¿Mbaʼépa jajapo vaʼerã jahecha jave umi inhustísia?

1, 2. ¿Mbaʼépa ojapo jepi heta hénte ohecha jave umi inhustísia, ha mbaʼépa ikatu ñañeporandu?

KO MÚNDOPE ningo oĩ hetaiterei inhustísia. Por ehémplo heta persónape ojetrata vai imboriahu haguére, onase haguérente peteĩ lugárpe, ipíntare térã hetave mbaʼére. Avei umi governánte ha empresário plátante voi oipota ha upévare odesidi hikuái umi mbaʼe operhudikáva ko ñande yvy térã umi persónape. Koʼã inhustísia oikóva ñanderupyty enterovépe, sapyʼánte oiko voi ñanderehe térã jahecha oikoha ótrore.

² Enterovévante jaipota umi hénte ñandetrata porã ha jaikose peteĩ múndo oĩháme pyʼaguapy. Upévare la hetaiterei persóna ipochy ohechávo oĩha inhustísia térã ojetrata vaiha ótrope. Upéicha rupi heta persóna oñehaʼã osolusiona umi provléma oĩva ko múndope térã ipaíspe, upearã haʼekuéra ojapo umi protésta pe goviérno térã umi léi kóntrape, algúno avei oapoja umi polítiko oprometévape osolusionataha umi provléma. Péro entéro kristiáno jaikuaa ndajaikói vaʼerã “umi hénte ko mundopegua oikoháicha” ha ñahaʼarõ vaʼerãha Ñandejára Rréino oipeʼaite umi inhustísia (Juan 17:16). Upéicharõ jepe lomímonte ikatu ñambyasy térã ñandepochy voi jahecha jave ojetrataha ótrope inhústamente. Upévare ikatu ñañeporandu: “¿Mbaʼéichapa arreaksiona vaʼerã ahecha jave umi inhustísia? ¿Oĩ piko álgo ikatúva ajapo koʼág̃ama voi?”. Ko artíkulope ñambohováita koʼã porandu, péro primero ñaanalisáta mbaʼéichapa Jehová ha Jesús oñeñandu ohecha jave umi inhustísia.

JEHOVÁ HA JESÚS ARAKAʼEVE NAIÑINHÚSTOIVA

3. ¿Mbaʼérepa jaʼekuaa ñañeñandu vaitanteha voi jahecha jave umi inhustísia? (Isaías 5:7).

³ La Biblia rupive ñantende porã mbaʼérepa ñañeñandu vai jahecha jave umi inhustísia. Upépe oñemyesakã Jehová ñandeapo hague ijoguaháramo, ha Jehová ningo “oipotaiterei ojehusga porã ha oĩ hustísia” (Sal. 33:5; Gén. 1:26). Jehová núnka naiñinhústoiva avavéndi, upévare ndoipotái ojetrata vai ótrope (Deut. 32:​3, 4; Miq. 6:8; Zac. 7:9). Por ehémplo proféta Isaías tiémpope heta israelita otrata vai vaʼekue hapicha israelítape jeýnte ha Jehová ohendu vaʼekue ‘ojerurérõ guare sokórro umi ohasa asýva’ (elee Isaías 5:7). ¿Mbaʼépa ojapo raʼe Jehová? Haʼe okastiga umi osegívape naiñeʼẽrendúi pe léi heʼívape ha umi otrata vaívape ótrope (Is. 5:​5, 13).

4. ¿Mbaʼéichapa Jesús oñeñandu vaʼekue ohechárõ guare umi líder rrelihióso ipyʼahatãha, ha mbaʼépa ñanemboʼe upéva? (Ehecha pe taʼanga).

⁴ Jesús ningo ojoguaiterei avei Itúape. Haʼe oipotaiterei ojejapo hustísia ha ndohechaseiete voi ojejapóvo inhustísia. ¿Mbaʼérepa jaʼekuaa Jesús upeichaha? Peteĩ vuéltape Jesús ohecha kuri peteĩ kuimbaʼe hasývape, haʼe ningo un ládo ipo ndaikatúi kuri omonguʼe. Upévare Jesús ombyasyeterei pe kuimbaʼépe ha omonguera chupe. Péro umi líder rrelihióso ohechárõ guare upéva ipochyeterei. Haʼekuéra heʼi Jesús ndorrespetái hague pe léi del sábado. Umi líder rrelihióso ndojepyʼapýi pe kuimbaʼe ohasa asývare, upéva rangue chupekuéra g̃uarã iñimportanteve kuri oñekumpli pe léi haʼekuéra ontendeháicha. ¿Mbaʼéichapa Jesús oñeñandu vaʼekue ohechárõ guare upéva? Haʼe ‘ombyasyeterei umi líder rrelihióso peichaite peve ipyʼahatã haguére’ (Mar. 3:​1-6).

