Rreferénsia ojepurútava rreunionhápe Mbaʼéichapa Jaiko ha Japredika vaʼerã
3-9 DE JUNIO
TESÓRO OĨVA ÑANDEJÁRA ÑEʼẼME | GÁLATAS 4-6
“Peteĩ ehémplo orrepresentáva peteĩ mbaʼe iñimportánteva ñandéve g̃uarã”
(Gálatas 4:24, 25) Koʼã mbaʼe ohechauka ñandéve umi mbaʼe oikótava amo gotyove; koʼã kuña orrepresenta mokõi kompromíso. Peteĩva ojejapo Sérro Sinaípe, enterove umi oĩva ko kompromísope haʼe tembiguái. Agar orrepresenta ko kompromísope. 25 Agar heʼise Sinaí, peteĩ sérro oĩva Arábiape. Haʼe orrepresenta Jerusalén koʼag̃aguápe, oĩgui tembiguáiramo imembykuérandi.
it-1-S 65 párr. 1
Agar
Apóstol Pablo heʼi kuri Agar orrepresentaha tetã Israel. Pe pákto de la léi rupive ko tetã oĩ vaʼekue unído Jehovándi. Ko pákto ojejapo kuri Sérro Sinaípe, ha “enterove umi oĩva ko kompromísope haʼe tembiguái”. Umi israelita haʼe rupi pekadór ndaikatúi okumpli umi mbaʼe heʼíva pe pákto. Haʼekuéra oĩ aja pe pákto poguýpe ohechakuaa haʼeha pekadór ha omereseha omano. Upévare haʼekuéra ndahaʼéi peteĩ puévlo lívre, síno tembiguái (Jn 8:34; Ro 8:1-3). Jerusalén Pablo tiémpope guare orrepresenta Agárpe, kóva haʼe kuri Israel kapitál ha orrepresenta pe país tuichakuépe, haʼéva kuri esklávo. Péro umi unhído ojeporavóva espíritu sánto rupive ningo haʼe pe “Jerusalén yvagapegua” memby, haʼéva hína Ñandejára rembireko. Ñanemanduʼa Sara haʼe hague peteĩ kuña orekóva liverta, péicha avei pe Jerusalén yvagapegua núnka ndahaʼéi tembiguái. Péro Ismael opersegi haguéicha Isaácpe, Jerusalén membykuéra haʼéva tembiguái, opersegi avei Jerusalén yvagapegua membykuérape (koʼãvape oñemosãso kuri pe Taʼýra rupive). Agar ha imembýpe ningo oñemosẽ kuri, péicha avei Jehová orrechasa tetã Israélpe (Gál 4:21-31; ehecha avei Jn 8:31-40).
(Gálatas 4:26, 27) Péro pe Jerusalén yvagapegua isãso ha haʼe hína ñande sy. 27 Ñandejára Ñeʼẽme heʼi: “Evyʼáke nde kuña ndaikatúiva nememby, esapukái vyʼágui ndereikuaáigui jehasa asy oñandúva umi imembýtava. Pe kuña ojeheja rei vaʼekue ningo hetave imemby pe kuña omendávagui”.
Ejeroviákena nde pyʼaite guive Ñandejára Rréinore
11 Pe pákto Jehová ojapo vaʼekue Abrahán ndive oñekumplíma oñemeʼẽrõ guare Abrahán desendientekuérape pe Yvy Oñepromete vaʼekue. Upéicharõ jepe, la Biblia ohechauka upe kompromíso oñekumpliha avei ótro hendáicha (Gál. 4:22-25). Ñandejára espíritu rupive, apóstol Pablo omombeʼu mbaʼéichapa oñekumpli upéva. Haʼe heʼi Abrahán desendénsia orekoha mokõi párte: pe párte prinsipál haʼéva Cristo, ha pe párte secundaria katu umi 144.000 kristiáno ojeporavo vaʼekue espíritu sánto rupive (Gál. 3:16, 29; Apoc. 5:9, 10; 14:1, 4). ¿Mávapa pe kuña outaha pe desendénsia? Upéva hína pe “Jerusalén yvagapegua” oĩháme Jehová família espirituál iñeʼẽrendúva, térã Jehová organisasión, pe párte oĩva yvágape (Gál. 4:26, 31). Ha oñepromete haguéicha Abrahánpe, upe kuña desendénsia rupive oñevendesíta yvyporakuérape.
