Ñantende hag̃ua la Biblia

1. Jajerurevaʼerã ijapoharépe tañanepytyvõ

“Yma ningo aleemivaʼekue la Biblia añeno mboyve pórke aikuaa ouha Ñandejáragui ha aikuaase mbaʼépa heʼi pype. Upévare ndachegustáiramo jepe la lektúra, adesidi aleetaha la Biblia iñepyrũ guive opa peve. Ñepyrũrã igústo chéve péro ahupytývo umi párte nantendeiha, chembokaigue ha ndaleevéintema.” (Ninfa, Italiaygua).

HETA oĩ avei ojapóva Ninfa ojapo haguéicha. Péro jahecha haguéicha pe ótro artíkulope, Jehová hína la Biblia apohare ha oipota ñantende. Mbaʼe piko jajapovaʼerã upearã? Ñepyrũrã jajerurevaʼerã chupe tañanepytyvõ ñantende hag̃ua.

Ñanemanduʼamína koʼág̃a Jesús remimboʼekuéra rehe. Chupekuéra ningo noñemeʼẽivaʼekue umi estúdio ijyvatevéva, upévare oĩ heʼíva hesekuéra “ndahaʼeiha tekove arandu” (Hechos 4:13). Upéicharõ jepe haʼekuéra ikatu ontende Ñandejára Ñeʼẽ. Mbaʼéicha rupi piko ontende hikuái? Jesús heʼi rupi chupekuéra: ‘Espíritu sánto che Ru omboútava che rérape penepytyvõta ha penemboʼéta opa mbaʼe’ (Juan 14:26). Pe espíritu sánto ningo haʼehína pe podér Ñandejára oiporuvaʼekue ojapo hag̃ua ko yvy ha opa mbaʼe oikovéva (Génesis 1:2). Ha upéva oiporuvaʼekue avei ohaika hag̃ua umi 40 kuimbaʼépe la Biblia (2 Pedro 1:​20, 21). Upe Ijespíritu ningo Jehová omeʼẽta opa ontendesévape Iñeʼẽ.

Péro Jehová omeʼẽ hag̃ua ñandéve ijespíritu sánto ningo jajerurevaʼerã chupe ñande pyʼaite guive. Ha ikatu hína heta vése jajerure chupe omeʼẽ hag̃ua ñandéve. Jesús heʼivaʼekue voi: “Pejerure, ha oñemeʼẽvaʼerã peẽme; peheka ha pejuhúne; pembota ha ojepeʼáne peẽme pe okẽ. Ha peẽ pene ñañáva pemeʼẽkuaáramo mbaʼe iporãva pende raʼykuérape, pende Ru yvagapeguáma katu omeʼẽvaʼerã espíritu sánto umi ichupe ojerurévape” (Lucas 11:​9, 13, BNP). Péicha jahecha Jehová katuete omeʼẽtaha ñandéve ijespíritu sánto jajeruréramo chupe. Ha mbaʼéicha piko ñanepytyvõta upe espíritu sánto? Primero ñanepytyvõta ñantende hag̃ua la Biblia heʼíva. Segundo katu ñanemoarandúta jaikuaa hag̃ua mbaʼéichapa jasegivaʼerã umi konsého oĩva pype (Hebreos 4:12; Santiago 1:​5, 6).

Upéicharõ, jaleéta jave la Biblia ñañemboʼe raẽ vaʼerã Ñandejárape. Ha jajerure chupe ijespíritu sánto ikatu hag̃uáicha ñantende.

Ñantende hag̃ua la Biblia

2. Jajeroviavaʼerã hese ñanepytyvõtaha

Sapyʼánte ikatu oñeñeʼẽ vai ndéve peteĩ nde rapicha ndereikuaáivare. Mbaʼéichapa retratáne chupe rejotopáramo hendive? Katuete ningo hasýta ndéve rehecha hag̃ua umi mbaʼe porã ojapóva pórke oñeñeʼẽ vaíma ndéve hese. Upeichaite avei oiko jepi la Biblia rehe.

APÓSTOL Pablo heʼivaʼekue hasytaha ñantende hag̃ua Ñandejára Ñeʼẽ ndajajeroviáiramo hese. Oĩvaʼekue heta hudío upeichagua ha umíva rehe heʼi: ‘Che aikuaa porã haʼekuéra hakateʼỹha Ñandejára rehe, péro ndoikuaaporãi Chupe ni ndojeroviái hekópe hese’ (Romanos 10:​2, ÑÑB).

Heta oĩvaʼekue avei ndojeroviáiva la Bíbliare, upévare ndoroviái Jesús haʼeha pe Mesías. Jesús ningo okumplipaite umi profesía oĩva la Bíbliape. Upéicharõ jepe umi hudío ndoroviái jey pórke oñemohatã haʼekuéra opensávapente ha ndohechakuaái Ñandejára Ñeʼẽ heʼíva.