5. ¿Mbaʼérepa ndovaléi jasegi ñandepochy oiko jave peteĩ inhustísia?

⁵ Jehová ha Jesús ningo ipochyeterei ohecha jave ojetrata vaiha umi héntepe, upévare jaʼekuaa ndaivairiha ñañeñandu haʼekuéraicha jahecha jave umi inhustísia (Efes. 4:26). Péro ñandepochýramo jepe, ndajahejái vaʼerã upéva ñanedomina pórke amo ipahápe péicha ndaikatumoʼãi ñasolusiona mbaʼeve. Avei ñanemanduʼa vaʼerã jasegírõnte ñandepochy ikatuha voi ñanderasy ha ñañedeprimi (Sal. 37:​1, 8; Sant. 1:20). Upévare ñahesaʼỹijomína Jesús ehémplo jahecha hag̃ua mbaʼépa jajapo vaʼerã jahecha jave umi inhustísia.

¿MBAʼÉPA JESÚS OJAPO VAʼEKUE OHECHÁRÕ GUARE OIKOHA INHUSTÍSIA?

6. ¿Mbaʼeichagua inhustísiapa Jesús ohecha vaʼekue oĩrõ guare ko yvy ape ári? (Ehecha pe taʼanga).

⁶ Jesús oĩrõ guare ko yvy ape ári ohecha vaʼekue oĩha hetaiterei inhustísia. Por ehémplo haʼe oikuaa kuri umi líder rrelihióso omoĩha hetaiterei léi umi héntepe ha upéva peteĩ kárga pohýi chupekuéra g̃uarã (Mat. 23:​2-4). Avei Jesús ohecha vaʼekue mbaʼéichapa umi governánte rrománo otrata vaieterei umi héntepe. Upévare heta judío ojeise vaʼekue Roma poguýgui, upearã algúno judío oforma umi grúpo oñorairõ hag̃ua Roma kóntrape. Koʼã grúpo ningo okambiase pe goviérno, péro Jesús ndoikéi vaʼekue ni peteĩva koʼã grúpope. Avei oikuaárõ guare umi hénte omoĩseha chupe rréiramo haʼe ojei chuguikuéra ha oho ótro ládo (Juan 6:15).

7, 8. ¿Mbaʼérepa Jesús oĩrõ guare ko yvy ape ári noñehaʼãi vaʼekue osolusiona umi inhustísia? (Juan 18:36).

⁷ Jesús oĩrõ guare ko yvy ape ári noñentremetéi vaʼekue polítikare oñehaʼã hag̃ua osolusiona umi inhustísia. ¿Mbaʼérepa ndojapói raʼe upéva? Pórke haʼe oikuaa la umáno ndorekoiha derécho ogovernávo ha ndaikatumoʼãiha voi ojapo porã upéva (Sal. 146:3; Jer. 10:23). Jareko vaʼerã enkuénta oĩha inhustísia ñane imperfeksión káusare ha Satanás káusare, upévare yvypóra ndaikatumoʼãi voínte ijehegui rei osolusiona umi inhustísia. Jaikuaaháicha Satanás la ogovernáva ko múndo ha haʼe iñañaiterei, upévare umi persóna oĩva ipoguýpe ojoguaiterei chupe (Juan 8:44; Efes. 2:2). Avei pe imperfeksión káusare, ni umi persóna ivuenovéva jepe ndaikatúi osolusiona umi provléma, pórke sapyʼánte haʼekuéra ojapónte avei umi mbaʼe ivaíva (Ecl. 7:20).

