PÁRTE 24
Umi kárta Pablo ohaivaʼekue
Pablo omondo kárta omombarete hag̃ua kristianokuérape
GRIÉGO Kuatiañeʼẽme (térã Nuevo Testaméntope) oĩ 21 kárta ojehaíva omokyreʼỹ ha omombarete hag̃ua kongregasionkuérape. Upérõ ningo umi kongregasión ipyahu gueteri ha heta ojepersegi chupekuéra. Hiʼarive ombohovaivaʼerã provléma iñirũnguéra apytépe jepe.
Umi 14 kárta tenondegua Romanos guive Hebreos peve ohai apóstol Pablo. Haʼe omoĩ voi pe kártare mávapepa omondo, peteĩ ermáno térã peteĩ kongregasiónpe g̃uarã. Jahechamína mbaʼe mbaʼe rehépa oñeʼẽraʼe.
Mbaʼéichapa jaikovaʼerã. Pablo heʼi ‘ndoikemoʼãiha Ñandejára rréinope’ umi hembiapo vaíva ha noñembyasýiva, pór ehémplo hekovaíva térã oporomoakãratĩva (Gálatas 5:19-21; 1 Corintios 6:9-11, BNP). Ñandejára siervokuéra ohayhuvaʼerã enterovépe haʼéramo jepe tetã ambuegua (Romanos 2:11; Efesios 4:1-6). Tekotevẽ avei ipojera ha oipytyvõ iñermanokuérape (2 Corintios 9:7). Pablo heʼi kristianokuérape: “Peñemboʼe mantéke” Jehovápe pende pyʼaite guive (1 Tesalonicenses 5:17; 2 Tesalonicenses 3:1; Filipenses 4:6, 7). Péro Ñandejára ohendu hag̃ua chupekuéra ojeroviavaʼerã hese (Hebreos 11:6).
Mbaʼe konséhopa omeʼẽ Pablo familiakuérape? Menakuérape heʼi ohayhuvaʼerãha hembirekópe haʼekuéra ojehayhuháicha. Tembirekokuéra katu omombaʼevaʼerã iménape ipyʼaite guive. Ñandejára oipota avei mitãnguéra iñeʼẽrendu itúva ha isýpe. Ha tuvakuéra katu ohekomboʼevaʼerã mborayhúpe ifamíliape Jehová oipotaháicha (Efesios 5:22–6:4; Colosenses 3:18-21).
Mbaʼépa Ñandejára rembipota. Pe léi omeʼẽvaʼekue Ñandejára umi Israelguápe Moisés rupive, oipytyvõ chupekuéra og̃uahẽ meve pe Mesías oñeprometevaʼekue. Péro kristianokuéra natekotevẽvéima okumpli upe léi (Gálatas 3:24). Pablo ohaírõ guare Hebreos omombeʼu umi hudíope maʼerãpa oipytyvõraʼe chupekuéra Moisés léi. Omombeʼu avei mbaʼéichapa Jesucristo ojapovaʼekue iñimportánte oiko hag̃ua Jehová rembipota. Ha omyesakã mbaʼéichapa upéi oñekumpli heta mbaʼe pe léipe oĩva. Pór ehémplo umi mymba ojejuka ha oñekuaveʼẽva Jehovápe orrepresenta Jesús rekove omeʼẽvaʼekue oñeperdona hag̃ua ñande pekádo (Hebreos 10:1-4). Haʼe omanóvo natetekotevẽveima ojejapo upe léi heʼíva (Colosenses 2:13-17; Hebreos 8:13).
Mbaʼépa ojejapo kongregasiónpe. Umi omoakãva kongregasión hekoporã ha ojerovia mbarete vaʼerã (1 Timoteo 3:1-10, 12, 13; Tito 1:5-9). Ñandejára siervokuéra oñembyaty meme vaʼerã oñomokyreʼỹ hag̃ua (Hebreos 10:24, 25). Upépe ningo ñañehekomboʼe ha ñamombarete ñande jerovia (1 Corintios 14:26, 31).
Pablo ohaírõ guare pe segunda kárta Timotéope oĩ jey préso Rómape ha ohaʼarõ ojehusga chupe. Saʼi oĩ ipyʼaguasúva ha ohóva hendápe. Pablo oikuaáma ojejukataha ha upévare heʼi: “Hekoitépe niko añorairõ, ipahaite peve añani, ha ndajeíri che jeroviágui” (2 Timoteo 4:7). Oiméne upe riremi ojejukáma chupe. Péro koʼág̃a peve umi kárta ohaivaʼekue oipytyvõ gueteri Ñandejára siervokuérape iñeʼẽrendu hag̃ua chupe.
(Oñeguenohẽ Romanos, 1 Corintios, 2 Corintios, Gálatas, Efesios, Filipenses, Colosenses, 1 Tesalonicenses, 2 Tesalonicenses, 1 Timoteo, 2 Timoteo, Tito, Filemón ha Hebreos kuatiañeʼẽgui.)