LEKSIÓN 49
¿Mbaʼéichapa ikatu revyʼa nde rogapýpe? (Párte 1)
Umi nóvio omendaha díape ovyʼaiterei, ha opensa voi ovyʼataha péicha tóda la vída. Péro, ¿ikatúne piko ohupyty upéva? Si ikatu. Ha jaikuaa porã upéva siertoha pórke oĩ heta Ñandejára siérvo aréma omenda vaʼekue ha osegíva ovyʼa imatrimóniope, ojapo rupi la Biblia heʼíva. Iñehemplokuéra ohechauka ikatuha javyʼa pára siémpre ñane matrimóniope.
1. ¿Mbaʼe konséhopa la Biblia omeʼẽ menakuérape?
Jehová onkarga pe kuimbaʼépe omoakã hag̃ua ifamília (elee Efesios 5:23). Upévare oipota odesidi umi mbaʼe ou porãtava ifamíliape. La Biblia heʼi menakuérape: “Pesegíkena pehayhu pene rembirekópe” (Efesios 5:25). Upéva heʼise pe kuimbaʼe otrata porã vaʼerãha hembirekópe, tahaʼe oĩ jave haʼekuéra haʼeño térã ótro rovake. Avei oprotehe vaʼerã chupe ha ojapo vaʼerã opa ikatúva omoñeñandu porã hag̃ua hembirekópe ha pono ofalta chupe mbaʼeve (1 Timoteo 5:8). Ha iñimportanteveha, oipytyvõ vaʼerã hembirekópe oñemoag̃uive hag̃ua Jehováre (Mateo 4:4). Upearã ikatu oñemboʼe ha olee la Biblia oñondive. Pe kuimbaʼe ohayhu vaʼerã hembirekópe ha oñangareko hese, upéicharõmante Jehová oipotáta chupe iñamigorã (elee 1 Pedro 3:7).
2. ¿Mbaʼe konséhopa la Biblia omeʼẽ tembirekokuérape?
Efesios 5:33 heʼi tembirekokuéra ‘orrespeta vaʼerãha iménape ipyʼaite guive’. Upearã tekotevẽ opensa umi kualida porã orekóvare iména ha mbaʼeichaitépa oñehaʼã okuida porã hese ha ifamíliare. ¿Mbaʼéichapa ikatu ohechauka orrespetaha iménape? Por ehémplo ikatu oipytyvõ chupe osẽ porã hag̃ua umi mbaʼe odesidíva, avei iñamávle hendive ha oñeʼẽ porã hese umi ótrope, lomímonte oiméramo jepe iména ndoadorái Jehovápe.
3. ¿Mbaʼéichapa umi omendáva ikatu ojogueraha porãve?
La Biblia heʼi umi omendávare: “Mokõivégui oikóta peteĩntema” (Mateo 19:5). Upéva heʼise umi omendáva ndohejái vaʼerãha mbaʼeve omomombyry chupekuéra ojuehegui. Upearã pyʼỹinte ohasa vaʼerã tiémpo oñondive ha omombeʼu porãnte vaʼerã ojupe umi mbaʼe opensáva ha oñandúva. Jaikuaaháicha Jehová hína la iñimportantevéva entérope g̃uarã, péro umi omendávape g̃uarã upéi ja oúma iména térã hembireko. Ha mokõivévante oñatende vaʼerã pono ojepokuaaiterei peteĩ ndahaʼéivare iména térã hembireko.
EJEPYʼAMONGETAMÍNA
Jahechamína umi konsého oĩva la Bíbliape ikatúva oipytyvõ umi omendávape.
4. Ména, ehayhúkena ne rembirekópe ha ekuida hese
La Biblia heʼi menakuéra ‘ohayhu vaʼerãha hembirekópe, haʼekuéra ojehayhuháicha’ (Efesios 5:28, 29). ¿Mbaʼépa heʼise upéva? Ehecha pe VIDÉO, ha upéi erresponde ko porandu:
¿Mbaʼéichapa pe ména ikatu ohechauka ohayhuha hembirekópe ha oñatende porãha hese?
Elee Colosenses 3:12, ha upéi erresponde ko porandu:
¿Mbaʼéichapa peteĩ ména ikatu ohechauka koʼã kualida imatrimóniope?
