Umi misionéro oho “mombyryvehápe jepe ko yvy ape ári”

Jesús heʼi vaʼekue idisipulokuérape: “Oikóta pendehegui che testígo [...] umi lugár mombyryvehápe jepe ko yvy ape ári” (Hech. 1:8). Koʼág̃arupi, umi testígo de Jehová kyreʼỹme okumpli hína upéva. Péro ko múndope oĩ umi território ndaikatuítiva ojekuvripa, umíva apytépe umi lugár tuichaitereíva ha hetaitereihápe umi hénte. Avei unos kuánto paíspe ndaiporiguasúi la Testígo (Mat. 9:37, 38). ¿Mbaʼépa ojejapo hína ojepredika hag̃ua hetave persónape?

Oñekumpli porã hag̃ua la Jesús omanda vaʼekue, pe Komite de Servísio del Kuérpo Governánte de los testigos de Jehová, oasigna umi misionéro umi lugár oñekotevẽvehápe ko múndope. Koʼag̃aite oĩ hína 3.090 misionéro ko múndo tuichakuére.a La majoría orresivíma entrenamiénto peteĩva umi eskuéla teokrátikape, por ehémplo pe Eskuéla de Evanhelisadórpe. Umi misionéro ningo oĩ dispuésto ohejávo hóga ha ova ótro paíspe. Haʼekuéra ningo ijerovia mbarete, oreko heta experiénsia ha orresivi entrenamiénto, upéicha rupi tuichaitereíma oipytyvõ hikuái predikasiónpe ha omoĩ ehémplo porã umi testígo de Jehová ipyahúvape.

Oñepytyvõ umi misionérope oipytyvõ hag̃ua ótrope

Káda sukursálpe, pe Sección de Ministros en el Campo oĩva Departaménto de Servísiope, ombaʼapo pe Komite de Sukursál ndive oñemeʼẽ hag̃ua umi misionérope umi mbaʼe oikotevẽva. Por ehémplo, oñepytyvõ chupekuéra oreko hag̃ua peteĩ lugár isensíllova oikomi hag̃ua, oñeñangareko isalúre, ha oñemeʼẽ chupekuéra michĩmi pláta ikatu hag̃uáicha oñemantene. Pe áño de servísio 2020-pe, umi testígo de Jehová ogasta amo 27 millón de dólar (mas de 182 mil millón de guarani) oñeñangareko hag̃ua umi misionérore. Upéicha rupi, haʼekuéra ikatu oipurupaite itiémpo ha iñenerhía pe predikasiónpe, ha avei omombarete hag̃ua umi ermanokuéra oĩva ikongregasiónpe.

¿Mbaʼeichaite pevépa umi misionéro oipytyvõ hína predikasiónpe? Frank Madsen, oservíva pe Komite de Sukursál de Maláwipe, heʼi: “Umi misionéro ningo ivale ha ikyreʼỹ. Upévare oipytyvõ umi kongregasiónpe oñepyrũ hag̃ua opredika umi território ijetuʼúvape, por ehémplo umi várrio serrádo ha umi lugár oñeñeʼẽhápe ótro idióma. Haʼekuérango oñehaʼãmbaite avei oaprende pe idióma ha pe kultúra ojerekóva pe lugár ohohápe oservi, ha upéva omokyreʼỹeterei umi ótrope. Iñehemplokuéra oipytyvõ avei umi imitãvape oñepyrũse hag̃ua oservi de tiémpo kompléto. Roagradeseterei ningo Jehovápe omeʼẽ haguére oréve umi misionéro”.

Peteĩ ermáno oĩva avei pe Komite de Sukursálpe ótro paíspe heʼi: “Umi misionéro ningo ohechauka porãiterei Jehová puévlo iñunidoha, tahaʼe haʼéva la ñande país. Umi ndahaʼéiva Testígo jepe opilla de ke jarekóramo jepe diferénte kultúra, upéva nañandedividiriha. Haʼekuéra ohechakuaa la Biblia ñanepytyvõ hague oiko hag̃ua ñandehegui peteĩ família iñunídova”.

¿Mbaʼéichapa umi misionéro oipytyvõ umi ermanokuérape? Paulo, peteĩ ermáno oikóva Timor Orientálpe, omombaʼeterei umi misionéro oĩvape ikongregasiónpe. Haʼe heʼi: “Ko lugárpe ningo hakueterei, haku voi ave. Péro umi misionéro oúramo jepe peteĩ lugár hoʼysãhágui, haʼekuéra lomímonte opredika hakuetereíramo jepe. Siémpre oĩ hikuái pyharevete pe rreunión ojejapóvape predikasión mboyve. Ha pyʼỹinte ahecha chupekuéra ojapoha rrevisíta la dosete, pe hakuve jave, osino katu pyharekue. Haʼekuéra ningo oipytyvõma hetaiterei persónape oikuaa hag̃ua Jehovápe, umíva apytépe chéve jepe. Ikyreʼỹetereíngo hikuái ha oñemeʼẽmbaite voi Jehová servísiope, upéva omokyreʼỹ pe kongregasión kompletoitépe ojaposeve hag̃ua avei Jehová servísiope”.

Ketti, peteĩ prekursóra rregulár oĩva Maláwipe, omombeʼu mbaʼéichapa peteĩ paréha de misionéro oipytyvõ ifamíliape. Haʼe heʼi: “Ko matrimónio og̃uahẽrõ guare ore kongregasiónpe, che añoite vaʼekue la Testígo ógape. Péro haʼekuéra tuichaiterei chepytyvõ ha oñamigaite la che famíliare. La iñehemplokuéra oipytyvõ che membykuérape ohecha hag̃ua mbaʼeichaitépa javyʼa jaservívo Jehovápe. Upéicha rupi, koʼág̃a mbohapy che membykuñágui oikóma prekursóra rregulár, ha che ména oñepyrũma oasisti rreunionhápe”.

¿Mbaʼéichapa oñepytyvõ umi misionérope okuvri hag̃ua umi gásto orekóva? Upearã ojepuru umi kontrivusión ojejapóva pe óvra mundiálpe. Heta oĩ ojapóva idonasión osegívo peteĩva umi método oñemombeʼúva donate.jw.org-pe. Roagradeseterei ningo peẽme penembaʼeporãiterei haguére pemeʼẽvo pene kontrivusión.