Ñanemanduʼákena ñañemboʼe hag̃ua ótro rehehápe

1. ¿Mbaʼérepa jaʼekuaa Jehovápe g̃uarã iñimportanteha ñane ñemboʼe?

PE ÑEMBOʼE ningo peteĩ rregálo iporãitereíva Jehová omeʼẽva ñandéve. Epensamíntena ko mbaʼére: Jehová onkarga umi ánhelpe heta traváho (Sal. 91:11). Avei Itaʼýrape omeʼẽ umi asignasión iñimportánteva (Mat. 28:18). ¿Péro oasignápa raʼe Jehová álgienpe ohendu hag̃ua ñañemboʼe jave chupe? Nahániri, Jehová voi ningo la ohenduséva ñane ñemboʼe. Upévare nonkargái ótrope ojapo hag̃ua upéva. La Biblia heʼi voi: “Ñandejára, nde ningo rehendu umi hénte ñemboʼe” (Sal. 65:2).

2. ¿Mbaʼe ehémplo iporãvapa oheja ñandéve apóstol Pablo?

² Ñañemboʼe jave Jehovápe ikatu ñamombeʼu chupe umi mbaʼe ñandéve ñandepyʼapýva, péro avei ñañemboʼe vaʼerã ótro rehehápe. Apóstol Pablo ojapo vaʼekue upéva. Por ehémplo haʼe oñemboʼe vaʼekue pe kongregasión Efesoguáre ha heʼi umi ermánope: “Chemanduʼa meme penderehe che ñemboʼépe” (Efes. 1:16). Pablo avei oñemboʼe vaʼekue peteĩteĩ umi ermánore. Por ehémplo heʼi vaʼekue Timotéope: ‘Aagradese Ñandejárape. Che siémpre chemanduʼa nderehe ajerure asy jave Ñandejárape ára ha pyhare’ (2 Tim. 1:3). Pablo oreko vaʼekue avei iprovlemakuéra ha oñemboʼe vaʼekue umívare. Péro lomímonte haʼe oñemotiémpo vaʼekue oñemboʼe hag̃ua ótrore (2 Cor. 11:23; 12:​7, 8).

3. ¿Mbaʼérepa sapyʼánte ikatu ñanderesarái ñañemboʼe vaʼerãha ótrore?

³ Heta vése ikatu ñanderesarái ñañemboʼe vaʼerãha ótrore. ¿Mbaʼérepa? Peteĩ ermána hérava Sabrinaa omombeʼu mbaʼérepa sapyʼánte ikatu oiko upéva. Haʼe heʼi: “Koʼág̃arupi hetaiterei mbaʼe jareko jajapo vaʼerã, ha upévare ikatu ñapensaiterei ñane provlémare ha ñañemboʼe umívarente”. ¿Oikómapa nderehe upéva? Oimérõ upéicha ko artíkulo tuicha nepytyvõta, pórke jahecháta mbaʼérepa iñimportánte ñañemboʼe ótro rehehápe ha mbaʼéichapa ikatu jajapo upéva.

¿MBAʼÉREPA ÑAÑEMBOʼE VAʼERÃ ÓTRO REHEHÁPE?

4, 5. ¿Mbaʼépa heʼise ñane ñemboʼe ‘orekoha podér ha imbaretetereiha’? (Santiago 5:16).

⁴ Ñañemboʼékena ótrore pórke ñane “ñemboʼe oreko podér ha imbareteterei” (elee Santiago 5:16). Ñañemboʼéramo ótrore, ¿ikatu piko ñaipytyvõ okambia hag̃ua upe persóna situasión? Si, ikatu. Jesús oikuaa vaʼekue apóstol Pedro onegáta hague chupe. Upévare heʼi vaʼekue Pédrope: “Che ajeruréma nderehe Ñandejárape ani hag̃ua ikangy nde jerovia” (Luc. 22:32). Apóstol Pablo oikuaa vaʼekue avei mbaʼépa ikatu ojehupyty ñañemboʼéramo ótrore. Por ehémplo, haʼe oĩrõ guare préso inhústamente Rómape heʼi vaʼekue Filemónpe: “Ikatu hína ojepoi chehegui peñemboʼe meme rupi cherehe” (Filem. 22). Ha upevaite la oiko vaʼekue. Tiémpo riremínte ojepoi vaʼekue Páblogui ha ikatu vaʼekue opredika jey.

