‘Ehenói umi ansiánope’ eikotevẽ jave ajúda

1. ¿Mbaʼéichapa Jehová ohechauka ohayhuetereiha umi ovechápe?

JEHOVÁ ohayhueterei entéro isiervokuérape ha okuida hesekuéra peteĩ pastór okuidaháicha ijovecha mimíre. Jehová omeʼẽ vaʼekue Itaʼýra ohayhuetévape isiervokuéra rehehápe, ha omoĩ umi ansiánope okuida hag̃ua hesekuéra (Hech. 20:28). Ñandejára onombra vaʼekue Jesúspe omoakã hag̃ua pe kongregasión, haʼekuéra oipota umi ansiáno otrata porã umi ovecha mimíme. Upévare umi ansiáno osegi Jesús gía ha oipytyvõ umi ovechápe oreko hag̃ua peteĩ amista imbaretéva Jehová ndive (Is. 32:​1, 2).

2. Ohechaukaháicha Ezequiel 34:​15, 16, ¿mávapepa koʼýte Jehová oipytyvõse?

² Jehová oñeinteresa entéro ijovechakuérare, péro koʼýte umi ikangývare. Upévare Jehová ojevale umi ansiánore oipytyvõ hag̃ua umi isiervokuéra ndorekóivape hína peteĩ amista imbaretéva hendive (elee Ezequiel 34:​15, 16). Upéicharõ, ¿mbaʼépa jajapo vaʼerã ñaikotevẽ jave ajúda? Péicha jave Ñandejára oipota ñañemboʼe chupe ñande pyʼaite guive, péro avei oipota jajerure umi “pastór ha mboʼehára” kongregasionpeguápe tañanepytyvõ (Efes. 4:​11, 12).

3. ¿Mbaʼéichapa ko artíkulo ñanepytyvõta enterovépe?

³ Ko artíkulope jahecháta mbaʼéichapa Jehová ojevale umi ansiánore ñamombarete jey hag̃ua ñane amista Jehovándi. Upévare ñambohováita jahávo koʼã porandu: ¿Mbaʼéicha javépa jajerure vaʼerã umi ansiánope ajúda? ¿Mbaʼérepa jajapo vaʼerã upéva? ¿Ha mbaʼéichapa haʼekuéra ikatu ñanepytyvõ? Ikatu oime koʼág̃a ñane amista Jehovándi imbarete porã hína, upéicharõ jepe ko artíkulo ñanepytyvõta javalorave hag̃ua mbaʼéichapa Jehová ojevale umi ansiánore ñanepytyvõ hag̃ua. Avei jahecháta mbaʼépa jajapo vaʼerã amo gotyove ñaikotevẽ sapyʼárõ umi ansiánore.

¿MBAʼÉICHA JAVÉPA ‘ÑAHENÓI VAʼERÃ UMI ANSIÁNOPE’?

4. ¿Mbaʼe sentídopepa hasy pe persóna oñeñeʼẽvare Santiago 5:​14-16, 19, 20-pe? (Ehecha pe taʼanga).

⁴ Pe disípulo Santiago omombeʼu mbaʼéichapa Jehová ojevale umi ansiánore ñanepytyvõ hag̃ua. Santiago heʼi: “¿Oĩpa hasýva pende apytépe? Tohenói umi ansiáno kongregasionpeguápe” (elee Santiago 5:​14-16, 19, 20). Santiago oñeʼẽ peteĩ persóna hasývare. Péro, ¿mbaʼe sentídopepa la hasy? Santiago ohechauka upe persóna tekotevẽha omombarete jey iñamista Jehovándi. Por ehémplo heʼi pe persóna hasýva ohenói vaʼerãha umi ansiánope ha ndahaʼéi peteĩ doktórpe. Avei pe téxtope ojehechauka pe hasýva okuerataha oñeperdona vove chupe ipekadokuéra. Ñapensamína upe ehémplore: Peteĩ persóna okuera hag̃ua peteĩ mbaʼasýgui tekotevẽ oho oñeʼẽ peteĩ doktór ndive, omombeʼu chupe la oñandúva ha upéi ojapo vaʼerã pe doktór heʼíva chupe. Peichaite avei jajapo vaʼerã oimérõ tekotevẽ ñañemoag̃ui jey Jehováre. Ñañeʼẽ vaʼerã umi ansiánondi, ñamombeʼu chupekuéra la ñane provléma, ha upéi jasegi umi konsého haʼekuéra omeʼẽva ñandéve la Biblia rupive.

