¿Ñandejára Rréino piko peteĩ mbaʼe jarekóva ñane korasõmente?

Mbaʼépa heʼi la Biblia

No, Ñandejára Rréino ndahaʼéi álgo kristianokuéra orekóva ikorasõme.a En rrealida, la Biblia ohechauka voi moõpa oĩ upe Rréino, pórke heʼi hese “pe Rréino yvagapegua” (Mateo 4:17). Jahechamína mbaʼéichapa la Biblia ohechauka Ñandejára Rréino haʼeha peteĩ goviérno oĩva yvágape.

• Ñandejára Rréino oreko umi ogovernátavape, peteĩ puévlo oĩva ipoguýpe ha umi léi. Avei oreko peteĩ propósito: ojejapo vaʼerã Ñandejára volunta yvágape ha ko yvy ape ári (Mateo 6:10; Apocalipsis 5:10).

• La Biblia heʼi Ñandejára goviérno, térã Irréino, omandataha entéro umi oĩvare ko yvy ape ári, upéva heʼise “umi hénte opa tetãygua ha puévlo oñeʼẽva diferénte idióma” (Daniel 7:13, 14). Ñandejára voi omoĩ ko goviérno, ndahaʼéi la hénte ovota vaʼekue hese (Salmo 2:4-6; Isaías 9:7).

• Jesús oprofetisa vaʼekue ijapostolkuéra ifiélva oĩtaha hendive pe Rréinope yvágape, ha oguapytaha hendive “umi trónope” (Lucas 22:28, 30).

• Oĩ avei umi oñemoĩva Ñandejára Rréino kóntrape, péro ko goviérno ohundipaitéta chupekuéra (Salmo 2:1, 2, 8, 9; 110:1, 2; 1 Corintios 15:25, 26).

Oĩ heʼíva Ñandejára Rréino oĩha ñane korasõme, pórke péicha Ñandejára ñanegoverna ha ñandegia jajapo hag̃ua iporãva, péro la Biblia ndeʼíri upéva. Upéva rangue, la Biblia omboʼe pe “mensáhe oñeʼẽva Ñandejára Rréinore” ha “umi notísia porã oñeʼẽva Ñandejára Rréinore” la ikatúva opoko ñane korasõre ha ñanepytyvõ jajapo hag̃ua iporãva (Mateo 13:19; 24:14).

¿Mbaʼépa heʼise Ñandejára Rréino oĩ hína pende pype?

Algúno Biblia otradusi péicha Lucas 17:21: “Ñandejára Rréino oĩ hína pende pype”. Ko téxto ojetradusi lája okonfundi jepi la héntepe, pórke opensa upépe Jesús heʼi porãiterei hague Ñandejára Rréino oĩha la hénte korasõme. Péro ñantende porã hag̃ua la Jesús heʼise vaʼekue, jahechámante vaʼerã mbaʼe rehepa oñeʼẽ hína kuri upérõ ha mávapepa.

Upe téxtope Jesús oñeʼẽ hína kuri umi fariséope, ha ko grúpo rrelihióso oñemoĩ kuri Jesús rehe ha oipytyvõ voi katu ojejuka hag̃ua chupe (Mateo 12:14; Lucas 17:20). ¿Ndépa ere isentidoha la Jesús heʼi koʼã hénte añáme Ñandejára Rréino oĩ hague ikorasõmekuéra? Ni mbaʼevéicharõ, pórke Jesús heʼi voi kuri chupekuéra: “Pene korasõ henyhẽ japu ha mbaʼe vaígui” (Mateo 23:27, 28).

Ani hag̃ua la hénte oñekonfundi ha ikatu hag̃uáicha hesakãve, algúno Biblia otradusi péicha Lucas 17:21: “Ñandejára reino oĩguima pende apytépe” (Buenas Nuevas para el Paraguay), ha avei “Ñande Ruete retã guasu ningo oĩ voíma pende apytépe” (Ñande Ruete Ñeʼẽ Biblia). Upéicharõ Jesús heʼípe Ñandejára Rréino oĩha ijapytepekuéra oñeʼẽ hína kuri ijehe voi, pórke haʼe hína pe Rréi ha orrepresenta pe Rréinope, ha okorre hína kuri oikóvo ijapytepekuéra (Lucas 1:32, 33).