Jehová siervokuéra omombaʼeterei pe hustísia

1. ¿Mbaʼe pruévapa ombohovái vaʼekue José, ha mbaʼéichapa haʼe orreaksiona vaʼekue?

JACOB raʼy José ningo ombohovái vaʼekue heta pruéva ijetuʼuetereíva. Peteĩ vuéltape, peteĩ kuñakarai heʼi vaʼekue chupe: “Ejúna eñeno chendive”. Upéva haʼe vaʼekue ipatrón Potifar rembireko. Péro José orrechasa chupe. Upévare ikatu oĩ álgien oñeporandúva koʼág̃arupi: “¿Mbaʼére piko José ojejoko vaʼekue ani hag̃ua ojapo upéva?”. Potifar ningo ndaipóri vaʼekue hógape, ha José katu haʼe vaʼekue peteĩ esklávo upe ógape. Ha ikatu kuri pe kuñakarai ojapo heta mbaʼe Josére ombosufri hag̃ua chupe noñenoséi haguére hendive. Upéicharõ jepe, José osegi orrechasa chupe pe kuñakarai heta vése heʼíramo jepe oreko hag̃ua hendive rrelasión sexuál. ¿Mbaʼérepa? José heʼi: “¿Mbaʼéichaiko ajapóta ko mbaʼe vaiete ha péicha apeka Ñandejára renondépe?” (Gén. 39:7-12).

2. ¿Mbaʼéichapa José oikuaa rakaʼe peteĩ oporomoakãratĩva opekaha hína Ñandejára renondépe?

² ¿Mbaʼéicha piko José oikuaa vaʼekue Ñandejára renondépe peteĩ oporomoakãratĩva ‘ojapoha peteĩ mbaʼe ivaietereíva’? Moisés léipe oĩ vaʼekue ko mandamiénto: “Ani remoakãratĩ ne ména térã ne rembirekópe”, ha upe léi oñemeʼẽ vaʼekue umi israelítape amo 200 áño upe riréma (Éx. 20:14). Upéicharõ jepe, José ohechakuaa vaʼekue Jehová renondépe oĩ vaiha pe ñemoakãratĩ. Por ehémplo, José katuete oikuaáne rakaʼe Jehová oforma hague pe matrimónio oĩ hag̃ua peteĩ kuimbaʼe ha peteĩ kuñánte, ha oiméne oikuaa rakaʼe avei mbaʼéichapa Jehová oprotehe vaʼekue ivisavuéla Sárape osegi hag̃ua ifiél iménape. Upéicha avei Jehová oprotehe vaʼekue Isaac rembireko Rebécape (Gén. 2:24; 12:14-20; 20:2-7; 26:6-11). José oiméne ojepyʼamongeta rakaʼe koʼã mbaʼére ha ohechakuaa mbaʼépa la oĩ porãva ha oĩ vaíva Ñandejárape g̃uarã. José ningo ohayhu vaʼekue Jehovápe, upévare haʼe omombaʼe la Jehová heʼíva oĩ porãha ha ojedesidi ojapotaha umíva.

3. ¿Mbaʼépa jahecháta ko artíkulope?

³ ¿Ndépa emombaʼe hína pe hustísia? Katuete ningo. Péro enterove ñaneimperfékto ha jajedeskuidáramo ifasileterei hína ova hag̃ua ñanderehe mbaʼéichapa ko múndo ohecha pe hustísia (Is. 5:20; Rom. 12:2). Upévare koʼág̃a ñaanalisáta mbaʼépa heʼise pe hustísia, ha mbaʼéichapa ikatu jaiko porãve javaloráramo la oĩ porãva. Upéi jahecháta avei mbohapy mbaʼe ikatúva ñanepytyvõ amás día ñamombaʼeve hag̃ua la Jehová oipotáva jajapo.

¿MBAʼÉPA HEʼISE PETEĨ PERSÓNA IHUSTOHA?

4. ¿Mbaʼépa heta oĩ opensáva imanduʼa jave peteĩ persóna ihústovare?

