¿Jakuidápa hína ñande eskúdo guasúre, haʼéva ñande jerovia?

1, 2. a) Asegún Efesios 6:16, ¿mbaʼérepa ñaikotevẽ pe ‘eskúdo guasu’ haʼéva ñande jerovia? b) ¿Mbaʼe mbaʼépa ñambohováita?

¿ÑANDÉPA jareko pe ‘eskúdo guasu’ haʼéva ñande jerovia? (Elee Efesios 6:16). Katuete oiméne jareko. Peteĩ eskúdo guasu ningo oprotehe haimete kompletoite ñande rete, péicha avei ñande jerovia ñandeprotehe umi mbaʼe vaiete oĩvagui ko múndope. Por ehémplo, pe tekovai, violénsia ha oimeraẽ mbaʼe oñemoĩva Ñandejára heʼívare.

² Péro jaiko hína “umi ára pahápe” ha ñande jerovia osegíta gueteri ombohovái heta mbaʼe ijetuʼúva (2 Tim. 3:1). Upéicharõ, ¿mbaʼéichapa ikatu jaikuaa oimépa oĩ porã ha imbarete hína ñande jerovia, térã ñande eskúdo guasu? ¿Ha mbaʼépa jajapo vaʼerã ñañakarama hatã hag̃ua hese? Ñambohovaimína koʼã porandu.

JARREVISA PORÃKENA ÑANDE ESKÚDO

3. ¿Mbaʼéichapa umi soldadokuéra okuida vaʼekue ijeskúdore, ha mbaʼérepa?

³ Yma la Biblia ojeskriviha tiémpope umi soldádo oreko vaʼekue umi eskúdo ojeforráva kuérope. Umi soldádo ombohasa vaʼekue aséite umi eskúdore ani hag̃ua oñembyai pe kuéro ni oñerrumbra umi párte de metál. Peteĩ soldádo opillárõ ijeskúdo orekoha peteĩ párte oñembyaiha, pyaʼe voi omyatyrõ, péicha haʼe siémpre oĩta kuri preparádo oñorairõ jey hag̃ua. ¿Mbaʼéichapa ikatu jaipuru pe ehémplo ñañeʼẽ hag̃ua pe jeroviáre?

4. a) ¿Mbaʼérepa jarrevisa porã vaʼerã ñande eskúdo, haʼéva ñande jerovia? b) ¿Mbaʼéichapa jajapo vaʼerã upéva?

⁴ Ojapo haguéicha umi soldádo, pyʼỹinte jarrevisa porã vaʼerã ñande eskúdo, haʼéva ñande jerovia, ha jahecha oimépa imbarete porã hína. Péicha siémpre ñaiméta preparádo ñañorairõ hag̃ua, pórke jaikuaaháicha ñande ñañorairõ hína umi demónio ehérsito yvagapeguándi (Efes. 6:10-12). Avave ningo ndaikatúi okuida ñande eskúdore, upéva ñandémante jajapo vaʼerã. ¿Mbaʼéicha ikatu jaikuaa imbarete porãpa hína ñande jerovia ombohovái hag̃ua umi pruéva? Primero, ñañemboʼe vaʼerã Jehovápe ha jajerure chupe tañanepytyvõ. Upe rire, jaipuru vaʼerã la Biblia jahecha hag̃ua oimépa ñande jerovia oĩ porã hína asegún pe Jehová ohaʼarõva ñandehegui (Heb. 4:12). La Biblia heʼi: “Rekonfia vaʼerã Jehováre nde pyʼaite guive, ha ani rejerovia umi mbaʼe nde repensávare” (Prov. 3:5, 6). Koʼág̃a ñapensami peteĩ situasión jahasa vaʼekuére ha mbaʼépa jajapo raʼe. Por ehémplo, oimérõ jajejopy vai raʼe ekonómikamente, ¿ñanemanduʼápa raʼe Jehová promésare oĩva Hebreos 13:5-pe? Upépe heʼi: “Núnka ndorohejamoʼãi ha núnka nderepytamoʼãi neaño”. ¿Ñanepytyvõpa raʼe ko promésa jajerovia hag̃ua Jehová ñanepytyvõtaha? Oimérire péicha, entónse ñande eskúdo oĩ porã hína.

