PESEGÍKENA PEIKUAAVE

Julio: Avyʼaiterei ningo don Néstor ikatu haguére ñañemongeta jepi la Bíbliare.a Nemanduʼápa akokuehe reporandu hague chéve Ñandejára Rréinore, ha ere kuri reikuaaseha mbaʼérepa ore testígo de Jehová roʼe upe Rréino oñepyrũmaha ogoverna áño 1914 guive.

Néstor: Heẽ si, la ves pasáda alee kuri pende rrevísta, ha upépe ningo heʼi Ñandejára Rréino ogovernamaha áño 1914 guive, ha upéva chemopensa. Peẽ ningo peje umi kreénsia peguerekóva oñeguenohẽha la Bíbliagui.

Julio: Ha upeichaite ningo.

Néstor: Péro chéngo aleéma la Biblia kompletoite ha ni peteĩ hendápe ndajuhúi oñeñeʼẽha upe áño rehe. Upémarõ aheka peteĩ Biblia Internétpe ha amoĩ upépe “1914”, ha ni upeichavérõ ndajuhúi.

Julio: Primeroite voi don Néstor rofelisitase relee haguére la Biblia kompletoite. Ojekuaa nderehe remombaʼeha la Biblia.

Néstor: Si, chéve g̃uarã ndaipóri ótra kósa iñimportantevéva la Bíbliagui.

Julio: Ajépa nde. Ha avei rofelisitase reheka haguére la Bibliaitépe voi umi mbaʼe reikuaaséva. Upéva ningo iñimportánte, pórke Ñandejára voi ñanemokyreʼỹ jasegi hag̃ua jaheka upépe umi mbaʼe jaikuaaséva.b ¡Avyʼa legálmente péicha reñehaʼã haguére!

Néstor: Grásia don Julio. Añehaʼãmbaite ningo hína aaprendeve hag̃ua Ñandejáragui. La ves pasáda ahekamieve informasión oñeʼẽva pe áño 1914 rehe ha atopa pe lívro koʼág̃a jaleévape hína. Oñeʼẽ peteĩ yvyramáta tuichaitereívare, oñekytĩ vaʼekue ha upe rire okrese jeýva... O álgo umícha lénto.

Julio: Heẽ, si, upeichaite. Péa ningo peteĩ profesía oĩva Daniel kapítulo 4-pe. Upépe oñemombeʼu pe rréi de Babilonia, hérava Nabucodonosor, oreko hague peteĩ suéño.

Néstor: Heẽ haʼetéma, aipóa. Heta vésema alee, péro legálmente koʼag̃aite peve nantendéi mbaʼe ke vérpa oreko pe rréi, Ñandejára Rréinondi ni pe áño 1914-ndi.

Julio: Ani rejepyʼapy. Ni pe proféta Daniel nontendéi kuri mbaʼépa heʼise pe profesía oskrivi vaʼekue.

Néstor: ¿Añete pio?

Julio: Si, upeichaite. Emañamína mbaʼépa heʼi vaʼekue ko proféta Daniel 12:8-pe: “Che ahendúramo jepe upe heʼíva, nahesakãi chéve mbaʼeve”.

Néstor: Eʼa nde, upéicharõ piko haʼe jepe nontendéi raʼe. Koʼág̃a añeñandu porãmiéma.

Julio: ¿Ha ndépa reikuaa mbaʼérepa Daniel nontendéi kuri pe oskrivi vaʼekue? Pórke Ñandejárape g̃uarã, upérõ ndahaʼéi gueteri pe tiémpo oñentende hag̃ua ko profesía. Péro koʼág̃a upéva okambiáma ha ñande ikatúma ñantende pe haʼe oskrivi vaʼekue.

Néstor: Ah..., upéicha voi piko raʼe.

Julio: Si. Ha Daniel 12:9-pe oexplika mbaʼérepa, koʼápe heʼi: “Koʼã mbaʼe opytáta ñemiháme og̃uahẽ meve upe ára paha”. Ko téxto ohechaukaháicha, ko profesía oñentendéta og̃uahẽ vove “upe ára paha”. Amo gotyove jastudiáta ág̃a mbaʼérepa umi mbaʼe oikóva koʼág̃a ohechauka jaikomaha upe tiémpope.c

Néstor: Don Julio, eexplikamína chéve ko profesía ikatúramo.

Julio: Vuéno, añehaʼãta.

