Oñemosensillove oñeimprimi lája umi puvlikasión

Ñandejára Jehová ningo ‘oipota opaichagua persóna oikuaa porã pe añetegua’ (1 Timoteo 2:3, 4). Péro ñande Testigokuéra ñañeʼẽ diferénte idióma ha umi hénte japredikávape upéichante avei. Upévare káda áño oñeimprimi haimete 2.000 millón de puvlikasión hetaiterei idiómape. ¿Mbaʼéichapa ojepuru porã hína umi donasión oñeimprimi hag̃ua hetaite idiómape?

Oĩ saʼive imprénta, péro umíva iporãve

Ojapo 40 áñorupi oñeimprimi hague umi puvlikasión mas de 40 sukursálpe. Péro upe guive oñeorganisa porãvéma la oñeimprimi lája, ha upéicha rupi koʼág̃a 9 sukursálntema oimprimi. Hiʼarive upe tiémpope ñane puvlikasionkuéra oñeimprimi mas o ménos 165 idiómapente, ¡péro koʼág̃a katu oĩma mas de 1.000 idiómape! ¿Mbaʼéichapa ikatu oñeimprimi hetave idiómape siéndo ke koʼág̃a saʼive oĩ umi imprénta? Pórke iporãve umi imprénta ojerekóva.

Umi imprénta pyahu ningo ipyaʼetereive ha oimprimi hetaitereive puvlikasión. Umi imprénta ojereko vaʼekuépe anteve, oñeimprimimba rire peteĩ puvlikasión, heta ojetarda kuri ojeprepara jey hag̃ua oimprimi hag̃ua ótra puvlikasión térã ótro idiómape. Péro koʼág̃a upe proséso 4 vése voi ipyaʼeve, pórke iporãve umi imprénta ojerekóva. Koʼág̃a ojejapo hetaiteve traváho saʼive tiémpope, umíva apytépe umi puvlikasión natekotevẽiva hetaiterei oñeimprimi oĩ rupi saʼi umi oñeʼẽva upe idióma. Ha káda ke oñeimprimi vaʼerã peteĩ puvlikasión tekotevẽ avei oñekambia umi pláncha de impresión. Ndaʼareiete, un áñopente ojegasta haimete 2 millón de dólar voi umi pláncha de impresiónre.a Upévare noñeimprimihetamoʼãirõ peteĩ puvlikasión, ojepurúnte umi impresóra noikotevẽiva pláncha de impresión. Pórke ojepurúramo koʼãichagua impresóra, umíva apytépe umi oimprimíva a láser, menove kósa oñekotevẽ ha upévare menove ojegasta.

Umi 3 áño ohasa vaʼekuépe, ojepurúma mas de 10 millón de dólar oñemehora hag̃ua umi ekípo ojeguerekóva oñeimprimi ha oñeenkuaderna hag̃ua umi puvlikasión. ¿Mbaʼéichapa ojepuru hína koʼã mbaʼe ojejapo hag̃ua umi Biblia? Anteve umi ermáno ojapo vaʼerã kuri mas de 40 kósa oñeimprimimba rire umi Biblia, por ehémplo tekotevẽ kuri ombovyvy, oikytĩ umi kuatia, orrekorta umi vórde, oliha ha odekora. Hiʼarive ojejapo aja koʼã mbaʼe, umi ermáno pyʼỹinte ojagarra vaʼerã umi Biblia ha omohenda ótro ládo osegi hag̃ua pe sigiénte proséso. Péro koʼág̃a 10 kósantema tekotevẽ umi ermáno ojapo, pórke el rrésto ojapopa umi mákinantema, ha umi sínta transportadóra ogueraha umi Biblia pe lugár oñekotevẽhápe, osegi hag̃ua la iproséso. Upévare ñakomparátarõ entéro umi traváho anteve umi ermáno ojapo vaʼekue, koʼág̃a lamitántema tekotevẽ ojejapo oñeguenohẽ hag̃ua umi Biblia. Pe sukursál de Japónpe anteve oñeenkuaderna vaʼekue 2.000 Biblia káda 8 óra, péro koʼág̃a umi 8 órape oñeenkuaderna 35.000 Bíbliarupi voi.