5. ¿Mbaʼéichapa ikatu jahechakuaa noiméipa ikangy ohóvo ñane amista Jehovándi?

⁵ Santiago kapítulo 5 ñanemokyreʼỹ ñañeʼẽ hag̃ua umi ansiánondi oimérõ jahechakuaa ikangyha ohóvo ñande jerovia. Péro natekotevẽi ñahaʼarõ oñembyai jepe ñane amista Ñandejárandi, síno oiko mboyve upéva ñañeʼẽma vaʼerã umi ansiánondi. La Biblia heʼi porã ñandéve ñañatende vaʼerãha, pórke ikatu ñañembotavy ñandejupe ha ñaimoʼã jarekoha peteĩ amista imbaretéva Jehovándi péro añetehápe ndahaʼéi hína upéicha (Sant. 1:22). Upéva oiko vaʼekue yma unos kuánto kristiáno oikóvare Sárdispe. Haʼekuéra opensa vaʼekue oĩ porã hague Ñandejárandi, péro Jesús heʼi umi kristiánope Jehová ndoguerohoryvéima hague chupekuéra (Apoc. 3:​1, 2). ¿Mbaʼéichapa ikatu japilla noiméipa ikangy hína ohóvo ñane amista Jehovándi? Por ehémplo ikatu ñapensa ñanekyreʼỹpa gueteri Jehová servísiope ñanekyreʼỹ haguéicha jajevautisárõ guare (Apoc. 2:​4, 5). Upévare ikatu eñeporandu: “¿Igústopa chéve alee la Biblia ha ajepyʼamongeta hese yma guaréicha? ¿Afaltápa aikóvo rreunionhápe ha vai vaíntema ajeprepara umi rreunionrã? ¿Asegípa gueteri chekyreʼỹ predikasiónpe? ¿Apensa memépa pe plátare ha umi diversiónre ha amotenonde umíva?”. La rekontesta lája koʼã porandu ikatu ohechauka ne amista Jehovándi ikangyha ohóvo, ha nderejapóirõ mbaʼeve ikatu hína ivaive ohóvo ne situasión. Tekotevẽterei ningo ñañeʼẽ umi ansianokuérandi oimérõ ndaikatúi ñasolusiona upe provléma ñandejehegui rei, térã oimérõ jajapóma raʼe álgo ivaíva Jehová renondépe.

6. ¿Mbaʼépa ojapo vaʼerã peteĩ ermáno opeka vaíramo?

⁶ Jaikuaa sapyʼánte oĩha umi oúva opeka vaieterei, ha noñarrepentíriramo ikatu hína oñenohẽ chupe kongregasióngui. Upévare peteĩ ermáno térã ermána opeka vaíva tekotevẽ oñeʼẽ peteĩ ansiánondi (1 Cor. 5:​11-13). Pe ermáno ndaikatumoʼãi ijehegui reínte oĩ porã jey Jehová renondépe, upévare tekotevẽmante oñepytyvõ chupe. Jehová operdonáta chupe sólamente ohechaukáramo “umi mbaʼe ojapóva rupive oñarrepentiha” (Hech. 26:20). ¿Mbaʼéichapa ikatu ohechauka oñarrepentiha? Peteĩva umi mbaʼe haʼe hína oñemoag̃ui umi ansiánore omombeʼu hag̃ua opeka vai hague.

7. ¿Mávapepa avei umi ansiáno oipytyvõ?

