KÁDA semána haimete opavave kongregasiónpe ojejapo diskúrso púvliko. Oimérõ nde peteĩ ansiáno térã siérvo ministeriál, ¿ojekuaápa rejapo lájare umi nde párte ndekatupyryha reporomboʼe hag̃ua? Oiméramo upéicha ikatu oñemeʼẽ ndéve rejapo hag̃ua peteĩ diskúrso púvliko. Ko eskuéla rupive hetaiterei kuimbaʼépema oñembokatupyry ojapo porã hag̃ua ko tembiapo. ¿Mbaʼéichapa rejapo vaʼerã oñemeʼẽramo ndéve ko asignasión?

Estudia porã nde voského

Reñepyrũ mboyve rehesaʼỹijo ha reheka informasión, releepaite vaʼerã pe voského ha ejepyʼamongeta repilla porã meve mbaʼépa la omboʼeséva. ¿Mbaʼépa ontendekase pe título? ¿Mbaʼépa nde remboʼese umi nerendúvape? ¿Mbaʼépa rehupytyse pe diskúrso rupive?

Elee ha eñehaʼã entende porã umi subtítulo. ¿Mbaʼéichapa umíva omyesakãve pe téma? Káda subtítulo guýpe oreko púnto omopyendáva koʼã párte, ha umíva guýpe oĩ jey umi ótro púnto sekundário omyesakãvéva umíva. Rentende porã vove pe téma, mbaʼépa rehupytyse pe diskúrso rupive ha mbaʼéichapa umi púnto prinsipál ohechauka upéva, ikatútama reñepyrũ reprepara nde diskúrso.

Tuicha nepytyvõta repensáramo nde voského ojedividiha cuatro térã cinco pártepe, ha káda párte orekoha avei peteĩ púnto prinsipál. Upéicha ikatu reprepara rehóvo káda párte.

Nemanduʼákena pe voského haʼeha peteĩ erramiéntante nepytyvõtava reprepara hag̃ua nde diskúrso. Ndete reprepara ha reskrivi vaʼerã nde voskehorã. Pe oñemeʼẽva ndéve ndahaʼéi hína reiporu hag̃ua rejapo jave nde diskúrso platafórma guive, síno haʼete peteĩ eskeléto, nde remoĩ vaʼerã chupe hoʼorã ha peteĩ korasõ. Tekotevẽ rerrellena chupe ani hag̃ua opyta ikanguekue reínte.

Eiporu hekoitépe la Biblia

Jesucristo ha idisipulokuéra oiporu vaʼekue Ñandejára Ñeʼẽ oporomboʼe jave (Luc. 4:16-21; 24:27; Hech. 17:2, 3). Ha nde resegi vaʼerã upe ehémplo, rejapóvo nde diskúrso umi mbaʼe eréva oñemopyenda vaʼerã la Bíbliape. Iporãramo jepe remyesakã umi mbaʼe ojeskrivíva pe voskéhope ha ere mbaʼéichapa ojejapo vaʼerã umíva, tekotevẽ rehecha mbaʼe téxtopa omopyenda umi konsého ha eñehaʼã eiporu la Biblia reporomboʼe jave.

Reprepara jave nde diskúrso eleepaite umi téxto. Ha rentende porã hag̃ua ehecha avei umi oĩva pe versíkulo mboyve ha avei upe rire, reikuaa hag̃ua mbaʼe situasiónpepa ojeskrivi. Péicha reikuaáta umi téxto tekotevẽva relee ha umi natekotevẽiva. Reiporavo vaʼerã umi añetehápe ideprovéchotava umi nerendúvape. Péicha rejapóramo natekotevẽmoʼãi reheka ótro téxto noĩriva pe voskéhope.

Iporã hag̃ua nde diskúrso natekotevẽi relee hetaiterei téxto, síno remyesakã porã umi reiporúva. Relee mboyve peteĩ téxto rehechauka vaʼerã mbaʼérepa ojeleéta. Upe rire emyesakã aja mbaʼéichapa ikatu ojejapo upépe heʼíva, ani remboty nde Biblia, upéicha umi nerendúva osegíta avei ne ehémplo. ¿Mbaʼépa rejapo vaʼerã umi téxto ideprovécho hag̃ua umi nerendúvape ha og̃uahẽ hag̃ua ikorasõme umi mbaʼe heʼíva? Relee jave umi téxto tekotevẽ remyesakã porã, emoĩ peteĩ ehémplo ha ehechauka mbaʼéichapa ikatu ojejapo upépe heʼíva (Neh. 8:8, 12).

