⁹ Jehová okondena avei Satanáspe. Heʼírõ guare mbaʼépa ojehúta chupe, Jehová omombeʼu mbaʼéichapa oisãmbyhýta upe guive, ha upéva rupive omoĩtaha pyʼaguapy opa henda rupi. Ñandejára heʼi Satanáspe: “Kuña ndive romoingo vaíta, ha iñemoñare neñemoñare ndive. Kuña ñemoñare neakãre opyrũta, nde katu rehaʼãta reisuʼu ipytápe” (Génesis 3:15). Ko profesía rupive, Jehová ohechauka omoĩtaha peteĩ “ñemoñare” ohundítava Satanáspe ha umi chupe omoirũvape. Ha upéicha ojehecháta Haʼe añoite orekoha derécho ñanesãmbyhývo (Salmo 2:​7-9; 110:​1, 2).

10. a) Máva mávapa pe “ñemoñare” oñeprometevaʼekue? b) Mbaʼépa heʼi Pablo pe profesía ñepyrũguáre?

¹⁰ Pe ñemoñare haʼevaʼekue Jesucristo ha umi ogovernátava hendive yvágape. Haʼekuéra oñondive oforma pe Ñandejára Rréino (Daniel 7:​13, 14, 27; Mateo 19:28; Lucas 12:32; 22:​28-30). Péro upéva ñepyrũrã ndojekuaaivaʼekue. Upévare apóstol Pablo ohenói ko profesía ñepyrũguápe “mbaʼe ñemi [...] okañyvaʼekue ko yvy oĩ mboyve guive” (Romanos 16:25). Hetaiterei árarema, kuña ha kuimbaʼe jeroviaha ohaʼarõ ojekuaa ko “mbaʼe ñemi”. Ha pe profesía ñepyrũgua heʼiháicha, ojehecháta Jehová añoite orekoha derécho ñanesambyhývo (Romanos 8:​19-21).

Pe “mbaʼe ñemi” hesakã mbeguekatúpe

11. Mbaʼé mbaʼépa Jehová omombeʼu Abrahánpe?

¹¹ Mbeguekatúpe, Jehová omyesakãve heta tapichápe pe ‘mbaʼe ñemi Ñandejára Rréino rehegua’ (Marcos 4:11). Umíva apytépe oĩvaʼekue Abrahán, ‘Jehová amígo’ (Santiago 2:23). Ñandejára heʼi ‘oikotaha chugui peteĩ tetã guasu’. Upe rire heʼi avei chupe iñemoñare apytépe oĩtaha heta rréi. Ha tenondeve katu heʼi chupe: “Ha opa tetã ko yvy arigua ojehovasáta neñemoñare rupi” (Génesis 12:​2, 3; 17:6; 22:​17, 18).

12. Máva mávapa oñemoĩ Satanás ñemoñare ndive dilúvio rire?

¹² Abrahán mboyve, yvyporakuéra oñehaʼãmavaʼekue ogoverna hapichápe. Upéicha ojapo Nemrod, Noé bisnieto. Heʼiháicha la Biblia, ko mymba jukaha oñemoĩva Jehováre oñepyrũvaʼekue ‘oñemombaʼe tavakuérare’ (Génesis 10:​8, 9). Enterove umi hénte oñemombaʼeguasuvaʼekue Nemrod ojapohaguéicha, oñemoĩ Satanás poguýpe. Haʼekuéra ha umi oñemoĩva hendivekuéra oĩ Satanás ñemoñare ndive (1 Juan 5:19).

13. Mbaʼépa Jehová heʼi Jacob rupive?

¹³ Péro ndaipóri ikatu vaʼerã ombyai Ñandejára rembipota, tahaʼe jepe umi Satanás omopuʼãva ogoverna hag̃ua. Jacob rupive, Jehová heʼi: ‘Ndojepeʼamoʼãi Judágui pe autorida ha ndojepeʼamoʼãi avei chugui hetã puʼaka, ou peve Siloh [...] ha hese oñembyatyvaʼerã tetãnguéra’ (Génesis 49:​10, ÑÑM). Péicha ojeʼe ouvaʼerãha peteĩ hérava Siloh, heʼiséva ‘Upe Ijára teéva’. Chupe añoite ikatu oñemeʼẽ oisãmbyhy hag̃ua tetãnguérape. Péro mávapa pe Siloh?