5. ¿Mbaʼépa ikatu jahechakuaa hína jarrevisa rire ñande jerovia?

⁵ Péro jarrevisa rire ñande jerovia ikatu hína ñañesorprende ha jahechakuaa ñanekangyha algúna kósape. Por ehémplo, ikatu ñañemeʼẽ enkuénta ñande jerovia opyta hague ikangy jaiko rupi jajepyʼapyeterei, ñahendu umi japu ojeʼéva ñanderehe, térã ñañedesanima rupi. Oiméramo upéva oiko raʼe ñanderehe, ¿mbaʼépa ikatu jajapo ñañangareko hag̃ua ñande jeroviáre pono oñembyaive?

JAJEKUIDÁKENA UMI MBAʼE OMOKANGÝVAGUI ÑANDE JEROVIA

6. ¿Mbaʼe mbaʼe rehepa ndaivaíri jajepyʼapy?

⁶ Ndaivaíri ningo jajepyʼapy algúna kósare, por ehémplo, ñande ñambovyʼase Jehová ha Jesúspe ha jajepyʼapy upévare (1 Cor. 7:32). Oiméramo japeka raʼe, ñande jajepyʼapy pórke ñaime porãse jey Jehovándi (Sal. 38:18). Avei jajepyʼapy ñambovyʼase rupi ñane ména térã ñane rembirekópe, ha ndajaipotáigui ofalta mbaʼeve ñane famíliape ha ñane ermanokuérape (1 Cor. 7:33; 2 Cor. 11:28).

7. a) ¿Mbaʼéichapa ikatu ñambyai ñande jerovia jajepyʼapyetereíramo? b) ¿Mbaʼérepa ndajakyhyjéi vaʼerã yvyporakuéragui, heʼiháicha Proverbios 29:25?

⁷ Péro jajepyʼapyetereíramo ikatu hína ñambyai ñande eskúdo, térã ñande jerovia. Por ehémplo, ikatu hína jajepyʼapyeterei ofaltárõ g̃uarã ñandéve ao ha tembiʼu (Mat. 6:31, 32). Upéicha rupi, ikatu jaju ñañekonsentraiterei ñakonsegi hag̃ua umi mbaʼerepy ha ikatu voi ñandeplatarayhu. Jahejáramo upéva oiko ñanderehe, ñande jerovia Jehováre ikatu hína ikangy ha saʼi saʼípe ñañemomombyry chugui (Mar. 4:19; 1 Tim. 6:10). Ikatu avei jajepyʼapyeterei jaipotágui ótro ñandeguerohory. Upéva káusare ikatu jaju jakyhyjeve umi hénte oñembohorýrõ g̃uarã ñanderehe térã ñandepersegi, jakyhyje rangue Ñandejáragui. ¿Mbaʼéichapa ikatu jajeprotehe koʼã mbaʼégui? Jajerurévo Jehovápe tañanepytyvõ jajeroviave hag̃ua ha tañanembopyʼaguasu ani hag̃ua jakyhyje umi hénte opensávagui (elee Proverbios 29:25; Luc. 17:5).

8. ¿Mbaʼépa jajapo vaʼerã oĩramo álgien heʼíva japu Jehová ha ñane ermanokuéra kóntrape?

