Peteĩ lívro de estúdio ndaijojaháiva

Enero de 2021-pe, pe Kuérpo Governánte oanunsia kuri oĩtaha peteĩ puvlikasión pyahu ñanepytyvõtava jastudia hag̃ua la Biblia. Pe lívro héra ¡Jaikóta vyʼápe pára siémpre!a ¿Mbaʼéichapa nde reñeñandu raʼe rehendúrõ guare upéva? Matthew, oikóva Canadápe, omombeʼu ñandéve mbaʼéichapa haʼe oñeñandu: “¡Impresionánte ko lívro! Ahendúrõ guare umi diskúrso ha ahechárõ guare umi vidéo oexplikáva mbaʼérepa ojejapo ko puvlikasión ha mbaʼéichapa ojejapo kuri, koʼýte chembovyʼavéntema. Ahechasetereíma voi kuri, ha añepyrũséntema voi aipuru”.

Ko puvlikasión oipuru peteĩ método pyahu jajapóta jave umi kúrso bíblico. Péro ndahaʼéi upévante la ombodiferénteva chupe umi ótro lívro ojepurúvagui anteve jastudia hag̃ua la Biblia. Oiméramo repokóma raʼe ko lívro pyahúre, oiméne rehechakuaa oĩha álgo idiferénteva. ¿Reikuaasépa mbaʼépa upéva? La sekréto hína mbaʼéichapa ojejapo raʼe pe lívro.

Peteĩ lívro pyahu idiferénteva

Pe kuatia iñanambusuve. Pe lívro Jaikóta vyʼápe oreko mas de 600 fóto orekóva diferénte kolór, haimete 10 vése hetave la orekóvagui pe lívro ¿Mbaʼépa ñanemboʼe la Biblia? Avei oĩ mimi párte ndorekoihápe fóto ni létra. Upévare ojepurúramo umi kuatia ipererĩva ikatu ojekuaa umi fóto térã palávra oĩva pe páhina kupépe, pórke hesakã pe kuatia. Ani hag̃ua oiko upéva, umi ermáno ombaʼapóva pe Departaménto Internasionál de Impresiónpe (Wallkill, Nueva Yórkpe), otantea 4 diferénte kuatia, ojepurúva jepi voi ñane imprentakuérape. Pe Komite de Rredaksión Kuérpo Governantepegua, oanalisa ha oiporavo pe kuatia iñanambusuvéva, ani hag̃ua hesakãiterei. Upéva ningo 16 por ciento hepyve pe kuatia jaipurúvagui normálmente, péro iñanambusuve rupi, umi estudiánte ndojedistraéi umi fóto oĩvare pe páhina kupépe.

Idiferénte ojeplastifika lája ijape. Pe lívro Jaikóta vyʼápe idiferénte la ijape umi ótro lívrogui, pórke ojepuru peteĩ plastifikádo oprotehéva chupe. Umi ótro lívro ijape overa jepi, péro ko lívro nahániri, péicha pe fóto ojekuaa porãve. Upéva avei oipytyvõ ani hag̃ua pe lívro pyaʼeterei oñembyai, ojepuru meméramo jepe. Péro oreko hag̃ua koichagua plastifikádo ndoveráiva hepyve 5 vése mas pe plastifikádo normálgui. Upévare unas kuánta sukursál ombaʼapo oñondive okonsegi hag̃ua peteĩ plastifikádo ndoveráiva péro varatovéva.

Oiméramo koʼã materiál hepyetereive, ¿mbaʼére upéicharõ ojepuru umíva? Peteĩ ermáno ombaʼapóva Departaménto Internasionál de Impresiónpe oexplika: “Ko lívro ningo heta ojepurúta, upévare roipota osegi iporã heta tiémpore”. Eduardo, ombaʼapóva pe ofisína de impréntape sukursál de Brasílpe, heʼi: “Orembovyʼaiterei roikuaávo pe organisasión oipuruha umi materiál oikoitéva. Upévare jaipurusetereíma voi ko lívro iporã ha imbaretéva. Ha jaikuaa avei ojepuru porãha umi donasión”.

