Enterovénte oñesorprende ohendúvo mbaʼéichapa Juan opredika, ha avei ohecharamo hikuái mbaʼéichapa oñemonde. Ijao ojejapo kaméllo raguekuégui ha oipuru peteĩ sinturón de kuéro. Avei oñealimenta tuku ha eirete kaʼaguýre. Péro, ¿mbaʼépa pe mensáhe opredikáva? Haʼe heʼi: “Peñarrepentíke, [pórke] pe Rréino yvagapegua hiʼag̃uimbaitéma” (Mateo 3:2).

Pe mensáhe Juan opredikáva opoko umi hénte korasõre. Oĩ heta ohechakuaáva tekotevẽha oñarrepenti, térã okambia vaʼerãha opensa lája ha ohejaite umi mbaʼe vai ojapo vaʼekue. “Umi hénte oĩva Jerusalénpe, ha enterove umi oikóva Judéape ha pe Jordán jerére” oho Juan rendápe (Mateo 3:5). Heta umi oúva hendápe oñarrepenti ha ojevautisa. Juan ovautisávo koʼã persónape, omoñapymiete voi chupekuéra pe rrío Jordánpe. ¿Mbaʼérepa ovautisa umi héntepe?

Añetehápe ningo iñimportanteterei pe mensáhe Juan opredikáva. Haʼe oanunsia: “Peñarrepentíke, cháke pe Rréino yvagapegua hiʼag̃uimbaitéma” (Mateo 3:2). Péicha haʼe ohechauka pe Rréi Jehová omoĩ vaʼekue, haʼéva hína Jesucristo, oñepyrũ potaitemaha hembiapo ko yvy ape ári.