Jaiporúva predikasiónpe: Ojejapo puvlikasión enterovépe g̃uarã

1, 2. a) ¿Mbaʼéichapa yma ojekuaauka umi notísia porã entéro tetã oĩvape Roma poguýpe? b) ¿Mbaʼépa ohechauka Ñandejára ñanepytyvõha ko tiémpope? (Ehecha pe rrekuádro “Notísia porã mas de 670 idiómape”.)

UMI hénte oúva Jerusalénpe ni ndogueroviaséi ohendúvo umi Galileagua oñeʼẽ porãha iñidiomapekuéra. Umi ovisitáva pe siuda omombaʼeterei upe oñemboʼéva chupekuéra. Upéva oiko áño 33-pe, Pentecostés árape. Peteĩ milágro rupive umi disípulo oñeʼẽ diferénte idiómape. Upéva ohechauka Ñandejára oipytyvõha chupekuéra (elee Hechos 2:1-8, 12, 15-17). Umi hénte oúva heta lugárgui ohendu umi notísia porã ha péicha ojekuaauka entéro tetã oĩvape Roma poguýpe (Col. 1:23).

² Ko tiémpope Ñandejára siervokuéra noñeʼẽi heta idiómape milágro rupive. Upéicharamo jepe umi notísia porã ojekuaauka hetaiteve idiómape. Upearã ojetradusi mas de 670 idiómape (Hech. 2:9-11). Ñandejára puévlo oguenohẽ hetaiterei puvlikasión opaichagua ñeʼẽme, ojepredika hag̃ua opárupi ko yvy tuichakuére.a Péicha ojekuaa porãiterei Jehová ojevaleha Rréi Jesucrístore omoakã hag̃ua pe predikasión (Mat. 28:19, 20). Jastudiávo mbaʼe mbaʼépa oiporu raʼe Ñandejára puévlo opredika hag̃ua umi cien áño ohasa vaʼekuépe, jahechakuaáta pe Rréi oipotaha ñañeinteresa káda persónare. Upévare ñanembokatupyry ñamboʼe hag̃ua chupekuéra la Biblia heʼíva (2 Tim. 2:2).

Pe Rréi omeʼẽ isiervokuérape oikotevẽva oikuaauka hag̃ua pe añetegua

3. ¿Mbaʼérepa jajevale heta mbaʼére japredika hag̃ua?

³ Jesús heʼi vaʼekue “pe marandu Rréino rehegua” ojoguaha semíllape ha umi hénte korasõ katu yvýpe (Mat. 13:18, 19). Peteĩ chokokue ningo ikatu oiporu heta erramiénta oprepara hag̃ua pe yvy ikatu hag̃uáicha oñemitỹ. Upéicha avei Jehová puévlo oiporu opaichagua erramiénta oprepara hag̃ua umi hénte korasõ, ikatu hag̃uáicha oguerovia hikuái umi notísia porã. Oĩ umi erramiénta ojeporu vaʼekue peteĩ tiémporente. Pe kapítulo ohasa vaʼekuépe jahecha kuri ojepredika hague rrádio ha diário rupive. Péro umi lívro ha rrevísta ojeporu koʼag̃aite peve. Jahechamína mbaʼe mbaʼépa oiporu Ñandejára puévlo oñeʼẽ hag̃ua umi héntendi hogaitépe voi (Hech. 5:42; 17:2, 3).

4, 5. ¿Mbaʼéichapa ojeporu vaʼekue umi fonógrafo, péro mbaʼépa ofalta chupe?

⁴ Diskúrso ojegravapyréva. Áño 1930 rire ha 1940 rasaʼimírupi umi puvlikadór oiporu diskúrso ojegravapyréva oñembopúva umi fonógrafo (térã vitróla) rupive. Káda gravasión ndohupytýi ni 5 minúto. Umi diskúrso título mbyky jepi, por ehémplo “Trinida”, “Purgatorio” ha “Rréino”. ¿Mbaʼéichapa ojeporúmi umi gravasión? Ermáno Clayton Woodworth ojevautisa vaʼekue 1930-pe Estados Unídospe omombeʼu: “Aguerahámi peteĩ maletínpe la che fonógrafo, ambokuérda ha apreparapáma voi ipu hag̃uáicha. Péicha ag̃uahẽvo umi óga ahénope aavri la che maletín ha ambopúntema la tímbre. Pe ogajára osẽvo haʼe chupe: ‘Aipotaite rehendu peteĩ notísia iñimportantetereíva’”. ¿Mbaʼépa ojapo jepi umi hénte? Pe ermáno heʼi: “Heta vése umi hénte oñatende porãiterei péro sapyʼánte omboty che rováre la okẽ. Oĩ katu oimoʼãva che avendeha aikóvo fonógrafo”.