⁴ Ojeʼe jave peteĩ persóna ihustoha heta oĩ opensáva peichagua persóna haʼeha álgien ijorgullósova, oporohusgáva, térã opensáva haʼe ivaleveha hapichakuéragui. Péro Ñandejárape ningo ndogustaiete umichagua kualida. Jesús oúrõ guare ko yvy ápe ári, ojaʼo vaʼekue umi líder rrelihióso upe tiempopeguápe, pórke haʼekuéra heʼi mbaʼépa la oĩ porãva asegún la opensávante hikuái (Ecl. 7:16; Luc. 16:15). Péro peteĩ persóna añetehápe ihústova ojapo umi mbaʼe Jehová heʼíva oĩ porãha, ha núnka nopensái ijehe ivaleveha hapichakuéragui.

5. Ohechaukaháicha la Biblia, ¿mbaʼépa heʼise peteĩ persóna ihustoha? Emoĩ peteĩ ehémplo.

⁵ Jaguerohoryeterei ningo peteĩ persóna ihústovape. Peteĩ persóna ihústova heʼise ojapoha umi mbaʼe iporãva Jehová renondépe. La Bíbliape ojepuru jave pe palávra ihústova heʼise jepi upe persóna oikoha Jehová omandaháicha. Por ehémplo, Jehová omanda vaʼekue umi komersiántepe oipuru hag̃ua umi pésa ‘ijexáktova’ (Deut. 25:15). Pe palávra hebrea ojepurúva koʼápe ha ojetradusíva “exákto” ikatu avei ojetradusi “hústo”. Upéicharõ peteĩ kristiáno ihustoséva Ñandejára renondépe noporombotavymoʼãi ojapo jave negósio, ijexáktota entéro mbaʼépe. Peteĩ persóna ihústova ningo ndohechaseiete voi oĩ jave oporotratáva inhústamente. Ha oipotágui Jehová ‘oguerohory chupe entéro mbaʼépe’, pe persóna añetehápe ihústova ohecháta mbaʼépa Jehová opensa odesidíta jave peteĩ mbaʼe (Col. 1:10).

6. ¿Mbaʼérepa ñakonfia Jehová ikatuha heʼi mbaʼépa iporã ha mbaʼépa ivai? (Isaías 55:8, 9).

⁶ La Biblia oñeʼẽvo Jehováre heʼi hese: “Jehovágui ou pe hustísia” (Jer. 50:7). Ha Jehová haʼe rupi ñande Kreadór haʼe añoite oreko la derécho heʼi hag̃ua mbaʼépa oĩ porã ha mbaʼépa oĩ vai. Ñande katu ñaneimperfékto ha pekadór, upévare ndajaikuaái mbaʼépa iporã ha mbaʼépa ivai. Péro Jehová katu perfékto, haʼe oikuaa porã hína mbaʼépa oĩ porã ha mbaʼépa oĩ vai (Prov. 14:12; elee Isaías 55:8, 9). Upéicharõ jepe, Ñandejára ñandeapo vaʼekue ijoguaháramo. Upévare ñande ikatu jajapo umi mbaʼe heʼíva iporãha (Gén. 1:27). Ha ñande javyʼaiterei voi jajapóvo upéva. Jahayhu rupi ñande Ru yvagapeguápe ñañehaʼãmbaite jasegi iñehémplo opa ikatuháicha (Efes. 5:1).

7. ¿Mbaʼérepa tekotevẽ ojeʼe mbaʼéichapa ojejapo vaʼerã peteĩ mbaʼe? Emoĩ peteĩ ehémplo.

⁷ Ñande ningo jaiko porãve jajapóramo umi mbaʼe Jehová heʼíva iporãha ha ndajajapóiramo la haʼe heʼíva ivaiha. ¿Jahechakuaápa mbaʼérepa? Ñapensamíntena mbaʼépa oikóta káda emprésa de konstruksión omoĩramo umi medída chupekuérante oñantoháva. Ajépa sarambi oikóta la itravahokuéragui. Ha umi doktór ha enfermerakuéra ndosegíriramo umi rrégla heʼíva mbaʼeichagua tratamiéntopa oñemeʼẽ vaʼerã peteĩ pasiéntepe, ikatu hína omano chuguikuéra la ipasiénte. Añetehápe oñemoĩ jave umi rrégla ha ojesegi umíva haʼe hína peteĩ proteksión enterovépe g̃uarã. Upéicha avei ñandeprotehe umi mbaʼe Ñandejára heʼíva oĩ porãha ha oĩ vaiha.

8. ¿Mbaʼeichagua vendisiónpa ohaʼarõ hína umi omombaʼévape umi mbaʼe iporãva?