⁷ Umi ansiáno ndahaʼéi ku oipytyvõva umi opeka vai vaʼekuépente. Haʼekuéra avei oipytyvõ umi ikangývape ha oñandúvape ndaikatumoʼãiha ipuʼaka peteĩ deséo vaíre (Hech. 20:35). Upéva haʼéramo nde káso, koʼýte ijetuʼúne hína ndéve oimérõ yma restudia mboyve la Biblia reipuru rakaʼe dróga, rehecha pornografía térã nderekovai. Péro nereiméi hína neaño. Ikatu ningo reñeʼẽ peteĩ ansiáno reñeñandu porãvévandi ha reikuaáva nerendutaha. Haʼe katuete omeʼẽta ndéve konsého iporãva, ha oaseguráta ndéve Jehová ndeguerohorytaha resegíramo relucha neñeʼẽrendu hag̃ua chupe (Ecl. 4:12). Ikatu oime reñedesanima resegi haguére relucha umi deséo vai kóntrape. Péicha jave umi ansiáno nemomanduʼáta Jehová ovyʼaitereiha rejerure haguére ajúda, pórke upéva ohechauka nderejeroviaiha ndejehe ha iñimportantetereiha ndéve g̃uarã ne amista Jehovándi (1 Cor. 10:12).

8. ¿Mbaʼéicha javépa natekotevẽi katuete ñañeʼẽ umi ansianokuérandi?

⁸ Natekotevẽi ningo jaha umi ansiáno rendápe káda ke jajavy peteĩ mbaʼépe. Por ehémplo, ikatu oime jatrata vai raʼe peteĩ ermáno térã ermánape ha ñandepochyete voi hendive. Oimérõ oiko upéva, jaha rangue peteĩ ansiáno rendápe ikatu jasegi Jesús konsého ha ñañeʼẽ pe ermáno térã ermánandi jaiko porã jey hag̃ua hendive (Mat. 5:​23, 24). Avei ikatu jaheka informasión ñane puvlikasionkuérape ohechaukáva mbaʼéichapa ikatu ñandepyʼaguapy, ñanepasiensiave ha jajejokokuaa. Péro oimérõ ndaikatúi gueteri ñasolusiona upe provléma, ikatu jajerure ajúda peteĩ ansiánope. Por ehémplo yma Evodia ha Síntique ndaikatúi vaʼekue osolusiona peteĩ provléma oreko vaʼekue oñondive. Upévare apóstol Pablo oskrivírõ guare ikárta umi filipénsespe, ojerure vaʼekue peteĩ ermáno upe kongregasionpeguápe oipytyvõ hag̃ua koʼã ermánape. Péicha avei ikatu hína ñanepytyvõ peteĩ ansiáno ñane kongregasionpegua (Filip. 4:​2, 3).

¿MBAʼÉREPA ‘ÑAHENÓI VAʼERÃ UMI ANSIÁNOPE’?

9. ¿Mbaʼérepa nañatĩri vaʼerã ñañeʼẽ hag̃ua umi ansiánondi? (Proverbios 28:13).

⁹ Jaikuaa ñaikotevẽha Jehová ajúda oimérõ ñañandu ndaikatumoʼãveimaha ñandepuʼaka peteĩ deséo vai kóntrape, térã oimérõ japeka vaíma voi raʼe. Péro ikatu hína ñatĩ ñañeʼẽ hag̃ua umi ansiánondi, péicha jave tekotevẽmante ñandejerovia mbarete ha ñandepyʼaguasu jajapo hag̃ua upéva. ¿Mbaʼérepa tekotevẽ ‘ñahenói umi ansiánope’? Pórke Jehová ojevale umi ansianokuérare ikatu hag̃uáicha jareko peteĩ amista imbaretéva hendive. Upévare ñañeʼẽ jave hendivekuéra jahechauka jajeroviaha Jehováre ha ñaneñeʼẽrenduha chupe. Péicha ojekuaa ñakonfiaha Jehová ñanepytyvõtaha ñandepuʼaka hag̃ua umi deséo vaíre (Sal. 94:18). Oimérõ japeka raʼe, ikatu ñaĩ segúro Jehová ñandeporiahuverekotaha ñamombeʼúramo la jajapo vaʼekue ha jahejáramo ñanerembiapo vaikue (elee Proverbios 28:13).