⁸ Satanás ningo “pe japu ruvicha”, ha haʼe oipuru umi hénte oĩvape ipoguýpe omosarambi hag̃ua heta japu Jehová ha ñane ermanokuéra kóntrape (Juan 8:44). Por ehémplo, umi apóstata oipuru Internet, téle ha hetave mbaʼe ikatu hag̃uáicha ijapu ha oñeʼẽ vai Jehová organisasiónre. Koʼã japu heʼíva hikuái oĩ hína “umi flécha hendýva” apytépe oipurúva Satanás (Efes. 6:16). ¿Mbaʼépa jajapo vaʼerã álgien heʼíramo ñandéve koʼãichagua japu? ¡Nañahendumoʼãi chupe! ¿Mbaʼérepa? Pórke ñande jajerovia Jehováre ha ñane ermanokuérare. Añetehápe, ñande ñamboykete voi opa mbaʼe oúva umi apóstatagui. Upévare ni mbaʼevéicharõ nañañepyrũmoʼãi ñañeʼẽ ni jajodiskuti hendivekuéra, ni ñandekuriósoramo jepe.

9. ¿Mbaʼépa ikatu oiko ñañedesanimáramo?

⁹ Ñañedesanimáramo ikatu ou ikangy ñande jerovia. Sapyʼánte ñañedesanima jareko rupi heta provléma. Añetehápe ningo ndaikatúi voi ñambohasa reínte umi provléma térã nañapenáinte umívare. Upéva naiporãmoʼãi avei. La ivaíva hína jaiko manterei ñapensa umi ñane provlemakuérare, pórke ikatu ñanderesarái entéro umi mbaʼe porãite Jehová opromete vaʼekuégui ñandéve (Apoc. 21:3, 4). Ñañedesanimaitereíramo ikatu voi ñapensa nañameʼẽveimaha ha jaju ndajaservivéi Jehovápe (Prov. 24:10). ¿Mbaʼépa ikatu jajapo ani hag̃ua oiko ñanderehe upéva?

10. ¿Mbaʼépa ñaaprende pe oskrivi vaʼekuégui peteĩ ermána?

¹⁰ Jahechamína mbaʼépa ojapo peteĩ ermána oikóva Estados Unídospe osegi hag̃ua ojerovia mbarete, oñangarekóramo jepe iména hasykatuetévare. Haʼe oskrivi peteĩ kárta pe sentrál mundiálpe g̃uarã, upépe heʼi: “Sapyʼánte ningo ore situasión ijetuʼueterei ha roñedesanimaʼimi jepi, péro ore esperánsa imbarete. Aagradeseterei opa mbaʼe Jehová omeʼẽva ñandéve ñamombarete hag̃ua ñande jerovia ha ñanemokyreʼỹ hag̃ua. Añetehápe ningo ñaikotevẽ peichagua konséhore. Umíva ñanepytyvõ jasegi hag̃ua jaservi Jehovápe ha ñaaguanta umi pruéva omoĩva ñandéve Satanás”. Umi mbaʼe heʼíva pe ermána ñanemboʼe ikatuha ñandepuʼaka pe desánimore. ¿Mbaʼéichapa? Ñanemanduʼa vaʼerã umi pruéva jahasáva ouha Satanásgui, jajerovia vaʼerã Jehová ñanekonsolataha ha ñamombaʼe umi informasión porãite omeʼẽva ñandéve.

11. ¿Mbaʼe mbaʼépa ñañeporandu vaʼerã jahecha hag̃ua oĩ porãpa ñande jerovia?

¹¹ ¿Jahechakuaápa tekotevẽha ñamyatyrõʼimi ñande eskúdo, térã ñande jerovia? Ñapensamína: Umi mése ohasa vaʼekuépe, ¿añehaʼãpa pono ajepyʼapyeterei? ¿Añehaʼãpa ani hag̃ua ajodiskuti umi apóstatandi ni ahendu umi japu heʼíva hikuái? ¿Ikatúpa raʼe chepuʼaka pe desánimore? Oiméramo péicha, ñande jerovia oĩ porã hína. Péro jasegi vaʼerã ñañatende, pórke Satanás oreko heta árma ikatúva oipuru ñane kóntrape. Jahechamína peteĩva.