(Gálatas 4:28-31) Koʼág̃a che ermanokuéra, ñande hína Ñandejára raʼy pe promésa rupive, Isaac haʼe haguéicha. 29 Upérõ pe onase vaʼekue yvypóra onaseháicha opersegi pe onase vaʼekuépe milágro rupive, ha upeichaite avei oiko koʼág̃a. 30 Upéicharõ jepe, ¿mbaʼépa heʼi Ñandejára Ñeʼẽ? “Emosẽ pe sirviénta ha imembýpe, cháke pe sirviénta memby ni mbaʼevéicharõ ndahaʼemoʼãi eredéro pe kuña isãsóva membýndi.” 31 Upéicharõ che ermanokuéra, ñande ndahaʼéi hína peteĩ sirviénta memby, síno pe kuña isãsóva memby.
Mbaʼépa ñaaprende Ñandejára Ñeʼẽgui
(Gálatas 4:6) Ha koʼág̃a peẽ haʼéma Ñandejára raʼy, upévare Ñandejára omoĩ pe espíritu sánto ñane korasõme. Ko espíritu sánto oñemeʼẽ vaʼekue Itaʼýrape ha ko espíritu sánto rupive ñande jasapukái: “¡Abba, che Ru!”.
Jaikuaave hag̃ua
¿Mbaʼérepa Jesús oñemboʼe jave Jehovápe heʼi “Abba, che Ru”?
Pe ñeʼẽ abba jajuhu tres hendápe la Bíbliape. Ha katuete ojepuru oñeñemboʼe jave ñande Ru Jehovápe. ¿Péro mbaʼérepa jaguerohory Jesús heʼi haguére Ñandejárape “Abba, che Ru”?
Peteĩ Enciclopedia heʼi: “Jesús tiémpope, umi mitã ohenói vaʼekue itúape abba che ru. Péicha ohechauka hikuái ohayhu ha orrespetaha itúape” (The International Standard Bible Encyclopedia). Ha péva raẽvete heʼi umi mitã oñeʼẽ ramóva jepe. Jesús ningo oipuru vaʼekue upe ñeʼẽ oĩrõ guare hardín de Getsemanípe. Upérõ haʼe omano ag̃uietéma ha oñemboʼe asy Jehovápe ipyʼaite guive ha heʼi chupe: “Abba, che Ru” (Marcos 14:36).
Pe Enciclopedia heʼi avei: “Umi Grecia ha Romagua tiémpope umi judío oñeʼẽ jave Ñandejárare umi lívro ha músikape ndoipuruguasúi vaʼekue pe ñeʼẽ abba. Haʼekuéra oimoʼã voi ndojerrespetaiha Ñandejárape ojeʼéramo upéicha”. Upévare ko enciclopedia omyesakãve: “Jesús oñemboʼe jave heʼívo Ñandejárape ‘Abba, che Ru’ ohechauka ñandéve ojogueraha porãitereiha Itúa ndive ha ojoayhuha hikuái”. Upéi apóstol Pablo ohaírõ guare umi Roma ha Galaciaguápe, mokõi hendápe oipuru vaʼekue avei pe ñeʼẽ abba. Upéva ohechauka umi kristiáno ypykue oipuru hague avei oñeʼẽ jave Ñandejárape (Romanos 8:15; Gálatas 4:6).
(Gálatas 6:17) Koʼág̃a guive ani avave chemolesta, arekógui che retére umi márka ohechaukáva che haʼeha Cristo rembiguái.
w10-S 1/11 15
Jaikuaave hag̃ua
¿Mbaʼe rehepa oiméne Pablo oñeʼẽ raʼe heʼírõ guare orekoha ‘umi márka ohechaukáva haʼeha Cristo rembiguái’? (Gálatas 6:17).
▪ Umi kristiáno síglo primérope guare ikatu vaʼekue ontende heta hendáicha la Pablo heʼíva. Por ehémplo, yma oñemarka vaʼekue iérro akúpe umi opytávape prisionéroramo peteĩ gérra rire, umi omondávape pe témplo ha umi esklávo okañysévape. Ko márka opytaitéma vaʼekue pe persóna pirére ha péva pe márka omotĩ chupe.
Péro umi márka ndahaʼéi vaʼekue la ivaíva katuete, síno heta persóna oreko vaʼekue ijehe umi márka ohechauka hag̃ua haʼeha peteĩ trívu térã peteĩ rrelihionpegua. Peteĩ lívrope heʼi: “Yma umi sirio oñemeʼẽ umi dios Hadad ha Atargátispe ha upearã omoĩ márka ipyapýre térã ijajúrare [...]. Umi persóna oadoráva pe dios Dionísiope katu omoĩ ijehe peteĩ márka haʼéva pe plánta hérava iédra raʼanga” (Theological Dictionary of the New Testament).