“Ou peve Siloh”

14. Mbaʼe kompromísopa Jehová ojapo David ndive?

¹⁴ Judá famíliagui Jehová oiporavo ypy vaʼekue Davídpe ogoverna hag̃ua Israélpe (1 Samuel 16:​1-13).a Ojavy vaíramo jepe Davíd, Jehová ohayhu chupe ojerovia rupi Hese ha oñemoĩ ipoguýpe. Ñandejára ojapo peteĩ pákto térã kompromíso hendive ha omyesakãve pe profesía oñemeʼẽvaʼekue Edénpe. “Amoĩta peteĩ neñemoñare ha amohendáta chupe nde guapyhápe”. Ko ñemoñare ndojeʼéi David raʼy Salomón rehe añónte. Upéva jaikuaa Ñandejára heʼihaguére: ‘Ha amoĩta chupe iguapyhápe opa ára g̃uarã’. Upe pákto heʼi pe “ñemoñare” oñeprometevaʼekue ouvaʼerãha David famíliagui (2 Samuel 7:​12, 13).

15. Mbaʼérepa ikatu jaʼe pe goviérno oĩvaʼekue Judápe orrepresentahague Ñandejára Rréinope?

¹⁵ David ha enterove umi itaʼýra ogovernavaʼekuére oñeñohẽ ypy vaʼekue aséite iñakãre. Upéva ojapovaʼekue pe saserdóte guasu. Upévare ikatu oñehenói chupekuéra ungido, térã Ñandejára oiporavovaʼekue (1 Samuel 16:13; 2 Samuel 2:4; 5:3; 1 Reyes 1:39). La Biblia heʼi haʼekuéra oguapyhague Jehová trónope ha ogovernaha Ñandejárape g̃uarã Jerusalénpe (2 Crónicas 9:8). Upévare, ikatu jaʼe pe goviérno oĩvaʼekue Judápe orrepresentahague Ñandejára Rréinope, Jehová voi oisãmbyhýgui upéva rupive.

16. Mbaʼéichapa oñehundi pe rréino oĩvaʼekue Judápe?

¹⁶ Upe rréi ha umi hénte iñeʼẽrendu aja Jehovápe, haʼe oñangareko ha omeʼẽ chupekuéra heta mbaʼe porã. Upéicha oikovaʼekue Salomón ogoverna aja. Upérõ oĩvaʼekue pyʼaguapy ha ojeguereko hetaiterei mbaʼe iporãva. Avei, péicha ojehechauka mbaʼéichatapa Ñandejára Goviérno poguýpe. Upépe ndaiporimoʼãvéima Satanás ha umi mbaʼe haʼe oiporúva ha ojehechátama Jehová añoite ikatuha ñanesãmbyhy (1 Reyes 4:​20, 25). Péro jaikuaaháicha, enterove nunga umi rréi ouvaʼekue David famíliagui ndojapói Ñandejára oipotáva. Upévare umi hénte mante heko vai ha omombaʼeguasu taʼangakuérape. Ipahápe, Jehová oheja umi Babiloniaygua ohundi ko rréino 607-pe Jesús ou mboyve. Haʼete ku Satanás ojapovaʼekue oipotáva: omoĩ vai Jehová sãmbyhýpe.