ANÍKENA JAHAYHU UMI MBAʼEREPY

12. ¿Mbaʼépa ikatu oiko jahayhúramo umi mbaʼerepy?

¹² Jahayhúramo umi mbaʼerepy ñande jerovia ikatu hína ikangy ha ndajajapomoʼãi heta mbaʼe Jehovápe g̃uarã. Apóstol Pablo heʼi vaʼekue: “Peteĩ soldádo opyta porãséva pe huvicha ogueraha vaʼekuéndi chupe soldádoramo, ndoikói oñentremete negósiope ogana hag̃ua pláta” (2 Tim. 2:4). Ha añetehápe, ymave umi soldádo rrománope noñepermitíri vaʼekue oñentremete mbaʼeveichagua negósiope ni ojapo ótro traváho. ¿Mbaʼépa oiko vaʼerãmoʼã peteĩ soldádo nokumplíriramo upe léi?

13. ¿Mbaʼérepa umi soldádo noñentremetéi vaʼekue negósiope?

¹³ Ñapensamína ko situasiónre: Peteĩ grúpo de soldádo oñentrena hína peteĩ pyhareve oipurukuaa hag̃ua ijespáda, péro peteĩva umi soldádo noĩri hendivekuéra. Ko soldádo oho kuri merkádope ovende hag̃ua hiʼupy. Upe kaʼarúpe umi soldádo orrevisa iñarmadurakuéra ha ohaimbeʼe joa hína ijespáda. Pe ótro soldádo katu hembiapo hína pórke oprepara vaʼerã umi hiʼupy ovendétava al día sigiénte. Péro al ótro día peteĩ enemígo oñepyrũ oataka chupekuéra de sorpresaite. Ndépa mbaʼe ere: ¿Mavaitévapa umi soldádo oĩta preparádo oñorairõ hag̃ua, ha mávapepa oguerohorýta pe ikomandánte? ¿Mávapepa erekose nde ykére ág̃a peñorairõ vove? ¿Peteĩva umi ojeprepara vaʼekuépe, térãpa upe ojedistrae vaʼekuépe inegósiore?

14. ¿Mbaʼépa hína pe iñimportantevéva Cristo soldadokuérape g̃uarã?

¹⁴ Ojapoháicha umi soldádo ikatupyrýva, pe iñimportantevéva ñandéve g̃uarã hína ñambovyʼa ñane komandantekuérape: Jehová ha Jesúspe. Upéva ningo ovaleve hína oimeraẽ mbaʼe ikatúvagui omeʼẽ ñandéve Satanás múndo. Upéicha rupi siémpre ñañemotiémpo ha ñañehaʼãmbaite jaservi hag̃ua Jehovápe ha oĩ porã hag̃ua ñande jerovia, térã ñande eskúdo, ha avei kompletoite ñane armadúra oúva Ñandejáragui.

15. ¿Mbaʼe avísopa omeʼẽ Pablo, ha mbaʼérepa?

¹⁵ ¡Ñañatende porãkena siémpre! ¿Mbaʼérepa? Apóstol Pablo oavisa vaʼekue “umi ojedesidímava ipláta hetataha” ‘ohejataha ijerovia’ (1 Tim. 6:9, 10). Pe fráse ‘ohejáta ijerovia’ heʼise hína ikatuha jajedistrae ñañehaʼãgui jareko heta hetave mbaʼe nañaikotevẽiva. Péicha jave ndahasyiete hína oike hag̃ua ñane korasõme umi “vyrorei ha deséo oporoperhudikáva”. Aníkena ni mbaʼevéicharõ jaheja umi mbaʼe oike ñane korasõme, upéva rangue ñanemanduʼa vaʼerã Satanás oipuruha umi deséo jarekóva peteĩ ármaicha omokangy hag̃ua ñande jerovia.

