Ñanase jey vaʼerãpa jajesalva hag̃ua?

OÑEPORANDÚRAMO ndéve: “Nde piko renase jeýmava?”. Mbaʼépa nde eréta? Hetaiterei ojeroviáva Ñandejárare heʼíta onase jeýma hague. Oĩ heʼíva ñanase jey vaʼerãha oiko hag̃ua ñandehegui kristiáno ha upéicharõmante jajesalvataha. Heʼi avei hikuái pe teólogo Robert Sproul heʼi haguéicha: “Peteĩ tapicha nonasejeýiva [...] ndaikatúi heʼi ijehe kristianoha”.

Ndépa repensa avei haʼekuéraicha? Upéicharõ katuete reipotáta umi ne hénte ha ne amigokuéra oguata avei pe tape porãre. Péro, iporãta oikuaa raẽ hikuái mbaʼeichaguápa hína peteĩ tapicha onase jeýva. Mbaʼéichapa nde remyesakãta chupekuéra upéva?

Heta oĩ heʼíva peteĩ tapicha onase jeyha opromete rupi oservitaha Ñandejárape ha Jesucrístope. Ha péicha ojapóvo haʼeteha oikovéma Ñandejárape g̃uarã. Peteĩ diksionário heʼi ‘peteĩ kristiáno onase jeyha oñemoag̃ui jeývo Ñandejárare ha opromete oservi jeytaha chupe’.

Péro la Biblia ndeʼíri upéicha. Ndépa reikuaase mbaʼépa heʼi Ñandejára Ñeʼẽ? Iporãta ningo rehesaʼỹijóramo reikuaa porã hag̃ua mbaʼépa heʼise oñenase jey. Upéva reikuaáramo ningo okambiáta heta mbaʼe nde rekovépe koʼág̃ama voi ha amo gotyove avei.

Mbaʼépa heʼi la Biblia

La Bíbliape jatopa Juan 3:​1-12-pe añoite heʼiha “onase jey” térã “onase pyahu jey”. Upépe ikatu jalee mbaʼéichapa Jesús oñemongetavaʼekue Nicodemo ndive, peteĩ omoakãva hudiokuéra rrelihión Jerusalénpe. Eleemína pe rrekuádrope upe oikovaʼekue.

Oñepyrũ guive opa peve, Jesús omyesakã mbaʼépa heʼise ‘oñenase jey’.a Ha ñanepytyvõ avei ñambohovái hag̃ua cinco porandu iñimportánteva:

◼ Mbaʼérepa tekotevẽ oñenase jey?

◼ Mávarepa odepende oñenase jey hag̃ua?

◼ Maʼerãpa oñenase jey vaʼerã?

◼ Mbaʼéichapa oñenase jey?

◼ Ha mbaʼépa okambia oñenase jeývo?

Ñambohovaimína koʼã porandu.

[Nóta]

[Taʼanga ha rrekuádro oĩva páhina 4-pe]

‘Tekotevẽ penase pyahu jey’