⁸ Jehová ningo ovendesi umi oñehaʼãvape oiko haʼe omandaháicha. Haʼe opromete voi: “Umi hembiapo porãvape oñemeʼẽta ko yvy, ha oikóta pype opa ára g̃uarã” (Sal. 37:29). Ñapensamíntena mbaʼeichaitépa jaikóta en unida, pyʼaguapýpe ha javyʼáta enterovete oiko vove Jehová oipotaháicha. Jehovápe ningo hiʼãiterei voi ñande jaiko péicha. Ikatu ñakonfia ha ñamombaʼe umi mbaʼe Jehová heʼíva oĩ porãha. ¿Péro mbaʼépa ikatu jajapo javalorave hag̃ua umíva? Jahechamína koʼág̃a mbohapy mbaʼe ikatúva jajapo.

ÑAMOMBAʼEVÉKENA UMI MBAʼE JEHOVÁ HEʼÍVA OĨ PORÃHA

9. ¿Mbaʼépa ñanepytyvõta ñamombaʼe hag̃ua umi mbaʼe oĩ porãva?

⁹ Primero: Ehayhu vaʼerã pe Persóna heʼívape mbaʼépa la oĩ porãva. Ikatu hag̃uáicha ñamombaʼe umi mbaʼe ihústova tekotevẽ avei jahayhuve Jehovápe, pe heʼíva mbaʼépa oĩ porã ha mbaʼépa oĩ vai. Amáske jahayhuve Jehovápe ñañehaʼãséta avei jaiko haʼe omandaháicha. Por ehémplo, Adán ha Eva ohayhúrire Jehovápe, haʼekuéra siémpre okumplíta kuri Jehová léi ihustoitéva (Gén. 3:1-6, 16-19).

10. ¿Mbaʼépa Abrahán ojapo vaʼekue ikatu hag̃uáicha ontende porãve mbaʼéichapa Jehová opensa?

¹⁰ Katuete ningo ñande ndajafallaséi Adán ha Eva ojapo haguéicha. Upéva ndoikomoʼãi ñanderehe jasegíramo jaikuaave Jehovápe, ñamombaʼeve umi ikualida ha ñañehaʼã ñantende mbaʼéichapa haʼe opensa. Jajapóramo upéicha, amás día jahayhuvéta Jehovápe. Ñapensamíntena Abrahán ehémplore. Haʼe añetehápe ohayhu vaʼekue Jehovápe, ha noñemoĩri vaʼekue ikóntrape ijetuʼúrõ guare chupe ontende hag̃ua umi mbaʼe Jehová odesidíva. Upéva rangue haʼe oñehaʼã oikuaa porãve Jehovápe. Por ehémplo, Abrahán oikuaárõ guare Jehová odesidi hague ohunditaha Sodoma ha Gomorra, ñepyrũrã okyhyje vaʼekue ‘pe Hués ohusgáva ko yvy kompletoite ndojapóirõ g̃uarã iporãva’ ha ohundipa umi ihústovape umi iñañávandi. Abrahánpe g̃uarã upéva naisentidoiete vaʼekue. Péro haʼe iñumílde ha oporandu Jehovápe heta mbaʼe upe kásope. Jehová katu ipasiénsia ha okontesta chupe umi porandu. Amo ipahápe, Abrahán ontende Jehová ohechakuaaha mbaʼépa oĩ káda persóna korasõme, ha haʼe núnka ndokastigamoʼãiha peteĩ persóna inoséntepe pe iñañávandi (Gén. 18:20-32).

11. ¿Mbaʼéichapa Abrahán ohechauka vaʼekue ohayhuha Jehovápe ha ojeroviaha hese?

