAPO VAʼERÃ JAGUEROVIA HAG̃UA JEHOVÁ ÑANEPERDONAHA?

7, 8. ¿Mbaʼépa Jehová heʼi vaʼekue ijehe, ha mbaʼéguipa ikatu ñaĩ segúro? (Éxodo 34:​6, 7).

⁷ Epensa memékena la Jehová voi heʼi vaʼekuére ijehe. Por ehémplo ikatu ereko enkuénta la Jehová heʼi vaʼekue Moiséspe, Sérro Sinaípe (elee Éxodo 34:​6, 7).a Jehová oreko hetaiterei kualida porã, péro entéro umíva apytégui haʼe oipota vaʼekue Moisés oikuaa haʼe haʼeha “peteĩ Dios oporoporiahuverekóva ha oporombyasýva”. ¿Ikatúne piko upéicharõ Jehová omboyke ha noperdonái peteĩ isiérvo oñarrepentívape ipyʼaite guive? Nahaniriete voi, Jehová noperdonáirõ peteĩ persóna oñarrepentívape sinséramente, ohechaukáta iñañaha ha nombyasyiha avavépe ha haʼe ningo ndahaʼéi peteĩ Dios peichagua.

⁸ Jehová heʼíma ijehe haʼe oporoporiahuverekoha. Ha jaikuaa upéva siertoha pórke Jehová núnka ndaijapúi (Sal. 31:5). Upévare ikatu ñakonfia la haʼe heʼívare. Oimérõ resegi gueteri reñeñandu vai la rejapo vaʼekuére yma, eñeporandumína: “¿Agueroviápa Jehová oporoporiahuvereko, oporombyasy ha nomboykemoʼãiha peteĩ oñarrepentívape?”. Oimérõ reguerovia upéva, entónse ikatu reĩ segúro haʼe neperdonáma hague.

9. ¿Mbaʼépa ñanemboʼe Salmo 32:5?

⁹ Ejepyʼamongetákena la Jehová heʼívare Iñeʼẽ rupive. Por ehémplo jahechamína la David oskrivi vaʼekue (elee Salmo 32:5). David heʼi vaʼekue: “Nde Ñandejára, reperdona che rembiapo vai ha che pekádo”. Pe palávra hebrea ojepurúva ko téxtope ha ojetradusíva “operdona” ikatu heʼise “ohupi” térã “ogueraha”. Upéicharõ, Jehová operdonárõ guare Davídpe haʼe oñandu Jehová ohupirõguáicha ha ogueraha pe kárga pohýi David oreko vaʼekue hiʼári. Upe rire David ivevýi asy opytávo ha ovyʼa jey oikuaágui Jehová operdonaitéma hague chupe (Sal. 32:​2-4). Ñande avei ikatu javyʼa péicha. Ñañarrepentíramo ñande pyʼaite guive, natekotevẽvéima jasegi ñañeñandu vai la jajapo vaʼekuére. Upéva rangue, ikatu javyʼa jaikuaágui Jehová ñaneperdonáma hague ha péicha ohupi ha ogueraha pe kárga pohýi jareko vaʼekue ñande ári.

10, 11. ¿Mbaʼépa heʼise Jehová ‘oĩha ñaneperdona hag̃uáicha’? (Salmo 86:​5, nóta).

¹⁰ (Elee Salmo 86:5 ha nóta). Ko téxtope David heʼi Jehová ‘oĩha operdona hag̃uáicha’. Upéva heʼise Jehová ndojapuraiha ipochy hag̃ua ñande jajavy jave. Haʼe siémpre operdonase umi oñarrepentívape, péicha voi ilája. ¿Mbaʼére haʼe ojapo upéicha? Pe ótra párte pe téxtope heʼi: “Entéro ojeroviáva nde rérare ohechakuaáta ehechaukaha mborayhu ifiélva”. Jahecháma haguéicha pe artíkulo ohasa vaʼekuépe, Jehová opromete ohechaukataha mborayhu ifiélva umi ohayhúvape chupe ha núnka ndohejamoʼãiha chupekuéra. Upévare isiervokuéra opekáramo péro upéi oñarrepenti, Jehová osegi ohechauka chupekuéra mborayhu ifiélva ha “operdonambaitéta” chupekuéra (Is. 55:7). Oimérõ ijetuʼu hína ndéve eguerovia Jehová neperdonáma hague, eñeporandumína: “¿Agueroviápa Jehová operdonaha umi oñarrepentívape ha ojerure asývape oiporiahuvereko hag̃ua chupekuéra?”. Oimérõ upéicha, ikatu reĩ segúro Jehová neperdonáma hague ejerure asýrõ guare chupe ndeporiahuvereko hag̃ua.