Umi karai oñeʼẽva umi palávra oĩvare la Bíbliape okalkula Pablo oñeʼẽnte hague umi pere orekóvare hetére oñemaltrata rupi chupe oserviha tiémpope misionéroramo (2 Corintios 11:23-27). Péro Pablo oñeʼẽvo “umi márka” orekóvare haʼe haguére kristiáno, ikatu oime oñeʼẽ hína oiko lájare oservi rupi Ñandejárape, ha ndahaʼéi katuete orekoha márka ojekuaáva hetére.
10-16 DE JUNIO
TESÓRO OĨVA ÑANDEJÁRA ÑEʼẼME | EFESIOS 1-3
“Jehová omoĩ peteĩ administrasión okumpli hag̃ua hembipota”
(Efesios 1:8, 9) Ñandejára imbaʼeporãiterei ñanendive, ha ñanepytyvõ ñanearandu ha ñantende hag̃ua opa mbaʼe. 9 Haʼe ojapo upéva oikuaaukávo umi sekréto marangatu, haʼéva hína hembipota. Ha chupe ogustahaichaite
it-2-S 981 párr. 2
Sekréto marangatu
Pe Mesías goviérno. Pablo omyesakã vaʼekue ikárta rupive pe sekréto marangatu oñeʼẽva Crístore. Efesios 1:9-11-pe heʼi Ñandejára oikuaauka hague hembipota haʼéva peteĩ “sekréto marangatu”. Upépe heʼi: “Haʼe ojapo upéva oikuaaukávo umi sekréto marangatu, haʼéva hína hembipota. Ha chupe ogustahaichaite omoĩ mbaʼéichapa ojedirihíta ha ojejapóta opa mbaʼe. Upéva oikóta oñemohuʼã vove pe tiémpo haʼe omoĩ vaʼekue ombyatypa jey hag̃ua opa mbaʼe oĩva yvágape ha yvy ape ári, ha omoĩ hag̃ua umíva Cristo poguýpe. Ore rojoaju hendive ha rorresivíta avei pe erénsia hendive. Upearã Ñandejára oreporavóma vaʼekue iñepyrũ guive, haʼe ningo ojapo opa mbaʼe odesidiháicha ha haʼe oipotaháicha”. Ko ‘sekréto marangatúpe’ oñeñeʼẽ peteĩ goviérnore, haʼéva Ñandejára Rréino oĩva pe Mesías kárgope. Pablo heʼírõ guare “opa mbaʼe oĩva yvágape” oñeʼẽ hína kuri umi ogovernátavare avei yvágape Crístondi. Ha heʼírõ guare opa mbaʼe oĩva “yvy ape ári”, oñeʼẽ hína kuri entéro yvypóra oikótavare upe goviérno poguýpe. Jesús oikuaauka vaʼekue idisipulokuérape pe sekréto marangatu oñeʼẽha pe Rréinore heʼírõ guare chupekuéra: “Ñandejára penepytyvõ pentende hag̃ua umi sekréto marangatu Irreinopegua” (Mr 4:11).
(Efesios 1:10) omoĩ mbaʼéichapa ojedirihíta ha ojejapóta opa mbaʼe. Upéva oikóta oñemohuʼã vove pe tiémpo haʼe omoĩ vaʼekue ombyatypa jey hag̃ua opa mbaʼe oĩva yvágape ha yvy ape ári, ha omoĩ hag̃ua umíva Cristo poguýpe.
Jehová ombyaty ifamília
3 Jehová ningo ojapo opa mbaʼe okumpli hag̃uáicha hembipota. Upévare “og̃uahẽvo pe ára Ñandejára oiporavo vaʼekue”, omoĩ peteĩ administrasión, térã omoñepyrũ peteĩ tembiapo ikatu hag̃uáicha omoĩ peteĩ ñeʼẽme opa hembiapokue (elee Efesios 1:8-10). Ko tembiapo ojejapo mokõi etápape. Primero, ojeprepara umi kristiáno unhídope oiko hag̃ua yvágape, ha haʼekuéra ombaʼapo meméta upépe Jesucristo poguýpe. Pe primera etápa oñepyrũ Pentekostés áño 33-pe, Jehová oiporavo ñepyrũrõ guare umi oisãmbyhýtavape Jesucristo ndive yvágape (Hech. 2:1-4). Jesucristo sakrifísio rupive, koʼã unhídope ojeguereko hekojojávaramo ha haʼekuéra omerese oikove opa ára g̃uarã. Upéicha rupi oikuaa porã hikuái haʼeha “Ñandejára raʼy” (Rom. 3:23, 24; 5:1; 8:15-17).