Umi mbaʼe jetuʼu ojehasáva oñeimprimi hag̃ua pe pandémia aja

Pe lívro Jaikóta vyʼápe oñepyrũ kuri oñeimprimi marzo de 2021-pe, pe pandémia de COVID-19 aja. Upévare oĩ heta mbaʼe ijetuʼúva ojehasáva kuri. Betélpe upérõ avave ndaikatúi kuri oike ni osẽ, upévare pe impréntape ndaikatúi oipytyvõ umi voluntário extérno ha ndaikatúi avei oike betelita ipyahúva. Upéicha rupi, sapyʼánte ndaipóri vaʼekue la kantida de ermáno oñekotevẽva. Ha unos kuánto imprénta oñembotýmante por un tiémpo pe goviérno voi ojerure rupi upéva.

¿Mbaʼéichapa oñesolusiona raʼe koʼã provléma? Ikatuha día guive oñeimprimi jey, ojejerure umi betelita ombaʼapóva ótro departaméntope oipytyvõ hag̃ua por un tiémpo pe impréntape. Joel, ombaʼapóva pe Departaménto Internasionál de Impresiónpe, heʼi: “Haʼekuéra ijaktitu porãiterei ha oaprendese voi umi traváho ipyahúva, upéa mediánte ikatu kuri rokumpli porã ore traváho”.

Ojehasáramo jepe koʼã mbaʼe ijetuʼúva ikatúma oñeimprimi hetaiterei lívro, millones voi. Upearã ojepuru hetaiterei materiál, por ehémplo pláncha de impresión, laminádo térã plastifikádo, kuatia, tínta ha pegaménto. Oñepyrũ guive oñeimprimi, 5 mésepente, ojegastáma mas 2,3 millón de dólar koʼã materiálpe. Ikatu hag̃uáicha ojeaorra, roñehaʼãmbaite roimprimi sólamente la oikotevẽvakueténte umi kongregasión.

“Ko lívro haʼe peteĩ rregálo”

¿Mbaʼéichapa oñeñandu umi estudiánte ha umi omboʼéva chupekuéra oipurúvo ko lívro pyahu? Peteĩ ermáno oikóva Austráliape hérava Paul heʼi: “Chegustaiterei pe lívro ¡Jaikóta vyʼápe pára siémpre! Upévare chekyreʼỹeterei voi astudia hag̃ua la Biblia umi héntendi aipurúvo ko lívro. Iñinteresanteterei ningo. Avei oreko umi informasión ifásilva ñantende hag̃ua ha umi porandu ñanemopensáva. Oreko avei vidéo, imáhen, ha umi rrekuádro ha méta oipytyvõva umi estudiántepe. Ko lívro haʼe peteĩ rregálo ha aikuaa chepytyvõtaha aporomboʼe porãve hag̃ua”.

Peteĩ estudiánte oikóva Estados Unídospe heʼi: “Chegustaiterei ningo ko lívro pyahu. Umi fóto orekóva chepytyvõ antende porãve hag̃ua mbaʼépa la omboʼeséva. Umi vidéo katu opoko pe che korasõre ha chemokyreʼỹ ajapo hag̃ua la ahecháva upépe”. Ko estudiánte oho entéro umi rreunionhápe ha ostudia 2 vése por semána.

Ofalta gueteri oñeimprimi ko lívro hetaiterei ha avei hetave idiómape. Ha pe Kuérpo Governánte voi oaprova koʼag̃aitérõ ojetradusi hag̃ua 710 idiómape, upévango 340 mas pe lívro Mbaʼépa ñanemboʼégui.

¿Moõguipa oñeguenohẽ pe pláta ojepaga hag̃ua koʼã mbaʼe? Pe donasión oñemeʼẽva pe óvra mundiál rupive. Heta koʼã donasión ojejapo donate.jw.org rupive. Roagradeseterei ningo peẽme péicha penembaʼeporã haguére. Pemeʼẽ rupi pene donasión, amás día hetave oñeimprimi umi puvlikasión ikatúva oipytyvõ umi persóna oikuaasevévape Jehovápe ha oikoséva vyʼápe pára siémpre (Salmo 22:26).