¿Mbaʼépa opensa umi testígo de Jehová pe divórsiore?
Ore testígo de Jehová roñehaʼãmbaite rosegi umi konsého oĩva la Bíbliape oñeʼẽva pe matrimónio ha pe divórsiore. Ñandejára ningo omoñepyrũ vaʼekue pe matrimónio, ha haʼe oipota pe tembireko ha ména opyta oñondive pára siémpre. Péro la Biblia heʼi umi omendáva ikatuha ojedivorsia oñomoakãratĩramo añoite (Mateo 19:5, 6, 9).
¿Oipytyvõpa umi testígo de Jehová umi matrimónio iprovlémavape?
Si roipytyvõ. Upearã rojevale koʼã mbaʼére:
Puvlikasionkuéra. Ore puvlikasiónpe pyʼỹi osẽ informasión oipytyvõva umi omendávape omombarete hag̃ua imatrimónio. Koʼãva oipytyvõkuaa avei umi opensávape naipohãveimaha imatrimónio. Por ehémplo osẽ jepi koʼãichagua informasión: “Cómo fortalecer el sentido del compromiso en el matrimonio”, “Cómo perdonar” ha “Cómo recuperar la confianza perdida”.
Ore rreunionkuéra. Umi rreunión rorekóvape káda semána ha umi aty guasu rojapóvape, roanalisa jepi umi konsého oĩva la Bíbliape umi omendávape g̃uarã.
Ansianokuéra. Umi ansiáno haʼe umi omoakãva peteĩ kongregasión, ha haʼekuéra oñehaʼã oipytyvõ káda matrimóniope osegi hag̃ua umi konsého oĩva la Bíbliape, por ehémplo pe oĩva Efesios 5:22-25-pe.
Oiméramo peteĩ Testígo ojedivorsiase, ¿ojerure vaʼerãpa permíso umi ansiánope ojapo hag̃ua upéva?
Nahániri. Umi ansiáno ikatu oipytyvõ peteĩ matrimóniope oiméramo iprovléma hikuái, péro haʼekuéra ndeʼimoʼãi chupekuéra mbaʼépa odesidi vaʼerã. (Gálatas 6:5). Péro oiméramo noñomoakãratĩri raʼe hikuái ha lomímonte ojedivorsia, la Biblia heʼi ndaikatuveimaha omenda jey hikuái ótro persónare (1 Timoteo 3:1, 5, 12).
¿Mbaʼépa opensa umi Testígo pe separasiónre?
La Biblia omokyreʼỹ umi omendávape opyta hag̃ua oñondive orekóramo jepe hikuái provléma (1 Corintios 7:10-16). Peteĩ matrimónio ojeruréramo ajúda Ñandejárape, avei osegíramo umi konsého oĩva la Bíbliape ha ohechaukáramo ojupe ojoayhuha, heta provléma ikatu oñesolusiona (1 Corintios 13:4-8; Gálatas 5:22).
Upéicharamo jepe, oĩ kristiáno odesidíva ojesepara ohasa rupi situasión ijetuʼuetereímava, por ehémplo:
Nomoĩséi ifamíliape oikotevẽva (1 Timoteo 5:8).
Oinupã vaipa hembirekópe térã iménape (Salmo 11:5).
Ndohejái oservi Jehovápe. Por ehémplo, peteĩ ména oovligáramo hembirekópe ojapo hag̃ua peteĩ mbaʼe Ñandejára oproivíva, pe tembireko ikatu hína opensa mehorveha ojesepara ikatu hag̃uáicha iñeʼẽrendu Ñandejárape, yvypórape rangue (Hechos 5:29).