Remyesakã vaʼerã. Repensa jave mbaʼéichapa remyesakãta peteĩ téxto, iporã reñeporandu koʼã mbaʼe: “¿Mbaʼépa heʼise pe téxto? ¿Mbaʼérepa aiporavo raʼe aiporu hag̃ua? ¿Mbaʼépa oikuaaséta hikuái ko téxtogui?”. Ideprovéchota ndéve releéramo umi versíkulo oĩva upe téxto mboyve ha upe rire. Avei rehesaʼỹijokuaa umi puvlikasión onohẽ vaʼekue “tembiguái jeroviaha ha iñarandúva”, koʼãva nepytyvõta rentende hag̃ua mbaʼépa oiko upe tiémpope, mbaʼe mbaʼépa ontendekase raʼe upe oskrivi vaʼekue pe téxto ha mávape g̃uarãpa ojeskrivi (Mat. 24:45-47). Péro aníke remyesakãse hetaiterei detálle pe téxtogui. Upéva rangue ehechauka mbaʼéichapa oho pe témare ha upéicha ontendéta hikuái mbaʼérepa rejerure chupekuéra olee hag̃ua.

Eiporu ehémplo. Jesús oiporu vaʼekue heta ehémplo omboʼérõ guare umi héntepe, ojapórõ guare pe Sermón del Mónte oñeʼẽ umi “guyrakuéra yvagapeguáre”, “umi lírio oĩva ñúre”, “okẽ ipoʼívare”, ha pe óga ‘oñemopyendáva ita ári rehe’. Péicha ojapo rupi opoko umi hénte korasõre ha ndopytái tesaráipe umi mbaʼe haʼe omboʼe vaʼekue (Mat., kap. 5–7). Nde avei reiporu porãramo umi ehémplo, reipytyvõta umi nerendúvape ontende porãve ha imanduʼa hag̃ua umi mbaʼe remboʼéva chupekuéra.

Ehechauka mbaʼéichapa ojeporu vaʼerã. Jahecháma iñimportanteha jaiporu ehémplo ha ñamyesakã porã umi mbaʼe ñamboʼéva, péro ideprovécho hag̃ua umi héntepe pe ñamboʼéva hína, jahechauka vaʼerã chupekuéra mbaʼéichapa ikatúta oiporu térã ojapo la Biblia heʼíva. Jaikuaa káda uno odesidi vaʼerãha ojapótapa la Biblia heʼíva térãpa nahániri, péro ñande ikatu ñaipytyvõ chupekuéra ohechakuaa hag̃ua mbaʼépa oñehaʼarõ chuguikuéra. Rehechakuaáramo ontendemaha mbaʼépa heʼise pe téxto ha mbaʼéichapa oho pe témare, ikatu rehechauka mbaʼéicha pe téxto omyesakã umi enseñánsa oĩva la Bíbliape, ha mbaʼépa oñehaʼarõ chuguikuéra ojapo. Remyesakã porã vaʼerã mbaʼérepa iñimportánte ñakambia ñande lája ha ñamboyke umi mbaʼe jaguerovia vaʼekue térã ñapensáva oĩ porãha, péro Ñandejára ndoguerohorýiva.

Eréta jave koʼã mbaʼe repensa vaʼerã umi nerendúva apytépe oĩha oñepyrũ ramóva ostudia, imitãva, ijedavéva ha oiméne oĩ avei ombohováiva hína umi provléma ijetuʼúva. Eñehaʼãkena emyesakã porã mbaʼépa tekotevẽ ojapo hikuái, péro ani rejopy umi nerendúvape ojapo hag̃ua peteĩ mbaʼe oforsaitereítava chupekuéra. Ani avei remeʼẽ konsého ideprovéchotava mbovymímente.