16. ¿Mbaʼe mbaʼépa iporã vaʼerã ñañeporandu jalee rire Marcos 10:17-22?

¹⁶ Péro ñamoĩ chupe ñande jarekoha la pláta jajogua hag̃ua heta mbaʼe. ¿Ivai piko jajogua umi mbaʼe ñandegustáva péro añetehápe nañaikotevẽguasúiva? Ndahaʼéingo la oĩ vaíva upéva. Péro ñapensamína koʼã pregúntare: Jarekóramo jepe la pláta jajogua hag̃ua peteĩ mbaʼe, ¿jareko piko pe tiémpo ha mbaretekue oñekotevẽva jaipuru ha ñamantene hag̃ua upe jajoguaséva? Avei ikatu hína jaju jahayhueterei umi mbaʼe jarekóva ha ndajapoisevéi umívagui, ¿ikatúpa upéva káusare amo ipahápe jajogua pe mitãkariaʼy orrechasa vaʼekuépe Jesús invitasión, ojapo hag̃ua hetave mbaʼe Jehová servísiope? (Elee Marcos 10:17-22). Ajépa iporãve jaiko sensillomínte ha jaipuru ñane tiémpo ha mbaretekue jajapo hag̃ua Jehová oipotáva.

ÑAÑAKARAMA HATÃKENA ÑANDE ESKÚDO GUASÚRE

17. ¿Mbaʼéguipa nañanderesaráiri vaʼerã?

¹⁷ Aníkena ñanderesarái ñaimeha gerrahápe, ha ñaime vaʼerãha preparádo ñañorairõ hag̃ua káda día (Apoc. 12:17). Ñane ermanokuéra ndaikatúi oraha ñande vése pe eskúdo, térã ojerovia Ñandejára rehe ñande vése, ñandete ñañehaʼã vaʼerã upearã.

18. ¿Mbaʼérepa umi soldádo oñakarama hatã vaʼekue ijeskúdore?

¹⁸ Ymave ningo oñembotuicha vaʼekue umi soldádo ohechaukávape ipyʼaguasuha gerrahápe. Péro ñemotĩ vaʼekue peteĩ soldádope g̃uarã oúramo gerrahágui ijeskudoʼỹre. Pe istoriadór rrománo hérava Tácito heʼi: “Peteĩ soldádope g̃uarã, pe ñemotĩ tuichavéva hína ohejáramo ijeskúdo gerrahápe”. Upéicha rupi, oñorairõ jave umi soldádo siémpre oñakarama hatã vaʼekue ijeskúdore.

19. ¿Mbaʼéichapa ikatu ñañakarama hatã ñande eskúdore?

¹⁹ Ñande ñañakarama hatã ñande eskúdore ndajafaltáiramo umi rreuniónpe ha ñañeʼẽramo ótrope Jehová rérare ha Irréinore (Heb. 10:23-25). Avei ñande jalee la Biblia káda día, ha ñañemboʼe Jehovápe ikatu hag̃uáicha ñanepytyvõ ñamoĩ hag̃ua en práktika umi mbaʼe ñaaprendéva (2 Tim. 3:16, 17). Péicha jajapóramo, tahaʼe haʼéva pe árma Satanás oipurúva ñane kóntrape ñanerundi hag̃ua, ni mbaʼevéicharõ ndaikatumoʼãi ñandejoko jahupyty hag̃ua pe vída etérna (Is. 54:17). Ñande eskúdo guasu, haʼéva ñande jerovia ñandeprotehéta. Avei ñambaʼapóta pyʼaguasúpe ñane ermanokuérandi. Ha ndahaʼéi ñaganátanteva umi ñorairõ káda diagua, síno jarekóta pe oportunida ñaimévo Jesús ykére ág̃a haʼe ogana vove Satanáspe ha iñirũnguérape (Apoc. 17:14; 20:10).