Japytákena siémpre Jehová organisasiónpe

SANTIAGO oskrivi vaʼekue: “Peñemoag̃uíkena Ñandejárare, ha haʼe oñemoag̃uíta penderehe” (Sant. 4:8). Ñandejára ningo pe ipoderosovéva, ñande katu ñaneimperfékto, upéicharõ jepe haʼe noĩri mombyry ñandehegui ñanerendu hag̃ua (Hech. 17:27). ¿Mbaʼéichapa ikatu ñañemoag̃ui Ñandejárare? Jaiko vaʼerã iñamígoramo ha ñañemboʼe chupe ñande pyʼaite guive (Sal. 39:12). Ikatu avei ñañemoag̃ui Ñandejárare siémpre jastudiávo Iñeʼẽ. Péicha jaikuaa porãvéta Jehovápe, mbaʼépa haʼe ojapóta ha mbaʼépa oipota ñandéve g̃uarã (2 Tim. 3:16, 17). Péicha jahayhúta Ñandejárape ha jakyhyjéta jajapo hag̃ua álgo ndogustáiva chupe (Sal. 25:14).

² Jesucristo rupive añoite ikatu ñaime porã Jehová renondépe (Juan 17:3; Rom. 5:10). Ndaipóri ni peteĩ umáno ikatúva oikuaauka porã ñandéve mbaʼépa Jehová opensa ha oñandu, Jesucristo añoite kuri ojapo upéva. Haʼe oikuaa porãiterei Itúape, upévare heʼi vaʼekue: “Che Túa añoite chekuaa porã, ha che añoite aikuaa porã che Túape. Ha che amombeʼuséramo peteĩ persónape mávapa che Túa, upéva oikuaa porãta avei chupe” (Luc. 10:22). Upévare jastudiávo umi 4 lívro bíblico oñeʼẽva Jesúsre ñaaprende hag̃ua mbaʼépa haʼe opensa ha oñandu, añetehápe ñaaprende hína mbaʼépa Jehová opensa ha oñandu. Péicha jaikuaavévo Ñandejárape ñañemoag̃uive hese.

³ Ñande ningo ñaĩ Ñandejára Raʼy poguýpe, ha jaikoséramo Jehová amígoramo ndovaléi ñañemomombyry iñorganisasióngui, ñanepytyvõva jajapo hag̃ua ivolunta. Heʼiháicha Mateo 24:45-47, Jesucristo onombra vaʼekue pe ‘esklávo de konfiánsa ha iñarandúvape’ omeʼẽ hag̃ua Ñandejára siervokuérape pe “aliménto hiʼoraitépe”. Ñane tiémpope pe esklávo omeʼẽ ñandéve hetaiterei mbaʼe omombaretéva ñande jerovia. Iñorganisasión rupive Jehová ñanemokyreʼỹ jalee hag̃ua la Biblia káda día, jaha meme hag̃ua rreunionhápe ha japredika meme hag̃ua “umi notísia porã oñeʼẽva Ñandejára Rréinore” (Mat. 24:14; 28:19, 20; Jos. 1:8; Sal. 1:1-3). Ani ñahaʼarõ pe esklávo de konfiánsa iperfékto. Jajerovia vaʼerã Ñandejárare, ñañehaʼãmbaite ani hag̃ua ñañemomombyry iñorganisasióngui, ha jasegi vaʼerã umi instruksión omeʼẽva ñandéve. Upéva ñanepytyvõta ñaĩ hag̃ua siémpre Jehová ykére, ñanemombaretéta ha ñandeprotehéta jahasa jave umi pruéva.

