Israel oike Canaánpe

HETA áño Israel oike mboyve Canaánpe Jehová oprometevaʼekue Abrahánpe omeʼẽtaha upe yvy ifamiliakuérape. Ha koʼág̃a Josué omoakã umi Israelguápe ojagarra hag̃ua upe tetã.

Umi hénte Canaangua ningo hekovaieterei ha oñorairõhárente oiko, upévare Jehová ojukapase chupekuéra. Upearã omanda umi Israelguápe ohundipaite hag̃ua umi táva oĩva Canaánpe.

Ojapo mboyve upéva Josué omondo mokõi kuimbaʼe ovichea hag̃ua upe tetãme. Haʼekuéra oho Jericópe ha opyta Rahab rógape. Haʼe opilla umi mokõi kuimbaʼe haʼeha Israelgua, upéicharamo jepe omokañy chupekuéra. Mbaʼérepa ojapo upéva? Rahab ningo ohenduvaʼekue mbaʼéichapa Jehová ojapo heta milágro osalva hag̃ua ipuévlope ha upévare ojerovia hese. Ko kuña ojerure umi kuimbaʼépe opromete hag̃ua chupe ni peteĩ hogaygua nomanomoʼãiha ojejagarrávo Jericó.

Upe rire umi Israelgua oike Canaánpe ha omongora Jericó. Jehová oitypa umi murálla oĩva ijerére ha umi soldádo ohundi upe táva. Rahab ha ifamília katu ojesalva. Upéi 6 áño aja Josué ha ijehérsito oñorairõ ojagarra hag̃ua heta táva Canaangua, ha umi trívu Israelgua oñembojaʼo pe yvýre.

Peteĩ ára Josué omano mboyvemi ombyatypa umi héntepe ha omomanduʼa chupekuéra umi mbaʼe porãita Jehová ojapovaʼekue Israel rehehápe. Avei omokyreʼỹ chupekuéra akóinte iñeʼẽrendu hag̃ua. Péro Josué ha iñirunguéra omano rire umi Israelgua oheja Jehovápe, ha oñepyrũ oadora umi ñandejára guaʼúpe. Trescientos áño pukukue pyʼỹinte omboyke hikuái Ñandejára léi, ha upévare haʼe oheja iñenemígo ipuʼaka hesekuéra. Péro umi Israelgua ojerurévo Jehovápe osalva hag̃ua chupekuéra haʼe omoĩ hués oipytyvõ hag̃ua umi héntepe. Umi 300 áño aja oĩvaʼekue 12 hués oipytyvõva chupekuéra ojejopy vai jave.

Jueces kuatiañeʼẽ omombeʼu oikovaʼekue upe tiémpope. Oñepyrũvo oñeʼẽ pe hués Otniel rehe ha opakuévo oñeʼẽ Sansón rehe. Haʼe hína pe kuimbaʼe imbaretevéva oikovaʼekue ko yvy ape ári. Umi káso oñemombeʼúva Juécespe ñanemboʼe peteĩ mbaʼe iñimportantetereíva: Ñaneñeʼẽrendúrõ Jehovápe ñasẽ porãta; ndajajapóiramo haʼe heʼíva katu ñambohováita heta mbaʼe vai.

(Oñeguenohẽ Josué; Jueces; ha Levítico 18:​24, 25-gui.)