‘Oĩvaʼekue peteĩ fariséo hérava Nicodemo, isrraelitakuéra ruvicha. Haʼe ningo oho peteĩ pyharépe ohechávo Jesúspe, ha heʼi chupe: “Mboʼehára, roikuaa niko Ñandejaraite voi nembou hague oremboʼe hag̃ua. Ndaipóri ningo ikatúva ojapo koʼã milágro nde rejapóva Ñandejára noĩriramo nendive”. Upérõ Jesús heʼi chupe: “Añetehápe haʼe ndéve, pe onase jey pyahuʼỹva, ndaikatúi ohecha Ñandejára rréino”. Nicodemo oporandu chupe: “Mbaʼéicha piko peteĩ kuimbaʼe okakuaapa rire onase jeýta? Ikatu ngaʼu piko oike jey isy retepýpe onase jey hag̃ua?”. Ha Jesús heʼi chupe: ‘Añetehápe haʼe ndéve, pe nonaséiva y ha espíritugui, ndaikatúi oike Ñandejára rréinope. Umi onaséva tuvakuéra yvypóravagui niko yvypóra; umi onaséva espíritugui katu espíritu. Ani reñemondýi ko haʼévare ndéve: “Peẽ tekotevẽ penase pyahu jey”. Pe yvytu niko oipeju oipejusehápe; rehendu pe hyapu, upéicharamo jepe ndereikuaái mamóguipa ou térã mamópa oho. Upéicha avei umi onaséva espíritugui”. Upémaramo Nicodemo oporandu jey Jesúspe: “Mbaʼéicha piko ikatu oiko upéva?”. Jesús heʼi chupe: “Nde niko mboʼehára ojekuaa porãva Israélpe, ha piko ndereikuaái koʼã mbaʼe? Añetéko haʼe ndéve ore roñeʼẽha upe roikuaávare, ha roʼeha peẽme upe rohechavaʼekue. Upéicharamo jepe peẽ ndaperoviái ore ñeʼẽ. Ndaperoviái ningo añeʼẽramo jepe peẽme umi mbaʼe ko yvy arigua rehe, piko mbaʼéicha peroviáta añeʼẽramo peẽme umi mbaʼe yvagapegua rehe?”.’ (Juan 3:​1-12, BNP.)

Mbaʼérepa tekotevẽ oñenase jey?

JESÚS oñemongetárõ guare Nicodemo ndive omyesakã porã tekotevẽha oñenase jey.

Jahechamína mbaʼépa heʼivaʼekue Jesús. Ñepyrũrã heʼi: ‘Pe onase jey pyahuʼỹva, ndaikatúi ohecha Ñandejára rréino’ (Juan 3:​3, BNP). Péicha Jesús ohechauka tekotevẽha oñenase jey. Pór ehémplo, oĩramo heʼíva: “Nosẽiramo kuarahy, ndaikatúi koʼẽvo”. Heʼisehína tekotevẽha osẽ kuarahy koʼẽ hag̃ua. Upéicha avei Jesús heʼi tekotevẽha peteĩ tapicha onase jey ‘ohecha hag̃ua Ñandejára rréino’.

Ha noñentendeporãirõ g̃uarã Jesús heʼi jey: ‘Peẽ tekotevẽ penase pyahu jey’ (Juan 3:​7, BNP). Péicha omyesakã porã oñenase jeýmante vaʼerãha ‘ojeike hag̃ua Ñandejára rréinope’ (Juan 3:​5, BNP).

Jahechakuaa Jesúspe g̃uarã tuichaiterei mbaʼeha oñenase jey. Upévare ñande ñañehaʼãmbaitevaʼerã ñantende porã mbaʼépa heʼise upéva. Pór ehémplo, ndépa ere káda únore odependeha onase jey hag̃ua?

[Komentário oĩva páhina 5-pe]

“Nosẽiramo kuarahy, ndaikatúi koʼẽvo”

Mávarepa odepende oñenase jey hag̃ua?

MÁVAREPA odepende oñenase jey hag̃ua? Oĩ ningo umi rrelihión omoakãva heʼíva ihentekuérape onase jey vaʼerãha. Ha upearã oiporu Jesús heʼivaʼekue: ‘Peẽ tekotevẽ penase pyahu jey’ (Juan 3:​7, BNP). Péro haʼekuéra oiporu kóva Jesús omandarõguáicha chupekuéra heʼívo: “Penase jeýke!”. Upévare heʼi hikuái káda uno rehe odependeha iñeʼẽrendu hag̃ua Jesúspe ha upearã tekotevẽha onase jey. Ha haʼekuéra heʼi voi ñanderehe odependeha ñanase jey hag̃ua. Péro, upéicha piko Jesús heʼíraʼe Nicodémope?