Umi mbaʼe ndete redesidi vaʼerã

Oĩ heta mbaʼe ndaikatúiva rekambia nde voskéhope, por ehémplo umi idéa prinsipál, ha mboy tiémpopa reiporu vaʼerã remyesakã hag̃ua umíva. Péro oĩ umi mbaʼe ndete redesidi vaʼerã mbaʼéichapa rejapóta, ikatu rehecha iporãvetaha mbykymínte reñeʼẽ peteĩ púnto sekundáriore, ikatu hag̃uáicha ne tiempove remyesakã hag̃ua ótro púnto iñimportantevéva. Reiporavo porã vaʼerã umíva, cháke nderejapóiramo upéicha rerekóta hetaiterei informasión remyesakã vaʼerã ha redesahusiáta umi nerendúvape. ¿Mbaʼéichapa reikuaáta mbaʼe púntopa tekotevẽ remyesakã porãve? Upearã ikatu reñeporandu: “¿Mbaʼe púntopa chepytyvõta amyesakã porãve hag̃ua pe téma? ¿Mavaitévapa ideprovechovéta umi cherendúvape? Amboykétaramo peteĩ téxto térã peteĩ púnto, ¿hesakãnepa lomímonte pe téma prinsipál?”.

Eñatendéke ani hag̃ua ere peteĩ mbaʼe ndereikuaaporãiva siertoha, térã peteĩ mbaʼe nde rekalkulávante. Ni Jesús ‘ndeʼíri vaʼekue mbaʼeve ijehegui rei’, haʼéramo jepe Ñandejára Raʼy (Juan 14:10). Ani nderesarái umi hénte ouha rreunionhápe ohendúvo Ñandejára Ñeʼẽ. Nde haʼéramo peteĩ mboʼehára katupyry ndereikomoʼãi reñembovale, síno reiporúta hekoitépe la Biblia. Upéicha katuete Jehová oguerohorýta la rejapóva ha osẽ porãta la nde diskúrso (Filip. 1:10, 11).

Resegíramo umi konsého oñemeʼẽ vaʼekue, rerekótama peteĩ diskúrso omyesakã porãva umi mbaʼe oĩva la Bíbliape. Koʼág̃a ikatúma repraktika en vos álta opyta porã meve ne akãme umi púnto iñimportantevéva. Eñehaʼãkena umi mbaʼe eréva tosẽ nde pyʼaite guive, upéicharõ nde diskúrso igústo ha oporomokyreʼỹta. Emeʼẽ mboyve nde diskúrso eñeporandu koʼã mbaʼe: “¿Mbaʼépa ahupytyse ko diskúrso rupive? ¿Hesakã porãpa umi púnto prinsipál? ¿Omopyendápa la Biblia che diskúrso? ¿Oĩpa hendápe porã umi púnto amyesakãva ahávo? ¿Omomýitapa umi cherendúvape ohayhu hag̃ua Jehovápe ha omombaʼe hag̃ua umi mbaʼe haʼe omeʼẽva ñandéve? ¿Ohópa che konklusión pe témare? ¿Ohechakuaátapa umi cherendúva mbaʼépepa tekotevẽ okambia, ha omomýitapa chupekuéra ojapo hag̃ua upéva?”. Oimérõ upéicha hína, ikatúma reipytyvõ ha remombarete pe kongregasiónpe nde diskúrso rupive ha péicha remombaʼeguasu Jehovápe (Prov. 15:2).

ENTEROVE ningo jaipota oiko ñandehegui mboʼehára ikatupyrýva. ¿Mbaʼérepa iñimportantete upéva? Oimérõ ramoiténte oiko hague ndehegui puvlikadór katuete rerekoséta peteĩ estúdio vívliko, Jesús heʼi voi ñaipytyvõ vaʼerãha ñande rapichápe oiko hag̃ua chuguikuéra idisípulo (Mat. 28:19, 20). Ha oimérõ heta tiémporema repredika, katuete ndekatupyryseve reg̃uahẽ hag̃ua umi nerendúva korasõme. Umi sy ha túva katu tekotevẽ omboʼe ifamíliape ohayhu hag̃ua Jehovápe, ikatu hag̃uáicha ijeheguiete odesidi hikuái oservi chupe (3 Juan 4). Ha nde ansiánoramo térã rehupytyse upe priviléhio, nde diskúrso rupive oiméne reipytyvõse ne ermanokuérape ohayhu hag̃ua Jehovápe ha umi léi haʼe omeʼẽva. ¿Mbaʼépa nepytyvõta rejapo porã hag̃ua koʼã mbaʼe?

