Eiporu la Biblia rembohovái hag̃ua umi porandu

UMI hénte oikuaase jave mbaʼépa ñande jaguerovia, mbaʼe esperánsapa jaguereko térã mbaʼépa ñande ñapensa umi mbaʼe oikóvare, ñañehaʼã vaʼerã ñambohovái chupekuéra la Biblia rupive. ¿Mbaʼérepa iñimportánte jajapo upéicha? Pórke la Biblia haʼe hína Ñandejára Ñeʼẽ, ha omopyenda umi mbaʼe jaʼe ha jagueroviáva. Avei omeʼẽ ñandéve esperánsa ha omyesakã mbaʼérepa oiko hetaite mbaʼe vai ko múndope (2 Tim. 3:16, 17).

Ñande hína testígo de Jehová, ha upévare jaikuaa porã mbaʼe rresponsavilidápa jareko. Upéicha rupi ñambohováita jave peteĩ porandu, opa mbaʼe jaʼéva ñamopyenda vaʼerã la Bíbliape, jaʼénte rangue yvyporakuéra opensáva. Jaikuaa rupi Jehová ñeʼẽ haʼeha pe añetegua, jaheja omoldea umi mbaʼe ñapensáva (Is. 43:12). Péro oĩ umi mbaʼe káda uno ikatúva odesidi, upévare ndovaléi jajopy umi héntepe odesidi hag̃ua ñande ñapensaháicha. Upéva rangue ñamboʼese chupekuéra la Biblia heʼíva, ikatu hag̃uáicha haʼekueraite voi oikuaa mbaʼépa ojapóta káda situasiónpe. Apóstol Pablo heʼi haguéicha, ñande jaipota umi hénte ‘iñeʼẽrendu Ñandejárape ojeroviágui hese’ (Rom. 16:26).

Jesucrístope oñehenói “pe testígo jeroviaha ha añetegua” (Apoc. 3:14). ¿Mbaʼéichapa Jesús ombohovái vaʼekue oñembaʼeporandu jave chupe? Sapyʼánte omombeʼu peteĩ ehémplo ojepyʼamongeta hag̃ua umi hénte, térã oporandu chupekuéra mbaʼéichapa ontende peteĩ téxto. Jesús ningo siémpre ojepokuaa omyesakã Ñandejára Ñeʼẽ heʼíva ombohovái jave umi porandu (Mat. 4:3-10; 12:1-8; Luc. 10:25-28; 17:32). Upe tiémpope umi eskritúra evréa oñeñongatu umi sinagógape. Ndajaikuaái ningo oimépa Jesús oreko raʼe hendive umi kuatiañeʼẽ, péro haʼe oikuaa ha ontende porã vaʼekue umíva, upévare oporomboʼe jave pyʼỹinte imanduʼa Ñandejára Ñeʼẽ heʼívare (Luc. 24:27, 44-47). Upéicha rupi Jesús heʼi vaʼekue opa mbaʼe omboʼéva ouha Itúvagui (Juan 8:26).

Ñande jasegi vaʼerã Jesús ehémplo. Jepe Jehová noñeʼẽi direktoite ñanendive, jareko Iñeʼẽ la Biblia. Jaiporu jave ñambohovái hag̃ua peteĩ porandu jahechauka hína ñambotuichaseha Jehovápe, ha ndahaʼéi ñañemoaranduséva. Ñande nañamboʼéi yvypóra opensáva, síno jaheja Jehová omyesakã ñandéve mbaʼépa hína pe añetegua (Juan 7:18; Rom. 3:4).

Péro ndahaʼéi jaiporúnte vaʼerã la Biblia, ikatu hag̃uáicha ñaipytyvõ porãve ñande rapichápe jaiporu vaʼerã hendaitépe ha ani jajopy chupe oguerovia hag̃ua upépe heʼíva. Upéva rangue, iporãvéta ñaipytyvõramo chupe ohechakuaa hag̃ua mbaʼérepa ogueroviakuaa la Biblia heʼíva. Upearã ikatu ere: “Jahechamína mbaʼépa Ñandejára opensa ko mbaʼére”, térã “La Biblia omyesakã hína ko mbaʼe”. Péro pe persóna ndogueroviáiramo la Biblia heʼíva, ikatu ere: “Taleemína ndéve peteĩ profesía yma guare”, térã “Peteĩ lívro opárupi ojeleéva heʼi péicha”.

Sapyʼánte ikatu avei remombeʼúnte mbaʼépa heʼi peteĩ téxto, péro ijáramo ndéve, iporãvéta releéramo la Bíbliagui voi, ha ikatúma guive pe ogajára Bíbliagui. Péicha reiporúramo Ñandejára Ñeʼẽ opokovéta ikorasõre (Heb. 4:12).

Koʼýte umi ansiáno iñimportánte oiporu la Biblia ombohovái jave peteĩ porandu. Ñandejára Ñeʼẽ heʼi voi mbaʼépa oñehaʼarõ chuguikuéra: “Oñakarama hatã vaʼerã pe ñeʼẽ añeteguáre oporomboʼe jave” (Tito 1:9). ¿Mbaʼérepa umi konsého omeʼẽva oñemopyenda vaʼerã la Bíbliape? Pórke ikatu hína pe ermáno osegi pe konsého odesidi hag̃ua mbaʼépa ojapóta. Umi ansiáno omoĩramo ehémplo, umi ótro ermáno ojapóta avei upéicha.