4 Pe segunda etápape ojeprepara umi oikótavape peteĩ múndo neporãmba jepévape ko yvy ape ári Jesús goviérno poguýpe. Ko grúpope oike raẽ pe “aty guasu” (Apoc. 7:9, 13-17, ÑÑB; 21:1-5). Ha upéi, Cristo oisãmbyhy vove mil áño rehe, oikéta upe grúpope hetaiterei tapicha oñemoingove jeýva (Apoc. 20:12, 13). Epensamíntena mbaʼeichaitépa ikatúta jahechauka jaikoha peteĩ ñeʼẽme oikove jey vove koʼã tapicha. Og̃uahẽ vove huʼãme umi mil áño “opaite mbaʼe oĩva [...] yvýpe” ohasáta peteĩ pruéva ijetuʼúva, ha umi nomboykéiva guive Jehovápe opytáta ‘Ñandejára raʼýramo’ ko yvy ape ári (Rom. 8:21; Apoc. 20:7, 8).
Mbaʼépa ñaaprende Ñandejára Ñeʼẽgui
(Efesios 3:13) Upévare, ajerure peẽme ani hag̃ua penekangy che ahasa asy haguére penderehehápe, upéva rupive ningo peẽ peñembotuicha hína.
Jahejákena Ñandejára tañanembotuicha
5 Ñañehaʼã meméramo jajapo Jehová rembipota, ñaipytyvõ ñande rapichakuérape ikatu hag̃uáicha Jehová omombaʼe avei chupekuéra. Apóstol Pablo ohai vaʼekue umi kristiáno Efesoguápe: “Ajerure peẽme ani hag̃ua penekangy che ahasa asy haguére penderehehápe, upéva rupive ningo peẽ peñembotuicha hína” (Efes. 3:13). ¿Mbaʼépa heʼise raʼe Pablo upérõ guare? ¿Mbaʼérepa heʼi ombotuichaha koʼã ermánope ohasa asy haguére? Heʼi péicha osegi haguére oipytyvõ chupekuéra, ohasáramo jepe heta mbaʼe ijetuʼuetereíva. Péicha ohechauka iñimportanteveha opa mbaʼégui jaservi Jehovápe. Pablo ikaneʼõ ha ndogueropuʼakáirire umi mbaʼe, umi ermáno opensáta ndorekoiha Jehovápe iñamígoramo ha nomombaʼeiha pe tembiapo omeʼẽ vaʼekue chupe ni pe esperánsa orekóva. Oaguanta rupi, ombotuicha pe kongregasión kristiána ha avei ohechauka umi ermánope oĩ vaʼerãha ogueropuʼaka hag̃uáicha opa mbaʼe Jesucristo réra rehehápe.
(Efesios 3:19) Ha ikatúta avei peikuaa mbaʼéichapa Cristo oporohayhu, upéva tuichave hína opa mbaʼe ikatúvagui jaikuaa. Péicha Ñandejára omeʼẽta peẽme opa mbaʼe porã oúva chugui.
cl-S 299 párr. 21
“Peikuaa mbaʼéichapa Cristo oporohayhu”
21 Pe palávra griega ojetradusíva “peikuaa” heʼise “jaikuaaha umi mbaʼe jahasáva rupive”. Jahayhúramo ñande rapichakuérape Cristo ojapo haguéicha ñañeinteresáta hesekuéra, ñandepyʼaporãta ha ñambohasa reíta ojavy jave. Koʼã mbaʼe ñanepytyvõta ñantende porãve hag̃ua mbaʼéichapa Cristo oñeñandu. Péicha umi mbaʼe jahasáva rupive jaikuaa “mbaʼéichapa Cristo oporohayhu, upéva tuichave hína opa mbaʼe ikatúvagui jaikuaa”. Aníkena arakaʼeve ñanderesarái, amáske jajogua Jesúspe, ñañemoag̃uivetaha Ñandejára ñanderayhuetévare.
17-23 DE JUNIO
TESÓRO OĨVA ÑANDEJÁRA ÑEʼẼME | EFESIOS 4-6
“Pemoĩkena pe armadúra kompletoite oúva Ñandejáragui”
(Efesios 6:11-13) Pemoĩkena pe armadúra kompletoite oúva Ñandejáragui, ikatu hag̃uáicha peñemoĩ mbarete umi ñuhã oipurúvare pe Aña. 12 Ñande ningo nañañorairõi yvypórandi, ñañorairõ guei umi espíritu aña yvagapeguándi; koʼãva haʼe hína umi governánte, autorida ha mburuvicha orekóva ipoguýpe ko múndo oĩva pytũmbýpe. 13 Upévare pemoĩkena pe armadúra kompletoite oúva Ñandejáragui, peñemoĩ mbarete hag̃ua koʼã enemígore haʼekuéra opuʼã vove penderehe, ikatu hag̃uáicha pejepytaso mbarete pekumpli rire opaite mbaʼe.