Jesucristo hína pe Mboʼehára Ikatupyryvéva, upévare jasegi vaʼerã iñehémplo (Luc. 6:40). Haʼe omboʼe jave opoko umi hénte korasõre ha umi mbaʼe omboʼéva ndopytái tesaráipe. Umi mbaʼe heʼíva rupive Jesús oipytyvõ vaʼekue umi héntepe opensa hag̃ua ha oservi hag̃ua Jehovápe ipyʼaite guive. Umi héntepe ndaijetuʼúi vaʼekue ontende mbaʼépa ojapo vaʼerã. ¿Ikatútapa nde avei péicha reipytyvõ umi nerendúvape?

Ejerovia Jehováre

Jesús oporomboʼe porãiterei vaʼekue oaprende rupi heta mbaʼe itúva Jehovágui ha pe espíritu sánto oipytyvõgui chupe. ¿Rejerurépa avei Jehovápe tanepytyvõ remboʼe porãve hag̃ua ne estudiantekuérape? Rerekóramo família, ¿rejerurépa Jehovápe tanemoarandu rehekomboʼe porã hag̃ua chupekuéra? ¿Reñemboʼépa Jehovápe nde pyʼaite guive rejapóta jave diskúrso térã otokáramo ndéve párte rreunionhápe? Reñemboʼéramo rehechauka hína rejeroviaha Jehováre, ha upéva nepytyvõta ndekatupyryve hag̃ua.

Jahechauka avei jajeroviaha Jehováre jaiporúvo la Biblia ñaporomboʼe jave. Pe pyhare omano mboyve Jesús heʼi vaʼekue itúvape: “Che ameʼẽ chupekuéra ne ñeʼẽ” (Juan 17:14). Jepe Jesús iñarandu ha oikuaa hetaiterei mbaʼe, haʼe nomboʼéi mbaʼeve ijehegui reínte, síno umi mbaʼe oaprende vaʼekue itúvagui. Tekotevẽ ñande jasegi avei iñehémplo (Juan 12:49, 50). Ñandejára ñeʼẽ ningo ipoderosoiterei ha ikatu okambia umi hénte rekove, umi mbaʼe opensáva ha opoko hemiandúre (Heb. 4:12). Upéicharõ, jaikuaa porãvévo la Bíbliape oĩva ha jaiporúramo predikasiónpe, ñandekatupyryvéta jahávo ñaipytyvõ hag̃ua ñande rapichápe oñemoag̃ui hag̃ua Ñandejárare (2 Tim. 3:16, 17).

Embotuicha Jehovápe

¿Mbaʼéichapa ikatu ñahaʼanga Crístope? Upearã ndahaʼéi jajapónte vaʼerã diskúrso iporã ha igustoitereíva. Jesús omboʼe jave, umi hénte “ohecharamoiterei umi ñeʼẽ porãite oiporúva”, péro haʼe ndojapói upéva oñembovale hag̃ua, síno ombotuicha hag̃ua Itúvape (Luc. 4:22; Juan 7:16-18). Haʼe heʼi voi idisipulokuérape: “Peẽ pehesape vaʼerã umi hénte renondépe, haʼekuéra ohecha hag̃ua umi mbaʼe porã pejapóva ha ombotuicha pende Ru oĩva yvágape” (Mat. 5:16). Akóinte ñanemanduʼa vaʼerã upévare ñaporomboʼe jave ha ani jaʼe mbaʼeve ñandejehegui rei. Upévare ñañeporandu vaʼerã: “Koʼã mbaʼe haʼéva rupive, ¿mávapepa oñembotuicháta, chéve térã Jehovápe?”.