Ñahesaʼỹijomiéramo jahechakuaáta Jesús ndeʼíri hague káda uno odesidivaʼerãha onase jeýtapa. Mbaʼérepa jaʼe upéicha? Griégope ojeʼévo “tekotevẽ penase jey” ikatu avei heʼise “tekotevẽ penase yvágagui”.a Upéicharõ nodependéi pe mávare onase pyahu jey hag̃ua, ou guei “yvágagui”, térã “pe Túvagui” (Juan 19:11; nóta; Santiago 1:17). Upéva heʼise Ñandejára rehe odependeha onase jey hag̃ua (1 Juan 3:9).

Péicha hesakã porã ñandéve nodependeiha káda únore onase jey hag̃ua. Ha ñambojojamína koʼág̃a peteĩ mitã onasétavare. Ñanderehépa odependerakaʼe ñanase hag̃ua? Nahániri ajépa, odepende ningo ñande sy ha ñande ru rehe. Upéicha avei ñande ikatu ñanase jey Ñande Ru yvagapegua oipotáramo añoite (Juan 1:13). Upévare apóstol Pedro heʼi: ‘Ñamombaʼeguasu Ñandejára, Jesucristo Rúpe, iporiahuvereko tuichaite rupi ñanemoingo pyahu jeýva’ (1 Pedro 1:​3, BNP).

Oñenase jey vaʼerãpa katuete?

Ikatu oĩ oñeporandúva: “Nodependéiramo ñanderehe ñanase jey hag̃ua, mbaʼére piko Jesús heʼirakaʼe: ‘Peẽ tekotevẽ penase pyahu jey’?”. Ha oiméramo Jesús omandáraʼe katuete oñenase jey hag̃ua, ojeruretahína peteĩ mbaʼe ndaikatumoʼãiva jajapo. Péro haʼe ndojeruréi upéva. Mbaʼépa upéicharõ heʼiséraʼe Jesús?

Ñahesaʼỹijóramo pe idióma Jesús oñeʼẽvaʼekue, jahechakuaáta ndoiporúi hague pe ñeʼẽ ojeporúva jepi oñemanda hag̃ua. Haʼe ningo oiporúnte pe ñeʼẽ ojeporúva jepi oñemombeʼu hag̃ua peteĩ mbaʼe. Upéicharõ Jesús heʼírõ guare ‘peẽ tekotevẽ penase jey’, omombeʼúnte peteĩ mbaʼe ha ndahaʼéi omandavahína ojejapo hag̃ua. Oĩ avei otradusíva kóicha Jesús heʼivaʼekue: ‘Peẽ peikotevẽ peikove pyahu jey’ (Juan 3:7).

Ñamoĩmína peteĩ ehémplo ñantende porãve hag̃ua. Peteĩ mitã tetã ambueguáva ndajeko ou oike hag̃ua eskuélape koʼápe. Upéi, peteĩ eskuelapegua direktór heʼi chupe: “Reike hag̃ua ko eskuélape, nde ore retãygua vaʼerã”. Upéva ndeʼiséi haʼe omandaha chupe ojapovaʼerã. Ndeʼirihína pe mitãme: “Oikovaʼerã ndehegui ore retãygua!”. Heʼínte chupe mbaʼépa oñekotevẽ oike hag̃ua eskuélape. Térã heʼihína chupe: “Nde reike hag̃ua ko eskuélape erekovaʼerã dokuménto koʼapegua”. Upéicha avei Jesús heʼisentevaʼekue mbaʼépa oñekotevẽ ‘ojeike hag̃ua Ñandejára rréinope’.

Péro, mbaʼérepa ojeʼe oñenase jey vaʼerãha ojeike hag̃ua Ñandejára Rréinope? Jaikuaa hag̃ua, ñambohovái raẽ vaʼerã ko porandu: “Maʼerãpa oñenase jey vaʼerã?”.