¹¹ Abrahán oñemongetárõ guare Jehovándi Sodoma ha Gomórrare, opokoiterei vaʼekue hese upe konversasión. Haʼe ningo katuete ohayhu ha orrespetave Itúa Jehovápe anteve guarégui. Péro heta áño rire, Abrahán ojecha vaʼekue peteĩ situasión ijetuʼuetereívape ha tekotevẽ haguépe ohechauka ojeroviaha Jehováre. Upérõ Jehová ojerure vaʼekue chupe ojuka hag̃ua sakrifísioramo itaʼýra ohayhuetéva Isaácpe. Péro koʼág̃a Abrahán oikuaa porãvéma avei Jehovápe, upévare ndodudái ni michĩmi ha noporanduvéima mbaʼeve chupe. Abrahán osẽntema oho ojapo hag̃uáicha la Jehová ojeruréva chupe. Upéicharõ jepe, ñañeimahinamíntena la mbaʼeichaitépa oiméne hasy asy rakaʼe chupe ikorasõme ojepreparárõ guare ojapo hag̃ua la Jehová ojeruréva. Abrahán oiméne heta ojepyʼamongeta rakaʼe umi mbaʼe oikuaámavare Jehovágui. Haʼe oikuaa vaʼekue Jehová núnka ndojapomoʼãiha mbaʼeve iñinhústova. Upéi apóstol Pablo heʼi haguéicha, Abrahán ohechakuaa vaʼekue Jehová ikatuha orresusita itaʼýra ohayhuetéva Isaácpe (Heb. 11:17-19). Hiʼarive Jehová oprometéma vaʼekue Isaácgui osẽtaha peteĩ nasión. Ha upe tiémpope Isaac neʼĩra gueteri ifamília. Abrahán ohayhu vaʼekue Jehovápe, upévare ojerovia hese ndojapomoʼãiha mbaʼeve iñinhústova. Ha ijetuʼúramo jepe Abrahánpe, haʼe ojerovia rupi Jehováre, iñeʼẽrendu chupe (Gén. 22:1-12).

12. ¿Mbaʼéichapa ikatu jasegi Abrahán ehémplo? (Salmo 73:28).

¹² ¿Mbaʼépa ikatu jajapo jasegi hag̃ua Abrahán ehémplo? Tekotevẽ jasegi ñaaprende Jehovágui. Ha jajapokuévo upéva ñañemoag̃uivéta Jehováre ha jahayhuvétantema chupe (elee Salmo 73:28). Ñane konsiénsia katu ombaʼapóta ñapensa hag̃ua Jehová opensaháicha (Heb. 5:14). ¿Ha mbaʼe rresultádopa jarekóta jajapóramo péicha? Oĩ jave ojapokaséva ñandéve peteĩ mbaʼe ivaíva ñande jarrechasáta upéva. Ñande ni núnka nañapensamoʼãi jajapóvo peteĩ mbaʼe ombosufrítava ñande Túa Jehovápe ha ombyaítava pe amista jarekóva hendive. Upéicharõ, ¿mbaʼépa avei ikatu jajapo jahechauka hag̃ua ñamombaʼeha umi mbaʼe oĩ porãva?

13. ¿Mbaʼéichapa ikatu jajapo umi mbaʼe ihústova? (Proverbios 15:9).

¹³ Segundo: Káda día ñañehaʼãmbaite jahayhu hag̃ua umi mbaʼe iporãva. Por ehémplo jaipotáramo ñane múskulo imbareteve, ñañehaʼãmbaite vaʼerã jajapo ehersísio káda día. Upéicha avei ñañehaʼãmbaite vaʼerã jahayhu hag̃ua umi mbaʼe Jehová heʼíva iporãha. Ha upéva ndahaʼéi la ijetuʼuetereíva jajapo hag̃ua káda día. Jehová ningo ijekilivrádo ha núnka ndojeruremoʼãi ñandéve peteĩ mbaʼe ndaikatumoʼãiva jajapo (Sal. 103:14). Haʼe oasegura voi ñandéve ‘ohayhuha pe oñehaʼãvape ihústo’ (elee Proverbios 15:9). Ñande ñañehaʼãmbaitéramo jahupyty peteĩ méta Jehová servísiope, jasegi vaʼerã ñañehaʼãmbaite jahupyty hag̃ua upéva. Upéicha avei jajapo vaʼerã umi mbaʼe ihústova. Jehová ipasiénsia ha ñanepytyvõta japrogresa hag̃ua ha amás día ñamehorave hag̃ua jahávo (Sal. 84:5, 7).

14. ¿Mbaʼépa hína upe ‘omoʼãva ñande pytiʼa hustísiape’, ha mbaʼérepa ñaikotevẽ upéva?