¹¹ La Biblia avei heʼi Jehová ontende porãitereiha ñande ñaneimperfektoha ha upéva tuicha ñanekonsola (Sal. 139:​1, 2). Jahechamína la David heʼi vaʼekue ótro Sálmope, pórke upéva ñanepytyvõta ñaĩve hag̃ua segúro Jehová ñaneperdonaha.

¿MBAʼÉGUIPA JEHOVÁ NDAHESARÁIRI?

12, 13. ¿Mbaʼéguipa Jehová ndahesaráiri ha mbaʼépa ojapo upévare? (Salmo 103:14).

¹² (Elee Salmo 103:14). Ko Sálmope David heʼi mbaʼérepa avei Jehová oĩ operdona hag̃uáicha umi oñarrepentívape. David heʼi Jehová ‘ndahesarairiha ñande yvynteha’. Upéva heʼise Ñandejára siémpre orekoha enkuénta ñaneimperfektoha. Ñantende porãve hag̃ua upéva, ñaanalisa porãmiéna la David heʼi vaʼekue.

¹³ David heʼi vaʼekue Jehová ‘oikuaa porãha mbaʼéichapa ñandeapo vaʼekue’. Haʼe ojapo vaʼekue Adánpe “yvýgui”. Jehová oikuaágui mbaʼéichapa ñandeapo vaʼekue ontende mbaʼépa oikotevẽ umanokuéra. Por ehémplo tekotevẽha jakaru, jake ha jarrespira. Umi umáno perfékto jepe oikotevẽ vaʼekue umícha mbaʼe (Gén. 2:7). Upéva upe sentídope ikatu jaʼe Adán yvýnte hague. Péro Adán ha Eva opeka rire heʼiséma ótra kósa avei la umanokuéra yvynteha. Upe guive heʼiséma avei ñande ñanasemaha pekadór ha tekotevẽha jalucha ñande devilida kóntrape. Upéicharõ Jehová oikuaa ñaneimperfektoha, péro David heʼírõ guare Jehová ‘ndahesarairiha’ ñande yvynteha heʼise vaʼekue avei Jehová siémpre ñandeporiahuverekotaha oikuaágui ñaneimperfektoha. ¿Entónse mbaʼépa la heʼise vaʼekue David? Haʼe ontendekase Jehová oikuaaha ñande jajavytanteha voi sapyʼánte, péro ohecha jave ñañarrepentiha ñande pyʼaite guive haʼe ñandeporiahuvereko ha ñaneperdona (Sal. 78:​38, 39).

14. a) ¿Mbaʼe ehémplopa oipuru avei David ohechauka hag̃ua mbaʼéichapa Jehová ñaneperdona? (Salmo 103:12). b) ¿Mbaʼépa ikatu ñaaprende David kásogui? (Ehecha pe rrekuádro “Jehová ñaneperdona jave, hesaráima la jajapo vaʼekuégui”).

¹⁴ ¿Mbaʼépa ikatu ñanepytyvõ avei ñaĩ hag̃ua segúro Jehová ñaneperdonaha? (Elee Salmo 103:12). David heʼi pe ‘kuarahyresẽ oĩha mombyryeterei pe kuarahyreikégui ha upéicha Ñandejára omomombyryha ñandehegui ñande pekádo’. Pe kuarahyresẽ ningo oĩ mombyryeterei pe kuarahyreikégui, ndaikatúi ñamedi ha núnka ndojohupytymoʼãi. ¿Mbaʼépa ñanemboʼe upéicharõ ko ehémplo? Peteĩ lívro oexplika ko versíkulo heʼiseha Ñandejára mombyryeterei omoĩha ñandehegui ñande pekádo. Haʼete voi ndopytáiva pe pekádo rapykuere ni hyakuãngue jepe, pórke odesaparesetéma voi. Ñande jaikuaa la ñahetũva ñanemomanduʼaha jepi algúna kósare, péro Jehová ñaneperdona jave ndopytái ni michĩmi voi ñande pekádo rapykuere, ha haʼe núnka ndoipurumoʼãi ñane kóntrape la jajapo vaʼekue (Ezeq. 18:​21, 22; Hech. 3:19).

