¿Mbaʼépa hína pe gérra de Armagedón?
Mbaʼépa heʼi la Biblia
Pe Armagedón haʼe hína pe última gérra umi goviérno umáno oñorairõtahápe Ñandejára kóntrape. Koʼã goviérno ha umi oapojáva chupekuéra koʼág̃ama voi opuʼã Ñandejárare pórke haʼekuéra noñemoĩséi igoviérno poguýpe (Salmo 2:2). Pe gérra de Armagedón ohundíta pára siémpre entéro umi goviérno umáno (Daniel 2:44).
Pe palávra “Armagedón” oaparese una vénte la Bíbliape, Apocalipsis 16:16-pe. Pe profesía oñeʼẽva ko gérrare heʼi oñembyatytaha “entéro umi rréi ko yvy arigua” oñorairõ hag̃ua “Ñandejára Todopoderóso ára guasúpe”, ha upéva oikotaha “pe lugár héravape idióma hebréope Armagedón” (Apocalipsis 16:14, 16).
¿Máva mávapa oñorairõta ko gérrape? Jesús omoakãta umi ehérsito oĩva yvágape, ha oganáta Ñandejára enemigokuérape (Apocalipsis 19:11-16, 19-21). Umíva haʼe hína umi opuʼãva voi Ñandejára goviérno kóntrape, ha avei umi ndorrespetáiva chupe (Ezequiel 39:7).
¿Oikótapa ko gérra Israel gotyo ládo? No. Ndahaʼemoʼãi peteĩ pártepente ko múndope, síno ke ojagarráta voi ko múndo kompletoite (Jeremías 25:32-34; Ezequiel 39:17-20).
Pe palávra “Armagedón”, hebréope heʼise hína “Montáña de Meguidó”. Ha Meguidó haʼe vaʼekue peteĩ siuda opyta vaʼekue yma Israélpe, peteĩ sóna héravape Jezreel. Upe lugárpe oiko vaʼekue heta gérra iñimportánteva, ha algúno koʼã gérra oñemensiona voi la Bíbliape (Jueces 5:19, 20; 2 Reyes 9:27; 23:29). Upéicharõ jepe, pe palávra “Armagedón” ndaikatúi oñeʼẽ upe sónare, pórke upépe ndaipóri peteĩ montáña tuicháva. Hiʼarive, ni Meguidópe ni Jezreel kompletoitépe voi, ndaikatúi oikepaitévo entéro umi Ñandejára enemigokuéra oñorairõtava ikóntrape. Upévare, Armagedón ndahaʼéi peteĩ lugár oĩva ko múndope, síno ke haʼe pe gérra oikótava ko múndo tuichakuére umi goviérno opuʼã vove última ves Ñandejára kóntrape.
¿Mbaʼépa la oikopátava Armagedónpe? Ndajaikuaái mbaʼeichaitépa Ñandejára oipurúta la ipodér, péro jaikuaa orekoha idisposisiónpe hetaiterei mbaʼe oipurúma vaʼekue ymave, por ehémplo amandáu guasu, terremóto, ama, tata ha asúfre, umi rrájo ha mbaʼasy (Job 38:22, 23; Ezequiel 38:19, 22; Habacuc 3:10, 11; Zacarías 14:12). Por lo méno algúno jepe umi Ñandejára enemigokuéra oñekonfundipáta ha ojojukáta haʼekuéra voi. Péro amo ipahápe, enterovéva ohechakuaáta haʼeha Ñandejára upe oñorairõva ikontrapekuéra (Ezequiel 38:21, 23; Zacarías 14:13).
¿Oñehundítapa ko múndo Armagedónpe? Armagedónpe noñehundimoʼãi ñane planéta, pórke péva Ñandejára ojapo vaʼekue jaiko hag̃ua pype pára siémpre (Salmo 37:29; 96:10; Eclesiastés 1:4). Pe Armagedón nohundimoʼãi enterove oikóvape ko múndope, síno ke osalváta katu umi iñeʼẽrendúvape. La Biblia heʼi voi oĩtaha “peteĩ aty guasu” noñehundimoʼãiva Armagedónpe (Apocalipsis 7:9, 14; Salmo 37:34).
¿Mbaʼérepa upéicharõ ojeʼe oĩtaha peteĩ “fin del múndo”? En rrealida, la Bíbliape ndojepurúi pe palávra “múndo” oñeñeʼẽ hag̃ua ko ñane planétare añónte, síno ojepuru avei oñeñeʼẽ jave umi hénte añáre ndoikuaaséiva mbaʼeve Ñandejáragui (1 Juan 2:15-17). Upévare upe sentídope si ikatu ojeʼe Armagedónpe oikotaha pe “fin del múndo”, pórke upépe oñehundíta umi hénte añáme (Mateo 24:3, Biblia Reina-Valera Actualizada 2015).
¿Arakaʼépa oikóta pe Armagedón? Armagedón ningo omohuʼãta hína pe “jehasa asy guasu”. Ha Jesús oñeʼẽrõ guare upe témare idisipulokuérandi, heʼi vaʼekue: “Avave ndoikuaái ni pe óra ni pe día, ndoikuaái umi ánhel oĩva yvágape, ni pe Taʼýra, pe Túa añoite oikuaa” (Mateo 24:21, 36). Upéicharõ jepe, la Biblia ohechauka porã pe Armagedón oikotaha Jesús ogovernaha tiémpope, ha haʼe oñepyrũ kuri ogoverna áño 1914-pe (Mateo 24:37-39).