Mitãrusukuéra, peñemoĩ mbaretéke Satanás kóntrape
APÓSTOL Pablo okompara kristianokuérape umi soldádore. Ñande ningo ñaime peteĩ gérrape, ha añetehápe oexisti hína la ñane enemigokuéra. Péro nañañorairõi yvyporakuéra kóntrape, síno Satanás ha umi demónio kóntrape. Ojapóma hetaiterei tiémpo haʼekuéra oñorairõ hague oikóvo, ha ikatupyryeterei hikuái. Upévare haʼete voi ndajarekóiva posivilida ñagana hag̃ua, ha koʼýte mitãrusukuéra. ¿Péro ikatúpa mitãrusu ha mitãkuña ogana koʼã enemígo ipoderosoitévape? Si ikatu, ha ogana voi hína. ¿Mbaʼérepa jaʼe upéva? Pórke Jehová omombarete chupekuéra upearã. Ojapoháicha umi soldádo oñentrena porãva, mitãrusukuéra omoĩ “pe armadúra kompletoite oúva Ñandejáragui” oĩ hag̃ua preparádo ko gerrarã (elee Efesios 6:10-12).
(Efesios 6:14, 15) Upéicharõ, pejepytaso mbaretékena, ha pelia pende kuʼáre pe añetegua haʼeramoguáicha peteĩ sínto, ha pemoʼã pende pytiʼa hustísiape. 15 Pemoĩ pende pýre pe sandália peho hag̃uáicha pyaʼe pepredika umi marandu porã oñeʼẽva pyʼaguapýre.
Mitãrusukuéra, peñemoĩ mbaretéke Satanás kóntrape
4 Pe sinturóncha avei, pe añetegua ñaaprendéva Ñandejára Ñeʼẽgui ñandeprotehe umi enseñánsa japúgui (Juan 8:31, 32; 1 Juan 4:1). Amáske jahayhu Ñandejára Ñeʼẽ, ifasilvéta ñandéve jajapo hag̃ua Ñandejára omandáva, térã ñamonde hag̃ua pe “pytiʼa moʼãha” (Sal. 111:7, 8; 1 Juan 5:3). Avei, amáske ñantende porãve pe añetegua, ñañedefende porãvéta ñane enemigokuéragui (1 Ped. 3:15).
7 Jehová mandatokuéra oprotehe ñane korasõ térã umi mbaʼe ñapensáva ha ñañandúva. Imandamientokuéra ihústova ikatu ñakompara pe chaléko de metál rehe (Prov. 4:23). Peteĩ soldádo arakaʼeve nokambiáiva la ichaléko de metál ótro chaléko ojejapóvare metál ikangyvévagui. Péicha avei, ñande núnka nañakambiái vaʼerã la Jehová heʼíva umi mbaʼe ñande ñapensávare. ¿Mbaʼérepa? Pórke ñandejehegui rei ndaikatumoʼãi japrotehe ñane korasõ (Prov. 3:5, 6). Upévare pyʼỹinte ñakontrola vaʼerã ñande “chaléko de metál” jahecha hag̃ua oprotehépa hína ñane korasõ.
10 Umi sandália oipurúva umi soldádo romano ideprovécho chupekuéra pe gerrahápe. Pe armadúra espirituál apytépe oĩ avei pe sandália japredika hag̃ua. Péro upéva nañanepytyvõi ñañorairõ hag̃ua, síno jaikuaauka hag̃ua pe mensáhe “oñeʼẽva pyʼaguapýre” (Is. 52:7; Rom. 10:15). Upéicharõ jepe, sapyʼánte tekotevẽ ñandepyʼaguasu japredika hag̃ua. Bo, orekóva 20 áño heʼi: “Che akyhyje vaʼekue apredika hag̃ua che kompañerokuérape, haʼetévaicha chéve la atĩva ajapo hag̃ua upéva. Apensávo upe tiémpore, ndaikuaái mbaʼérepa añeñandu vaʼekue péicha. Koʼág̃a avyʼa ikatu haguére apredika umi che aveguápe”.
(Efesios 6:16, 17) Opa árape peñakarama hatã pende jeroviáre, penemoʼã hag̃ua peteĩ eskúdoicha, péicha ikatúta pembogue opa umi flécha hendýva opoíva penderehe pe aña. 17 Avei pepensa meme pe salvasiónre, ha upéva omoʼãta pene akã peteĩ káskoicha; ha pejagarra pe espáda omeʼẽva pe espíritu sánto, upéva hína Ñandejára Ñeʼẽ.