⁸ Jesús oikuaa vaʼekue mbaʼérepa oĩ umi inhustísia ha oikuaa vaʼekue Ñandejára Rréino añoite osolusionataha umi mbaʼe. Upévare haʼe oipuru vaʼekue itiémpo ha imbaretekue ‘opredika ha oikuaauka hag̃ua umi notísia porã oñeʼẽva Ñandejára Rréinore’ (Luc. 8:1). Jesús tiémpope ningo oĩ vaʼekue umi hénte “oipotaitereíva oĩ hustísia” ha Jesús opromete vaʼekue chupekuéra koʼẽrõitéma opataha opaichagua mbaʼe vai ha inhustísia (Mat. 5:6 ha nóta de estúdio oĩva Traducción del Nuevo Mundo españólpe; Luc. 18:​7, 8). Ni peteĩ goviérno umáno ningo ndaikatumoʼãi ojapo koʼãichagua kámbio, Ñandejára Rréino añoite la ikatútava ojapo koʼã mbaʼe ha upe Rréino ndahaʼéi ko mundopegua (elee Juan 18:36).

JASEGÍKENA JESÚS EHÉMPLO OIKO JAVE UMI INHUSTÍSIA

9. ¿Mbaʼérepa reĩ segúro Ñandejára Rréino añoite ikatutaha osolusionaite umi inhustísia?

⁹ Jaiko rupi umi ára pahápe jahecha hetaiteve inhustísia la Jesús ohecha vaʼekuégui oĩrõ guare ko yvy ape ári, péro oĩ peteĩ mbaʼe nokambiáiva. Koʼag̃aite peve Satanás ha umi hénte aña káusare la osegi oĩ heta sufrimiénto (2 Tim. 3:​1-5, 13; Apoc. 12:12). Péro ñande jasegi Jesús ehémplo ha jaikuaa Ñandejára Rréino añoite ikatutaha ohundi Satanáspe ha upéicha opaitéta pe inhustísia. Ñande ningo jaapoja Ñandejára Rréino añoite, upévare ndajaikói japartisipa umi protésta, márcha térã oimeraẽ mbaʼe oñeorganisávape oñesolusiona hag̃ua umi inhustísia. Jahechamína la ohasa vaʼekue peteĩ ermána hérava Stacy.a Oiko mboyve chugui Testígo haʼe oho meme vaʼekue opartisipa umi manifestasión ojejapóvape kállere, péro upéi oñepyrũ vaʼekue opensa ovalépa la péna la haʼe ojapóva. Haʼe heʼi: “Aha jave umi manifestasiónpe añeporandu vaʼekue: ‘¿Sera piko añete la aipytyvõ oñesolusiona hag̃ua umi provléma?’. Koʼág̃a ningo che aapojáma Ñandejára Rréino ha ndadudái upe Rréino añoite ikatutaha osolusiona umi provléma. Che aikuaa porã Jehová odefendetaha entéro umi osufrívape ha upéva ningo che ndaikatumoʼãi voi kuri ajapo” (Sal. 72:​1, 4).

10. Ohechaukaháicha Mateo 5:​43-48, ¿mbaʼérepa ñande nañamoirũi umi hénte oñehaʼãvape okambia umi goviérnope? (Ehecha pe taʼanga).

¹⁰ Koʼág̃arupi oĩ heta hénte oñomoirũva ojerure hag̃ua umi goviérnope okambia hag̃ua ojapo lája heta mbaʼe. Péro koʼãichagua hénte ningo normálmente ipochy, nopenái umi léire ha operhudika ótrope. Upéva ningo ndahaʼéi la Jesús ñanemboʼe vaʼekue jajapo hag̃ua (Efes. 4:31). Peteĩ ermáno hérava Jeffrey heʼi: “Sapyʼánte ningo trankílonte oñepyrũ umi manifestasión, péro upéi sapyʼaitépe oĩma ivioléntova, oporomondáva ha ojapóva sarambi”. Ñande jaikuaa porã Jesús heʼi hague jatrata vaʼerãha enterovévape mborayhúpe, umíva apytépe umi nopensáivape ñandéicha ha umi ñandepersegívape (elee Mateo 5:​43-48). Upévare entéro kristiáno oñehaʼãmbaite osegi Jesús ehémplo ha ojapo la haʼe omboʼe vaʼekue.

11. ¿Mbaʼérepa sapyʼánte ikatu ijetuʼu ñandéve jasegi Jesús ehémplo?

