Peteĩ mbaʼe jadevéva ñande rapichakuérape
1 Pe apóstol Pablo oikuaa porã vaʼekue opredikavaʼerãha hapichakuérape. Oikuaa Jehová omoĩhague peteĩ tape ikatu hag̃uáicha opaichagua tapicha ojesalva Itaʼýra ruguy rupive (1 Tim. 2:3-6). Upévare Pablo heʼi: “Che adeve umi griégo ha umi bárbarope, umi iñarandúva ha umi iñaranduʼỹvape avei”. Kyreʼỹme ha ikaneʼõʼỹre oñeʼẽ pe marandu porãgui ha upéicha opaga pe odevéva hapichakuérape (Rom. 1:14, 15).
2 Pablo ojapohaguéicha, kristianokuéra koʼag̃agua oñehaʼã avei oñeʼẽ ikatuhápe ko marandu porãgui hapichakuéra ndive. Pe trivulasión guasu pyaʼeterei og̃uahẽ oúvo, ha upévare tekotevẽterei jajeporeka jajuhu hag̃ua umi tapicha ipyʼaporãvape. Pe mborayhu añete jaguerekóva ñande rapichakuérare tañanemomýi jajapo hag̃ua kyreʼỹme ko tembiapo osalváva ñande rekove (Mat. 24:21; Eze. 33:8).
3 Japaga pe jadevéva. Ñañeʼẽ hag̃ua hetave tapichakuérape ñasẽ japredika ogaha rupi. Umi óga jára ndaiporihápe, ñaanota porãramo pe óga direksión, ha jaha jeýramo ikatúta vove jatopa hesekuéra, hetave ndive ñañemongetáta (1 Cor. 10:33). Ikatu avei jahupyty heta tapichápe japredikáramo umi negosioha rupi, kállepe, plásape, estasionamientoha rupi ha teléfono rupive. Ikatu ñañeporandu: ‘Chépa ajapoʼaína ikatúva guive apredika hag̃ua oimeháicha ko marandu porã tekove meʼẽha?’ (Mat. 10:11.)
4 Peteĩ prekursóra oñehaʼãmbaite oñeʼẽ opavavépe iterritóriope. Oĩvaʼekue peteĩ óga oñembotyháre oikóva, ha avave rehe ndojetopáiva. Peteĩ jevy katu pe prekursóra ohecha peteĩ áuto pe óga rovái. Haʼe nosẽikuri opredika hag̃ua péro ohechakuaa ikatuha ojuhu pe óga járape ha upémaramo ombopu pe tímbre. Osẽ peteĩ kuimbaʼe, ha oñemongeta hikuái. Upéi pe ermána oho jey iména ndive heta vése. Upe rire pe kuimbaʼe oñepyrũ ostudia ha koʼág̃a ojevautisáma. Haʼe ovyʼa pe ermána oñanduhaguére opredikavaʼerãha opavavépe, odeveha hapichakuérape.
5 Ko tiémpo ohasa pyaʼeterei. Upévare koʼág̃a japagavaʼerã pe jadevéva ñande rapichakuérape ñañehaʼãmbaite rupi ñamog̃uahẽ opavavépe ko marandu porã (2 Cor. 6:1, 2).