MBAʼÉREPA OĨ HETAVE PRUÉVA

⁴ Oimérõ reservíma Jehovápe heta áñore, katuete reikuaa heta vése jahasa vaʼerãha umi pruéva tekotevẽhápe jahechauka ñaneñeʼẽrendútapa. Ha oimérõ ramoiténte reñepyrũ reservi Jehovápe iñorganisasión ndive, lomímonte oiméne rehechakuaáma Satanás oñemoĩ mbareteha umi iñeʼẽrendúvare Jehovápe (2 Tim. 3:12). Tahaʼe haʼeháicha natekotevẽi ñañedesanima ni jakyhyje. Jehová opromete ñanepytyvõtaha, ñandesalvataha ha omeʼẽtaha ñandéve vída opa ára g̃uarã (Heb. 13:5, 6; Apoc. 2:10).

⁵ Ñande ningo jaiko koʼã ára pahápe ha jahasámante vaʼerã heta mbaʼe ijetuʼúva. Ñandejára Rréino oñepyrũ ogoverna áño 1914-pe, ha upe guive noñepermitivéi Satanáspe oike yvágape. Chupe ha idemoniokuérape oñemombo kuri ko yvýpe ha Satanás ipochyeterei. Upévare oiko heta mbaʼe vai ha ojepersegi mbareteve Jehová puévlope. Koʼã mbaʼe ohechauka jaikomaha umi ára pahápe ha mbykypaitemaha pe tiémpo hembýva Satanás goviérnope (Apoc. 12:1-12).

⁶ Satanáspe omorrenegaiterei isituasión. Haʼe oikuaa saʼipaitemaha pe tiémpo hembýva chupe. Upévare haʼe ha idemoniokuéra oñehaʼãmbaite ojoko pe predikasión ha ombyai pe unida oĩva Jehová siervokuéra apytépe. Ikatu jaʼe ñaimeha peteĩ gérrape, la Biblia heʼi voi: “Ñande ningo nañañorairõi kuimbaʼekuérandi, síno ñañorairõ hína umi demónio ehérsito yvagapeguándi, koʼãva hína umi goviérno, umi autorida ha umi ogovernáva ko múndo oĩva pytũmbýpe”. Ñande ñaime Jehová ládo ha ñaganaséramo ko gérra ndaikatúi ñañentrega, ni jaipeʼa pe armadúra oúva Ñandejáragui. Péicharõmante ikatúta ‘jajepytaso mbarete ani hag̃ua jaʼa umi ñuhã oipurúvape pe Diablo’ (Efes. 6:10-17). Upévare tekotevẽterei ñaaguanta.

MBAʼÉICHAPA IKATU ÑAAGUANTA

⁷ Ñaaguanta heʼise jagueropuʼakaha peteĩ situasión ijetuʼúva. La Bíbliape oñeñeʼẽ jave pe aguántere heʼise peteĩ persóna osegiha ojapo iporãva osufríramo jepe, oĩramo oñemoĩva ikóntrape, opersegíva chupe, térã ohasáramo ótra kósa ikatúva omomombyry chupe Jehovágui. Pe aguánte ningo nañagueronaséi, síno ñañehaʼã vaʼerã jareko hag̃ua. Amáske ñandejerovia mbarete, ñaneaguantevéta. Ñañepyrũvo jaservi Jehovápe jahasa umi pruéva michĩvéva, péro umíva omombarete ñande jerovia ha ñandeprepara ñaaguanta hag̃ua umi pruéva tuichavéva jaikuaáva oñepresentataha (Luc. 16:10). Ndaikatúi ñahaʼarõ ou raẽ umi pruéva tuicháva jadesidi hag̃ua ndajahejamoʼãiha Jehovápe. Jajedesidíma vaʼerã ou mboyve umi pruéva. Apóstol Pedro heʼi vaʼekue tekotevẽha ñañehaʼã jahechauka hag̃ua umi kualida porã, umíva apytépe pe aguánte. Haʼe heʼi: “Peñehaʼãmbaitéke pejerovia ha pejapo umi mbaʼe iporãva. Peñehaʼãmbaite avei peikuaa hag̃ua heta mbaʼe, avei peñehaʼãmbaite pejejokokuaa, peaguanta ha peadora Ñandejárape pende pyʼaite guive, avei peñehaʼãmbaite pehayhu pene ermanokuérape ha pehayhu enterovépe” (2 Ped. 1:5-7; 1 Tim. 6:11).