[Nóta]

[Nóta oĩva taʼanga ndive páhina 6]

Mávarepa odepende onase hag̃ua peteĩ mitã ha mávarepa odepende oñenase pyahu jey hag̃ua?

Maʼerãpa oñenase jey vaʼerã?

HETA oĩ heʼíva ñanase jey vaʼerãha jajesalváma hag̃ua. Péro nemanduʼápa mbaʼérepa Jesús heʼivaʼekue oñenase pyahu jey vaʼerãha? Haʼe heʼi ‘pe nonasejeýiva, ndaikatúi ohecha Ñandejára rréino’ (Juan 3:​3, BNP). Koʼápe ndeʼirihína peteĩ tapicha ojesalva hag̃ua tekotevẽha onase jey, heʼintehína upéva tekotevẽha ojeike hag̃ua Ñandejára Rréinope. Péro ikatu avei jaʼe: “Ñandejára Rréinope jaikéramo piko ndeʼiséi jajesalvamaha?”. Nahániri. Ñambohovái hag̃ua ko porandu jahechami raẽta mbaʼépa heʼise “Ñandejára rréino”.

Peteĩ rréino ningo peteĩ goviérno avei. Upévare ñañeʼẽramo “Ñandejára rréino” rehe, ñañeʼẽñaína peteĩ goviérno Ñandejára omoĩvare. La Bíbliape heʼi ko rréino oisãmbyhyha Jesucristo ha peteĩ aty omoirũva chupe (Daniel 7:​1, 13, 14; Mateo 26:​63, 64). Koʼã Jesucristo irũnguéra ningo ojeporavo “opaichagua trívu, ñeʼẽ, tetã ha tetãygua” apytégui oisãmbyhy hag̃ua “ko yvy” (Apocalipsis [Revelación] 5:​9, 10, BNP; 20:6). Ñandejára Ñeʼẽ ohechauka umi oisãmbyhýtava oĩha 144.000, ha haʼeha ‘peteĩ ovecha aty michĩva’ ojeporavovaʼekue ko yvy ape árigui (Lucas 12:32; Revelación 14:​1, 3).

Ha moõpa oĩ Ñandejára Rréino? Ñandejára Rréinope ningo ojeʼe avei ‘rréino yvagapegua’. Upéicharõ Jesús ha iñirũnguéra oisãmbyhy yvága guive (Lucas 8:10; Mateo 13:11). Upévare, Ñandejára Rréino haʼe peteĩ goviérno yvagapegua oĩva Jesucristo ha umi iñirũnguéra poguýpe.

Upéicharõ, mbaʼépa heʼiserakaʼe Jesús heʼírõ guare oñenase jey vaʼerãha ojeike hag̃ua Ñandejára Rréinope? Heʼise peteĩ tapicha onase jey vaʼerãha oisãmbyhy hag̃ua Jesucristo ndive yvágape. Péicha jahecha umi 144.000 yvypóra onase pyahu jey vaʼerãha oisãmbyhy hag̃ua yvágape.

Koʼág̃a jahechakuaáma iñimportantetereiha oñenase jey, ha Ñandejára rehe odependeha upéva. Ha upéicha ojepreparahína umi 144.000 yvypórape oisãmbyhy hag̃ua yvágape. Koʼa rire jahechamíta mbaʼéichapa oñenase jey.

[Komentário oĩva páhina 7-pe]

Onase pyahu jey vaʼerã umi 144.000 yvypóra oisãmbyhy hag̃ua yvágape

[Nóta oĩva taʼanga ndive páhina 7]

Ñandejára Rréino oisãmbyhy Jesucristo ha umi 144.000 yvypóra ojeporavovaʼekue

Mbaʼéichapa oñenase jey?

JESÚS heʼi Nicodémope tekotevẽha oñenase pyahu jey, avei mávarepa odepende upéva ha maʼerãpa oñenase jey vaʼerã. Heʼi avei chupe mbaʼéichapa oikóta upéva: ‘Pe nonaséiva y ha espíritugui, ndaikatúi oike Ñandejára rréinope’ (Juan 3:​5, BNP). Upéicharõ ikatu oñenase jey y ha espíritu sánto rupive añoite. Péro mbaʼépa heʼise upéva?