Iporãramo jepe remombeʼu ehémplo ha experiénsia reporomboʼe jave, reñatende vaʼerã ani ipukueterei térã odistrae umi nerendúvape ha ipahápe noñentendeporãi pe remboʼeséva hína. Ikatu igústo umi nerendúvape remombeʼúramo umi káso oiko vaʼekue, péro iporã reñeporandu: “¿Añetehápepa chepytyvõ umíva amog̃uahẽ hag̃ua pe añetegua? Ohendu rire hikuái ko amombeʼúva, ¿mávapepa oñembotuicháta: chéve térã Jehovápe?”. Pe mboʼehára ikatupyrýva oipota siémpre oñembotuicha Jehovápe.

Ehechauka mbaʼépepa idiferénte ojuehegui umi mbaʼe

Peteĩ persóna oservi hag̃ua Jehovápe tekotevẽ ontende porã umi mbaʼe oaprendéva. Haʼe ohechakuaa vaʼerã mbaʼépepa idiferénte pe añetegua umi enseñánsa japúgui. Umi mboʼehára ikatupyrýva oikuaa iñimportanteha ojapo upéva oporomboʼe jave.

Heta vése Jehová heʼi vaʼekue isiervokuérape ‘ohechakuaa vaʼerãha hikuái mbaʼépepa idiferénte’ ojuehegui umi mbaʼe ipotĩva umi mbaʼe ikyʼávagui (Lev. 10:9-11). Heʼi vaʼekue avei umi oservíva chupe omboʼetaha “mbaʼépepa idiferénte peteĩ mbaʼe imarangatúva peteĩ mbaʼe kyʼágui” (Ezeq. 44:23). Provérbiospe heta vése ojehechauka mbaʼéichapa idiferénte ojuehegui peteĩ persóna hekojojáva peteĩ naiñeʼẽrendúivagui, pe iñarandúva itavývagui. Ha apóstol Pablo avei heʼi idiferenteha ojuehegui peteĩ hekojojáva peteĩ ivuénovagui (Rom. 5:7). Hebréospe katu Pablo ohechauka Cristo haʼeha saserdóte guasu, ha heʼi iservísio iporãveha upe Aarón ojapo vaʼekuégui. Síglo 17-pe peteĩ profesór hérava Johann Amos Comenius heʼi vaʼekue: “Ñaporomboʼe heʼise jahechauka mbaʼépepa idiferénte ojuehegui umi mbaʼe; por ehémplo maʼerãpa ojejapo, mbaʼéichapa oñepyrũ ha mbaʼérepa tuichave térã michĩve. [...] Pe persóna ohechauka porãva mbaʼéichapa idiferénte ojuehegui umi mbaʼe, oporomboʼe porã hína”.

Ñamoĩ chupe nde reñeʼẽha peteĩ persónandi Ñandejára Rréinore, ha haʼe nontendeporãi mbaʼépa heʼise. Upéicharõ ikatu remyesakã chupe la Biblia omboʼéva: ko Rréino ndahaʼeiha peteĩ mbaʼe jarekóva ñane korasõme, ha mbaʼérepa idiferénte yvyporakuéra goviérnogui. Péro haʼe oikuaámarõ koʼã mbaʼe ikatu rehechauka chupe mbaʼéichapa idiferénte Ñandejára Rréino oĩva Cristo poguýpe, Ñandejára goviérnogui oĩva Salmo 103:19-pe. Idiferenteha avei pe ‘taʼýra ohayhuetéva rréinogui’, oĩva Colosenses 1:13-pe, térã mbaʼéichapa Ñandejára Rréino idiferénte avei upe ojeʼévagui Efesios 1:10-pe, upépe oñemombeʼu mbaʼéichapa Ñandejára ‘odirihi ha ojapo’ ohóvo opa mbaʼe oĩ hag̃ua Cristo poguýpe. Rehechaukáramo mbaʼépepa idiferénte koʼã mbaʼe, umi nerendúva ontende porãvéta la Biblia omboʼéva.