¹⁴ Jehová ningo mborayhúpe ñanemomanduʼa ndahaʼeiha la hasyetereíva jajapo umi mbaʼe haʼe heʼíva iporãha (1 Juan 5:3). Umíva ningo ñandeprotehe, ha ñande ñaikotevẽ voi káda día upe proteksión. Ñanemanduʼamínte pe armadúra Pablo oñeʼẽ vaʼekuére (Efes. 6:14-18). ¿Mbaʼe pártepa upe armadúragui oprotehe ñane korasõ? Pe párte ‘omoʼãva ñande pytiʼa hustísiape’, ha upéva orrepresenta hína umi mbaʼe Jehová odesidíva iporãha. Upe párte pe armadúragui oproteheháicha ñane korasõ, upéicha avei umi mbaʼe Jehová heʼíva oĩ porãha oprotehe ñane korasõ térã mbaʼeichagua persónapa ñande ñande pyʼapýpe. Upéicharõ iñimportanteterei hína ñamoĩ pe armadúra orekóva pe párte omoʼãva ñande pytiʼa hustísiape (Prov. 4:23).

15. ¿Mbaʼéichapa ikatu ‘ñamoʼã ñande pytiʼa hustísiape’?

¹⁵ ¿Mbaʼépa ikatu jajapo ‘ñamoʼã hag̃ua ñande pytiʼa hustísiape’? Ikatu hína jajapo upéva jarekóvo enkuénta mbaʼépa Ñandejára oipota jajapo, káda día jadesidíta jave peteĩ mbaʼe. Por ehémplo, jadesidi jave mbaʼérepa ñañemongetáta, mbaʼe músikapa ñahendúta, mbaʼépa jahecháta télepe térã mbaʼe lívropa jaleéta. Upéicha jave ñañeporandumi vaʼerã: “¿Mbaʼépa amoingéta hína che korasõme? ¿Jehová piko oguerohorýta ko mbaʼe? ¿Térãpa chemomýita hína cherekovai hag̃ua, cheviolénto, chetaryrýi ha cheegoísta hag̃ua?”. Koʼã mbaʼére ningo Jehová heʼi ivaiha (Filip. 4:8). Umi mbaʼe jadesidíva oĩ porãramo Jehová renondépe, japrotehéta hína ñane korasõ umi mbaʼe vai ikatúvagui ñandeafekta.

16, 17. ¿Mbaʼéichapa Isaías 48:18 oasegura ndéve ikatuha eiko pára siémpre Jehová omandaháicha?

¹⁶ ¿Ndépa ejepyʼapy epensávo esegítapa eiko Jehová omandaháicha káda día, káda áño ohasáva? Jahechamína peteĩ ehémplo Jehová oipuru vaʼekue ha jatopáva Isaías 48:18-pe (elee). Jehová opromete vaʼekue pe ‘ñande hustísia ojoguataha umi oláda marpeguápe’. Eñeimahinamíntena eimeha pe mar oríllape ha emañaha umi oláda ou ha ohóvare, núnka voi ndopáivare. Katuete ningo nembopyʼaguapýta peichagua lugár. Ha eime jave peichagua lugár itrankiloitévape, ¿eñekevrantátapa peteĩ díape opárõ g̃uarã umi oláda? Nahániri, nde eikuaa hetaiterei áñorema umi oláda og̃uahẽha pe y oríllape, ha reime segúro osegitaha péicha.

¹⁷ ¿Péro mbaʼéichapa nde hustísia ikatu ojogua umi oláda marpeguápe? Nde edesidíta jave peteĩ mbaʼe, primero ereko vaʼerã enkuénta mbaʼépa Jehová oipota rejapo. Upéi emoĩ en práktika upéva. Ijetuʼuetereíramo jepe upe mbaʼe redesidítava, nde Túa Jehová nderayhuetéva siémpre oĩta nde ykére ikatu hag̃uáicha nemombarete ha nepytyvõ rejapo hag̃ua umi mbaʼe iporãva káda día (Is. 40:29-31).

18. ¿Mbaʼérepa ndovaléi jaiko jahusga ótrope asegún umi mbaʼe ñande ñapensávante?

¹⁸ Tercero: Jaheja Jehovápe tohusga umi ótro ojapóvapa oĩ porã hína térãpa nahániri. Ñande ningo ñañehaʼãse jaiko Jehová omandaháicha, ha upéva jajapokuévo ndajaikoséi japorohusga ha ñapensa ñandejehe ñandehustoitereiha. Ndovaléi ñakompara umi mbaʼe jajapóva umi ótro ojapóvare, ha ñapensa ñandevaleveha chuguikuéra. Ñande ningo ndajarekói derécho jahusga hag̃ua umi ótropa ojapo hína Jehová ohaʼarõva chuguikuéra. Ñanemanduʼa vaʼerã Jehová haʼeha “pe Hués ohusgáva ko yvy kompletoite” (Gén. 18:25). Jehová ningo ndohejái ñande kárgope japorohusga hag̃ua. Upévare Jesús heʼi vaʼekue voi: “Anive pehusga pende rapichápe, ha Ñandejára napendehusgamoʼãi avei” (Mat. 7:1).b

19. ¿Mbaʼéichapa José ojerovia vaʼekue Jehováre oporohusga hag̃ua?

