¿Mbaʼéichapa ojetrata vaʼerã kuñanguérape? ¿Mbaʼépa heʼi la Biblia?

“Chemitãkuñaʼírõ guare che ermáno tódo el día chemaltrata, cheapoʼi ha chejaʼómi. Upéi amenda rire, che suegraháma chetrata péicha. Haʼe ha che suégro chetrata ijesklávaicha. Añeñandu vaieterei ningo, ha apensa voi ajesuisidávo” (Madhu, Indiapegua).a

Pe Organización Mundial de la Salud heʼi: “Ko múndo tuichakuére oñemaltrata la kuñáme, upéva peteĩ provléma komún”. Ojekalkula mbohapy kuña apytégui peteĩme jepe oñemaltrataha térã ojeavusaha hese, tahaʼe koʼág̃a o imitãvépe.

Oiméramo upéva oiko nderehe, ijetuʼúne ndéve reñeñandu hag̃ua segúra. Ikatu oime reñandu voi reho rehohápe oĩtaha katuete nemaltratáva, ndejaʼóva, ndeapoʼíva térã oavusáva nderehe. Upéva káusare oiméne voi reimoʼã la majoría opensaha: “La kuñángo ndovaléi mbaʼeverã”. ¿Péro upévapa la Ñandejára opensáva umi kuñáre?

¿Mbaʼépa Ñandejára opensa umi kuñáre?

Téxto bíblico: ‘Ñandejára ojapo kuimbaʼe ha kuñáme’ (Génesis 1:27).

Mbaʼépa heʼise: Ñandejára okrea kuimbaʼépe ha avei kuñáme. Haʼe ohecha mokõivépe peteĩchante ha orrespeta mokõivévape. Avei haʼe heʼi menakuérape ‘ohayhu hag̃ua hembirekópe haʼekuéra voi ojehayhuháicha’. Ndeʼíri odomina vaʼerãha hembirekópe ni omaltrata vaʼerãha chupe, tahaʼe umi mbaʼe heʼíva térã ojapóva rupive (Efesios 5:33; Colosenses 3:19). Jahechakuaa upéicharõ Ñandejára ovaloraitereiha la kuñáme ha oipotaha oñeñandu segúra.

“Chemitãkuñaʼípe, peteĩ che hénte oavusa cherehe. Arekópe 17 áño, che patrón cheamenasa chemosẽtaha nañenóiramo hendive. Ha akakuaapámarõ, che ména, che tuakuéra ha che vesinokuéra chemaltrata ha ndacherrespetái. Péro kon el tiémpo aikuaa ñande Apohare Jehovápe,b ha ideʼotroite voi la haʼe otrata lája umi kuñáme. Haʼe cherrespeta, cherayhu ha chevaloraiterei” (María, Argentinapegua).

¿Mbaʼéichapa ikatu reñeñandu porãve rehóvo?

Téxto bíblico: “Oĩ amígo nderayhuvéva ne ermánogui” (Proverbios 18:24).

Mbaʼépa heʼise: Peteĩ amígo verdadéro siémpre oĩ nde ykére ha nepytyvõkuaa. Ikatúramo, emombeʼúna chupe térã peteĩ persóna de konfiánsape mbaʼéichapa reñeñandu.

“Che namombeʼúi kuri avavépe ojeavusa hague cherehe. Upévare, 20 áño pukukuére ndavyʼái, añedeprimi ha ajepyʼapy tódo el tiémpo. Péro amombeʼu rire la ojehúva chéve álgien de konfiánsape ha oĩvape dispuésto cherendúvo, tuichaiterei chepyʼaguapy. ¡Chemoñeñandu porãiterei upéva!” (Elif, Turquiapegua).

Téxto bíblico: ‘Pemoĩ Ñandejára pópe entéro mbaʼe pendepyʼapýva, pórke haʼe ojepyʼapy penderehe’ (1 Pedro 5:7).

Mbaʼépa heʼise: Nde reñemboʼe jave, Ñandejára ojapysaka nderehe (Salmo 55:22; 65:2). Haʼe ningo ojepyʼapy nderehe, upévare nepytyvõkuaa nde voi rehechakuaa hag̃ua mbaʼeichaitépa ndevaliósa.

“Aikuaa rire Jehovápe añepyrũ añeñandu porãve, haʼete ku okueráva ohóvo pe erída emosionál arekóva, aréma chereko asyetéva. Koʼág̃a ikatu amombeʼupaite Ñandejárape la ahasáva guive. Haʼe che amigoite ha ontende porã mbaʼéichapa añeñandu” (Ana, Belicepegua).

¿Mbaʼépa ojapóta Ñandejára ponove oñemaltrata la kuñáme?

Téxto bíblico: “Jehová, [...] nde reñenkargáta ojejapo hag̃ua hustísia umi ityreʼỹvape, ha entéro umi osufrívape. Ndaiporimoʼãvéima avave oikóva omongyhyje chupekuéra” (Salmo 10:​17, 18).

Mbaʼépa heʼise: Ñandejára oñenkargáta koʼẽrõitéma opa hag̃ua pe inhustísia, upéva heʼise ndaiporimoʼãveimaha avave ivioléntova ni omaltratáva umi kuñáme.

“Aikuaa rire Jehová rupive koʼẽrõite ndaiporimoʼãveimaha omaltratáva kuñáme, mitãkuñáme ni mitãkuñaʼíme, haʼete voi oñemoĩva peteĩ pohã che erídare. Tuichaiterei ningo chembopyʼaguapy upéva” (Roberta, Mexicopegua).

Reikuaasevéramo mbaʼe esperánsa omeʼẽ la Biblia, mbaʼérepa jajeroviakuaa umi promésa oĩvare pype ha mbaʼéichapa umi testígo de Jehová oipytyvõ la héntepe la Biblia rupive, ikatu restudia la Biblia gratiete.

Emboguejy ko informasión eimprimi hag̃ua.