10. ¿Mbaʼépa ikatu oiko ñañomíramo ñanerembiapo vaikue?

¹⁰ Tuichaiterei ñañevenefisiáta jajeruréramo ajúda umi ansiánope. Péro oiméramo ñañehaʼã ñañomi ñanerembiapo vaikue, ikatu hína ñambyaive ñane situasión. Por ehémplo rréi David opeka rire, un tiémpore nomombeʼúi vaʼekue la ojapóva. Upéicha rupi haʼe oñeñandu vaieterei ha ombohasyete voi chupe upéva, pórke oikuaa ombyai hague iñamista Jehovándi (Sal. 32:​3-5). Ñapensamíntena: Jarekóramo peteĩ mbaʼasy térã ñañelastima ha ñahaʼarõiterei jatrata hag̃ua upéva, ivaivéta la ñane situasión. Péicha avei oimérõ japeka raʼe, nañañeʼẽiramo ensegída umi ansiánondi jasufrivéta hína upéi. Jehová ningo ndoipotái upéva oiko ñanderehe. Upévare ñanemokyreʼỹ ñañeʼẽ hag̃ua umi ansiánondi, pórke haʼe ojevaléta hesekuéra ikatu hag̃uáicha ñande ‘jaiko porã jey hendive’ (Is. 1:​5, 6, 18).

11. ¿Mbaʼépa ikatu oiko ñamokañýramo umi pekádo vai?

¹¹ Ñamokañýramo ñanerembiapo vaikue ikatu hína japerhudika ótrope. Ñande káusare pe espíritu sánto ikatu hína ombaʼapo asy kongregasiónpe ha avei ikatu ndaiporivéi pyʼaguapy ermanokuéra apytépe (Efes. 4:30). Péicha avei jaikuaáramo oĩha peteĩ ermáno térã ermána opeka vai vaʼekue, jaʼe vaʼerã chupe oho hag̃ua oñeʼẽ ansianokuérandi pórke ñamokañýramo ipekádo ñande kulpávleta avei (Lev. 5:1).a Ñande jahayhueterei Jehovápe ha upéva ñanemomýi ñamombeʼu hag̃ua oimérõ oĩ raʼe opeka vaíva. Jajapóramo péicha, pe kongregasión osegíta ipotĩ ha avei ñaipytyvõta pe opeka vaʼekuépe oĩ porã jey hag̃ua Jehovándi.

¿MBAʼÉICHAPA IKATU ÑANEPYTYVÕ UMI ANSIÁNO?

12. ¿Mbaʼéichapa umi ansiáno oipytyvõ umi ikangývape?

¹² La Biblia heʼi umi ansiánope oipytyvõ hag̃ua umi ikangývape ha umi tekotevẽvape omombarete jey iñamista Jehovándi (1 Tes. 5:14). Oimérõ repeka raʼe, umi ansiáno ikatu hína ojapo ndéve unas kuánta pregúnta ikatu hag̃uáicha ontende la repensáva ha reñandúva (Prov. 20:5). Ikatu oime ndahaʼéi la ifasilpáva ndéve reñeʼẽ umi ansiánondi, pórke ikatu reikohápe la hénte ndojepokuaái omombeʼupaite la oñandúva, ikatu nde lája voi péicha térã retĩ la rejapo vaʼekuére. Péro tuicha reipytyvõta umi ansiánope reñehaʼãramo emombeʼu la oĩva nde pyʼapýpe. Ani rekyhyje eréramo g̃uarã peteĩ mbaʼe ‘epensa porãʼỹre’ (Job 6:3). Umi ansiáno ningo ndoikomoʼãi ojapura ndehusga hag̃ua umi mbaʼe erévare. Upéva rangue haʼekuéra nerendu porãta oikuaa porã hag̃ua mbaʼépa la oiko vaʼekue omeʼẽ mboyve ndéve peteĩ konsého oĩva la Bíbliape (Prov. 18:13). Umi ansiáno oikuaa orahanteha voi tiémpo oñeñatende porã hag̃ua Jehová ovechakuérare, upévare ontende oĩha provléma noñesolusionamoʼãiva una vénte peñeʼẽ haguére.