17. Mbaʼéichapa Jehová ohechauka oisãmbyhyha gueteri, oñehundíramo jepe Judá rréino?

¹⁷ Ojehuhaguéicha Israel rréinope, oñehundi avei pe rréino ha umi rréi oĩvaʼekue Judápe. Upéicharamo jepe, upéva ndohechaukái Jehová ndorekoiha derécho ñanesãmbyhývo, térã ogoverna vaiha. Ohechauka uvei umi mbaʼe vai oguerúva oñemboykévo Ñandejárape ha ojejapo Satanás oipotáva (Proverbios 16:25; Jeremías 10:23). Ohechauka hag̃ua Jehová oisãmbyhyha gueteri, heʼi proféta Ezequiel rupive: “Ojepeʼáta ndehegui jeguaka neakã rehegua [...]. Opa mbaʼe ohejáta yvýre ñembyaikuepa. Ha upéva oikóta ou vove ku, che haʼégui chupe, omoĩtava tekojoja” (Ezequiel 21:​26, 27). Upéicha ohechauka pe “ñemoñare” oñeprometevaʼekue ndouiha gueteri.

18. Mbaʼépa ánhel Gabriel heʼi Maríape?

¹⁸ Jahechami koʼág̃a mbaʼépa oikovaʼekue áño 2-pe Jesús ou mboyve. Pe ánhel Gabriel ovisita peteĩ kuñataĩme oikóva Nazarétpe, opytáva nórte gotyo Galiléape. Gabriel heʼi chupe: “Nde ryeguasúta ha nemembýta, ha pe mitã rembohérata Jesús. Haʼe tuicha mbaʼéta ha ojeʼéta hese: ‘[Ñandejára] Yvatetegua Raʼy’. Ha [...] Ñandejára ojapóta chugui mburuvicha guasu, ijypykue Davídcha. Haʼe oisãmbyhýta Jacob retãguápe opa árape g̃uarã” (Lucas 1:​31-33).

19. Onasévo Jesús, mbaʼépa hiʼag̃uimbaitéma?

¹⁹ Hasy peve hesakã porãta pe “mbaʼe ñemi”. Hiʼag̃uimbaitéma pe “ñemoñare” oñeprometevaʼekue (Gálatas 4:4; 1 Timoteo 3:16). ‘Ojesuʼútaramo’ jepe chupe ipytápe, ko “ñemoñare” ojukáta Satanáspe ha upéicha oñehundietéta chupe ha umi hendive oĩvape. Ko “ñemoñare” ohechaukáta avei Ñandejára Rréino omyatyrõtaha opa mbaʼe vai Satanás ojapovaʼekue, ha upéicha ojehecháta Jehová añoite orekoha derécho ñanesãmbyhývo (Hebreos 2:14; 1 Juan 3:8). Péro mbaʼéichapa ojapóta Jesús koʼã mbaʼe? Mbaʼe ehémplopa omoĩ ñandéve? Koʼã mbaʼe ñambohováita pe artíkulo oúvape

Ndépa reñemoĩ Jehová sãmbyhy ykére?

“Opa tetãnguéra rupi tojeʼe: ‘Ñandejára ñande ruvicha guasu hína’.” (SALMO 96:10.)

1, 2. a) Mbaʼe iñimportántevapa oiko pe áño 29-pe? b) Mbaʼéichapa opoko upe mbaʼe Jesús rehe?

PE MÉS de octubre áño 29-pe oikovaʼekue peteĩ mbaʼe ndojehecháiva gueteri. Iñimportanteterei rupi oñemoĩ la Bíbliape, umi cuatro lívrope oñeʼẽva Jesús rekovekuére. Mateo omombeʼu kóicha: “Jesús ojevautisa rire osẽ pe ýgui ha upévo ojepeʼa pe yvága ha Jesús ohecha pe Ñandejára Espíritu peteĩ pykasúicha oúva oguejy hiʼári. Upérõ oñehendu peteĩ ñeʼẽ yvágagui heʼiva: ‘Kóva haʼe che Raʼy ahayhuetéva, [che aiporavovaʼekue]’” (Mateo 3:​16, 17, BNP; Marcos 1:​9- 11; Lucas 3:​21, 22; Juan 1:​32-34).