15. ¿Mbaʼe rehepa ikatu ñapensa oimérõ jasegi ñañeñandu vai la jajapo vaʼekuére?

¹⁵ Upéicharõ, ¿mbaʼéichapa ñanepytyvõ la David heʼi vaʼekue Salmo 103-pe? Oimérõ esegi eñeñandu vai la ejapo vaʼekuére, epensamíntena: Jehová ningo ndahesaráiri nde neimperfektoha ha operdonaseterei voi umi oñembyasývape, ¿ha ndahaʼéi piko upéva la nde rejapómava? Avei nemanduʼákena Jehová neperdona jave odesidíma naimanduʼamoʼãveimaha la rejapo vaʼekuére, upévare núnka ndoipurumoʼãi ne kóntrape ne rembiapo vaikue. Jehová nopensavéima umi nde pekadokuérare ha upéicha avei nde rejapo vaʼerã (Sal. 130:3). Jagueroviáramo Jehová ñaneperdonáma hague, ikatúta ñande voi ñañeperdona ñandejupe ha jasegi adelánte.

16. ¿Mbaʼérepa ipeligróso jajesarekoiterei umi mbaʼe vai jajapo vaʼekuére yma? Emombeʼu peteĩ ehémplo. (Ehecha pe taʼanga).

¹⁶ Epensamína ko ehémplore. Peteĩ persóna omanehárõ ohóvo peteĩ áuto, katuete omaña mimíta ijespéhore oikuaa hag̃ua la oĩva hapykue gotyo. Péro ipeligrosoitereíta omañáramo tódo el tiémpo ijespéhore añónte. Omaneha hag̃ua segúro porã, pe persóna omaña vaʼerã kontinuadoite henonderãre. Péicha avei, iporã ningo sapyʼa pyʼánte ñanemanduʼa umi mbaʼe vai jajapo vaʼekuére ani hag̃ua jajapo la mísma kósa. Péro jajesarekoitereírõ umi mbaʼe jajavy vaʼekuére ikatu jaju ndajavyʼavéi ha nañameʼẽvéima Jehovápe la iporãvéva iservísiope. Upévare iñimportánte jajesareko la jarekóvare ñane renonderãme. Ñande ñaĩ hína pe tape ñandeguerahávape Ñandejára múndo pyahúpe, ha upépe ‘avave naimanduʼamoʼãvéima umi mbaʼe oiko vaʼekuére yma’ (Is. 65:17; Prov. 4:25).

SIÉMPREKENA EGUEROVIA JEHOVÁ NDERAYHU HA NEPERDONAHA

17. ¿Mbaʼérepa ñañehaʼãmbaite vaʼerã siémpre jaguerovia hag̃ua Jehová ñanderayhuha ha ñaneperdonaha?

¹⁷ Ñañehaʼãmbaitékena siémpre jaguerovia hag̃ua Jehová ñanderayhuha ha ñaneperdonaha (1 Juan 3:19). ¿Mbaʼérepa? Pórke Satanás osegíta oñehaʼãmbaite ogueroviaka ñandéve Jehová nañanderayhuiha ha núnka nañaneperdonamoʼãiha. Satanás ojapo upéva pórke oipotaiterei ñande jaheja Jehovápe, ha amedída ke hiʼag̃ui la fin ombaʼapo jejopyvétantema upearã, pórke oikuaa mbykypaitemaha pe tiémpo hembýva chupe (Apoc. 12:12). ¡Aníkena jaheja Satanás ogana!

18. ¿Mbaʼéichapa ikatu reĩ segúro Jehová nderayhuha ha neperdonaha?

¹⁸ Eguerovia hag̃ua nde pyʼaite guive Jehová nderayhuha, esegíkena umi konsého oĩva pe artíkulo ohasa vaʼekuépe. Ha ani hag̃ua reduda Jehová neperdonaha, epensa memékena la Jehová voi heʼívare ijehe. Ejepyʼamongetákena la haʼe heʼívare Iñeʼẽ rupive, nemanduʼákena avei haʼe ndahesarairiha nde neimperfektoha ha upévare ndeporiahuverekóta. Ha ani nderesarái Jehová neperdonambaitetaha. Rejapóramo péicha revyʼáta pórke reĩta segúro Jehová ndeporiahuverekoha, ha ikatúta ere rréi David heʼi haguéicha: “Nde Ñandejára, reperdona che rembiapo vai ha che pekádo” (Sal. 32:5).