NABUCODONOSOR OSOÑA VAʼEKUE

Julio: Primero ñañeʼẽmíta mbaʼépa pe osoña vaʼekue rréi Nabucodonosor, ha upéi jahecháta mbaʼépa heʼise upe suéño. ¿Mbaʼépa ere chupe?

Néstor: Oĩ porã.

Julio: Nabucodonosor ningo ohecha vaʼekue iképe peteĩ yvyramáta og̃uahẽva yvága peve. Upévo ohendu Ñandejára mensahéro omandaha oñekytĩ hag̃ua, ha opyta hag̃ua hapo ha michĩmi imatakue. Upe rire ohasa “siete tiémpo” ha pe yvyramáta okakuaa jey.d Ko profesía oñekumpli ypy vaʼekue Nabucodonosor rehe, haʼe kuri peteĩ rréi ipoderosoitereíva ha upéicha rupi haʼete og̃uahẽva yvága peve. Péro upe rire operde itróno ha ohasa “siete tiémpo”. ¿Nemanduʼápa mbaʼépa oiko raʼe hese upe rire?

Néstor: Mmm... Nachemanduʼaimi.

Julio: Ani rejepyʼapy. La Biblia ningo heʼi Nabucodonosor opyta hague itavyrai siete áño, térã “siete tiémpo”, ha upéi operde vaʼekue itróno. Péro siete áño haguépe okuera ha orrekupera jey itróno.e

Néstor: Koʼág̃a antendemie ahávo. Péro eremína chéve, ¿mbaʼe ke ver piko oreko ko profesía áño 1914-ndi ha Ñandejára Rréinondi?

Julio: Vuéno, ko profesía oreko mokõi kumplimiénto. Primero oñekumpli Nabucodonosor operdérõ guare itróno. Ha pe segundo katu oñekumpli ojejokórõ guare Ñandejára goviérno. Upéicharõ pe segundo kumplimiénto la oñeʼẽva hína Ñandejára Rréinore.

Néstor: ¿Ha mbaʼére ere oreko hague pe segundo kumplimiénto?

Julio: Ñepyrũrã pe profesía voi ñanepytyvõta jahecha hag̃ua upeichaha. Daniel 4:17 ningo omombeʼu pe profesía oñemoĩ hague ikatu hag̃uáicha umi hénte oikuaa ‘pe Ipoderosovéva ogovernaha hína Irréinope ko yvy tuichakuére, ha haʼe omeʼẽsévape omeʼẽtaha itróno’. Rehechakuaápa, koʼápe heʼi pe Rréi ogovernaha ko yvy tuichakuére.

Néstor: Si, heʼi voi katu upépe ‘pe Ipoderosovéva ogovernaha hína Irréinope ko yvy tuichakuére’.

Julio: ¿Ha mávapa vaicha ndéve ‘pe Ipoderosovéva’?

Néstor: Ha Ñandejára, ¿ajépa?

Julio: Upeichaite. Ko fráse ohechauka porã ndahaʼeiha Nabucodonosor rehe añónte oñeñeʼẽva. Ha heʼi avei Ñandejára “ogovernaha Irréinope ko yvy tuichakuére” térã yvyporakuéra ári. Ha jahecháramo umi téxto oĩva kóva mboyve ha upe rire avei, jahechakuaáta orekoveha sentído. ¿Mbaʼépa ere ñaanalisáramo umíva?

Néstor: Oĩ porã, jahecha katu.

MBAʼÉREHEPA OÑEÑEʼẼ LÍVRO DE DANIÉLPE

Julio: Lívro de Daniélpe ningo hetaiterei vése oñeñeʼẽ mbaʼéichapa oñepyrũ ombaʼapo Ñandejára Rréino ha Jesucristo, upe omoakãva ko Rréino. Jahechamína peteĩ ehémplo. Jarretrosede jeýta 2 kapítulo, jahecháta mbaʼépa heʼi Daniel 2:44. ¿Ikatúpa ndete voi relee?

Néstor: Si, ndaipóri provléma. Koʼápe heʼi: ‘Ogoverna aja koʼã mburuvicha, Ñandejára yvagapegua omoĩta peteĩ rréino noñehundimoʼãiva arakaʼeve. Ndoʼamoʼãi avaveichagua tetã poguýpe. Ohundietéta guei opavave koʼã rréino, ha irréino ndopamoʼãi arakaʼeve’.

Julio: ¿Ndépa ere koʼápe oñeñeʼẽha Ñandejára Rréinore?

Néstor: Eeeh... Ndaikuaaporãi.