Oporomboʼe jave Jesús ohechauka idiferenteha umi hénte ontende lája pe Léi, ha mbaʼéichapa añetehápe oñentende vaʼerã (Mat. 5:21-48). Ohechauka avei idiferenteha umi omombaʼeguasúva ipyʼaite guive Ñandejárape umi fariséo rovamokõigui (Mat. 6:1-18). Omyesakã idisipulokuéra tekotevẽha isakrifikádo ha ndojoguái vaʼerãha umi oikóvape omandasénte ótrope (Mat. 20:25-28). Ha peteĩ vuéltape omokyreʼỹ umi héntepe ijeheguiete ohechakuaa hag̃ua idiferenteha peteĩ persóna oñarrepentíva ipyʼaite guive, ha umi oñembohekojoja guaʼúnteva (Mat. 21:28-32). Upérõ guare Jesús ñanemboʼe ótra kósa tekotevẽva jajapo ñaporomboʼe jave. Jahechami upéva.

Eipytyvõ umi nerendúvape opensa hag̃ua

Pe mboʼehára ikatupyrýva ndahaʼéi heʼínteva mbaʼépa ojapo vaʼerã umi ohendúva chupe, síno oipytyvõ chupekuéra opensa hag̃ua ha ijeheguiete opilla hag̃ua mbaʼépa ojapo vaʼerã (Prov. 3:21; Rom. 12:1). ¿Mbaʼéicha nde ikatu rejapo upéva? Ikatu rejevale umi pregúntare, Jesús ojapo haguéicha. Haʼe pyʼỹinte oporandu vaʼekue: “¿Mbaʼépa peẽ peje?” (Mat. 21:28). Ótra vuéltape oporandu Pédrope: “¿Mbaʼépa ere Simón? ¿Mávapa opaga umi impuestokuéra umi mburuvicha guasúpe? ¿Itaʼyrakuéra térãpa ótro hénte?”. Péicha Jesús oipytyvõ Pédrope ohechakuaa hag̃ua ijeheguiete máva mávapa opaga vaʼerã umi impuésto (Mat. 17:25). Peteĩ kuimbaʼe oporandúrõ guare chupe: “¿Máva piko añetehápe che rapicha?”, ombohovái rangue chupe direktoite, Jesús omombeʼu peteĩ káso. Upe káso oñeʼẽ hína peteĩ levíta, peteĩ saserdóte ha peteĩ samaritánore, ha upe rire Jesús oporandu upe kuimbaʼépe: “¿Mávapa koʼã mbohapy apytépe ohechauka ohayhuha pe kuimbaʼe oñemondapa vaʼekuépe?” (Luc. 10:29-36). Ha péicha Jesús omokyreʼỹ pe kuimbaʼépe haʼete ohechakuaa hag̃ua mávapa hína hapicha (Luc. 7:41-43).

Pe eréva og̃uahẽ vaʼerã umi nerendúva korasõme

Umi mboʼehára ontende porãva la Biblia, ohechakuaa jaadora hag̃ua Ñandejárape hekoitépe ndahaʼéi jaikuaánte vaʼerãha de memória heta mbaʼe ha upéi ñakumpli. Síno tekotevẽ ñañemoag̃ui Jehováre ha jahayhu iléi ñande pyʼaite guive, upéicharõ jahechakuaa pe iñimportantevéva hína pe oĩva ñane korasõme (Deut. 10:12, 13; Luc. 10:25-27). La Bíbliape pe palávra korasõ heʼise mbaʼeichagua persónapa ñande, oike hína umi mbaʼe oĩva ñande pyʼapýpe, ñapensáva, ñañandúva, ha jaipotáva.

Jesús oikuaa yvyporakuéra omombaʼeha jepi hapichápe ipíntarente, Ñandejára katu ndaupéichai, haʼe ohecha mbaʼépa oĩ ñane korasõme (1 Sam. 16:7). Ñande jaservi vaʼerã Jehovápe jahayhúgui chupe, ndahaʼéi jajechauka hag̃ua ótrope (Mat. 6:5-8). Umi fariséo katu ojapo heta mbaʼe ojechaukaségui umi héntepe. Oñembotuicha okumpli haguére umi detalleʼi oĩva pe Léipe, ha omoĩ avei heta rrégla ipohýiva. Ha heʼínte hikuái omombaʼeha Ñandejárape, pórke ni vymi nohaʼangái chupe (Mat. 9:13; Luc. 11:42). Jesús omboʼe iñimportanteha ñakumpli umi mandamiénto, péro ohechauka porã avei ñaneñeʼẽrendu vaʼerãha ñande pyʼaite guive ha ani tovamokõime (Mat. 15:7-9; Mar. 7:20-23; Juan 3:36). Jasegíramo Jesús ehémplo katuete ñasẽ porãta. Tekotevẽramo jepe ñamboʼe ñande rapichápe Jehová ohaʼarõva chugui, iñimportánte avei oikuaa mbaʼeichagua persónapa haʼe. Péicha ohayhúta Jehovápe ha umi mbaʼe odesidívare ojekuaáta omombaʼeha chupe.