⁵ Upéva ndeʼiséi ñande ikatuha jajopy Jehovápe ojapo hag̃ua pe jajeruréva chupe ñane ñemboʼépe. Péro haʼe ojesareko hína mbaʼeichaite pevépa isiervokuérape oipyʼapy álgo, ha sapyʼánte odesidi ojapotaha la ojeruréva chupe hikuái. Jaikuaávo upéva, ¿mbaʼépa jajapose? Upéva ñanemomýi ñañemboʼe hag̃ua Jehovápe ñande pyʼaite guive peteĩ situasiónre, ha upéi jahejáma hag̃ua ipópe la oikóva jajeroviágui haʼe oikuaa porãitereiha mbaʼépa ojapóta (Sal. 37:5; ehecha 2 Corintios 1:11 ha umi nóta de estúdio pe Traducción del Nuevo Mundo españólpe).

6. ¿Mbaʼéichapa ikatu ñañeñandu ñañemboʼe rire ótrore? (1 Pedro 3:8).

⁶ Ñañemboʼéramo ótrore ikatúta ‘japoroporiahuvereko ñande pyʼaite guive’ (elee 1 Pedro 3:8). Jaiporiahuvereko ñande rapichápe heʼise jarekoha enkuénta umi mbaʼe jetuʼu ohasáva ha jajaposeha álgo ñaipytyvõ hag̃ua chupe (Mar. 1:​40, 41). Peteĩ ansiáno hérava Miguel heʼi: “Añemboʼe jave ótrore antende porãve umi provléma ohasáva hikuái ha upévare ahayhuve chupekuéra. Haʼete chéve añemoag̃uivéva hesekuéra, haʼekuéra ndoikuaáiramo jepe”. Peteĩ ansiáno hérava Richard heʼi avei: “Ñañemboʼe jave ótro rehehápe, upéva ñanemomýi ñaipytyvõ hag̃ua chupe. Oimérõ ñañemboʼe hína peteĩ persónare ha upéi jajapo álgo hesehápe, haʼete voi ñande ñaipytyvõva hína oñekontesta hag̃ua la jajerure vaʼekue ñañemboʼérõ guare”.

7. ¿Mbaʼéichapa avei ñanepytyvõ ñañemboʼéramo ótrore? (Filipenses 2:​3, 4). (Ehecha pe taʼanga).

⁷ Ñañemboʼéramo ótrore ikatúta jahecha ñane provlemakuéra hendápe porãnte (elee Filipenses 2:​3, 4). Enterovévante voi ñaneprovléma jaiko rupi ko múndo oĩvape Satanás poguýpe (1 Juan 5:19; Apoc. 12:12). Jajepokuaáramo ñañemboʼe ótrore, ifasilvéta jareko hag̃ua enkuénta enterove ñane ermáno “oĩva ko múndope oaguantaha avei koʼãichagua jehasa asy” (1 Ped. 5:9). Peteĩ prekursóra hérava Katherin heʼi: “Añemboʼéramo ótro rehehápe chemanduʼa enterovévante voi jahasaha heta mbaʼe ijetuʼúva. Upéva chepytyvõ ani hag̃ua apensaiterei che provlémarente”.

¿MÁVA MÁVAREPA IKATU ÑAÑEMBOʼE?