Mbaʼeichagua “y” ha “espíritu” rehépa oñeʼẽ?

Nicodemo ningo peteĩ hudío iñarandúva. Ha oiméne oikuaarakaʼe pe Escrituras Hebréaspe “Ñandejára espíritu” heʼiseha Ñandejára puʼaka, pe oiporúva ombokatupyry hag̃ua yvyporakuérape ikatu hag̃uáicha ojapo hembipota (Génesis 41:38; Éxodo 31:3; 1 Samuel 10:6). Upévare, ohendúvo Jesúspe oñeʼẽ “espíritu” rehe, Nicodemo ontendéneraʼe oñeʼẽha upe Ñandejára espíritu sántore.

Ha mbaʼépa hína pe y Jesús oñeʼẽ hague? Upearã jahechamína la Bíbliape mbaʼépa Jesús heʼi oñemongeta mboyve Nicodemo ndive, ha upe rire heʼíva avei. Upépe ningo omombeʼu Juan el Bautista ha Jesús remimboʼekuéra oporovautisaha ýpe (Juan 1:​19, 31; 3:22; 4:​1-3). Ha Jerusalénpe ningo ojejapóva avei péicha, upévare Nicodemo oikuaa porãne rakaʼe Jesús oñeʼẽha ýpe ojevautisávare.a

Ojevautisa ‘espíritu sántope’

Péicha jahecha ‘oñenase ýgui’ heʼiseha ojevautisa ýpe. Ha mbaʼépa upéicharõ heʼise ‘oñenase jey espíritugui’? Jesús oñemongeta mboyve Nicodemo ndive, Juan el Bautista heʼimavaʼekue pe y ha espíritu iñimportanteha ojevautisa hag̃ua peteĩ tapicha. Juan el Bautista heʼi: ‘Che ningo povautisa ýpe, Jesús katu pendevautisáta espíritu sántope’ (Marcos 1:​7, 8, ÑÑB). Pe lívro de Marcos oĩva la Bíbliape omombeʼu mbaʼéichapa oñepyrũvaʼekue upeichagua vautísmo. Upépe heʼi: ‘Peteĩ árape Jesús ou Nazaret de Galiléagui, ha Juan ovautisa chupe rrío Jordánpe. Ha osẽvo pe ýgui, ojehecha pe yvága ojeavriha ha pe espíritu sánto oguejy hiʼári pykasúicha’ (Marcos 1:​9, 10, ÑÑB). Jesúspe ningo ojevautisa ýpe oñemoñapymĩrõ guare chupe rrío Jordánpe. Ha oñemeʼẽrõ guare chupe espíritu sánto yvágagui, ojevautisa espíritu sántope.

Jesús tres áño ojevautisa haguépe, heʼi hemimboʼekuérape: ‘Peẽ katu koʼẽrõitéma avei pejevautisáta espíritu sántope’ (Hechos 1:​5, BNP). Arakaʼépa oiko upéva?

Jerusalénpe áño 33-pe Pentecostés jave 120 Jesús remimboʼe oñembyaty peteĩ hendápe. “Upeichaháguinte peteĩ tyapu mbarete ou yvágagui, yvytu hatã oipejurõguáicha, ha omyenyhẽmba pe óga oĩháme hikuái. Ha ojechauka chupekuéra kũ tatarendýicha oguejýva [...] ha opavave henyhẽ espíritu sántogui.” (Hechos 2:​1-4.) Upe araitépe Jerusalénpe, apóstol Pedro heʼi peteĩ hénte atýpe ojevautisa hag̃ua ýpe: ‘Pejevy pene rembiapo vaikuégui ha pejevautisa peteĩteĩ Jesucristo rérape, Ñandejára oheja rei hag̃ua peẽme pene rembiapo vaikue, ha omeʼẽta peẽme espíritu sánto’. Mbaʼépa ojapo umi hénte? ‘Umi ogueroviavaʼekue iñeʼẽ ojevautisa, ha upe árape tres mil rupi hetave hikuái.’ (Hechos 2:​38, 41.)