⁸ Disípulo Santiago ohechauka vaʼekue iñimportanteha ñañehaʼã meme ñaneaguánte hag̃ua. Haʼe heʼi: “Pevyʼákena che ermanokuéra pembohovái jave opaichagua jehasa asy, pórke peẽ peikuaa pende jerovia ojeprováramo péicha, penembaretevéta peaguanta hag̃ua. Ha peaguanta meme rupi peñentrena porã hína, péicha perekopaitéta opa mbaʼe peikotevẽva, ha pejapo porãta entéro mbaʼe ha ndofaltamoʼãi peẽme mbaʼevete” (Sant. 1:2-4). Santiago ohechauka umi kristiáno oasepta vaʼerãha umi pruéva ha ovyʼa vaʼerãha voi ohasa jave umíva, pórke umi pruéva ñanepytyvõ ñaneaguanteve hag̃ua. ¿Repensápa nde upéicha? Santiago oexplika pe aguánte ñanepytyvõha jahechauka porãve hag̃ua umi ótro kualida kristiána ha péicha Ñandejára ñandeguerohorýta. Upéicharõ, jahasávo umi situasión ijetuʼúva ñanembaretevéta ha ñaneaguantevéta. Ha pe aguánte rupive ikatu jareko hetave kualida porã.

⁹ Jehová ovyʼa ohechávo ñaaguantaha umi pruéva ha upévare omeʼẽse ñandéve vída opa ára g̃uarã. Santiago heʼi: “Ovyʼa pe persóna oaguantáva pe jehasa asy. Pórke ohasa rire pe pruéva, haʼe orresivíta pe jeikove opaveʼỹva peteĩ prémioicha, upéva ningo Jehová opromete entéro umi osegívape ohayhu chupe” (Sant. 1:12). Ñande jaikuaa porã ñaaguantáramo jarresivitaha pe jeikove opaveʼỹva. Ko múndo ñandejopy ha nañañatendéiramo jajapo jeýta umi mbaʼe jahejáma vaʼekue. Nañaaguantáiramo Ñandejára nomeʼẽmoʼãi ñandéve ijespíritu sánto ha upévare ndaikatumoʼãi jahechauka umi kualida porã oúva pe espíritu sántogui.

¹⁰ Ñaaguanta hag̃ua umi situasión ijetuʼúva, tekotevẽ jahecha umi pruéva hendápe porã ha jaasepta umíva. Ñanemanduʼa vaʼerã Santiago heʼi hague: “Ovyʼa pe persóna oaguantáva pe jehasa asy”. Sapyʼánte ikatu ijetuʼu jajapo upéva pórke umi pruéva ñanembosufri ha ojapo vai jepi ñanderehe. Péro ñanemanduʼa vaʼerã nañaaguantáiramo ndaikatumoʼãiha jaiko opa ára g̃uarã. Peteĩ experiénsia ohasa vaʼekue umi apóstol ñanepytyvõ jahecha hag̃ua ikatuha javyʼa jasufríramo jepe. Upéva jatopa lívro de Héchospe, ha heʼi péicha: “Haʼekuéra ohenói umi apóstolpe, ombyepoti chupekuéra, ha omanda chupekuéra anivéma hag̃ua oñeʼẽ Jesús rérape, ha upéi opoi chuguikuéra. Upémarõ haʼekuéra vyʼapópe osẽ oho pe Sanedrín renondégui, pórke Ñandejára opermiti oñembohasa asy chupekuéra Jesús réra rehehápe” (Hech. 5:40, 41). Umi apóstol ontende vaʼekue haʼekuéra osufriha ojapo rupi Jesús omanda vaʼekue ha oikuaa Jehová oguerohoryha chupekuéra. Tiémpo rire, Pedro oskrivi ipriméra kártape iñimportanteha ñaaguanta pe sufrimiénto jahasáva jajapo haguére iporãva (1 Ped. 4:12-16).