8. Emombeʼumína máva mávarepa ikatu ñañemboʼe.

⁸ ¿Máva mávarepa ikatu ñanemanduʼa ñane ñemboʼépe? Ikatu ningo ñañemboʼe kompletoite umi ermánore, ha ñanemanduʼa umi hasývare ha umi ijedávare. Ikatu avei ñañemboʼe umi imitãvare, pórke eskuéla térã koléhiope oĩ jepi oñembohorýva hesekuéra ha ojopýva chupekuéra ojapo hag̃ua ivaíva. Avei oĩ umi ermáno ohasa asýva pórke oĩ oñemoĩ mbaretéva ikontrapekuéra, tahaʼe ihentekuéra térã pe goviérno (Mat. 10:​18, 36; Hech. 12:5). Oĩ avei umi ñane ermáno ohejávamante hóga oĩ rupi heta violénsia ha provléma polítiko pe oikohápe. Avei oĩ umi ermáno ohasa asýva umi desástre naturál káusare. Ikatu oime ndajaikuaái personálmente koʼã ermánope. Péro ñañemboʼe jave hesehapekuéra, jahechauka hína ñaneñeʼẽrenduha Jesúspe jahayhúvo ñane ermanokuérape (Juan 13:34).

9. ¿Mbaʼérepa ñañemboʼe vaʼerã umi ermáno ñandegiávare Jehová organisasiónpe ha hembirekokuérare?

⁹ Ikatu avei ñañemboʼe umi ermáno ñandegiávare Jehová organisasiónpe. ¿Máva mávapa hína umíva? Por ehémplo umi oĩva pe Kuérpo Governántepe ha iñajudantekuéra, umi komite de sukursál, umi superintendénte oñatendéva umi departaménto oĩvare Betélpe, umi superintendénte de sirkuíto ha umi ansiáno ha siérvo ministeriál oĩva kongregasiónpe. Heta koʼã ermáno oreko avei umi provléma oipyʼapýva chupekuéra, péro lomímonte haʼekuéra ombaʼapo jejopy ñanderehehápe (2 Cor. 12:15). Por ehémplo peteĩ superintendénte de sirkuíto hérava Mark heʼi: “Ajepyʼapyeterei ningo che tuakuéra ijedávare, pórke aĩ mombyry chuguikuéra ha mokõivévante hasy. Che ermána ha iména oñatende porã hesekuéra, péro lomímonte ambyasyeterei ndaikatúi haguére ajapo hetave mbaʼe che tuakuéra rehehápe”. Ikatu oime ndajaikuaapái umi mbaʼe oipyʼapýva koʼã ermáno iguapoitévape. Péro iporãta jasegíramo ñañemboʼe hesehapekuéra (1 Tes. 5:​12, 13). Avei ikatu ñañemboʼe koʼã ermáno rembirekóre, pórke haʼekuéra oapoja iménape osegi hag̃ua okumpli porã iñasignasión.

10, 11. ¿Ogustápa Jehovápe ñañemboʼérõ enterove ermanokuérare nañamensionáiramo jepe chupekuéra hérarupi? Emyesakã.

¹⁰ Jahecháma haguéicha pyʼỹinte ñañemboʼe kompletoite umi ermáno ha ermánare ha nañamensionái káda únope. Por ehémplo ikatu oime ndajarekói hína ñane akãme peteĩ ermáno térã ermána réra, péro lomímonte ikatu jajerure Jehovápe toipytyvõ umi oĩvape kárselpe ha tokonsola umi ihénte manóvape. Peteĩ ansiáno hérava Donald heʼi: “Oĩ ningo hetaiterei ermáno ha ermána ohasa asýva hína. Upévare heta vése ñañemboʼéntema enterovéva rehehápe”.

¹¹ ¿Ogustápa Jehovápe ñañemboʼe jave enterovéva umi ermánore, ñamensionaʼỹre jepe káda únope? ¡Kláro ke si! Legálmente ningo ndajaikuaái káda uno umi ermáno situasión. Upévare iporã avei ñañemboʼéntema kompletoite umi ermáno ha ermánare (Juan 17:20; Efes. 6:18). Péicha ñañemboʼe jave jahechauka jahayhuha “enterove ermanokuéra oĩvape ko múndope” (1 Ped. 2:17).