¹¹ Jaikuaa porã ningo Ñandejára Rréino añoite ikatutaha osolusiona umi inhustísia pára siémpre. Upéicharõ jepe ikatu ijetuʼu ñandéve jasegi Jesús ehémplo oĩ jave ñandetrata vaíva. Upéicha ningo oñeñandu vaʼekue peteĩ ermána hérava Janiya, chupe ningo ojeapoʼi vaʼekue ipire kolór rehe. Pe ermána heʼi: “Umi mbaʼe la hénte heʼi vaʼekue chéve ningo chemoñeñandu vaieterei, upévare chepochy ha aipota voi ojekastiga chupekuéra. Oĩ vaʼekue peteĩ grúpo oprotestáva ani hag̃ua ojeapoʼi la héntepe ipire kolór rehe térã oimeraẽ mbaʼére. Che apensa vaʼekue aapojávo upe grúpo ha aimoʼã vaʼekue upéva chemoñeñandu porãvetaha”. Tiémpo rire pe ermána ohechakuaa vaʼekue tekotevẽha okambia unas kuánta kósape. Haʼe heʼi: “Ahechakuaa aiko rangue ajerovia Jehováre, añepyrũ hague ajerovia la hénte heʼívare ha akonfia haʼekuéra osolusionataha umi provléma. Upévare ajedesidiete vaʼekue ndajeheʼamoʼãveimaha umichagua grúpore”. Jahechaháicha, ikatu ningo ñandepochy oĩ jave ñandetrata vaíva térã otrata vaíva ótrope, péro ndajahejái vaʼerã la ñañandúva ñanedomina. Upéicharõ añoite ndajaikomoʼãi ñañentremete polítikare ni ndajaikomoʼãi umi hénte ko mundopegua oikoháicha (Juan 15:19).

12. ¿Mbaʼérepa tekotevẽ ñañatende mbaʼe notísiapa jalee térã ñahendu?

¹² ¿Mbaʼépa ñanepytyvõta ñandepyʼaguapy hag̃ua jahecháramo jepe peteĩ inhustísia? Por ehémplo ikatu ñañatende mbaʼépa jalee, ñahendu térã jahecha. Umi rred sosiálpe osẽ jepi umi notísia ojepreparáva voi omondýi hag̃uáicha la héntepe ha oheja vai hag̃ua pe goviérnope. Pyʼỹinte umi omombeʼúva umi notísia heʼi la opensáva ha nomombeʼúi la añetehápe oiko vaʼekue. Péro ñamoĩ chupe siertoha la oñemombeʼúva, ¿mbaʼépe piko ñanepytyvõta jasegíramo ñapensa tódo el día umi inhustísia oikóvare? Jahasaitereíramo tiémpo jaleévo, ñahendúvo térã jahechávo umichagua notísia, ikatu jaju ñarrenegaiterei ha ñañedesanima (Prov. 24:10). Ivaiveha katu kon el tiémpo ikatu hína ñanderesarái Ñandejára Rréino añoite osolusionataha entéro umi inhustísia.

13. ¿Mbaʼéichapa ñanepytyvõta jaleéramo la Biblia káda día?

¹³ ¿Mbaʼépa avei ñanepytyvõta oiko jave peteĩ inhustísia? Tuicha ideprovéchota ñandéve jaleéramo la Biblia káda día ha jajepyʼamongetáramo hese. Peteĩ ermána hérava Alia ohecha vaʼekue pe haʼe oikohápe mbaʼéichapa oñemaltrata algúnope. Upéva omorrenegaiterei chupe pórke hiʼarive ndojekastigái umi ojapóvape umi mbaʼe vai. Pe ermána heʼi: “Ahechakuaa vaʼekue akambia vaʼerãha la apensa lája arovia añetéramo Jehová osolusionataha entéro umi provléma. Upe tiémpope kavalete alee Job 34:​22-29, umi versíkulo chemomanduʼa mbaʼevete nokañyiha Jehovágui, haʼe añoite oikuaa mbaʼéichapa ohusga vaʼerã umi héntepe ha haʼe añoite la osolusionátava entéro umi inhustísia”. Péro ñahaʼarõ aja Ñandejára Rréino oipeʼaite entéro umi inhustísia, ¿mbaʼépa ikatu jajapo koʼág̃ama voi?

¿MBAʼÉPA IKATU JAJAPO KOʼÁG̃A?

14. ¿Mbaʼépa ikatu jajapo koʼág̃ama voi? (Colosenses 3:​10, 11).

¹⁴ Ñande ningo ndaikatúi jajoko umi hénte ojapóvape inhustísia, péro si ikatu ñañehaʼã jatrata porã enterovépe. Jahecháma haguéicha ko artíkulope, ñande ñañehaʼã jasegi Jesús ehémplo ha japorohayhu, upévare jatrata porã enterovépe, umi ojapóvape jepe inhustísia (Mat. 7:12; Rom. 12:17). Jehová ovyʼaiterei ñanembaʼeporã ha ñandehústo jave enterovéndi (elee Colosenses 3:​10, 11).