¹¹ Jahechamína la ohasa vaʼekue Pablo ha Silas ohórõ guare Filípospe. Upépe ojejagarra chupekuéra, ha ojeakusa ojapoha sarambi pe siudápe ha omboʼeha umi mbaʼe oñemoĩva pe léire. Upéi oñemoinge kárselpe ha oñembyepoti chupekuéra. Haʼekuéra opyta upépe ha avave nomonguerái ijeridakuéra. ¿Mbaʼépa ojapo hikuái upe aja? La Biblia heʼi: “Pyharepytérupi, Pablo ha Silas oñemboʼe ha opurahéi hína kuri omombaʼeguasu hag̃ua Ñandejárape, ha umi préso ohendu chupekuéra” (Hech. 16:16-25). Ñandejára ha umi hénte renondépe haʼekuéra ohechaukase iñeʼẽrenduha, upévare oaguanta umi pruéva. Avei oikuaa oaguanta rupi ikatutaha oñepresenta umi oportunida opredika hag̃ua umi ohendusévape. Péicha umi hénte ikatúta ojesalva. Por ehémplo upe pyharépe voi pe guardiakársel ha hogayguakuéra oasepta pe mensáhe ha oiko chuguikuéra Jesús segidór (Hech. 16:26-34). Pablo ha Silas ojerovia Jehováre, oĩ segúro haʼe ipoderosoha ha oipytyvõtaha chupekuéra. Ha Jehová ndohejareíri chupekuéra.

¹² Koʼág̃a avei Jehová omeʼẽ ñandéve entéro mbaʼe ñaikotevẽva jagueropuʼaka hag̃ua umi situasión ijetuʼúva. Haʼe oipota ñaaguanta umíva. Por ehémplo omeʼẽ ñandéve Iñeʼẽ jaikuaa hag̃ua mbaʼépa ivolunta, ha upéva omombarete ñande jerovia. Avei jareko ñane ermanokuéra jaservi hag̃ua hendivekuéra Ñandejárape. Ikatu avei ñamombarete ñane amista Jehová ndive ñañemboʼévo chupe. Pe ñemboʼe rupive ikatu ñamombaʼeguasu Jehovápe ha jajerure chupe tañanepytyvõ ñaĩ porã hag̃ua henondépe. Jaikuaa haʼe katuete ñanerendutaha (Filip. 4:13). Ha jajepyʼamongetávo pe esperánsa porãite jarekóvare, katuete ñanembaretevéta avei (Mat. 24:13; Heb. 6:18; Apoc. 21:1-4).

ÑAAGUANTÁKENA OPAICHAGUA PRUÉVA

¹³ Umi pruéva jahasáva ojogua avei umi ohasa vaʼekuépe Jesucristo disipulokuéra. Koʼág̃arupi oĩ hénte oñemoĩva ñane kóntrape ohendu rupi heta japu umi testígo de Jehovágui. Upévare iñeʼẽ pohýi ñandéve ha ñanemaltrata. Oiko haguéicha umi apóstol tiémpope, sapyʼánte umi ifanátikova irrelihiónre omomýi ótrope ñandetrata vai hag̃ua. La Biblia ohechauka porã umi mbaʼe haʼekuéra omboʼéva ha ojapóva oĩ vaiha (Hech. 17:5-9, 13). Heta vésema umi goviérno oipytyvõ Jehová puévlope jajerurérõ guare ojerrespeta hag̃ua ñande derécho (Hech. 22:25; 25:11). Péro avése umi goviérno voi la oñemoĩva ñane kóntrape ha oproivi pe predikasión, ojokoségui upe traváho jajapóva (Sal. 2:1-3). Péicha jave pyʼaguasúpe jasegi umi apóstol ifiélva ehémplo, haʼekuéra heʼi vaʼekue: “Ore ningo oreñeʼẽrendu vaʼerã Ñandejárape ore governánteramo, yvypórape rangue” (Hech. 5:29).