² Ohechávo Jesús pe espíritu sánto oguejyha hese, hesakã porãiterei Ñandejára oiporavohague chupe, ha péicha oiko chugui Mesías térã Cristo (Juan 1:33). Hasy peve ou pe “ñemoñare” oñeprometevaʼekue! Péina, Juan el Bautista renondépe oĩ pe kuimbaʼe Satanás ‘oisuʼútava ipytápe’. Péro haʼe opyrũta Satanás akãre, pe oñemoĩ mbaretevéva Jehováre ha isãmbyhýre (Génesis 3:15). Upe guive, Jesús oikuaa porãma mbaʼépa ojapóta. Ojapopaitevaʼerã Jehová rembipota ojehecha hag̃ua Haʼe añoite orekoha derécho ñanesãmbyhývo Irréino rupive.

3. Mbaʼéichapa ojeprepara Jesús ojapopaite hag̃ua Jehová rembipota ha oñemoĩ Jehová ykére?

³ Ojapo hag̃ua upe mbaʼe, “Jesús, [henyhẽva] Espíritu Sántogui ojevy Jordán ysyrýgui ha Espíritu Santo ogueraha ichupe peteĩ desiertohápe” (Lucas 4:​1, BNP; Marcos 1:12). Umi cuarenta día ohasa aja haʼeñohápe, heta ojepyʼamongeta mbaʼéichapa Satanás oñemoĩ Jehová sãmbyhýre, ha mbaʼépa haʼe ojapovaʼerã oñemyatyrõ hag̃ua upe mbaʼe. Upépe oikepaite avei enterove yvypóra ha umi yvágape oĩva. Upévare iporã jahecha mbaʼépa ojaporakaʼe Jesús, ha jahecha avei mbaʼépa jajapovaʼerã ñande ñañemoĩ hag̃ua Jehová ykére (Job 1:​6-12; 2:​2-6).

Jesús ombohovái Satanáspe

4. Mbaʼépa ojapo Satanás oipotágui Jesús omboyke Ñandejára sãmbyhy?

⁴ Jaikuaaháicha, koʼã mbaʼe ohecha avei Satanás ha nohaʼarõi oataka hag̃ua Jesúspe, pe “kuña” yvagapegua “ñemoñare” (Génesis 3:15). Satanás omoĩ Jesús renondépe mbohapy mbaʼe ohejauka hag̃ua chupe Itúva rembipota, ha ojapo hag̃ua haʼe ojaposévante. Pe mbohapyhápe Satanás oipota Jesús omboyke Ñandejára sãmbyhy. Ohechaukapa rire Jesúspe “umi tetã yvy arigua, ha umi mbaʼeta ipype oĩva”, Satanás heʼi chupe: “Ameʼẽmbáta ndéve opa koʼã mbaʼe, reñesúramo cherenondépe ha chemombaʼeguasu”. Jesús oikuaavaʼekue “umi tetã yvy arigua” oĩmbaha Satanás poguýpe. Ha ndojapói rupi Satanás heʼíva ohechauka oñemoĩha Jehová ykére. Jesús heʼi chupe: “Tereho koʼágui Satanás. [Ñandejára] ñeʼẽme niko heʼi: ‘[Jehová] nde Jára renondépe reñesũvaʼerã, ha chupe añónte remombaʼeguasuvaʼerã’” (Mateo 4:​8-10).

5. Mbaʼe ijetuʼúvapa ojapovaʼerã Jesús?

⁵ Jesúspe g̃uarã ndaiporivaʼekue iñimportantevéva Jehová sãmbyhýgui, ha odefende oikove aja pukukue. Haʼe oikuaa ojepytasovaʼerãha Ñandejára ykére omanoite peve, ha péicha ohechauka Jehová añoite ikatuha ñanesãmbyhy. Upéicha oñekumplíta pe profesía heʼíva Satanás oisuʼuvaʼerãha ipytápe pe kuña “ñemoñarépe” (Mateo 16:21; 17:12). Avei oikuaaukavaʼerã Ñandejára Rréino rupive Jehová ipuʼakataha Satanás rehe, ha omoĩ jeytaha pyʼaguapy opa henda rupi (Mateo 6:​9, 10). Mbaʼéichapa okumplíta Jesús ko mbaʼe ijetuʼúva?