Mbaʼépa ñanemboʼe umi hudío ojapovaʼekue? Jalee jave la Biblia ndovaleiha ñañemohatã ñande ñapensávapente. Pórke ñañemohatãramo hasýta ñantende hag̃ua Ñandejára Ñeʼẽ heʼíva.

Carolina del Nórtepe (EE.UU.) peteĩ profesór ostudiáva rrelihionkuérare heʼi la Biblia “haʼeha peteĩ lívro yvypóra ohaivaʼekuénte hapichakuérape g̃uarã. Oñekontradesipáva ha umi konsého omeʼẽva katu nañanepytyvõmoʼãi mbaʼevépe”. Péicha ñapensáramo avei la Bíbliare ningo ndahasyietéta voi ñamboyke hag̃ua umi konsého nañandegustáiva.

Péro la Bíbliape heʼi ñandéve ñahesaʼỹijo porã hag̃ua umi Bereaygua ojapo haguéicha. Umi Bereaygua ningo ndahaʼeivaʼekue ojapóntemava Pablo heʼíva, ‘oipyguara katu hikuái Ñandejára Ñeʼẽ ohecha hag̃ua añetépa umi mbaʼe ojeʼéva chupekuéra’ (Hechos 17:11). Ñande avei ñantende hag̃ua la Biblia ñahesaʼỹijo porã vaʼerã jajeroviágui hese ha nañapenaivaʼerã umi mbaʼe ojeʼévare. Upéicha jahechaukáta jaikuaaseha mbaʼépa heʼi ñandéve la Biblia Apohare.

Ñantende hag̃ua la Biblia

3. Jahejavaʼerã umi ikatupyrývape tañanepytyvõ

Peteĩ karai hérava Edward John Eyre oheja umi indígena Australiaygua oipytyvõ chupe okrusa hag̃ua Nullarbor. Umíva ohechauka chupe mbaʼéichapa oguenohẽvaʼerã y umi yvykuʼi atýragui ha eukalípto mátagui. Upéicha rupínte nomanói tapére.

KO MBAʼE oikovaʼekue ohechauka pyʼỹinte ñaikotevẽha umi ikatupyrýva ñanepytyvõ jajapo hag̃ua umi mbaʼe ijetuʼúva. Upéicha avei ñaikotevẽ jepi peteĩ ikatupyrýva ñanepytyvõ ñantende hag̃ua la Biblia.

Jesús oikuaa porã vaʼekue ijetuʼutaha hemimboʼekuérape ontende hag̃ua ijehegui reínte Ñandejára Ñeʼẽ. Upearã “oipeʼa pe iñarandu rokẽkuéra oikuaauka hag̃ua chupekuéra upe kuatiañeʼẽme oĩva” (Lucas 24:​45, JMP). Jesús ohechakuaa oĩvaʼerãha peteĩ ñanepytyvõva ñantende porã hag̃ua Ñandejára Ñeʼẽ.

Mávapa ikatu ñanepytyvõ

Jesús heʼivaʼekue hemimboʼekuérape oporopytyvõ hag̃ua. Ha oho mboyvemi yvágape heʼi chupekuéra: ‘Tapeho aipóramo opa tetã rupi ha pejapo chuguikuéra che remimboʼe. Ha pemboʼe chupekuéra ojapo hag̃ua opa mbaʼe haʼevaʼekue peẽme’ (Mateo 28:​19, 20). Upéicharõ, umi oservíva Ñandejárape oporomboʼevaʼerã. Upéva heʼise oipytyvõvaʼerãha la héntepe ontende ha ojapo hag̃ua Ñandejára Ñeʼẽ heʼíva.

Jahechamína mbaʼépa oikovaʼekue Jesús heʼi riremi hemimboʼekuérape oporopytyvõvaʼerãha. La Biblia ningo omombeʼu peteĩ kuimbaʼe Etiopiaygua olee hague ohóvo umi profesía Isaías ohaivaʼekue. Ha upéi ojuhu peteĩ párte nontendeiha, pe heʼihápe: ‘Ovecháicha ojereraha ojejuka hag̃ua, ovecharaʼýicha okirirĩ iñapĩha renondépe, haʼe ndoavríri ijuru. Oñemotĩndy ha ndojehusgái chupe hekópe. Mávapa imanduʼáne iñemoñarére? Hekove niko ojepeʼa ko yvy árigui’ (Hechos 8:​32, 33; Isaías 53:​7, 8).