¹⁴ Ko yvy tuichakuére la hénte amás día ifanatikove hetãre, upévare ojejopyve umi Testígope anivéma hag̃ua ojapo pe traváho Ñandejára omeʼẽva chupekuéra. Upéicha rupi ñantende porãve pe konsého jatopáva Apocalipsis 14:9-12-pe. Upépe oñeñeʼẽ pe ‘animál salváhe ha haʼangáre’, ha heʼi: “Upévare tekotevẽ umi ojeporavo vaʼekue oaguantakuaa, haʼekuéra okumpli Ñandejára mandamiénto ha ojerovia mbarete Jesús rehe”.

¹⁵ Sapyʼánte ikatu ijetuʼu jaservi hag̃ua Jehovápe lívremente pórke oĩ gérra, umi hénte opuʼã umi goviérnore, oĩ ñandepersegíva térã umi goviérno oproivi pe predikasión. Péicha jave ndaikatúi jepi ñañerreuni Salónpe, umi superintendénte de sirkuíto ndaikatuvéi jepi ovisita umi kongregasión. Avei umi kongregasión ndaikatuvéi jepi oñekomunika pe sukursál ndive ha umi puvlikasión nog̃uahẽvéi. ¿Mbaʼépa ikatu jajapo umícha jave?

¹⁶ Jajapo vaʼerã ikatúva guive jasegi hag̃ua jaservi Jehovápe. Por ehémplo ikatúta jasegi jastudia ñaneañohápe. Sapyʼánte ikatúta ñañembyaty en grúpo michĩvape peteĩ ermáno rógape jastudia hag̃ua. Upépe ikatu jaipuru la Biblia ha umi puvlikasión ojestudiáma vaʼekue. Koʼã situasiónpe ani rejepyʼapyeterei ni rekyhyje. Péicha jave pe Kuérpo Governánte ensegída oñekomunika jepi umi ermáno orekóvandi rresponsavilida Jehová organisasiónpe.

¹⁷ Ha upeichahágui ndaikatuvéirõ ñañekomunika ni peteĩ ermáno ndive, aníke ñanderesarái Jehová ha Jesucristo ñanemoirũha. Aníkena ñanekangy, Jehová ohendúta ñane ñemboʼe ha ñanemombaretéta ijespíritu rupive. Jajerurékena chupe tañandegia. Siémpre ñanemanduʼa vaʼerã ñande haʼeha Ñandejára siérvo ha Jesús disípulo, upévare jaaprovecha vaʼerã umi oportunida oñepresentáva japredika hag̃ua. Jehová katuete ñanevendesíta, ha ikatu voi oĩ ohendúva pe mensáhe ha oñepyrũ oadora avei Ñandejárape (Hech. 4:13-31; 5:27-42; Filip. 1:27-30; 4:6, 7; 2 Tim. 4:16-18).

¹⁸ Ha jahechakuaárõ ikatuha ñandejuka hikuái, oiko haguéicha yma umi apóstol ha hetave Ñandejára siérvore, jajerovia vaʼerã Jehováre, “haʼe hína pe omopuʼãva umi omano vaʼekuépe” (2 Cor. 1:8-10). Jajeroviárõ pe rresurreksiónre ñaaguantáta umi pruéva ijetuʼuvéva jepe (Luc. 21:19). Jesús oikuaa porã vaʼekue oaguantáramo umi pruéva ikatuha oheja peteĩ ehémplo porã ha omombarete ótrope. Upéicha avei, ñande ñaaguantáramo ikatu ñamombarete ñane ermanokuérape (Juan 16:33; Heb. 12:2, 3; 1 Ped. 2:21).