Péro tekotevẽ avei umi nerendúva ojepyʼamongeta ohecha hag̃ua mbaʼépa añetehápe oĩ ikorasõme. Jesús omokyreʼỹ vaʼekue umi héntepe ojepyʼamongeta hag̃ua, péicha oikuaáta hikuái mbaʼépa omomýi chupekuéra ojapo térã heʼi hag̃ua peteĩ mbaʼe. Oñemoñeʼẽ jave umi héntepe, Jesús oporandúmi chupekuéra mbaʼérepa haʼekuéra opensa upéicha térã mbaʼérepa ojapo upéva. Péro ndahaʼéi upévante, ombaʼeporandu rire, katuete omoĩ peteĩ ehémplo omyesakã porã hag̃ua pe omboʼeséva hína (Mar. 2:8; 4:40; 8:17; Luc. 6:41, 46). Nde ikatu avei remokyreʼỹ umi nerendúvape toñeporandu koʼã mbaʼe: “¿Mbaʼérepa añetehápe chestira térã ajapose ko mbaʼe? Ojeʼe térã ojejapóramo peteĩ mbaʼe ndachegustáiva, ¿mbaʼépa che ajapo? ¿Mbaʼérepa añetehápe chemolesta upéva?”. Upéi eipytyvõ chupekuéra ohechakuaa hag̃ua iporãveha opensa hikuái Jehová opensaháicha.

Ehechauka mbaʼéichapa ojeporu vaʼerã

Pe mboʼehára katupyry oikuaa hína pe “arandu haʼeha pe iñimportantevéva” (Prov. 4:7). ¿Mbaʼépa heʼise arandu? Heʼise jaiporu umi mbaʼe jaikuaáva ñambohovái hag̃ua umi provléma, jajehekýi hag̃ua pelígrogui, jahupyty hag̃ua peteĩ méta, térã avei ñaipytyvõ hag̃ua ñande rapichápe. Nde remboʼe vaʼerã ne estudiántepe mbaʼépa heʼi la Biblia, péro ndovaléi redesidi hese. Reiporúvo umi konsého oĩva Ñandejára Ñeʼẽme reipytyvõkuaa chupe ojepyʼamongeta hag̃ua. Ikatu remoĩ ehémploramo peteĩ provléma ha eporandu chupe mbaʼéichapa oipytyvõta chupe upe konsého odesidi porã hag̃ua (Heb. 5:14).

Pentekostés áño 33-pe apóstol Pedro ohechauka mbaʼéicha jajapo vaʼerã upéva. Upérõ haʼe ojapo peteĩ diskúrso iporãitereíva opokóva umi hénte korasõre (Hech. 2:14-36). Haʼe ohesaʼỹijo umi héntendi mbohapy téxto oĩva Ñandejára Ñeʼẽme, upéi ohechauka chupekuéra mbaʼéichapa oñekumpli umíva. Upévo umi hénte ohendúva hína chupe ohechakuaa pyaʼe okuʼe vaʼerãha ojapo hag̃ua Jehová rembipota. ¿Oñeñandúpa avei upéicha umi hénte nerendúva? Remyesakãnte rangue pe informasión, ¿rehechaukápa chupekuéra mbaʼérepa oguerovia ha ojapo vaʼerã upe eréva? ¿Reipytyvõpa chupekuéra ohechakuaa hag̃ua mbaʼépa ojapo vaʼerã? Oime vaʼerã opa rire nde diskúrso haʼekuéra ndeʼimoʼãi “¿mbaʼe piko rojapóta?”, oiko haguéicha pe Pentekostéspe, péro remyesakã porãramo mbaʼéichapa ikatu ojapo hikuái umi téxto heʼíva, upéva katuete omomýita chupekuéra (Hech. 2:37).