Mbaʼépa ojapóraʼe pe etíope nontendéivo upe profesía? Ojerure Felípepe oipytyvõ hag̃ua chupe, haʼe ningo hetave mbaʼe oikuaa Ñandejára Ñeʼẽgui. Pe etíope oporandu Felípepe: ‘Mávare piko heʼi koʼã mbaʼe pe proféta? Ijehe piko térã ambuére?’ (Hechos 8:34). Pe etíope ningo oukuévo témplogui oleékuri upe profesía ha upévare jaikuaa haʼe omombaʼeguasu hague Ñandejára añeteguápe. Ha oiméne oñemboʼéraʼe ontende hag̃ua upépe heʼíva pórke ojekuaa hese oikuaaseveha. Upéicharõ jepe nontendéi upe oleéva. Péro noñemombaʼeguasúi rupi ojerure Felípepe oipytyvõ hag̃ua chupe. Ha haʼe naiprovlemaiete upearã. Pe etíope ningo ovyʼaiterei ontendévo upe profesía ha ojevautisaséma voi katu (Hechos 8:​35-39).

Koʼág̃a rupi avei testigos de Jehová oporopytyvõ, ojapo haguéicha Felipe ha umi kristiáno ypykue. Amo 235 tetã ha lugár rupi oporomboʼe hikuái la Biblia grátis. Ha opyta porãveha óra umi héntepe oho hikuái ohesaʼỹijo hag̃ua hendivekuéra Ñandejára Ñeʼẽ.a (Ehechamína pe rrekuádro heʼíva “Mbaʼéichapa la Biblia ombohovái”.)

“La Biblia omyesakã chéve umi mbaʼe aikuaaséva”

Steven, Valvanera ha Jo-Anne ningo oñepyrũvaʼekue ostudia la Biblia testigos de Jehová ndive. Mbaʼépa heʼi hikuái upévare? Steven heʼi: “Chepyʼarory ningo ahechávo mbaʼéichapa la Biblia omyesakã chéve umi mbaʼe aikuaaséva. Pe chemboʼéva la Biblia chepytyvõ akompara hag̃ua ojuehe umi téysto heʼíva ikatu hag̃uáicha antende porãve. Ha avyʼaiterei ahechakuaágui natekotevẽiha rojodiskuti antende hag̃ua la Biblia heʼíva”.

Valvanera heʼi avei: “Che ningo ahechakuaa iporãitereiha umi mbaʼe la Biblia omboʼéva ha ndojoavyiha. Ha arovia voi pype heʼíva pórke hesakã porãiterei chéve ha ndahaʼéi upe rrelihión heʼi haguérente.” Ha Jo-Anne katu heʼi: “Ahechakuaávo la Biblia ombohovaiha chéve umi mbaʼe aikuaaséva, chemomýi amombaʼe hag̃ua Ñandejárape che pyʼaite guive. Che ningo amombaʼeterei Ñandejára oheja haguére Iñeʼẽ ombohovái hag̃ua ñandéve opa mbaʼe jaikuaaséva”.

Ha ndépa reikuaa testigos de Jehovápe? Ikatu rejerure chupekuéra tohechauka ndéve mbaʼéichapa haʼekuéra oipytyvõ hapichápe ostudia hag̃ua la Biblia. Ha oiméramo ndereikuaái peteĩ testigo de Jehovápe, ikatu rehai peteĩ kárta ha emondo pe direksión opyta porãvetahápe ndéve, oĩva páhina 4-pe. Upéi umi testigos de Jehová ohótama nde rogaitépe voi oñemongeta hag̃ua nendive. Jahecháma ningo ikatuha ñantende la Biblia heʼíva. Jajapontevaʼerã umi mbaʼe jahechavaʼekue koʼã artíkulope: Jajerure Ñandejárape tañanepytyvõ ijespíritu sánto rupive, jajerovia la Bíbliare ñanepytyvõtaha ha jajerure umi ikatupyryvévape omyesakã hag̃ua ñandéve.

[Nóta]

[Taʼanga ha rrekuádro oĩva páhina 8-pe]

Mbaʼéichapa la Biblia ombohovái

Restudiáramo la Biblia testigos de Jehová ndive, ombohováita ndéve koʼã porandu:

• Mbaʼe propósitopa Ñandejára oguereko ko yvýpe g̃uarã?

• Moõpa oĩ umi omanovaʼekue?

• Jaikopañaína pe ‘ára pahápe’?

• Mbaʼérepa oheja Ñandejára oĩ pe jehasa asy?

• Mbaʼéichapa ikatu revyʼa nde rogapýpe?

[Nóta oĩva taʼanga ndive páhina 7]

Ñantende hag̃ua la Biblia, jajerurevaʼerã Ñandejárape ijespíritu sánto, jajeroviavaʼerã la Bíbliare ha jaheja umi ikatupyrývape tañanepytyvõ