⁵ Áño 1940-pe oĩma mas de 90 diskúrso ojegravapyréva ha ojejapo un millón de kópiarupi. John Barr upérõ oservi de prekursór Inglatérrape ha tiémpo rire oservi Kuérpo Governántepe. Haʼe omombeʼu: “Áño 1936 guive 1945 peve ahahápente araha la che fonógrafo. Haʼete voi ndaikatúiva aiko heseʼỹ. Tuichaiterei ningo chemokyreʼỹ ahendúvo ermáno Rutherford ñeʼẽ pe gravasiónpe. Haʼete voi oĩva che ykére pe óga renondépe. Péro oĩ peteĩ mbaʼe ofaltáva pe fonógrafope. Naorepytyvõi ore voi romboʼe hag̃ua mi héntepe ha rog̃uahẽ hag̃ua ikorasõme”.

6, 7. a) ¿Mbaʼéichapa oipytyvõ vaʼekue umi ermánope pe tarhéta ojepredika hag̃ua, péro mbaʼépepa ojoko chupekuéra? b) ¿Mbaʼéichapa Jehová ombokatupyry ermanokuérape opredika hag̃ua?

⁶ Tarhéta ojepredika hag̃ua. Áño 1933 guive ojeʼe umi puvlikadórpe toiporu umi tarhéta opredika hag̃ua la héntepe hogaitépe. Pe tarhéta tuichakue ojogua ñande óha de infórmepe. Pype oĩ peteĩ presentasión mbykymi oñeʼẽva la Bíbliare ha heʼíva umi ogajárape ikatuha ojerure peteĩ puvlikasión. Pe maranduhára ombohasánte ko tarhéta pe ogajárape ha ojerure chupe olee hag̃ua. Ermána Lilian Kammerud upéi oservi vaʼekue de misionéra Puerto Rico ha Argentínape omombeʼu: “Avyʼaiterei ikatu haguére roiporu umi tarhéta ropredika hag̃ua”. Haʼe heʼi mbaʼérepa: “Naentéroi ikatu vaʼekue ropredika porã ha pe tarhéta orepytyvõ rojepokuaa hag̃ua roñemoag̃ui la héntere”.

⁷ Ermáno David Reusch ojevautisa vaʼekue áño 1918-pe, omombeʼu: “Umi tarhéta oipytyvõ ermanokuérape opredika hag̃ua, oĩ rupi heta oñandúva ndaikatupyryiha”. Upéicharamo jepe heta mbaʼépe ojoko chupekuéra. Ermáno Reusch heʼi: “Sapyʼánte umi hénte oimoʼã ore sordomudoha. Ha legálmente sapyʼánte ropyta oreñeʼẽngu ropredikáta jave. Péro Jehová mbeguekatúpe orembokatupyry roñeʼẽ hag̃ua la héntendi. Upéi haʼe oremboʼe mbaʼéichapa roiporu vaʼerã la Biblia ropredika jave. Upearã 1940 rire oñepyrũ pe Eskuéla Jaiporukuaa Hag̃ua La Biblia” (elee Jeremías 1:6-9).

8. ¿Mbaʼéichapa nde reheja Crístope nerekomboʼe?

⁸ Umi lívro. Áño 1914 guive Jehová puévlo oguenohẽ mas de 100 lívro oñeʼẽva la Bíbliare. Oĩ umi ojejapóva ombokatupyry hag̃ua ermanokuérape predikasionrã. Ermána Anna Larsen Dinamarcagua, opredikámava 70 áñore, omombeʼu: “Jehová oremboʼe ropredika porãve hag̃ua. Upearã ojevale Eskuéla Jaiporukuaa Hag̃ua la Bíbliare ha umi lívrore. Chemanduʼa pe primer lívro osẽ vaʼekue 1945-pe héra hague Ayuda teocrática para los publicadores del Reino. Upéi 1946-pe osẽ lívro “Equipado para toda buena obra”. Koʼág̃a jareko lívro Benefíciese osẽ vaʼekue 2001-pe”. (Guaraníme osẽ 2014-pe ha héra Eñembokatupyrýke Eskuéla Jaiporukuaa Hag̃ua la Biblia Rupive.) Añetehápe Eskuéla Jaiporukuaa Hag̃ua La Biblia ha umi lívro ojeporúva upépe tuichaiterei ñanepytyvõ ikatu hag̃uáicha ‘ñandekatupyry jajapo hag̃ua ko tembiapo’ (2 Cor. 3:5, 6). ¿Ndépa reñanotáma ko eskuélape? ¿Reguerahápa nde lívro Eñembokatupyrýke rreunionhápe relee hag̃ua pe Eskuéla omoakãva oñeʼẽ jave hese? Rejapóramo péicha reheja hína Cristo nerekomboʼe oiko hag̃ua ndehegui peteĩ mboʼehára ikatupyrýva (2 Cor. 9:6; 2 Tim. 2:15).