Mbaʼéichapa ojejapovaʼerã

Mbaʼépa omyesakã ñandéve umi mbaʼe jahechavaʼekue? Oñenase jey hag̃ua oñekotevẽha mokõi mbaʼe. Pór ehémplo Jesús ojevautisa raẽ vaʼekue ýpe ha upéi espíritu sántope. Upéicha avei hemimboʼekuéra: Juan el Bautista ovautisa raẽ chupekuéra ýpe, ha upéi oñemeʼẽ chupekuéra espíritu sánto (Juan 1:​35, 36). Umi 3.000 kristiáno pyahu ojevautisa raẽ vaʼekue ýpe ha upe rire oñemeʼẽ chupekuéra espíritu sánto.

Jaikuaa rire oikovaʼekue Pentecostéspe, mbaʼéichapa ikatu oñenase jey koʼág̃a rupi? Umi Jesús apóstol ha umi kristiáno ypykue onase jey haguéicha. Ñepyrũrã, peteĩ tapicha oñembyasyvaʼerã ojapo haguére mbaʼe vai, ndojapovéi, oñemeʼẽ Ñandejárape ha ohechauka upéva enterovépe ojevautisávo ýpe. Upe rire añoite Jehová ijespíritu sánto rupive ikatu oiporavo pe tapichápe oisãmbyhy hag̃ua Irréinope. Péicha jahecha pe tapicháre odependeha ojevautisa hag̃ua ýpe, ha upe rire katu Ñandejárarema odepende ovautisátapa chupe espíritu sántope. Upéicharõ, peteĩ tapicháre ikatu jaʼe onase jeyha ohasáramo koʼã mokõi vautísmo rupi.

Péro mbaʼérepa Jesús heʼirakaʼe ‘penase jey vaʼerã ýgui ha espíritugui’? Ohechauka hag̃ua umi ojevautisáva ýpe ha espíritu sántope tuichaiterei okambiataha. Pe artíkulo oúvape jahecháta upéva.

[Nóta]

[Nóta oĩva taʼanga ndive páhina 9]

Juan ovautisavaʼekue ýpe umi Israelgua oñembyasývape ojapo haguére mbaʼe vai

Mbaʼépa okambia oñenase jeývo?

MBAʼÉREPA Jesús heʼi ‘oñenase jey vaʼerãha espíritugui’ oñeʼẽrõ guare pe espíritu sántope ojevautisávare? (Juan 3:5.) Pe ñeʼẽ “onase” ojeporu jepi ojeʼe hag̃ua “oñemoñepyrũha” peteĩ mbaʼe. Ha mbaʼépa heʼise ‘onase’ ha ‘onase pyahu’? Heʼise umi ojevautisáva espíritu sántope Ñandejára orekomaha chupekuéra itaʼýraramo. Ha mbaʼéichapa oiko upéva?

Apóstol Pablo ombojoja umi túva oadoptávare ifamiliarã. Haʼe omombeʼu mbaʼéichapa Ñandejára oprepara umi yvypóra oisãmbyhýtavape yvágape. Ha heʼi voi ‘Ñandejára orekoha chupekuéra itaʼyrarõguáicha’ (Gálatas 4:5; Hebreos 12:7). Kóicha ningo ñantende porãve mbaʼéichapa oĩ Ñandejára ndive umi ojevautisavaʼekue espíritu sántope. Jaikuaa hag̃ua mbaʼeichakuépa upéva, ñañeʼẽmi jey pe mitã oikesévare pe eskuéla koʼapeguápe.