Julio: Pe téxto ningo heʼi ko rréino térã goviérno “ndopamoʼãiha arakaʼeve”, térã ogovernataha opa árare. ¿Ikatúnepa oĩ peteĩ goviérno opytáva opa árare ndahaʼéiramo Ñandejára mbaʼéva?

Néstor: No legálmente.

Julio: ¿Ajépa? Jahechamína koʼág̃a ótra profesía oñeʼẽva Ñandejára Rréinore. Oĩ hína Daniel 7:13, 14-pe, koʼápe oñeñeʼẽ peteĩ persóna oikótavare rréi, emañamína mbaʼépa heʼi: ‘Ha oñemeʼẽ chupe podér, tekomimbipa, rréino, opaite tetãnguéra, trivukuéra ha opaichagua idióma oiko hag̃ua ipoguýpe hembiguaikuéraramo, igoviérno opyta hag̃ua opa ára g̃uarã ha irréino ndopamoʼãi arakaʼeve’. ¿Rehechakuaápa mbaʼérepa oñeñeʼẽ jey koʼã versíkulope?

Néstor: Si, oñeʼẽ jey peteĩ rréinore.

Julio: Siérto, ha ndahaʼéi oimeraẽ rréinore. Emaña jeýrõ ko téxtore, heʼi ko rréinope oñemeʼẽha ‘opaite tetãnguéra, trivukuéra ha opaichagua idióma’. Jaʼe porãsérõ g̃uarã, ogovernáta ko yvy tuichakuére.

Néstor: Heẽ siérto. Chéko ndapillái kuri upéva, péro koʼápe heʼi upeichaite.

Julio: Ha heʼi avei ‘igoviérno opytataha opa ára g̃uarã, ha irréino ndopamoʼãiha arakaʼeve’. ¿Ajépa ko téxto ojoguaiterei Daniel 2:44 heʼívape?

Néstor: Si, el mísmo lénto la heʼíva umi téxto.

Julio: Vuéno, koʼág̃a ikatu jajapo peteĩ rrepasoʼimi. Jahecháma kuri Daniel kapítulo 4-pe oñeñeʼẽha peteĩ ‘Ipoderosovéva ogovernávare hína Irréinope ko yvy tuichakuére’. Upéva ohechauka porã ko profesía noñekumpliriha Nabucodonosor rehe añónte, síno oĩha peteĩ ipoderosovéva chugui. Avei lívro de Daniélpe omombeʼu mbaʼéicha ha arakaʼépa oñepyrũta ombaʼapo Ñandejára Rréino ha Jesucristo, upe omoakãva ko Rréino. Mbaʼépa ekalkula, ¿oñeñeʼẽpa upéicharõ Daniel kapítulo 4-pe Ñandejára Rréinore?

Néstor: Si chéverõ g̃uarã. Péro nantendéi gueteri mbaʼe ke vérpa upéva oreko áño 1914-ndi.

OHASA SIETE TIÉMPO

Julio: Vuéno, jarretrosede jeýna rréi Nabucodonosor tiémpope. Jaʼéma haguéicha, pe yvyramáta orrepresenta chupe. Oñekytĩrõ guare pe yvyramáta, Nabucodonosor okúi kómo rréi ha upéi ohasa siete tiémpo. Upe tiémpo aja haʼe itavyrai, péro upe rire orrekupera jey ha oiko jey chugui rréi. Pe segundo kumplimiénto katu oiko ojejokórõ guare Ñandejára Rréino ko yvy ape ári, péro ndahaʼéi Ñandejára káusa oikóva upéva, oiko haguéicha Nabucodonosor kásope.

Néstor: ¿Mbaʼe? Nantendéi.

Julio: Aexplikáta ndéve. Yma ningo ojeʼe vaʼekue umi rréi isrraelíta oguapyha Jehová trónope.f Upéva heʼise haʼekuéra orrepresentaha Ñandejárape ko yvy ape ári. Igoviernokuéra orrepresenta Ñandejára goviérnope. Péro kon el tiémpo, heta rréi oĩ omboykéva chupe ha pe puévlo oapoja chupekuéra ha omboyke avei Ñandejárape. Upéicha rupi, Ñandejára opermiti umi babilonio ojagarra Israel áño 607-pe Jesús ou mboyve. Upéva upe fécha guive ndaiporivéima rréi orrepresentáva Jehovápe Jerusalénpe. Ha upépe Ñandejára Rréino ojejoko. ¿Jaha porãpa hína hese?