13. ¿Mbaʼépa avei ojapóta umi ansiáno ñanepytyvõ hag̃ua? (Ehecha pe taʼanga).

¹³ Umi ansiáno ndoikomoʼãi nemoñeñandu vaive la rejapo vaʼekuére, upéva rangue haʼekuéra oñemboʼéta nderehehápe. Tuicha ningo ikatu reñesorprende rehechávo mbaʼeichaitépa umi ansiáno “ñemboʼe oreko podér ha imbareteterei”. La Biblia heʼi avei umi ansiáno ‘omonataha nderehe aséite Jehová rérape’ (Sant. 5:14-16). Upe “aséite” haʼe hína pe añetegua oĩva Ñandejára Ñeʼẽme. Umi ansiáno oipuru porãta la Biblia nembopyʼaguapy, nekonsola ha ereko jey hag̃ua peteĩ amista imbaretéva Jehová ndive (Is. 57:18). Umi konsého haʼekuéra omeʼẽva ndéve la Biblia rupive nemombaretéta resegi hag̃ua rejapo iporãva. Umi ansiáno rupive haʼete voi Jehová heʼíva ndéve: “Kóva hína pe tape iporãva, eho koʼárupi” (Is. 30:21).

14. ¿Mbaʼéichapa umi ansiáno oipytyvõ peteĩ ermáno ‘ohóvape tape vaíre’? (Ehecha pe taʼanga).

¹⁴ (Elee Gálatas 6:1). Peteĩ kristiáno “ohóramo tape vaíre” ndojapói hína umi mbaʼe ogustáva Ñandejárape, ikatu oime odesidi vai raʼe peteĩ mbaʼe térã opeka voi raʼe. Umi ansiáno ohayhu rupi upe ermánope oñehaʼãta ‘ogueru jey chupe tape porãme’, ha ojapóta upéva “pyʼaguapýpe porãnte”. Pe palávra griega ojetradusíva “pegueru jey” ikatu ojepuru avei ojeʼe hag̃ua oñemoĩ jeyha hendápe peteĩ ñane kangue opẽ vaʼekue ikatu hag̃uáicha okuera porã. Jaikuaa ningo peteĩ doktór ivaléva oñehaʼãtaha ani hag̃ua hasyeterei ñandéve omoĩ porã jave ñane kangue. Péicha avei umi ansiáno okorrehi jave peteĩ ohóvape tape vaíre, oñehaʼã ani hag̃ua omoñeñandu vaive upe ermánope. La Biblia heʼi avei umi ansiánope omeʼẽ jave konsého ‘oñatende vaʼerãha ijehe’ avei. Upéva heʼise haʼekuéra siémpre imanduʼataha iñimperfektoha ha ikatunteha avei ojavy. Upévare umi ansiáno nopensái ihustoveha pe ermáno ojavy vaʼekuégui, síno oñehaʼã iñumílde ha oporoporiahuvereko (1 Ped. 3:8).

15. ¿Mbaʼépa jajapo vaʼerã oimérõ ñambohovái hína peteĩ provléma?

