• “Peikovéta”
    ¡Ojeadora jey vove Jehovápe añoiténte!

    • ‘Umi kanguekue ojoapy uno a uno’

      10. a) ¿Mbaʼépa ojeprofetisa rakaʼe Ñandejára puévlo rehe Ezequiel 37:7, 8-pe? b) ¿Mbaʼe mbaʼépa oiméne omeʼẽ rakaʼe esperánsa umi Ñandejára siérvo ifiélvape?

      10 Yma Jehová oprofetisáma vaʼekue ipuévlo mbeguekatúpe oikove jeytaha (Ezeq. 37:7, 8). ¿Mbaʼe mbaʼépa mbeguekatúpe oipytyvõ vaʼekue umi ifiélvape oĩva prisionéroramo ojerovia jey hag̃ua oho jeytaha Israélpe? Katuete omeʼẽne rakaʼe chupekuéra esperánsa umi promésa ojapo vaʼekue umi proféta ymave guare. Por ehémplo, Isaías oprofetisa vaʼekue “peteĩ desendénsia sagráda” oho jeytaha Israélpe (Is. 6:13; Job 14:7-9). Avei oiméne omeʼẽ rakaʼe chupekuéra esperánsa umi profesía Ezequiel oskrivi vaʼekue, ha heʼíva oho jeytaha hikuái hetãme ha oadora Ñandejárape. Oiméne omeʼẽ avei chupekuéra esperánsa ohechávo oĩha Babilóniape umi Ñandejára siérvo ifiélva, por ehémplo proféta Daniel, ha ohecha avei hikuái mbaʼeichaitépa hoʼa pe goviérno de Babilonia áño 539-pe a.C.

      11, 12. a) ¿Mbaʼéichapa mbeguekatúpe avei oikove jey pe “Israel Ñandejára mbaʼéva”? (Ehecha avei pe rrekuádro “Pe adorasión verdadéra mbeguekatúpe oñepyrũ jey”). b) ¿Mbaʼépa ikatu ñañeporandu jaleévo Ezequiel 37:10?

      11 ¿Mbaʼéichapa mbeguekatúpe avei oikove jey pe “Israel Ñandejára mbaʼéva”, térã umi kristiáno unhído? Hetaiterei áño oĩ rire hikuái prisionéroramo, oiko “peteĩ tyapu, oñehendu umi kanguekue okuʼepa”, ha upéva oiko umi persóna omombaʼéva Ñandejárape odefendérõ guare pe adorasión verdadéra. Por ehémplo, áño 1500 rupi, William Tyndale otradusi peteĩ Biblia ingléspe. Umi omoakãva rrelihión katólika ipochyeterei, pórke koʼág̃a oimeraẽ persónantema ikatúta olee la Biblia. Upéi ipahápe ojejuka Týndalepe. Upéicharõ jepe, heta persóna ipyʼaguasúva osegi otradusi la Biblia heta ótro idiómape, ha péicha mbeguekatúpe heta hetave persónama ikatu kuri olee la Biblia.