ÑAÑEMBOʼE PETEĨTEĨ ÑANE ERMANOKUÉRARE

12. ¿Mbaʼépa ñanepytyvõta ñañemboʼe hag̃ua peteĩteĩ ñane ermanokuérare?

¹² Ñanembaʼerechakuaákena. Iporãitereíramo jepe ñañemboʼe kompletoite ñane ermanokuérare, avei iñimportánte ñañemboʼe peteĩteĩre. Por ehémplo ikatu ne kongregasiónpe oĩ peteĩ ermáno térã ermána hasýva, ikatu oĩ avei peteĩ mitãrusu térã mitãkuña oñedesanimáva pórke ikoléhiope oĩ ojopýva chupe ojapo hag̃ua ivaíva. Térã ikatu oime eikuaa oĩha peteĩ túa térã sy oñehaʼãva haʼeño ohekomboʼe ifamíliape Jehová oipotaháicha (Efes. 6:4). Ñanembaʼerechakuaárõ jahayhuvéta ha ñantendevéta ñane ermanokuérape, ha upéva ñanemomýita ñañemboʼe hag̃ua hesehapekuéra (Rom. 12:15).b

13. ¿Mbaʼépa ikatu jajapo ñañemboʼe hag̃ua umi ermáno ndajaikuaáivare?

¹³ Ñañemboʼe ñane ermanokuérare hérarupi. Ñañemboʼe jave ikatu ñamensiona ñane ermanokuérape hérarupi ndajaikuaáiramo jepe chupekuéra. Por ehémplo ñapensamína umi ermáno ha ermána oĩvare kárselpe Crimea, Eritrea, Rusia ha Singapúrpe. Jahekáramo jw.org-pe ikatu jatopa umi ermanokuéra réra.c Peteĩ superintendénte de sirkuíto hérava Brian heʼi: “Oĩ heta ermáno oĩva kárselpe, upévare añehaʼã askrivi herakuéra ha upéi haʼe en vos álta. Upéva chepytyvõ chemanduʼa hag̃ua hesekuéra ha amensiona hag̃ua umi ermánope añemboʼe jave”.

14, 15. ¿Mbaʼéichapa jaikuaáta la ikatúva jajerure exáktamente ñañemboʼe jave?

¹⁴ Ñañehaʼã jaikuaa mbaʼépa exáktamente jajeruréta. Miguel pe ermáno ñañeʼẽma vaʼekuére omombeʼu la haʼe ojapóva jepi. Haʼe heʼi: “Jw.org-pe alee jepi la ohasáva umi ermáno oĩva kárselpe. Upéi añehaʼã añeimahina mbaʼéichapa che añeñandúne aĩrõ upe situasiónpe. Aikuaa ajepyʼapytaha che rembirekóre ha aikuaasetaha orekopápa hína la oikotevẽva. Ajapo rupi upéicha aikuaáma mbaʼépa exáktamente ajeruréta Jehovápe añemboʼe jave umi ermáno omendáva oĩvare kárselpe” (Heb. 13:​3, nóta).

¹⁵ Ñañehaʼãrõ ñañeimahina mbaʼépa ohasa káda día umi ermáno ha ermána oĩvape kárselpe, ouvéta ñane akãme algúna idéa ikatúva jaʼe Jehovápe ñañemboʼe jave chupe. Por ehémplo ikatu jajerure Jehovápe umi guardiakársel ikalida hag̃ua umi ermanokuérandi. Avei ikatu hag̃uáicha umi autorida oheja ñane ermanokuérape oadora Jehovápe lívremente (1 Tim. 2:​1, 2). Avei ikatu ñañemboʼe ikatu hag̃uáicha pe ehémplo porã omoĩva koʼã ermáno omokyreʼỹ umi kongregasión oĩvape upe sónape. Jajerurekuaa avei Jehovápe umi ndahaʼéiva Testígo tohechakuaa pe kondúkta porã orekóva umi ermáno oĩva kárselpe, ha upéva tomomýi chupekuéra ohenduse hag̃ua umi notísia porã (1 Ped. 2:12). Jaikuaaháicha koʼã mbaʼe ikatu jajapo ñañemboʼéta jave umi ermáno ohasávare oimehaichagua situasión ijetuʼúva. Ñanembaʼerechakuaáramo, ñañemboʼéramo ñane ermanokuérare hérarupi ha ñañehaʼãrõ jaikuaa mbaʼépa exáktamente jajeruréta Jehovápe, jahechaukáta jahayhuha ermanokuérape (1 Tes. 3:12).