Néstor: Si, antende hína ahávo.

Julio: Áño 607 guive, oñepyrũ oñekonta umi siete tiémpo. Ha upe tiémpope ojejoko Ñandejára Rréino ko yvy ape ári. Ha ohasa rire umi siete tiémpo, Ñandejára oiporavo peteĩ rréi pyahu orrepresenta vaʼerã chupe, péro ko rréi oĩ yvágape. Ha umi ótra profesía jalee vaʼekue pe lívro de Daniélpe, oñekumpli avei opakuévo umi siete tiémpo. Péro, ¿arakaʼépa opa raʼe umi siete tiémpo? Jaikuaáramo upéva, jaikuaáta avei mbaʼe áñopepa oñepyrũ jey raʼe ombaʼapo Ñandejára Rréino.

Néstor: Ehaʼarõmi..., áño 1914-pe, ¿ajépa?

Julio: Upeichaite don Néstor, ejasertaite voi.

Néstor: Péro, ¿mbaʼére ikatu reasegura upéva oiko hague áño 1914-pe?

Julio: Vuéno, Jesús oĩro guare ko yvýpe heʼi umi siete tiémpo noñemohuʼãitiha.g Upévare ikatu jaʼe ko tiémpo ipukuetereiha. Oñepyrũ hetaiterei áño Jesús ou mboyve ko yvy ape ári ha okontinua hetaiterei áño Jesús oho rire yvágape. Avei ñanemanduʼa vaʼerã pe profesía heʼi hague voi koʼã mbaʼe oñentendetaha “pe ára pahápe” ae.h Ha upeichaite oiko, síglo 19-pe oĩ vaʼekue peteĩ grúpo ostudia porãva la Biblia, ha ohesaʼỹijo vaʼekue kóva ha hetave profesía. Ha mbeguekatúpe ontende hikuái umi siete tiémpo opataha áño 1914-pe. Umi mbaʼe oiko vaʼekue upe áño guive ko múndo tuichakuére, ohechauka Ñandejára Rréino oñepyrũ hague ogoverna yvágape, ha upérõ avei oñepyrũ pe ára paha. Amalisia hetaiterei mbaʼéma haʼe ndéve de una vés, ha ijetuʼu ñantende hag̃ua péicha péichante.

Néstor: Si, ijetuʼu legálmente. Tekotevẽ alee jey umi mbaʼe jahecha vaʼekue antende porã hag̃ua.

Julio: Rontende don Néstor. Che heta avei aiko vaʼekue hese antende porã hag̃ua. Péro hiʼãite ko konversasión jareko vaʼekue nepytyvõ rehechakuaa hag̃ua ore testígo de Jehová roguenohẽha la Bíbliagui umi mbaʼe rogueroviáva Ñandejára Rréinore.

Néstor: Si. Che la siémpre ahecharamovéva penderehe mbaʼeichaitépa pejerovia la Bíbliare.

Julio: Ha ahechakuaa nde rejeroviaseha avei la Bíbliare upéicha. Jaʼéma haguéicha, oĩ heta párte ijetuʼúva ñantende hag̃ua péicha péichante, péro ñainvestiga porãramo, ifasilmie. Upéicharõ jepe oiméne oĩ gueteri heta mbaʼe reikuaaséva. Por ehémplo, jahecha kuri umi siete tiémpo oñekumpliha Ñandejára Rréinore ha oñepyrũ hague áño 607-pe. Péro, ¿mbaʼérepa jaʼekuaa umi siete tiémpo opa hague áño 1914-pe?i

Néstor: Upéva che la aikuaaséva avei.

Julio: La Biblia voi ñanepytyvõ jakalkula hag̃ua mbaʼéichapa ipuku raʼe umi siete tiémpo. Mbaʼépa ere ñañeʼẽramo upévare ótro ajúvape.j

Néstor: Oĩ porãiterei chamígo, rohaʼarõta.

ÑANEMANDUʼA JEY NABUCODONOSOR OSOÑA VAʼEKUE

Julio: ¿Mbaʼeteko piko don Néstor? Avyʼaiterei ningo ikatu haguére ñañemongeta jepi káda semána la Bíbliare.a ¿Mbaʼéiko reikomi?

Néstor: Trankílo, ndaipóri mbaʼeve. ¿Ha nde?

