Sofía: Vuéno. “Pe mbói haʼe vaʼekue pe imañerovéva opaite animál Ñandejára Jehová ojapo vaʼekue apytépe. Upéi pe mbói heʼi pe kuñáme: ‘¿Añetéiko Ñandejára heʼi peẽme ndovaleiha peʼu umi yvyramáta hiʼávagui oĩva guive ko hardínpe?’. Upémarõ pe kuña heʼi pe mbóipe: ‘Umi yva orekóva umi yvyramáta oĩva guive ko hardínpe ningo ore ikatu roʼu. Péro pe yvyramáta oĩvare hardín mbytépe, Ñandejára heʼíma oréve: “Aníke peʼu hiʼa, ha animoʼãke pepoko hese, cháke pejapóramo upéva, pemanóta” ’. Upépe pe mbói heʼi pe kuñáme: ‘Peẽ ningo ni mbaʼevéicharõ napemanomoʼãi. Ñandejára oikuaa porã peʼuha árape pe yva pejesapeʼataha, ha pejoguáta Ñandejárape ha peikuaáta mbaʼépa iporã ha mbaʼépa ivai’ ”.

Miguela: Upeichaite. Péro upéi Satanás heʼíma álgo oheja vai hag̃ua Ñandejárape. Emañamína la heʼi vaʼekue: “Peẽ ningo ni mbaʼevéicharõ napemanomoʼãi”. Koʼápe Satanás heʼíma Ñandejárare ijapuha.

Sofía: ¡Eʼa nde! Che nahendúiva péva ántes.

Miguela: Ha Satanás heʼírõ guare Ñandejárare ijapuha, tekotevẽtamante kuri ohasa tiémpo ojehechauka hag̃ua ndasiertoiha upéva. ¿Epillápa mbaʼérepa?

Sofía: Ndapillái legálmente.

Miguela: Ñantende hag̃ua ikatu ñamoĩmi peteĩ ehémplo. Eñeimahinamína che haʼeha chembareteveha ndehegui, ¿mbaʼéichapa ikatu jaikuaa siértopa upéva?

Sofía: Chéverõ g̃uarã jajapómante vaʼerã peteĩ pruéva.

Miguela: ¡Ajépa! Por ehémplo ikatu jahecha álgo ipohýiva ha jahecha mavaitévapa ikatu ohupi. Jajapo rire upéva jaikuaátama mávapa imbareteve. Legálmente ndahasyiete japilla hag̃ua upéva.

Sofía: Hẽe, apilla la ereséva.

Miguela: Péro ñamoĩ chupe koʼág̃a haʼeha nde naneonrradaiha. Upéva ótra kosaitéma, ¿ajépa?

Sofía: Si, péva ja ideʼótroma.

Miguela: Pórke jaikuaa hag̃ua peteĩ persónapa iñonrrádo ndaikatúi jajapónte peteĩ pruéva ha ja ovaléma.

Sofía: Si, siérto.

Miguela: Añetehápe ohasámante vaʼerã tiémpo, pórke upéicha entéro ikatúta ohecha la rejapóva, ha oikuaáta neonrradaha.

Sofía: Legálmente isentído upéva.

Miguela: Ñapensami jeýna koʼág̃a la heʼívare Génesispe. ¿Heʼípa raʼe Satanás haʼe imbarete ha ipoderosoveha Ñandejáragui?

Sofía: No.

Miguela: Upéicharire ningo Ñandejára ikatúta kuri sapyʼaitépe ohechauka haʼe ipoderosoveha chugui. Upéva rangue, Satanás heʼi Ñandejárare naiñonrradoiha, pórke ndeʼipái chupekuéra la verda. Haʼete ku heʼíva Évape: “Ñandejára ningo ijapu peẽme, péro che cheonrrádo ha haʼe peẽme la verda”.

Sofía: Eʼa, che ndaikuaáiva upéva.

Miguela: Iñinteresánte, ¿ajépa? Péro Ñandejára iñarandueterei, ha oikuaa porã vaʼekue ohejámante vaʼerãha ohasa tiémpo ojepilla hag̃ua mávapa heʼi la verda ha mávapa ijapu.