Mitãrusukuéra, peñemoĩ mbaretéke Satanás kóntrape
13 ¿Mbaʼéicha javépa Satanás opoi ñanderehe “umi flécha hendýva”? Haʼe ikatu ojapo upéva heʼívo heta japu Jehováre. Satanás oipota ñapensa Jehová nañanderayhuiha ha noñeinteresaiha ñanderehe. Ida, orekóva 19 áño heʼi: “Pyʼỹinte añandu Jehová oĩha mombyry chehegui ha ndachepotaiha iñamigarã”. ¿Mbaʼépa ojapo Ida oñeñandu jave péicha? Haʼe heʼi: “Umi rreunión omombareteterei che jerovia. Anteve aguapýnte vaʼekue Salónpe ha nakomentái pórke apensa avave nohendusemoʼãiha la haʼéva. Koʼág̃a katu ajeprepara rreunionrã ha añehaʼã akomenta 2 térã 3 vése. Añetehápe ijetuʼu chéve upéva, péro péicha añeñandu porãve. Avei umi ermáno ha ermána chemokyreʼỹeterei. Umi rreunión chepytyvõiterei añandu hag̃ua Jehová cherayhuha”.
16 Pe kásko ningo oprotehe umi soldádo akã, péicha avei pe esperánsa de “salvasión” ñandeprotehe ñapensa hag̃ua hekoitépe (1 Tes. 5:8; Prov. 3:21). Pe esperánsa jarekóva ñanepytyvõ jajesareko hag̃ua Ñandejára promesakuérare, ha avei ñanepytyvõ ani hag̃ua ñanemokangy ñane provlemakuéra (Sal. 27:1, 14; Hech. 24:15). Péro jaipotáramo pe esperánsa ñandeprotehe, jajerovia vaʼerã hese. Jaʼe porãsérõ g̃uarã, ñamoĩ vaʼerã ñane akãre “peteĩ káskoicha”, jaraha rangue ñande pópente.
20 Apóstol Pablo heʼi Ñandejára Ñeʼẽ ojoguaha peteĩ espádape. Jehová voi ningo omeʼẽ ñandéve upéva. Péicha rupi tekotevẽ ñandekatupyryve jahávo jaexplika hag̃ua ótrope umi mbaʼe jaroviáva, ha avei jakorrehi hag̃ua ñapensa lája (2 Cor. 10:4, 5; 2 Tim. 2:15). ¿Mbaʼéichapa ikatu ñandekatupyryve? Sebastian, orekóva 21 áño heʼi: “Alee jave che Biblia askrivi jepi iguyetépe peteĩ versíkulo de káda kapítulo. Péicha ajapo hína peteĩ lísta umi versíkulo chegustavévagui. Koʼã mbaʼe chepytyvõ apensa hag̃ua Jehová opensaháicha”. Daniel katu heʼi: “Ajapo jave la che lektúra bíblica aiporavo umi versíkulo ikatúva oipytyvõ umi persóna atopávare predikasiónpe. Apilla umi hénte orreaksiona porãveha ohechakuaa jave ñanderehe ñandegustaitereiha la Biblia ha ñañehaʼãmbaiteha hesehapekuéra”.
Mbaʼépa ñaaprende Ñandejára Ñeʼẽgui
(Efesios 4:30) Aníkena avei pemoñembyasy Ñandejára espíritu sánto; upéva rupive ningo Ñandejára omoĩ vaʼekue penderehe peteĩ séllo og̃uahẽ meve pe ára pejesalva hag̃ua Cristo opaga rupi penderehe.
it-2-S 938 párr. 5
Santida
Espíritu Sánto. Jehová odomina pe espíritu térã fuérsa orekóva ha oipuru okumpli hag̃ua hembipota. Ko fuérsa ningo ipotĩ ha imarangatu, ha Ñandejára oaparta oipuru hag̃ua ideprovécho hag̃uáicha. Upévare ojeʼe ko espíriture haʼeha “sánto” térã “espíritu sánto” (Sl 51:11; Lu 11:13; Ro 1:4; Ef 1:13). Pe espíritu sánto ombaʼapo jave peteĩ persónare omomýi chupe hekopotĩ ha hekomarangatu hag̃ua. Péro peteĩ persóna hekokyʼáramo, térã ojapo umi mbaʼe ivaíva, ikatu jaʼe ‘omoñembyasyha’ pe espíritupe térã oñemoĩha hese (Ef 4:30). Pe espíritu sánto ndahaʼéiramo jepe peteĩ persóna ikatu avei ‘oñembyasy’ pórke ohechauka mbaʼéichapa Ñandejára oñeñandu. Jepive umi tembiapo vai “ombogue pe espíritu rata” (1Te 5:19), ha umi tembiapo vai osegíramo, “Ñandejára espíritu sánto oñembyasy”. Upéicha rupi Ñandejárape g̃uarã upe persóna hembiapo vaíva haʼéma peteĩ rrevélde ha oikóma iñenemígoramo (Is 63:10). Umi omoñembyasýva pe espíritu sántope, ikatu voi ou otaky ikóntrape, ha Jesús heʼi haguéicha, upe pekádo noñeperdonamoʼãi koʼág̃a ni amo gotyove (Mt 12:31, 32; Mr 3:28-30; ehecha ESPÍRITU).
