Umi provléma polítiko okumpli peteĩ profesía bíblica
Koʼág̃arupi la hénte ojedividipa pe polítika káusare. Ndogustaiete voi chupekuéra umi léi oñemoĩva ha oafektátava chupekuéra, ha mbaretépe voi heʼi umi mbaʼe opensáva pe polítikare. Pe goviérnope voi, umi omoĩva umi léi ha orekóva ótro kárgo, oiko vai jepi ha ndoaseptái umi ótro opensáva. Umichagua provléma káusare umi governánte ndaikatúi ojapo porã itraváho.
Péro umi provléma polítiko oĩva Reino Unido ha Estados Unídospe, iñimportánte entérope g̃uarã. ¿Mbaʼérepa? Pórke la Biblia oprofetisa koʼã goviérno oñaprovlema vove péicha, upe javete Ñandejára omoĩtaha igoviérno, ha upéva okambiaitéta la situasión mundiál.
Umi provléma polítiko “oikóta umi ára pahápe”
La Bíbliape, lívro de Daniélpe, jatopa peteĩ profesía ñanemopirĩmbáva. Upe profesíape Ñandejára omombeʼu “mbaʼépa oikóta umi ára pahápe”. Upérõ guare oñeʼẽ hína kuri peteĩ mbaʼe oikótavare amo gotyove, ha tuicha pe kámbio oikótava (Daniel 2:28).
Ko profesía Ñandejára omombeʼu kuri rréi de Babilóniape iképe. Upérõ pe rréi ohecha peteĩ estátua tuichaitereíva ha ojejapóva diferénte metálgui. Upe rire proféta Daniel oexplika pe estátua, iñakã guive ipy peve orrepresentaha umi poténsia mundiál opuʼãtava ha hoʼátava kon el tiémpo.a Upéi omombeʼu oĩtaha peteĩ ita ohundietétava ko estátua, upe ita orrepresenta peteĩ Rréino térã goviérno Ñandejára omoĩva (Daniel 2:36-45).
Según pe profesía Ñandejára Rréino opytáta entéro umi ótro goviérno rekovia. Upéva upe Rréino hína la Jesús omboʼe vaʼekue idisipulokuérape ojerure hag̃ua oñemboʼévo: “Tou ne Rréino” (Mateo 6:10).
Péro, ¿mbaʼe partetépa upe profesíagui heʼi oĩtaha provléma polítiko? Pe profesía heʼi pe estátua py ojejapotaha “en párte iérrogui ha en párte ñaiʼũgui” (Daniel 2:33). Entéro umi ótra párte orekóva pe estátua ojejapo peteĩ metálguinte ha imbarete porãva, péro ko párte idiferénte pórke oñembojeheʼa mokõi mbaʼe. Upéva heʼise oĩtaha peteĩ poténsia mundiál idiferénteva umi ótrogui. ¿Mbaʼe sentídopepa? Pe profesía de Daniel oexplika kóicha:
Según ko profesía, pe poténsia mundiál, oñerrepresentáva pe estátua py rupive, oĩta dividído. Umi hénte oĩva ko goviérno poguýpe ojapóta heta mbaʼe omokangýtava pe goviérnope ha upéicha rupi ijetuʼúta chupe imbarete hag̃ua.
¿Mbaʼéichapa oñekumpli koʼág̃a Daniel profesía?
Pe estátua py orrepresenta pe poténsia mundiál tuichavéva oĩva koʼág̃a, péva haʼe hína Reino Unido ha Estados Unidos ombaʼapóva hína oñondive. ¿Mbaʼe mbaʼépa ohechauka siertoha upéva?
Jaʼéma haguéicha, pe estátua py “ojejapo en párte iérrogui ha en párte ñaiʼũgui” ha upéicha rupi naimbaretéi (Daniel 2:42). Koʼág̃arupi Reino Unido ha Estados Unidos ikangy pórke umi hénte oĩva ipoguýpe ojedividipa. Por ehémplo, mokõive paíspente umi hénte opuʼã ojuehe ha iviolentoiterei odefendévo iderechokuéra. Ha heta vése umi governánte la hénte voi oiporavo vaʼekue nog̃uahẽi peteĩ ñeʼẽme. Péicha la hénte ojodividipa rupi, pe goviérno odesidíramo jepe ojapo peteĩ mbaʼe ndaikatúi ohupyty upéva.
Pe estátua ojeprofetisa vaʼekue Daniel kapítulo 2-pe, orrepresentáva diferénte goviérno
Jahechamína unos kuánto detálle pe profesía omeʼẽvagui Daniel, mbaʼépa heʼise umíva ha mbaʼéichapa oñekumpli koʼág̃arupi:
Profesía: “Ko rréino oĩta dividído. Pe iérro imbareteháicha, ko rréino en párte imbaretéta” (Daniel 2:41).
Mbaʼépa heʼise: Umi hénte opuʼãramo jepe ojuehe ha ojodividipa, Reino Unido ha Estados Unidos oreko ehérsito imbaretéva. Upévare jaʼekuaa pe autorida orekóva hikuái imbareteha peteĩ iérroicha.
Mbaʼéicha oñekumpli
Ojejapo peteĩ lísta ohechaukahápe mboýpa ojegasta umi ehérsito militár rehe áño 2023-pe, ha ojetopa ke ni oñesumáramo oñondivepa umi 12 país ogastave vaʼekue, ndohupytyiha gueteri la ogasta vaʼekue oñondive Reino Unido ha Estados Unidos [Instituto Internacional de Estudios para la Paz de Estocolmo].