Olee jave la Biblia ifamíliandi, tuvakuéra ikatu oipytyvõ umi mitãme ohechakuaa hag̃ua hikuái mbaʼéichapa ikatu ideprovécho chupekuéra upe párte (Efes. 6:4). Por ehémplo, ikatu reiporavo pe párte otokávagui ojelee la Biblia upe semánape ha remyesakã rire, reporandu chupekuéra: “¿Mbaʼépa ñanemboʼe koʼã versíkulo? ¿Mbaʼéichapa ikatu jaiporu predikasiónpe? ¿Mbaʼépa ñanemboʼe Jehovágui? ¿Mbaʼéichapa koʼã versíkulo ñanepytyvõ jahayhuve hag̃ua chupe?”. Emokyreʼỹkena ne famíliape okomenta hag̃ua umi mbaʼe, ojejapo jave pe párte Eskuéla Jaiporukuaa Hag̃ua la Bíbliape. Katuete opytaitéta iñakãme umi mbaʼe okomentáva hikuái.

Emoĩ ehémplo iporãva

Ñande ikatu ñamboʼe ñane ehémplo rupive, ha ndahaʼéi umi jaʼéva rupivénte. Upéicha jahechauka mbaʼéichapa ojesegi vaʼerã umi konsého ñande voi ñameʼẽva. Por ehémplo umi mitã ohaʼanga jepi ituvakuérape, ha péicha ohechauka ojoguaseha chupekuéra. Upéicha avei ne estudiánte osegi vove ne ehémplo, nde resegiháicha Cristo ehémplo, oñepyrũta oguata Jehová rapére ha ohupytýta heta mbaʼe porã (1 Cor. 11:1). Ojapóvo upéva haʼekuéra voi ohechakuaáta Jehová imbaʼeporãha ha oñemoag̃uivéta hese.

La Bíbliape ningo heʼi voi: “Peñatendéke mbaʼeichagua persónapa peẽ: penderekomarangatu ha pemombaʼeguasu vaʼerã Ñandejárape pende pyʼaite guive” (2 Ped. 3:11). Ñakumplívo umi mbaʼe heʼíva la Bíbliape ñamoĩ hína peteĩ ehémplo iporãva. Upévare nde remokyreʼỹramo ne estudiántepe olee hag̃ua káda día la Biblia, nde voi rejapo vaʼerã upéva. Reipotáramo ne família ojapo la Biblia heʼíva, ¿rehechaukápa hína nde voi rekumpliha umíva? Rreunionhápe eréramo kyreʼỹme ojepredika vaʼerãha, ¿ohechápa hikuái nde voi resẽ memeha repredika? Ñande voi ñakumplíramo umi mbaʼe ñamboʼéva, ñamomýita avei ñande rapichakuérape osegi hag̃ua ñane ehémplo (Rom. 2:21-23).

Oiko hag̃ua ndehegui peteĩ mboʼehára katupyry iporã reñeporandu koʼã mbaʼe: “Aporomboʼe jave, ¿aipytyvõpa umi cherendúvape okambia hag̃ua ilája, opensáva ha oñeʼẽ lája? ¿Ahechaukápa mbaʼéichapa idiferénte ojuehegui umi mbaʼe iporãva ivaívagui? ¿Mbaʼépa ajapo umi cherendúva imanduʼa hag̃ua umi mbaʼe haʼévare? ¿Ohechakuaápa hikuái mbaʼéichapa osegi vaʼerã umi konsého oĩva la Bíbliape? ¿Ohechápa hikuái che akumpliha upe amboʼéva? ¿Mbaʼépa ajapo ontende hag̃ua hikuái pe informasión ikatuha oipytyvõ chupekuéra oñemoag̃uive hag̃ua Jehováre?” (Prov. 9:10). Ndevalevéta reporomboʼe hag̃ua rejepyʼamongetáramo koʼã porandúre ha resegíramo apóstol Pablo konsého: “Akóintekena eñatende ndejehe ha remboʼe lájare. Esegíke ejapo koʼã mbaʼe; rejapóramo péicha rejesalváta nde ha avei umi nerendúva” (1 Tim. 4:16).