(Efesios 5:5) Peẽ peikuaa ko mbaʼe ha pentende porãiterei: ni peteĩ hekovaíva, hekokyʼáva, ni itaryrýiva (upéva heʼise omombaʼeguasúva ñandejára guaʼu) ndoikemoʼãi Cristo ha Ñandejára Rréinope.
it-1-S 255 párr. 5
Taryrýi
Ojekuaa umi mbaʼe jajapóvare. Peteĩ persónare ojekuaa itaryryiha ojapo jave peteĩ mbaʼe ohechaukáva orekoha deséo vai ha oipotaiterei rasapa upéva. Pe eskritór bíblico Santiago heʼi ñañepyrũ jave jaipota térã jajapose peteĩ mbaʼe ivaíva ha ndajaipeʼái upéva ñane akãgui, upe rire japekataha (Snt 1:14, 15). Pe persóna itaryrýivare ojekuaa upeichaha umi mbaʼe ojapóvare. Apóstol Pablo heʼi koʼãichagua tapicha haʼetenteha avei omombaʼeguasúva ñandejára guaʼu (Ef 5:5). Pe persóna itaryrýiva ningo la idiós hína umi mbaʼe haʼe oipotáva térã ojaposéva, ha koʼã mbaʼe iñimportanteve chupe g̃uarã Ijapoharégui ha pe servísio omeʼẽvagui chupe (Ro 1:24, 25).
24-30 DE JUNIO
TESÓRO OĨVA ÑANDEJÁRA ÑEʼẼME | FILIPENSES 1-4
“Ani pejepyʼapyeterei mbaʼevére”
(Filipenses 4:6) Ani pejepyʼapyeterei mbaʼevére, síno opa árape pemombeʼu Ñandejárape peipotáva, pejapo upéva peñemboʼévo, pejerure asývo, ha peagradese avei chupe.
Ñandejára pyʼaguapy tuichave opa mbaʼe ikatúvagui ñantende
10 ¿Mbaʼépa ñanepytyvõta ani hag̃ua jajepyʼapyeterei ha jareko hag̃ua “Ñandejára pyʼaguapy”? Umi mbaʼe Pablo oskrivi vaʼekue umi Filiposguápe ohechauka mbaʼépa ikatu jajapo: ñañemboʼe Jehovápe. Upéicharõ, peteĩ provléma ñanekevrantáramo, ñañemboʼe meme vaʼerã (elee 1 Pedro 5:6, 7). Jajapóvo upéva, ñanemanduʼa vaʼerã Jehová oñeinteresaha ñanderehe ha jaagradese chupe ñanevendesi haguére. Ani ñanderesarái haʼe ikatuha “ojapo hetaitereive mbaʼe jajerure térã ñaimoʼãvagui” (Efes. 3:20).
(Filipenses 4:7) Ha Ñandejára pyʼaguapy tuichavéva opa mbaʼe ikatúvagui pentende, oñangarekóta pene korasõre ha umi mbaʼe pepensávare, Cristo Jesús rupive.
Ñandejára pyʼaguapy tuichave opa mbaʼe ikatúvagui ñantende
7 ¿Mbaʼépa opensa umi ermáno Filiposgua oleérõ guare pe kárta Pablo omondo vaʼekue chupekuéra? Katuete imanduʼáne raʼe Pablo ha Silas rehe oiko vaʼekue, ha mbaʼéichapa Jehová oipytyvõ chupekuéra oñehaʼarõʼỹháicha. ¿Mbaʼépa omboʼese chupekuéra Pablo? Natekotevẽiha ojepyʼapyeterei ha oñemboʼe vaʼerãha ikatu hag̃uáicha Ñandejára omeʼẽ chupekuéra pyʼaguapy. Pablo heʼi kuri Ñandejára pyʼaguapy tuichaveha opa mbaʼe ikatúvagui ñantende. ¿Mbaʼépa heʼise upéva? Oĩ Biblia otradusíva kóicha ko fráse: “tuichaitevéva opa yvy arigua arandúgui”, ha “tuichavéva opa ikatu vaʼerãgui yvypóra ohaʼarõ”. Upéicharõ, koʼápe Pablo heʼise ndaiporiha mbaʼeve ikatúva oñembojoja pe pyʼaguapy Ñandejára omeʼẽvare. ¿Mbaʼépa ñanemboʼe upéva? Sapyʼánte ikatu hína ni ndajaikuaái mbaʼéichapa ñasolusionáta ñane provlemakuéra, péro Jehová si oikuaáma ha ikatu voi ojapo peteĩ mbaʼe ñahaʼarõʼỹva (elee 2 Pedro 2:9).