Menove ojegasta pórke saʼive puvlikasión oñeñongatu

Ojejapo rupi entéro umi kámbio jaʼe vaʼekue, ikatu ojepuru porãve umi donasión oñemeʼẽva. Por ehémplo, koʼág̃a saʼive puvlikasión tekotevẽ oñeñongatu umi depósitope, pórke ikatúma pyaʼeve oñekambia umi pláncha de impresión ha oñeimprimíntema umi puvlikasión asegún oñekotevẽ. Gary, peteĩ ermáno ombaʼapóva pe sukursál de Estados Unídospe, heʼi: “Chéve g̃uarã haʼete kuri mehorvéva oñeimprimíramo umi puvlikasión heta heta ha káda tántonte. Upévare haʼetévaicha naisentídoiva kuri ojeʼérõ guare koʼág̃a oñeimprimitaha saʼi mimíntema péro pyʼỹive”. Ha upéi heʼive: “Pe primer áño ojejapórõ guare upéva, ojegastave kuri 60.000 dólar éntre umi pláncha de impresión ha umi kuatia hemby vaʼekue. Péro amo ipahápe, upe áñope ojeaorra mas de un millón imédio de dólar ojepurúmi vaʼekue oñeñongatu hag̃ua umi kuatia ha umi lívro oñeimprimimba pyréva”. Ha upe ojeaorra vaʼekue ikatu ojepuru hetave mbaʼerã, por ehémplo oñemopuʼã hag̃ua umi Salón del Reino ha oñepytyvõ hag̃ua oiko peteĩ desástre.

Kómo ke koʼág̃a natekotevẽvéima ojepuru hetaiterei espásio oñeñongatu hag̃ua umi puvlikasión, umi lugár anteve ojepuru vaʼekue upearã, koʼág̃a Betel oipuru ótra kosarã. Avei saʼivéma rupi umi sukursál oimprimíva, la majoría umi sukursál ojejapo pyahútava ojepreparántema michĩve. Por ehémplo, umi traváho de impresión anteve ojejapo vaʼekue sukursál de Gran Bretáñape, 2018 guive oñepyrũ kuri ojejapo sukursál de Europa Central ha hetave sukursálpe. Upéicha rupi hetaiterei pláta ojeaorra kuri ojejapórõ guare pe sukursál pyahu Inglatérrape.

“¡Grásiamante nemanduʼa haguére cherehe!”

Jahecháma haguéicha, koʼág̃a ifasilve rupi oñeimprimi umi puvlikasión heta ojeaorra. Péro ndahaʼéi upévante la oñekonsegíva, síno iñimportanteveha hetave persónape ikatu oñepytyvõ oikuaa hag̃ua Jehovápe. ¿Mbaʼérepa jaʼe upéva? Pórke koʼág̃a ikatu oñeimprimi hetave idiómape, inklúso umi ndaiporihápe heta oñeʼẽva upe idióma. Por ehémplo, oĩ 35.000 persónarupinte oñeʼẽva wallisiano, ha haʼekuéra oiko Nueva Caledóniape ha umi Ísla Wallis ha Futúnape. Péro agosto de 2024-pe osẽ kuri pe Traducción del Nuevo Mundo iñidiomapekuéra, ha peteĩ puvlikadóra hérava Selafina heʼi: “Che aleémi vaʼekue la Biblia francéspe, péro oĩ vaʼekue heta palávra nantendéiva. Upévare oñemeʼẽrõ guare chéve la Biblia wallisiánope avyʼaiterei ha cherasẽ voi, ha haʼe Jehovápe: ‘¡Grásiamante nemanduʼa haguére cherehe! Koʼág̃a apilla porãvéntema nde orerayhuha peteĩchapa’”.

República Democrática del Cóngope oĩ ménos de 500.000 persóna oñeʼẽva sanga, péro lomímonte oĩ disponívle upe idiómape pe lívro ¡Jaikóta vyʼápe pára siémpre! Peteĩ ermáno hérava Josué, oservíva peteĩ kongregasión oĩva upe idiómape, heʼi: “Chemanduʼa anteve ijetuʼu hague rejapo hag̃ua estúdio, pórke reexplika térã retradusi vaʼerã kuri ne estudiántepe heta palávra ha fráse oĩva pe lívrope. Ha sapyʼánte ni upeichavérõ la che estudiantekuéra nontendéi vaʼekue. Péro koʼág̃a ojerekóma rupi pe lívro sángape, la che estudiantekuéra ontende porãvéma mbaʼépa omboʼe la Biblia ha natekotevẽvéima aexplikaiterei heta mbaʼe”.

Koʼág̃arupi ningo mas ke núnka oñeimprimi ha oñemog̃uahẽ hína umi puvlikasión hetave héntepe ha hetave idiómape. Ha entéro koʼã mbaʼe ojehupyty pemeʼẽ rupi pene donasión, umíva apytépe umi pejapóva donate.jw.org rupive. ¡Grásiamante péicha pendepojera haguére!