Julio: Trankílo avei. Nemanduʼa akokuehe ñañeʼẽ hague mbaʼérepa ore testígo de Jehová roʼe Ñandejára Rréino oñepyrũha ogoverna áño 1914 guive.b Ha jahecha kuri Daniel kapítulo 4-pe oñeñeʼẽha peteĩ mbaʼe ikatúvare ñanepytyvõ. ¿Nemanduʼápa?

Néstor: Si, rréi Nabucodonosor osoña vaʼekue, ¿ajépa?

Julio: Haʼetéma. Haʼe osoña vaʼekue peteĩ yvyramáta tuichaitereíva, og̃uahẽva yvága peve. Upéi ohendu Ñandejára mensahéro omandaha ojeity hag̃ua pe yvyramáta, ha opyta hag̃ua hapo ha michĩmi imatakue. Upe rire ohasa “siete tiémpo” ha pe yvyramáta okakuaa jey.c Ha jahecha kuri ko profesía oñekumpliha dos vése. ¿Nemanduʼápa pe primer kumplimiéntore?

Néstor: ¿Ndahaʼéi piko Nabucodonosor opytárõ guare itavyrai siete áño?

Julio: Upeichaite. Ha opyta rupi itavyrai, operde itróno. Pe segundo kumplimiénto katu oiko ojejokórõ guare Ñandejára goviérno ko yvy ape ári siete tiémpore. Ha upéva oñepyrũ áño 607-pe Jesús ou mboyve, Jerusalén oñehundírõ guare. Upe áño guive, ndaiporivéima rréi orrepresentáva Jehovápe ko yvy ape ári. Opa rire umi siete tiémpo Ñandejára onombra peteĩ rréi pyahu, péro ndahaʼevéima koʼápe, síno yvágape. Upéicharõ jaʼekuaa ke opa rire umi siete tiémpo, oñepyrũha ogoverna Ñandejára Rréino yvágape. Entónse jaikuaáma arakaʼe guivépa oñepyrũ oñekonta umi siete tiémpo. Koʼág̃a jaikuaa vaʼerã mboýpa odura raʼe umi siete tiémpo, jaikuaa hag̃ua avei mbaʼe áñopepa oñepyrũ ogoverna Ñandejára Rréino. ¿Rentendépa hína rehóvo?

Néstor: Si, antende. Koʼág̃a chemanduʼáma ahávo upe ñañeʼẽ vaʼekuére akokuehe.

Julio: Oĩ porã entónse. Jahechápy upéicharõ mboýpa odura umi siete tiémpo. Che voi heta ainvestiga vaʼerã kuri aju mboyve chemanduʼapa hag̃ua umi detállere. Péro añehaʼãmbaitéta aexplika ndéve isensilloveháicha.

Néstor: Oĩma.

OPA UMI SIETE TIÉMPO HA OÑEPYRŨ UMI ÁRA PAHA

Julio: Oñekumpli ypýrõ guare ko profesía Nabucodonosor rehe, umi siete tiémpo odura kuri siete áño. Ha pe segundo katu oñekumpli Ñandejára Rréinore, péro ipukuve siete áñogui.

Néstor: ¿Ha mbaʼéicha eikuaa upéva?

Julio: Vuéno, jahecha kuri umi siete tiémpo oñepyrũha oñehundírõ guare Jerusalén áño 607-pe Jesús ou mboyve. Ñakontáramo upe guive siete áño, ñag̃uahẽta áño 600-pe. Ha upe áñope ndoikói vaʼekue mbaʼeve oĩva rrelasionádo Ñandejára Rréinondi. Ha avei, jaʼéma haguéicha akokuehe, Jesús oúrõ guare ko yvy ape ári heʼi vaʼekue umi siete tiémpo noñemohuʼãitiha, hiʼarive haʼe ou vaʼekue hetaiterei áño ojeskrivi rire pe profesía.

Néstor: Heẽ, si. Chemanduʼa ñañeʼẽ hague upévare.

Julio: Upéicharõ jaʼekuaa umi siete tiémpo ndahaʼeiha siete áñonte, síno haʼeha peteĩ tiémpo ipukuvéva.

Néstor: ¿Ha mboy piko upéicharõ ipuku?

Julio: Apocalípsispe jatopa peteĩ profesía oĩva rrelasionádo pe profesía jahecha vaʼekuéndi lívro de Daniélpe, ha upe profesía ñanepytyvõta jaikuaa hag̃ua mboýpa odura umi siete tiémpo. Pe profesía oĩva Apocalípsispe heʼi tres tiémpo imédio orekoha 1.260 día.d Upéicharõ el dóvle upévagui, térã siete tiémpo, ohupyty hína 2.520 día.