“Reino Unido ha Estados Unidos ombaʼapo oñondive [...] ikatu hag̃uáicha oprotehe ha odefende umi mbaʼe orekóva ipaíspe. Ha oguereko hikuái umi teknolohía iñavansadovéva [...]. Upéicha rupi ombaʼapo oñondive, ojoapoja ha oñomoirũ oñorairõ hag̃ua” (Comando Estratégico, Ministerio de Defensa del Reino Unido, abril de 2024).
Profesía: “Umi ipysã ningo ojejapo en párte iérrogui ha en párte ñaiʼũgui, péicha ko rréino en párte imbaretéta ha en párte ikangýta” (Daniel 2:42).
Mbaʼépa heʼise: Reino Unido ha Estados Unidos orekóramo jepe peteĩ ehérsito imbaretéva, oĩ heta mbaʼe ndaikatúiva ojapo pe demokrásia káusare. Oiméramo la majoría umi hénte ndoapojái peteĩ mbaʼe, umi goviérno sapyʼánte ndaikatúi ojapo la oreko vaʼekue planeádo.
Mbaʼéicha oñekumpli
“Algúno expérto heʼi péicha ojedividipa rupi pe polítika Estados Unídospe, ijetuʼuha pe goviérnope okumpli hag̃ua la oprometéva umi ótro paíspe. Por ehémplo, umi mbaʼe oafektáva pe segurida ha umi negósio” (The Wall Street Journal).
“Primera ves la peichaite peve oĩ umi provléma polítiko Reino Unídope. Upéicha rupi umi ombaʼapóva pe goviérnope ndaikatúi oñekonsentra la ojapo vaʼerãre, ha ndaikatúi ojapo umi kámbio tekotevẽva oñepytyvõ hag̃ua umi héntepe” [Instituto de Gobierno].
Profesía: “Ko rréino ojeheʼáta umi héntere, péro ndaikatumoʼãi oja porã” (Daniel 2:43, nóta).
Mbaʼépa heʼise: Peteĩ goviérno demokrátikope umi hénte ndahaʼéiva polítiko ikatu heʼi la opensáva térã oipotáva ojejapo, péro amo ipahápe la rresultádo nokonvensepái ni umi polítikope ni umi héntepe.
Mbaʼéicha oñekumpli
“Koʼág̃arupi, la majoría umi estadounidense oñeʼẽ vaieterei pe polítikare ha umi polítikore” [Centro de Investigación].
“Umi 50 áño ohasa vaʼekuépe, Reino Unídope koʼág̃a primera ves la peichaite peve noñekonfiái umi governánte ha polítikore” [Centro Nacional de Investigación Social].
¿Mbaʼéichapa oñekumplíta Daniel profesía amo gotyove?
Según pe profesía Daniel omeʼẽ vaʼekue, Reino Unido ha Estados Unidos haʼéta hína pe poténsia mundiál ogovernátava, Ñandejára ogueru vove Irréino entéro umi goviérno umáno rekovia (Daniel 2:44).
Lívro de Apocalípsispe oñeñeʼẽ peteĩ profesía oñekumplítavare avei el mísmo tiémpope. Upépe oñemombeʼu “entéro umi rréi ko yvy arigua” oñembyatytaha oñorairõ hag̃ua Ñandejára Jehovándi.b Upéva oikóta Armagedónpe, térã “Ñandejára Todopoderóso ára guasúpe” (Apocalipsis 16:14, 16; 19:19-21). Ko gérrape Jehová ohundietéta entéro umi goviérno umánope ha ndopytamoʼãi ni peteĩ poténsia mundiál, oñerrepresentáva pe estátua oprofetisa vaʼekuére Daniel.
Reikuaasevéramo ko témagui elee pe artíkulo hérava “¿Mbaʼépa hína pe gérra de Armagedón?”.
¿Mbaʼérepa iporãta ñantendéramo Daniel profesía?
Umi provléma polítiko oĩva Reino Unido ha Estados Unídospe, ojeprofetisáma vaʼekue la Bíbliape. Rentende porãramo upéva, nepytyvõta avei rentende porã hag̃ua umi mbaʼe oikóva ko múndo tuichakuére.
Rentendéta mbaʼérepa Jesús ndoipotái isegidorkuéra oñentremete polítikare (Juan 17:16). Ha avei rentendéta mbaʼérepa Jesús, upe Ñandejára oiporavo vaʼekue oiko hag̃ua chugui Rréi Ñandejára Rréinope, heʼi vaʼekue: “Che Rréino ndahaʼéi ko mundopegua” (Juan 18:36).
Regueroviáta Ñandejára Rréino koʼẽrõitéma osolusionataha entéro mbaʼe ha ñanevendesitaha enterovetépe, haʼe opromete haguéicha (Apocalipsis 21:3, 4).
Ndereikomoʼãvéima rejepyʼapy oñehundítapa ko yvy, umi goviérno opuʼã haguére ojuehe (Salmo 37:11, 29).
Pe profesía omeʼẽva Daniel ohechauka Reino Unido ha Estados Unidos, oñerrepresentáva pe estátua py rupive, haʼetaha pe última poténsia mundiál umána ogovernáva. ¿Mbaʼépa oikóta upéi? Oĩta peteĩ goviérno perfékto ogovernátava yvága guive, upéva hína Ñandejára Rréino.
Reikuaasevéramo mbaʼe mbaʼépa ojapóta Ñandejára Reino ñanderehehápe, ehecha pe vidéo hérava ¿Mbaʼépa hína Ñandejára Rréino?
a Ehecha pe rrekuádro hérava “¿Máva mávapa umi poténsia mundiál oprofetisáva Daniel?”.
b Ñandejára héra Jehová (Salmo 83:18). Ehecha pe artíkulo hérava “¿Mávapa Jehová?”.