15. ¿Mbaʼépa ojehupytýta ñamombeʼúramo umi enseñánsa oĩva la Bíbliape?

¹⁵ ¿Mbaʼépa hína pe iñimportantevéva ikatúva jajapo jalucha hag̃ua umi inhustísia kóntrape? Upéva hína ñamombeʼu umi enseñánsa oĩva la Bíbliape. ¿Mbaʼérepa jaʼe upéva iñimportantetereiha? Pórke umi hénte orekóramo ‘Jehová konosimiénto’, ikatu tuichaiterei okambia. Upéicha rupi peteĩ persóna ivioléntova ha oñorairõsénteva voi, upéi ikatu ou imbaʼeporã ha oiko pyʼaguapýpe hapichándi (Is. 11:​6, 7, 9). Jahechamína Amín káso. Ostudia mboyve la Biblia haʼe oike peteĩ grúpo oñemoĩ mbaretévape peteĩ goviérno kóntrape, pórke chupe g̃uarã pe goviérno ojopyetereíma la héntendi. Amín heʼi: “Ndaikatúi ningo ñakambia la héntepe mbaretépe, péro ikatu okambia hikuái oaprendéramo la Biblia heʼíva. Péicha rupínte ningo che akambia vaʼekue”. Amín oaprendérõ guare umi enseñánsa oĩva la Bíbliape ndoikosevéima kuri oñorairõ. Upéicharõ, amáske oĩve umi hénte oaprendéva la Biblia heʼíva ha okambiáva, saʼive oĩta umi hénte ojapóva inhustísia ko múndope.

16. ¿Mbaʼérepa remombeʼuse la héntepe la ojapótava Ñandejára Rréino?

¹⁶ Jesús ojapo haguéicha, ñande avei ñamombeʼuse la héntepe Ñandejára Rréino añoite osolusionataha pára siémpre umi inhustísia. Upe esperánsa ikatu okonsola umi hénte oñemaltrata vaʼekuépe (Jer. 29:11). Stacy, pe ermána ñañeʼẽ vaʼekuére párrafo 9-pe heʼi: “Aaprende rupi mbaʼépa ojapóta Ñandejára, ikatu chepyʼaguapy ojejapóramo jepe cherehe peteĩ inhustísia térã ahechárõ jepe ojetrata vaiha ótrope. Jehová ningo ñanekonsola la Biblia rupive”. Tekotevẽ jajeprepara porã ñakonsola hag̃ua la héntepe la Biblia rupive. Ñande voi jaikuaa porãramo la Biblia heʼíva umi inhustísiare ñaĩvéta segúro la Biblia omboʼévagui. Péicha avei ifasilvéta ñañeʼẽ hag̃ua pyʼaguapýpe porãnte koʼã témare eskuéla, koléhiope térã ñande travahohápe.b

17. ¿Mbaʼéichapa Jehová koʼág̃a ñanepytyvõ ñaaguanta hag̃ua umi inhustísia?

¹⁷ Jaikuaa Satanás haʼeha ‘ko múndo ruvicha’ ha upévare osegíta gueteri oiko umi inhustísia. Péro nañaiméi esperansaʼỹre, Jehová oprometéma ñanepytyvõtaha koʼág̃a ha koʼẽrõitéma ‘omosẽtaha’ Satanáspe (Juan 12:31). La Biblia rupive Jehová oikuaauka ñandéve mbaʼérepa oĩ umi inhustísia ha mbaʼéichapa haʼe oñeñandu jahasa asy jave umíva káusare (Sal. 34:​17-19). Itaʼýra ehémplo rupive ñaaprende mbaʼépa jajapo vaʼerã oiko jave peteĩ inhustísia. Ha koʼẽrõitéma Ñandejára Rréino oipeʼaitéta umi inhustísia ha núnka ndaiporimoʼãvéima avave ohasa asýva (2 Ped. 3:13). Jasegíkena kyreʼỹme japredika umi notísia porã oñeʼẽva Ñandejára Rréinore ha vyʼápe jasegi ñahaʼarõ pe tiémpo ko yvy henyhẽ vove ‘tekojoja ha hustísiagui’ (Is. 9:7).