Opaichagua tapichakuéra ikatu ojesalva
1. Mbaʼépa ñaikotevẽ ñaime porã hag̃ua Ñandejára ndive?
1 Ñandejára ipyʼaporã haguére ñanendive ñamereseʼỹre ikatúta jajesalva. Jehová oipota “opaichagua yvypóra ojesalva ha ou oikuaa porã pe añeteguáva” (1 Tim. 2:3, 4). Ñaime porãtaramo Ñandejára ndive, natekotevẽi jajepyʼapy ñande pire kolór, ñande posisión sosiál, ñande katupyrykue, térã ñane píntare. Tekotevẽ uvei jaguerovia Jesucristo sakrifísio ikatuha ñandepeʼa pe pekádogui (Juan 3:16, 36). Ñande ñambaʼapo Ñandejára ndive. Upévare, oiméramo ñande pyʼapýpe ndajahayhupái tapichakuéra opaichaguápe, upéva jaipeʼavaʼerã ñandehegui. Ikatu ombyai ñane korasõ ha ndajahayhúi umi tapicha Ñandejára ohayhútava oservíramo chupe.
2, 3. Mbaʼépa ñanepytyvõta ani hag̃ua jahusga ñande rapichápe pe jahechávare?
2 Ani japorohusga. Jehová omaña ohecha hag̃ua mbaʼépa oĩ yvyporakuéra pyʼapýpe. Ndojapói upéva iñañágui térã omboyke hag̃ua chupekuéra (1 Sam. 16:7). Haʼe ohecha avei mbaʼépa ikatu ojapo hikuái tenonderãme. Upévare, oĩramo oserviséva chupe, haʼe umívape ohayhu (Ageo 2:7). Jahechápa ñande rapichakuérape Ñandejára ohechaháicha chupekuéra?
3 Sapyʼánte jatopa predikasionhápe umi tapicha ñanemondýiva. Oĩ umi oñemonde vaietereíva térã oñemonde tieʼỹva, hendyva vukúva, térã omoĩva namichãi itĩre térã hembére. Oĩ umi ni ndahógaiva. Oĩ katu umi iñeʼẽ arhélva ñandéve. Ñapensarangue umíva ndoservisemoʼaiha voi Jehovápe, iporãvéta ñapensa porã hesekuéra, jaikuaágui “ñande jepe avei yma ñandetavy, nañaneñeʼẽrendúi – [ha] oĩ umi ñanembotavýva” (Tito 3:3). Upéva jahechakuaáramo, jahaséta japredika opavavépe. Nañamboykemoʼãi peteĩ tapicha, haʼetéva nomereseiha ipínta vai haguére.
4, 5. Mbaʼépa ñaaprende pe ehémplo Jesús ha Pablo ohejavaʼekuégui?
4 Umi ehémplo primer síglope guare. Jesucristo oñehaʼãvaʼekue otopa mbaʼe porã opavavére, umi heko vaietereívare avei, umi oñeimoʼãtava ndaikatumoʼãiha voi oservi Ñandejárape (Luc. 8:26-39). Nomomorãiramo jepe ni mbaʼevéicharõ umi tembiapo vai, haʼe oikuaa peteĩ tapicha ikatuha hoʼa ha ojapo umi mbaʼe naiporãiva (Luc. 7:37, 38, 44-48). Upéicha ohechauka iñaranduha, “ha oiporiahuvereko chupekuéra, ojoguahaguére umi ovecha herekuaʼỹvape” (Mr. 6:34). Ikatúpa ñande ñañehaʼã jajapo porãve jahupyty hag̃ua pe Jesús ojapovaʼekue?
5 Pe apóstol Páblope oñemboʼita, oñembyepoti, ha ojegueraha kárselpe (Hech. 14:19; 16:22, 23). Ombopochýpa chupe pe oikóva hese, ha heʼípa oĩha tetã térã grúpo ndohoseveimahápe opredika? Ndeʼiriete upéicha. Haʼe oikuaa ikatutaha ojetopa umi ipyʼaporãva opaichagua apytépe, ha ohose oheka umívape otopa peve. Ñandépa upéicha avei jahecha ñande territóriope umi tapicha oúva opaichagua kultúragui?
6. Mbaʼéichapa ikatu ojapo porã ñande rapicháre ñañatende porãramo hesekuéra rreunionhápe?
6 Ñañatende porã opavavére. Heta ñane ermanokuéra ovyʼa oñeñatende porã haguére hesekuéra ou ypýrõ guare rreunionhápe. Umi ermáno nomaʼẽivaʼekue pe ojehechávarente. Peteĩ kuimbaʼe hendyva vukúva, iñakãrague vukúva ijatiʼy ári peve, ha ijao kyʼáva, og̃uahẽ peteĩ Salón del Réinope Alemániape. Pe kuimbaʼe opárupi herakuã vai. Upéicharõ jepe, oñeñatende porãiterei hese pe rreunionhápe. Upéva haʼe ohecharamoiterei ha ou jey pe ótra semánape. Ndaʼaréi rire ojekuaáma hese ipotĩveha, ndopitavéima ha avei omenda pe kuñataĩ oikovaʼekue ndive. Ndohasaʼaréi ha hembireko ha itajyrakuéra ndive oservíma hikuái Jehovápe. Oiko chuguikuéra peteĩ família porã.
7. Mbaʼéichapa ikatu jajapo ojapoháicha Ñandejára, omboykeʼỹva avavépe?
7 Ñandejára nomboykéi avavépe. Jajapókena haʼe ojapoháicha, ha ñaipytyvõ opavavépe ohupyty hag̃ua avei hikuái Ñandejára pyʼaporã ñamereseʼỹva.
[Komentário oĩva páhina 3-pe]
“Ñandejárape g̃uarã peteĩchante opavave, ha haʼe oguerohory oimeraẽ tetãme umi okyhyjéva chugui ha hembiapo porãvape” (Hech. 10:34, 35.)