Néstor: Heẽ... Péro la nantendéiva koʼag̃aite peve mbaʼérepa peẽ peje Ñandejára Rréino oñepyrũha ogoverna áño 1914-pe.

Julio: Koʼág̃a ñañeʼẽvéta upévare. La Bíbliape sapyʼánte oñeñeʼẽ jave un díare, añetehápe heʼise hína un áño.e Jaaplikáramo upéva umi siete tiémpore, 2.520 día añetehápe heʼise hína 2.520 áño. Ha ñakontáramo 2.520 áño, 607 Jesús ou mboyve guive, ñag̃uahẽ hustoite 1914-pe.f Upévare ikatu jaʼe upe áñope opa hague umi siete tiémpo ha oñenombra hague Rréi Jesúspe, Ñandejára Rréinope. Ha avei áño 1914-pe oñepyrũ oñekumpli umi mbaʼe la Biblia opredesi vaʼekue oikotaha umi ára pahápe.

Néstor: ¿Mbaʼe por ehémplo?

Julio: Jahechamína mbaʼépa heʼi vaʼekue Jesús Mateo 24:7-pe, upépe heʼi: “Peteĩ tetã opuʼãta ótro tetãre, ha umi goviérno opuʼãta ojuehe. Avei oĩta ñembyahýi, ha yvyryrýi ápe ha pépe”. Koʼápe heʼi porã oĩtaha ñembyahýi ha yvyryrýi, ha pe síglo pasádo guive heta hetave koʼã mbaʼe, ¿ajépa?

Néstor: Si, legalete upéva.

Julio: Jesús heʼi vaʼekue avei oĩtaha gérra. Ha Apocalípsispe ojepredesi ndahaʼemoʼãiha peteĩ paíspente oĩtaha gérra, síno opataha pe pyʼaguapy “ko yvy ape ári”, upéva heʼise oafektataha ko múndo kompletoitépe.g ¿Ha nemanduʼa arakaʼépa oiko raʼe pe primera gérra mundiál?

Néstor: Áño 1914-pe. ¡Emañami nde! Hústo upéva upe áñope peẽ peje Jesús oñepyrũha ogoverna. Che naimoʼãi umíva oĩha rrelasionádo.

Julio: Ha opa mbaʼe isentidove rehecháramo mbaʼéichapa oĩ rrelasionádo pe profesía oñeʼẽva umi siete tiémpore ha pe profesía oñeʼẽva umi ára paháre. Ore testígo de Jehová roime segúro ke Jesús oñepyrũha ogoverna áño 1914 guive ha upe guive oñepyrũha avei umi ára paha.h

Néstor: Legálmente ijetuʼu ñantendepa hag̃ua péicha péichante.

Julio: Si, che avei heta aiko hese antende porã hag̃ua. Ore ningo don Néstor roñehaʼã roinvestiga porã la Biblia heʼíva roikuaa hag̃ua arakaʼépa añetehápe Jesús oñepyrũ ogoverna, ha upéi ae rokonfirma oiko hague upéva áño 1914-pe. Hiʼãite chéve ko konversasión nepytyvõ rentende hag̃ua mbaʼérepa ore testígo de Jehová roguerovia upe áñope Ñandejára Rréino oñepyrũha ogoverna, noñemensionáiramo jepe upe áño la Bíbliape.

Néstor: Añetehápe tuichaiterei chepytyvõ antende hag̃ua. ¿Eikuaápa mbaʼépa la ahecharamóva? Nde siémpre reipuru la Biblia rembohovái hag̃ua chéve aporandúva guive ndéve. Ha núnka nderéiva “chéverõ g̃uarã”, térã “che apensa ke...”, síno siémpre reipuru la Biblia. Péro eremína chéve, ¿mbaʼére hasyete ñantende la Bíbliape oĩva? ¿Mbaʼére por ehémplo Ñandejára ndeʼírintema Jesúsgui oikotaha Rréi áño 1914-pe?

Julio: Iñinteresánte la reporandúva don Néstor. Añetehápe heta mbaʼe oĩva la Bíbliape ndaikatúi ñantende péicha péichante. Ha ñañeporanduse jepi voi mbaʼérepa Ñandejára ojapo upéicha la Biblia. ¿Mbaʼére piko ñañehaʼãmante vaʼerã ñantende hag̃ua? Mbaʼépa ere ñañeʼẽramo upévare ág̃a ótra semánape.

Néstor: Oĩ porã, rohaʼarõta.