Ojejapo umi vidéo pe aty guasu 3 diaguápe g̃uarã “¡Javyʼákena siémpre!”

Umi vidéo osẽ vaʼekue ñande aty guasu 3 diaguápe og̃uahẽ ñane korasõme ha ñanepytyvõ ñantende porãve hag̃ua la Biblia omboʼéva. Pe aty guasu 3 diagua 2020-pegua “¡Javyʼákena siémpre!” oreko kuri 114 vidéo, umíva apytépe 43 diskúrso ojapo vaʼekue umi ermáno oĩva pe Kuérpo Governántepe ha iñajudantekuéra. ¿Ndépa reñeporandúmava mbaʼeichaitépa oñembaʼapóne raʼe ha mboy plátapa ojegasta ojejapopa hag̃ua umi vidéo?

Amo 900 ermáno ha ermánarupi oĩva ko múndo tuichakuére oipuru itiémpo ha umi mbaʼe ojapokuaáva ojapo hag̃ua pe prográma. Ko projéktope haʼekuéra oipuru 100.000 órarupi 2 áño aja. Upévape oike hína umi 70.000 óra ojepuru vaʼekue ojejapopa hag̃ua pe pelíkula bíblica Nehemías: “Pe vyʼa Jehová omeʼẽva peẽme pendeprotehéta”, oduráva 76 minúto.

Añetehápe ningo heta ojegasta oñekonsegi hag̃ua umi mbaʼe oikotevẽva koʼã voluntário isakrifikadoitéva, avei umi kosakuéra, umi ekipamiénto ha umi lugár oñekotevẽva ojejapopa hag̃ua umi vidéo.

Ermáno Jared Gossman, ombaʼapóva Servicio de Audio y Vidéope heʼi: “Pe Komite de Enseñánsa del Kuérpo Governánte añetehápe oipota ojehechauka diferénte kultúra ha lugár umi vidéope. Upéicha hína ñane ermanokuéra oĩ rupi ko múndo tuichakuére ha ojehechaukase upéva umi vidéope. Ha ikatu hag̃uáicha ojejapo, 24 ekípo oĩva 11 paíspe ombaʼapo oñondive ko projéktope. Upearã tekotevẽ kuri ojegasta heta pláta, oñeplanea ha oñembaʼapo porã oñondive ko múndo tuichakue javeve”.

Ojejapo hag̃ua heta vidéo oñekotevẽ heta ekípo ha esenário. Por ehémplo, umi esenário oñekotevẽ vaʼekue ojejapo hag̃ua pe vidéo Nehemías: “Pe vyʼa Jehová omeʼẽva peẽme pendeprotehéta” ojeprepara kuri pe estúdio de gravasión Mount Ebo ryepýpe, opytáva ag̃uiete Páttersongui, Nueva Yórkpe (Estados Unidos). Ikatu hag̃uáicha ojepuru porã umi kontrivusión oñemeʼẽva ha ojejapo hag̃ua umi esenário ojoguáva umi murálla de Jerusalén yma guarépe, ojejapo kuri umi estruktúra de madéra ivevýiva ha ijyvatéva 6 métro. Koʼãvare oñemoĩ isopór ha oñepinta ojogua hag̃uáicha itápe. Koʼã “pare” ikatu vaʼekue ojeguerova ojepuru hag̃ua diferénte esenáriope, ha péicha saʼive kuri umi esenário tekotevẽ vaʼekue ojeprepara. Upéicharõ jepe, ojegasta haimete 100.000 dólar (689 millón de guaranírupi) ojeguereko hag̃ua umi esenário ojejapo hag̃ua pe pelíkula bíblicante voi.a

¡Ajépa koʼýte jaagradeseve ñande aty guasu ko añopeguáre jaikuaamiévo mbaʼéichapa ojejapo raʼe! Ñaime segúro pe traváho ojejapo vaʼekue ojeprepara hag̃ua pe aty guasu omombaʼeguasutaha Jehovápe ko múndo tuichakuére. Roagradese peẽme ore pyʼaite guive pendepojera haguére pemeʼẽ hag̃ua pene kontrivusión pe óvra mundiálpe g̃uarã donate.jw.org rupive, ha hetave hendáicha.