JAHECHÁKENA PE ÑEMBOʼE HENDÁPE PORÃ

16. ¿Mbaʼépa ñanepytyvõta jasegi hag̃ua jahecha hendápe porãnte pe ñemboʼe? (Mateo 6:8).

¹⁶ Jahecháma haguéicha ñañemboʼéramo ótrore ikatu hína ñaipytyvõ okambia hag̃ua pe persóna situasión. Péro tekotevẽ jahecha hendápe porãnte pe ñemboʼe. Ñañemboʼe jave ndahaʼéi ku jaʼéva hína Jehovápe peteĩ mbaʼe haʼe ndoikuaáiva gueteri. Ndajaikói vaʼerã avei jaʼe chupe mbaʼéichapa omaneha vaʼerã peteĩ situasión. Jehová oikuaa porãiterei mbaʼépa oikotevẽ káda uno isiérvo ñande jaikuaa mboyve jepe (elee Mateo 6:8). ¿Mbaʼére piko upéicharõ ñañemboʼe vaʼerã ótro rehehápe? Ko artíkulope jahecháma mbaʼe mbaʼérepa, péro avei ñanemanduʼa vaʼerã péicha jahechaukaha jajepyʼapyha ótrore. Japorohayhúramo ñañemboʼéta ojuehe, ha Jehová ovyʼaiterei ohecha jave ñande jajoayhuha haʼe oporohayhuháicha.

17, 18. Emombeʼu peteĩ ehémplo ohechaukáva Jehová oipotaha ñañemboʼe ñane ermanokuérare.

¹⁷ Ikatu oime ñañemboʼéma hína ótro rehehápe, péro haʼete ñandéve nomehoraiha isituasión. Upéicharõ jepe, ñañemboʼe rupi hesehápe jahechauka hína jahayhuha upe ermáno térã ermánape, ha Jehová ojesareko upévare. Ñantende hag̃ua upéva ñamoĩ chupe peteĩ túa orekoha mokõi ifamiliami, peteĩ itaʼýra ha peteĩ itajýra. Pe mitãʼi ou hasyete ha oĩ tupápe, upémarõ pe mitãkuñaʼi ojerure asy itúape: “Papa, por favór eipytyvõmína che ermanítope. Hasyete ningo”. Jaikuaa pe túa ojapomaha hína álgo pórke ohayhu itaʼýrape ha okuida porã hese. Péro oiméne pe túa ovyʼaite ohechávo mbaʼeichaitépa itajyrami ohayhu ha oñeinteresa iñermanítore, upévare ojerure oñepytyvõ hag̃ua chupe.

¹⁸ Péicha avei Jehová oipota ñañeinteresa ha ñañemboʼe ojuehe. Jajapóramo péicha jahechauka ndajaikoiha jajepyʼapy ñandejehénte, síno jahayhuha ñande pyʼaite guive ñane ermanokuérape ha Jehová oreko enkuénta upéva (2 Tes. 1:3; Heb. 6:10). Avei jahecháma haguéicha ñañemboʼéramo ótrore, sapyʼánte ikatu hína ñaipytyvõ okambia hag̃ua isituasión. Upévare, ñanemanduʼa memékena ñañemboʼe vaʼerãha ojuehe.