¹⁵ Ñande ikatu jajerovia umi ansiáno ñane kongregasionpeguáre, Jehová omboʼéma chupekuéra ndoikói vaʼerãha omombeʼu upérupi la jaʼéva chupekuéra. Heʼi rangue la opensávante hikuái, umi ansiáno oaprendéma mbaʼéichapa omeʼẽ vaʼerã konsého oĩva la Bíbliape. Avei umi ansiáno oikuaa osegi vaʼerãha ñanepytyvõ jagueraha hag̃ua ñande kárga pohýi (Prov. 11:13; Gál. 6:2). Jaikuaa umi ansiáno lája idiferenteha ojuehegui ha ikatuha oĩ umi iñexperiensiavéva. Péro ñaneprovléma sapyʼárõ, ndajadudái vaʼerã ñañemboja hag̃ua oimeraẽ ansiánore. Ñanemanduʼa vaʼerã ndajahamoʼãiha jajerure konsého káda únope oĩ peve peteĩva ijapyteguikuéra heʼíva ñandéve la ñahenduséva. Jajapóramo upéva jajoguáta umi hénte oipotávape ‘oñembojuruheʼẽnte chupekuéra’ oaprende rangue “umi enseñánsa porã” oĩva Ñandejára Ñeʼẽme (2 Tim. 4:3). Ñamombeʼu jave ñane provléma peteĩ ansiánope, haʼe ikatu oporandu ñandéve ñañeʼẽmapa raʼe umi ótro ansiánondi ha oimérõ upéicha, mbaʼe konséhopa omeʼẽ raʼe ñandéve hikuái. Upe ansiáno iñumílde rupi ikatu hína oho ojerure ótro ansiánope oipytyvõ hag̃ua chupe (Prov. 13:10).

¿MBAʼE RRESPONSAVILIDÁPA JAREKO KÁDA UNO?

16. ¿Mbaʼe rresponsavilidápa jareko káda uno?

¹⁶ Umi ansiáno oñangareko porã ñanderehe ha omeʼẽ ñandéve konsého, péro haʼekuéra ndeʼíri ñandéve mbaʼépa jajapo vaʼerã. Umi mbaʼe jajapóva ha jaʼéva rupive káda uno jahechauka vaʼerã Jehovápe jahayhuha chupe ha jaipotaha haʼe ñandeguerohory. Jehová ningo ñanepytyvõta jadesidi porã hag̃ua ha jasegi hag̃ua ñandefiél chupe (Rom. 14:12). Upévare umi ansiáno nomandái ñandéve mbaʼépa jajapo vaʼerã. Síno oipuru hikuái la Biblia ha ñanepytyvõ ñantende hag̃ua mbaʼépa Jehová opensa peteĩ mbaʼére, ha upéi umi ansiáno oheja ñandete jadesidi la jajapótava. Jasegíramo umi konsého haʼekuéra omeʼẽva ñandéve la Biblia rupive, ñaaprendéta ‘jaipuru ñane akã’ jadesidi porã hag̃ua (Heb. 5:14).

17. ¿Mbaʼépa jajedesidi vaʼerã jajapo?

¹⁷ Ajépa javyʼaite Jehová oñangareko porã haguére ñanderehe peteĩ pastór okuidaháicha ijovechamíre. Jehová ombou vaʼekue Jesúspe haʼéva hína “pe pastór imbaʼeporãva” omeʼẽ hag̃ua hekove ñanderehehápe ikatu hag̃uáicha jaiko pára siémpre (Juan 10:11). Avei Jehová omoĩ umi ansiánope oñangareko hag̃ua kongregasiónre, pórke haʼe voi opromete vaʼekue: “Che ameʼẽta peẽme pastór oikótava che aipotaháicha, ha haʼekuéra iñarandu ha imbaʼerechakuaáta oñatendévo penderehe” (Jer. 3:15). Upévare aníkena jakyhyje ‘ñahenói hag̃ua umi ansiánope’ oimérõ jahechakuaa ñandejerovia ikangyha ohóvo, térã tekotevẽrõ jajapo álgo ñaĩ porã jey hag̃ua Jehovándi. Umi ansiáno ningo haʼe peteĩ rregálo Jehová omeʼẽva kongregasiónpe, upévare jajedesidíkena jaaprovecha porãtaha upe rregálo.