Mbaʼérepa heta mbaʼe okambia

Jaʼéma haguéicha pe mitã ndaikatúi oike upe eskuélape ndahaʼéi rupi ñane retãygua. Péro peteĩ família koʼapegua oadoptáramo chupe, okambiáta pe mitã situasión. Haʼe orekótama derécho umi mitã koʼapeguáicha oike hag̃ua eskuélape.

Upeichaite avei oiko umi onase jeývare. Upe mitã ningo ndaikatúikuri oike upe eskuélape ndahaʼéigui ñane retãygua, péro haʼe ijeheguínte ndaikatúi mbaʼeve ojapo okambia hag̃ua isituasión. Upéicha avei tekotevẽ ‘onase pyahu jey’ peteĩ yvypóra oisãmbyhy hag̃ua yvágape Ñandejára Rréinope. Péro ni peteĩ yvypóra ndaikatúi ojapo upéva ijeheguínte, pórke Ñandejárare odepende ‘oñenase pyahu jey hag̃ua’.

Ñanemanduʼami jey mbaʼéichapa okambiáraʼe pe mitã situasión? Chupe ningo oadoptákuri peteĩ família koʼapegua. Upéicharõ jepe jaikuaa pe mitã ndahaʼeiha ñane retãygua, péro okambiáma umi derécho orekóva. Ha orekópe pe dokuménto oadopta hague chupe upe família, haʼete onase térã oñepyrũ pyahu jeýva, pórke oiko chugui ñane retãygua. Upévare ikatúma oike koʼapegua eskuélape ha oĩma peteĩ família pyahúpe.

Upéicha avei Jehová okambia heta yvypóra imperfékto situasión oadoptávo chupekuéra itaʼýraramo. Ha apóstol Pablo heʼi voi iñirũnguérape: ‘Oñemeʼẽkuri peẽme pe espíritu ojapóva pendehegui Ñandejára raʼy ha Ñandejára rajy. Ha upévare ikatu jaʼe: “Abba, Che Ru”! Pe espíritu sánto ohechauka ñande espíritupe ñande haʼeha Ñandejára raʼy ha rajykuéra’ (Romanos 8:​15, 16, JMP). Péicha umi kristiánope ojeadopta rupi oiko chuguikuéra ‘Ñandejára raʼy ha Ñandejára rajy’ ha oĩma hikuái ifamíliape (1 Juan 3:1; 2 Corintios 6:18).

Upéicharõ jepe, haʼekuéra iñimperfékto gueteri (1 Juan 1:8). Ha apóstol Pablo heʼi haguéicha, ojeadopta rupi chupekuéra okambia umi derécho orekóva. Ñandejára espíritu sánto rupive haʼekuéra oikuaa porã oikotaha Jesucristo ndive yvágape (1 Juan 3:2). Ha ohaʼarõha chupekuéra peteĩ mbaʼe pyahu iporãva (2 Corintios 1:​21, 22). Haʼetévaicha onase pyahu jeýva térã oñepyrũ jeýva hikuái.

La Biblia heʼi oikotaha chuguikuéra ‘Ñandejára ha Jesucristo saserdóte, ha oisãmbyhytaha hendive mil áño’ (Revelación 20:6). Jesucrístoicha avei oisãmbyhýta hikuái Ñandejára Rréinope. Upévare apóstol Pedro heʼi: ‘Pe mbaʼe Ñandejára oguerekóva peẽme g̃uarã yvágape, ndaikatumoʼãi oñembyai, ikyʼa térã ipiru’ (1 Pedro 1:​3, 4). Ajépa iporãite upéva!

Péro jaikuaase gueteri mávapepa oisãmbyhýta koʼã onase pyahu jeýva? Ñambohováita ko porandu pe artíkulo oúvape.

[Nóta oĩva taʼanga ndive páhina 10]

Mbaʼépa Pablo heʼivaʼekue umi Ñandejára oadoptavaʼekuére?