¹⁹ Péro oĩ avei hetave pruéva tekotevẽva ñaaguanta. Por ehémplo algúno ou oñedesanima umi hénte nohenduséi rupi pe mensáhe. Ótro ou hasykatu térã oñedeprimi. Ha oĩ ndaikatúiva ojapo heta mbaʼe pe imperfeksión káusare. Apóstol Pablo tekotevẽ vaʼekue oaguanta avei umichagua situasión. Upe provléma omolesta vaʼekue chupe iservísiope ha heta vése ijetuʼu vaʼekue ojapo hag̃ua hembiapo (2 Cor. 12:7). Ótro kristiáno hérava Epafrodito ha oiko vaʼekue Filípospe, ou ‘oñeñandu vaieterei umi ermáno ohendu rupi hasy hague’ (Filip. 2:25-27). Ñande ningo ñaneimperfékto, ha umi ótra persóna upéichante avei ha upéva sapyʼánte ikatu ñanemoprovléma. Ikatu jajoavy ñane ermáno térã familiakuérandi. Umi mbaʼe ningo ijetuʼu jepi ñaaguanta hag̃ua, péro ikatu jagueropuʼaka jasegíramo umi konsého oĩva la Bíbliape (Ezeq. 2:3-5; 1 Cor. 9:27; 13:8; Col. 3:12-14; 1 Ped. 4:8).

JAJEDESIDÍKENA SIÉMPRE ÑANDEFIELTAHA

²⁰ Jasegi vaʼerã ñaneñeʼẽrendu Jesucrístope, pórke Jehová onombra chupe omoakã hag̃ua pe kongregasión (Col. 2:18, 19). Jaapoja vaʼerã pe esklávo de konfiánsape ha avei umi ansiánope (Heb. 13:7, 17). Jaapojárõ umi mbaʼe ojedesidíva ñaiméta organisádo jajapo hag̃ua Jehová volunta. Ha aníke núnka ñanderesarái ñañemboʼe vaʼerãha Jehovápe. Oĩramo jepe ñandegueraháva kárselpe térã ñanemoĩva peteĩ lugár ñaimetahápe ñaneañoite, lomímonte ikatúta ñañemoag̃ui Jehováre pe ñemboʼe rupive. Tahaʼe haʼéva la ojejapóva ñanderehe, ndaikatumoʼãi ombyai pe unida oĩva Jehová puévlope.

²¹ Jajedesidíkena ñaaguanta ha ani ñañentrega, péicha ikatúta jasegi japredika. Ñakumplíta pe tembiapo Jesús oheja vaʼekue ñandéve. Orresusita rire haʼe heʼi idisipulokuérape: “Tapeho pemboʼe umi hénte entéro paisguápe oiko hag̃ua chuguikuéra che disípulo, ha pevautisa chupekuéra pe Túa, pe Taʼýra ha pe espíritu sánto rérape. Ha pemboʼe chupekuéra ojapo hag̃ua entéro mbaʼe amanda vaʼekue peẽme” (Mat. 28:19, 20). Ñaaguantákena Jesús ojapo haguéicha. Jasegi jajepyʼamongeta pe esperánsa porãite jarekóvare, jaikotaha Ñandejára Rréino poguýpe opa ára g̃uarã (Heb. 12:2). Ñande ningo Jesús disípulo ha ñaipytyvõ oñekumpli hag̃ua haʼe heʼi vaʼekue oñekumplitaha ‘pe fin ou potaite vove’: “Umi notísia porã oñeʼẽva Ñandejára Rréinore oñemombeʼúta oparupiete ko yvy ape ári, upe mensáhe ojekuaa hag̃ua entéro tetãrupi, ha upéi og̃uahẽta pe fin” (Mat. 24:3, 14). Ñañehaʼãmbaitéramo jajapo Jesús omanda vaʼekue, ikatúta jaiko pára siémpre Jehová múndo pyahúpe.