Ñandejára pyʼaguapy tuichave opa mbaʼe ikatúvagui ñantende
16 ¿Mbaʼéichapa ñanepytyvõ jarresivi jave Ñandejára pyʼaguapy tuichavéva opa mbaʼe ikatúvagui ñantende? La Biblia ombohovái upéva heʼívo: “Oñangarekóta pene korasõre ha umi mbaʼe pepensávare” (Filip. 4:7). Idióma griégope pe palávra “oñangarekóta” ojepuru vaʼekue umi ehérsitope oñeñeʼẽ jave umi grúpo de soldádo oprotehévare umi siuda. Umi hénte Filiposgua oke trankílo vaʼekue pyharekue oikuaágui umi grúpo de soldádo oñangarekoha hesekuéra. Péicha avei, jareko jave “Ñandejára pyʼaguapy” ñane ménte ha ñane korasõ oĩ trankílo. Jehová ningo oñangareko ñanderehe ha oipota osẽ porã ñandéve entéro mbaʼe (1 Ped. 5:10). Jaikuaávo upéva ñanepytyvõ ani hag̃ua jajepyʼapyeterei ni ñañedesanima.
Mbaʼépa ñaaprende Ñandejára Ñeʼẽgui
(Filipenses 2:17) Che ningo avyʼa ha chepyʼarory penendive aikuaágui mbaʼéichapa peẽ heta pejesakrifika ha peservi Ñandejárape pejerovia rupi. Upévare pe víno oñeñohẽháicha oñekuaveʼẽ hag̃ua Ñandejárape, che avei añeñohẽ hína penderehehápe.
it-2-S 525 párr. 9
Ofrendakuéra
Ofrénda líkida. Umi israelita oikuaveʼẽ vaʼekue heta kláse ofrénda ha umíva apytépe oĩ avei pe ofrénda líkida. Haʼekuéra koʼýte oikuaveʼẽ vaʼekue ko ofrénda oike rire pe Tiérra Prometídape (Nú 15:2, 5, 8-10). Pe ofrénda líkida (vevída orekóva alkoól) haʼe vaʼekue víno oñeñohẽva pe altár ári (Nú 28:7, 14; ekompara Éx 30:9; Nú 15:10 heʼívare). Apóstol Pablo oskrivi vaʼekue umi kristiáno Filiposguápe: “Che ningo avyʼa ha chepyʼarory penendive aikuaágui mbaʼéichapa peẽ heta pejesakrifika ha peservi Ñandejárape pejerovia rupi. Upévare pe víno oñeñohẽháicha oñekuaveʼẽ hag̃ua Ñandejárape, che avei añeñohẽ hína penderehehápe”. Pablo omoĩ ehémploramo pe ofrénda líkida heʼi hag̃ua mbaʼeichaitépa haʼe oñemeʼẽmbaite umi ótro kristiáno rehehápe (Flp 2:17). Omano mboyvemi oskrivi kuri Timotéope: “Pe víno oñeñohẽháicha oñekuaveʼẽ hag̃ua Ñandejárape, che añeñohẽ avei hína penderehehápe, ha og̃uahẽmbaitéma pe tiémpo areko hag̃ua liverta” (2Ti 4:6).
(Filipenses 3:11) Ajapose upéva jahecha naiméipa umi primeroite oñemoingove jeýtava apytépe.
“Pe jeikove jey tenondegua” oñepyrũma
5 Upe rire umi ohótava yvágape oñehenóiva ‘Israel Ñandejára mbaʼe’ oikove jey vaʼerã oĩ hag̃ua Jesucristo ndive “opa ára g̃uarã” (Gálatas 6:16, JMP; 1 Tesalonicenses 4:17). Haʼekuéra hína umi ‘tenondete oikove jeýva’ (Filipenses 3:10, 11; Apocalipsis 20:6). Opa rire pe ñemoingove jey tenondegua, oñemopuʼãta hetaiterei tapichápe ko Yvy ape ári oiko hag̃ua Paraísope opa ára g̃uarã. Upéicharõ, ñahaʼarõramo jaiko yvágape térã yvýpe, jaikuaase mbaʼépa hína pe “ñemoingove jey tenondegua”. ¿Mbaʼeichaguápa hína? ¿Ha arakaʼépa oiko?