¹⁹ Jahechami jeýna peteĩ kuimbaʼe ihústova ehémplo. Haʼe héra vaʼekue José. Haʼe ndoikói vaʼekue ohusga ótrope, ni umi otrata vai vaʼekuépe jepe chupe. Umi iñermanokuéra ombyepoti ha ovende chupe esklávoramo, ha ogueroviaka ituakuérape José omano hague. Heta áño rire José ojotopa jey ifamiliakuérandi. Upérõ guare José haʼéma vaʼekue peteĩ governánte ipoderósova, upévare ikatu kuri okastiga pohýi iñermanokuérape ha ohecha mbaʼéichapa oñevengáta hesekuéra. Umi iñermanokuéra katu okyhyje chugui ojapórõ g̃uarã upéva. Hiʼarive haʼekuéra ipyʼaite guive ombyasy kuri la ojapo vaʼekue. Péro José oasegura chupekuéra: “Anína pekyhyje. Chéngo ndahaʼéi Ñandejára aporohusga hag̃ua” (Gén. 37:18-20, 27, 28, 31-35; 50:15-21). José ningo iñumílde vaʼekue ha ohechakuaa Jehová añoite oguerekoha derécho ohusgávo iñermanokuérape.

20, 21. ¿Mbaʼépa ikatu jajapo ani hag̃ua ñapensa ñande ñandehustoitereiha?

²⁰ José ojapo haguéicha, ñande avei jaheja Jehová kárgope oporohusga. Por ehémplo, ñande ndajadudái mbaʼérepa ñane ermanokuéra ojapo umi mbaʼe ojapóva hína. Ñande ningo ndajaikuaái mbaʼépa oreko ñande rapichakuéra ikorasõme, Jehová añoite hína pe ikatúva ohecha “mbaʼépa oĩ umi hénte korasõme” (Prov. 16:2). Haʼe ningo ohayhu opaichagua persónape, taidiferénte jepe raʼe mbaʼéichapa oñemongakuaa vaʼekue, mbaʼe edukasión ha kultúrapa oreko. Ha Jehová ñanemokyreʼỹ voi ‘jahayhuve hag̃ua’ enterovépe (2 Cor. 6:13). Ñande ningo jahayhuse enterove ñane ermáno ha ermanakuérape, ha ndahaʼéi jaikoséva jahusga chupekuéra.

²¹ Ndovaléi avei jaiko jahusga umi noĩrivape kongregasiónpe (1 Tim. 2:3, 4). Ñandépa ñapensámava peteĩ ñane pariénte ndahaʼéivare Testígo: “Kóva núnka ndoservimoʼãi Jehovápe”. Ndovaléi ningo jajapo upéicha, pórke osino ñañemombaʼeguasúta ha ñapensátama voi ñandejehe ñandehustoveha chugui. Jehová ningo osegi omeʼẽ oportunida ‘enterove yvypórape oñarrepenti hag̃ua’ (Hech. 17:30). Siémprekena ñanemanduʼa Jehovápe g̃uarã pe persóna opensáva ihustoveha ótrogui iñinhustoha hína.

22. ¿Mbaʼérepa jajerresolve ñamombaʼetaha umi mbaʼe Jehová heʼíva iporãha?

²² Ñande ningo ñamombaʼeterei umi mbaʼe Jehová heʼíva oĩ porãha. Ha upéva ñanembovyʼa ha ñanepytyvõ ñamoĩ hag̃ua ehémplo porã ótrope. Péicha haʼekuéra ñanderayhúta ñandéve ha koʼytevéntema ohayhúta Ñandejárape. Siémprekena ‘jaipotaiterei oĩ hustísia’ (Mat. 5:6). Ñaimékena segúro Jehová ohechaha umi mbaʼe porã ñañehaʼãva jajapo ha umi progréso jajapóva. Ko múndope ningo la hénte amás día iñinhustove, péro aníkena ñanedesanima upéva. Ñanemanduʼákena siémpre ‘Jehová ohayhuha umi ihústovape’ (Sal. 146:8).