Jasegíkena ñañembokatupyryve japredika hag̃ua
1. ¿Mbaʼe ehémplopa ohechauka jasegi vaʼerãha japrogresa ha ñañembokatupyryve japredika hag̃ua?
1 Entéro Jesús disípulo jasegi vaʼerã japrogresa ha ñañembokatupyryve predikasiónpe. Jahechamína mbohapy ehémplo ohechaukáva upéva. Primero, Jesús voi omeʼẽ vaʼekue instruksión idisipulokuérape ikatu hag̃uáicha ikatupyryve opredika hag̃ua (Luc. 9:1-5; 10:1-11). Segundo, Áquila ha Priscila ogueraha hendivekuéra Apólospe ha “omyesakã porãve chupe Ñandejára rape” (Hech. 18:24-26). Tercero, Timoteo opredikámarõ jepe heta áñore, Pablo omokyreʼỹ chupe osegi hag̃ua oñehaʼãmbaite oporomboʼe porãve ikatu hag̃uáicha ‘opavave ohechakuaa oñakãrapuʼãha ohóvo’ (1 Tim. 4:13-15). Péicha jahecha opavave jaservíva tembiguáiramo ñande Ruvichápe ikatuha jasegi ñañembokatupyryve japredika hag̃ua, oiméramo jepe heta áñorema jajapo ko tembiapo térã ñañepyrũ ramónte.
2. ¿Mbaʼéichapa ikatu ñaaprende ótrogui?
2 Ñaaprendékena ótrogui. Ñandekatupyryve hag̃ua ñañehaʼã vaʼerã ñaaprende ñane ermanokuéragui (Prov. 27:17). Upévare, ñañatende porã vaʼerã ñane irũre opredika jave. Ikatu voi ñaporandu umi ermáno ikatupyrývape mbaʼépa ikatu jajapo ñamehora hag̃ua ha jajapysaka porã umi mbaʼe heʼívare ñandéve (Prov. 1:5) ¿Rekyhyje léntopa rejapo hag̃ua rrevisíta, remoñepyrũ hag̃ua estúdio vívliko, térã repredika hag̃ua ótro hendáicha? Ani retĩ rejerure hag̃ua pe omoakãvape nde grúpo térã peteĩ puvlikadór ikatupyrývape nepytyvõ hag̃ua. Aníkena avei nderesarái Jehová ikatuha nepytyvõ ijespíritu sánto rupive ndekatupyryve hag̃ua, upévare reñemboʼe meme vaʼerã chupe (Luc. 11:13).
3. Oiméramo jepe ndajajeruréi raʼe konsého, ¿mbaʼépa jajapo vaʼerã ojeʼe jave ñandéve mbaʼépepa ikatu ñamehora?
3 Peteĩ ermáno térã ermána heʼíramo ndéve mbaʼépa ikatu rejapo remehora hag̃ua, aníkena ndepochy hendive, oiméramo jepe nde nderejeruréi raʼe chupe konsého (Ecl. 7:9). Apolos ojapo haguéicha, eagradese ha easepta vaʼerã upe konsého. Péicha rehechaukáta nearanduha (Prov. 12:15).
4. ¿Mbaʼépa jahupytýta jasegíramo japrogresa ha ñandekatupyryve japredika hag̃ua?
4 Ñambotuicha Jehovápe. Peteĩ ilustrasión rupive, Jesús omokyreʼỹ vaʼekue idisipulokuérape oñehaʼã hag̃ua oprogresa ha oñembokatupyryve opredika hag̃ua. Haʼe oñekompara peteĩ parrál rehe ha heʼi umi unhído haʼeha hakãnguéra. Upéi heʼi Itúva omopotĩha umi hakã ikatu hag̃uáicha “hiʼa hetave” (Juan 15:2). Peteĩ parralty jára oipotaháicha umi parrál rakã hiʼa heta hetave, Jehová oipota avei ñande ñandekatupyryve káda día “jaikuaauka hag̃ua héra” (Heb. 13:15). ¿Mbaʼépa jahupytýta ñañehaʼãramo japrogresa ha ñandekatupyryve japredika hag̃ua? Jesús heʼi vaʼekue péicha jajapóramo ‘ñambotuichaha hína Itúvape’ (Juan 15:8).