“Ñandejára rréino hiʼag̃uíma”

6. Mbaʼéichapa Jesús oikuaauka Ñandejára oiporutaha Irréino “ombyai hag̃ua upe [Satanás] ojapovaʼekue”?

⁶ Ojapo hag̃ua Ñandejára heʼivaʼekue chupe, “Jesús omoherakuã oúvo Galiléape [...] Ñandejára [marandu porã], ha heʼi: ‘Pe ára og̃uahẽma, [...] Ñandejára rréino hiʼag̃uíma’” (Marcos 1:​14, 15, BNP). Haʼe voi heʼi upe rire: “Tekotevẽ umi siudakuéra ambuépe avei amoherakuã [...] Ñandejára rréino rehegua ñeʼẽ, upearã niko añembouvaʼekue” (Lucas 4:​18-21, 43, BNP). Ha upeichaite ojapo: oho opa rupi Israélpe “omoherakuãvo [...] Ñandejára rréino rehegua ñeʼẽ” (Lucas 8:​1, BNP). Ojapo avei heta milágro: omongaru hetaitereípe, ojoko ára pochy, omonguera hasývape ha omoingove jey omanovaʼekuépe. Upéicha, Jesús ohechauka Ñandejára ikatuha omyatyrõmbaite umi mbaʼe vai ojejapovaʼekue Edénpe, ha “ombyai hag̃ua upe ojapovaʼekue [Satanás]” (1 Juan 3:8).

7. Maʼerãpa ombokatupyry Jesús hemimboʼekuérape? Ha mbaʼéichapa oho chupekuéra?

⁷ Ikatu hag̃uáicha hetave ohendu pe marandu porã, Jesús ombokatupyry hemimboʼekuérape. Ñepyrũrã oiporavo doce apóstol ha “omondo ichupekuéra oñemoñeʼẽ hag̃ua [...] Ñandejára rréino rehe” (Lucas 9:​1, 2, BNP). Upe rire omondo avei 70 hemimboʼekuéra opredika hag̃ua: “Ñandejára rréinoko oñemoʼag̃uíma” (Lucas 10:​1, 8, 9, BNP). Ojevy rire hikuái ha omombeʼu Jesúspe mbaʼéichapa oho porã chupekuéra, haʼe heʼi: “Che ahecha Satanáspe hoʼáramo yvágagui aratirícha” (Lucas 10:​17, 18).

8. Mbaʼépa ohechauka Jesús umi mbaʼe ojapovaʼekuére?

⁸ Jesús ombaʼapo Ñandejára Rréino rehehápe ára ha pyhare. Upearã omboykevaʼekue heta mbaʼe oikotevẽva jepe. Heʼivaʼekue: “Umi aguara oguereko haity, ha umi guyra yvategua oguereko hupa, ko Yvypóra raʼy katu ndoguerekói moõpa oñenóta opytuʼumi” (Lucas 9:​58, JMP; Marcos 6:31; Juan 4:​31-34). Avei, opredika opa ijahápe chupe. Upéicha, omano mboyvemi Jesús heʼi Pilátope: “Che niko ajuvaʼekue ko Yvy ári haʼe hag̃ua umi mbaʼe añeteguáva” (Juan 18:37). Umi mbaʼe ojapovaʼekuére, Jesús ohechauka ndouihague ko Yvy ape ári oporomboʼe, ojapo milágro térã omano hag̃ua ñanderehehápe añónte. Chupe g̃uarã iñimportanteve omombaʼe Jehová sãmbyhy ha oikuaauka Ñandejára ojapotaha hembipota Irréino rupive (Juan 14:6).