5. Tembireko, ehayhu ha errespetákena ne ménape
La Biblia heʼi kuñanguéra orrespeta vaʼerãha iménape, tove toservi jepe raʼe Jehovápe térã nahániri. Elee 1 Pedro 3:1, 2, ha upéi erresponde koʼã porandu:
Oiméramo ne ména ndoadoráiti Jehovápe, katuete reipota oiko upéva. ¿Mbaʼépa nde ere oikovetaha: repredikáramo chupe tódo el día térãpa reñehaʼãramo nekondúkta porã ha errespeta chupe? ¿Mbaʼérepa repensa upéicha?
Umi omendáva ikatu odesidi porã oñondive. Péro sapyʼánte ikatu avei pe kuimbaʼe odesidi peteĩ mbaʼe hembirekópe ndogustapáiva. Upéicha jave haʼe trankílo porãnte heʼikuaa iménape mbaʼépa opensa, péro ohechauka vaʼerã orrespetaha chupe, pórke oikuaa Jehová omeʼẽ hague la rresponsavilida iménape odesidi hag̃ua mbaʼépa iporãve ifamíliape g̃uarã. Avei oñehaʼãmbaite vaʼerã oapoja umi mbaʼe iména odesidíva. Ojapóramo entéro koʼã mbaʼe oipytyvõta ojevyʼa hag̃ua hogapýpe. Elee 1 Pedro 3:3-5, ha upéi erresponde ko porandu:
¿Mbaʼéichapa Jehová oñeñandu ohechávo pe tembireko orrespetaha iménape?
6. Umi omendáva ikatu osolusiona umi provléma orekóva
Ndaipóri ningo matrimónio perfékto. Upévare umi omendáva oñopytyvõmante vaʼerã osolusiona hag̃ua umi provléma orekóva. Ehecha pe VIDÉO, ha upéi erresponde koʼã porandu:
Según pe vidéo, ¿mbaʼérepa jaʼekuaa pe matrimónio oñemomombyry hague oikóvo ojuehegui?
¿Mbaʼe mbaʼépa ojapo raʼe hikuái ojogueraha porã jey hag̃ua?
Elee 1 Corintios 10:24 ha Colosenses 3:13. Elee rire káda téxto erresponde ko porandu:
¿Mbaʼéichapa ko konsého ikatu oipytyvõ umi omendávape ojogueraha porãve hag̃ua?
La Biblia heʼi ñamombaʼe vaʼerãha ñande rapichápe, upéva heʼise jatrata porã vaʼerãha peteĩ persónape ha jarrespeta chupe. Elee Romanos 12:10, ha upéi erresponde koʼã porandu:
Peteĩ matrimóniope, ¿máva raẽpa ohechauka vaʼerã omombaʼeha pe ótrope? ¿Mbaʼérepa repensa upéicha?
OĨRAMO HEʼÍVA: “Ore ndorojoguerahaporãvéi yma guaréicha, idiferentete koʼág̃a”.
¿Mbaʼéichapa nde reexplikáne upe persónape la Biblia ikatuha oipytyvõ chupe imatrimóniope?
RRESÚMEN
Umi omendáva ikatu ovyʼa ojoayhúramo, ojorrespetáramo ha ojapóramo la Biblia heʼíva.
Rrepáso
¿Mbaʼépa pe ména ikatu ojapo ojogueraha porãve hag̃ua hembirekóndi?
¿Mbaʼépa pe tembireko ikatu ojapo ojogueraha porãve hag̃ua iménandi?
Oiméramo nde remendáma, ¿mbaʼe konsého oĩva la Bíbliapepa ikatu nepytyvõ pemombareteve hag̃ua pene matrimónio?
EINVESTIGA HAG̃UA
Ehecha umi konsého omeʼẽva la Biblia ikatúva nepytyvõ revyʼa hag̃ua nde rogapýpe.
Ehechamína ko vidéo musikál ohechaukáva mbaʼéichapa Ñandejára ovendesi umi matrimónio iñeʼẽrendúvape chupe.
Ehecha mbaʼépa heʼise pe ména omoakãha hogapy.
“Kuñanguéra, mbaʼérepa peñemoĩvaʼerã umi penemoakãva poguýpe?” (Ñemañaha 15 de mayo de 2010)
Peteĩ matrimónio iprovléma hetaiterei vaʼekue ha ojodivorsia jepe voi, ¿mbaʼépa oipytyvõ chupekuéra osolusiona jey hag̃ua iprovlemakuéra?
Ñandejára orepytyvõ oho porã jey hag̃ua oréve ore matrimóniope (5:14)