“Oikopáma”

9. Mbaʼéichapa Satanás oisuʼu ipytápe “kuña ñemoñarépe”?

⁹ Upe tembiapo ojapovaʼekue Jesús pe Rréino rehehápe, nombovyʼái Satanáspe. Upévare, ojevale umi “iñemoñare” yvyporakuérare omokirirĩ hag̃ua Jesucrístope, haʼéva pe “kuña ñemoñare”. Jesús onase guive ha omano meve, Satanás oñehaʼã ojapo hese mbaʼe vai. Ipahápe, áño 33-pe og̃uahẽ upe ára Jesucristo ‘ojesuʼu hag̃ua ipytápe’ (Mateo 20:​18, 19; Lucas 18:​31-33). Ñandejára Ñeʼẽ omombeʼu porã mbaʼéichapa Satanás oiporu umi héntepe okondena ha ojuka asy hag̃ua Jesúspe peteĩ yvyráre. Umíva apytépe oĩvaʼekue Judas Iscariote, umi saserdóte, fariséo ha romayguakuéra(Hechos 2:​22, 23).

10. Mbaʼépa pe iñimportantevéva ojapovaʼekue Jesús omanórõ guare pe yvyráre?

¹⁰ Mbaʼépa ñapensa ñanemanduʼa jave mbaʼéichapa omano asy vaʼekue Jesús? Ikatu ñanemanduʼa omeʼẽhague hekove ñanderehehápe (Mateo 20:28; Juan 15:13). Ikatu avei jahechakuaa mbaʼeichaitépa Jehová ñanderayhu omboúvo Itaʼýrape omano hag̃ua (Juan 3:16). Térã ikatu jaʼe pe mburuvicha Romaygua heʼihaguéicha: “Kóva niko añetehápe [Ñandejára] Raʼy raʼe” (Mateo 27:54). Entéro koʼã mbaʼe oĩ porãiterei. Péro ñanemanduʼami Jesús heʼivaʼekuére omanombotaitépe: “Oikopáma” (Juan 19:​30, BNP). Mbaʼépa upe oikopamavaʼekue? Añete, Jesús ojapo heta mbaʼe ko Yvy ape ári, ha omanóvo ojehupyty avei heta mbaʼe. Péro jaikuaaháicha, chupe g̃uarã iñimportanteve vaʼekue oñemyesakã porã Jehová añoite ikatuha ñanesãmbyhy. Ha heʼiháicha la Biblia, Satanás heta ombohasa asýta ko ‘ñemoñarépe’ ikatu hag̃ua omopotĩ Jehová réra (Isaías 53:​3-7). Jesús okumplipaitevaʼekue ko mbaʼe. Ajépa tuichaite mbaʼe upéva!

11. Mbaʼépa ojapóta Jesús oñekumplipaite hag̃ua Génesis 3:15?

¹¹ Jesús ndohejái Jehovápe, upévare haʼe omoingove jey chupe, ndahaʼéi yvypóraicha sino “espíritu oporomoingovéva[ramo] (1 Corintios 15:45; 1 Pedro 3:18). Upéi Jehová heʼi Itaʼýrape: “Eguapy che [derécha] gotyo, tamoĩ nepyendáramo umi nderayhuʼỹva” (Salmo 110:1). Umi ‘ohayhuʼỹva’ chupe hína Satanás ha enterove “iñemoñare”. Haʼe rupi Rréi Jehová goviérnope, Jesucristo ohundipaitéta umi opuʼãvape Ñandejárare, toĩ yvágape térã Yvy ape ári (Apocalipsis [Revelación] 12:​7-9; 19:​11-16; 20:​1-3, 10). Upéicha oñekumplipaitéta pe profesía oĩva Génesis 3:​15-pe. Avei Jesús heʼivaʼekue padrenuéstrope: “Tou ne rréino, tojejapo nerembipota yvy ári yvagapeguáicha” (Mateo 6:10; Filipenses 2: 8- 11).