9, 10. ¿Mbaʼéichapa umi lívro oipytyvõ oñemombeʼu hag̃ua la Biblia heʼíva?

⁹ Jehová ojevale iñorganisasión rehe omeʼẽ hag̃ua ñandéve lívro ikatu hag̃uáicha ñamyesakã umi mbaʼe iñimportantevéva oĩva la Bíbliape. Peteĩ lívro iporãitereíva haʼe vaʼekue La verdad que lleva a vida eterna. Osẽ ypy 1968-pe ha pyaʼeterei voi ojehecha ideprovechoitereiha. Ñane Marandu Porã osẽ vaʼekue noviembre de 1968-pe heʼi: “Hetaiterei ojejerure pe lívro La verdad, upévare septiémbrepe Betel de Broóklynpe oñembaʼapo pyharekue entéro pe impréntape”. Upe artíkulo heʼive: “Agóstope ofalta mas de un millón imédio lívro”. Áño 1982-pe osẽma mas de 100 millón lívro 116 idiómape. Áño 1968 guive 1982 peve pe lívro La verdad oipytyvõ oĩ hag̃ua mas de un millón puvlikadór pyahu.b

¹⁰ Áño 2005-pe oñeguenohẽ lívro Mbaʼépa añetehápe omboʼe la Biblia? Kóva hetaitereípema avei oipytyvõ. Oñeimprimíma 200 millónrupi 256 idiómape. ¿Mbaʼépa ojehupyty? Siete áñopente, 2005 guive 2012 peve, oĩma un millón doscientos mil puvlikadór pyahu. Upe tiémpope avei hetave umi ostudiáva la Biblia ñanendive, oĩ vaʼekue seis millón péro upéi oĩma ocho millón setecientos mil voi. Ojekuaa porãiterei Jehová ovendesiha umi mbaʼe jajapóva ñamombeʼu hag̃ua pe añetegua Irréinogui (elee 1 Corintios 3:6, 7).

11, 12. Ohechaukaháicha umi téxto, ¿mávape g̃uarãpa ojejapo umi rrevísta?

¹¹ Rrevistakuéra. Ñepyrũrã Ñemañaha ojejapo umi unhídope g̃uarã oñehenóiva “ovechakuéra mbovymi” ha ‘ojeporavóva oho hag̃ua yvágape’ (Luc. 12:32; Heb. 3:1). Pe 1 de octubre de 1919, Jehová organisasión oguenohẽ ótra rrevísta ojejapóva oñekuaveʼẽ hag̃ua enterove héntepe. Ñepyrũrã ko rrevísta héra La edad de oro. Upéi 1937-pe oñembohéra Consolación ha áño 1946-pe oñehenói ¡Despertad! Ko rrevísta ogustaiterei umi Estudiánte de la Biblia ha ambue tapichápe, upévare heta áñore osẽ hetave rrevísta Ñemañahágui.

¹² Ohasávo pe tiémpo oñekambia heta mbaʼe koʼã rrevístape, péro ojesegi ojejapo ojekuaauka hag̃ua Ñandejára Rréino ha omombarete hag̃ua ñande jerovia la Bíbliare. Koʼág̃a oĩ Ñemañaha ojestudia hag̃ua ha Ñemañaha púvlika. Pe rrevísta de estúdio ojejapo umi ‘ótro tembiguaikuérape’ g̃uarã térã “domésticos”. Upévape oike umi kristiáno ohótavape yvágape ha umi oikótava ko yvy ape áric (Mat. 24:45; Juan 10:16). Pe Ñemañaha púvlika ojejapo umi ndoikuaáivape g̃uarã pe añetegua péro omombaʼéva Ñandejárape ha la Biblia (Hech. 13:16). ¡Despertad! katu ojejapo umi ndoikuaaguasúivape g̃uarã la Biblia ni Ñandejára tee Jehovápe (Hech. 17:22, 23).

13. ¿Mbaʼépa remombaʼe ñande rrevistakuérare? (Ehecha pe rrekuádro “Rrevísta ha lívro oñemeʼẽvéva ko yvy tuichakuére”.)

¹³ Oñepyrũvo áño 2014 ojejapóma káda mes mas de 44 millón ¡Despertad! ha 46 millónrupi Ñemañaha. Rrevísta ¡Despertad! ojetradusi 100 idiómape ha Ñemañaha katu mas de 200 idiómape. Upéicharõ koʼãva hína umi rrevísta ojetradusivéva ha oñemeʼẽvéva la héntepe ko yvy tuichakuére. Iporãiterei koʼã mbaʼe ojehupytýva, péro ñande ndajahecharamói. Ñande jaikuaa koʼã rrevístape oĩha pe notísia Jesús heʼi vaʼekue ojepredika vaʼerãha opárupi ko yvy ape ári (Mat. 24:14).

14. ¿Mbaʼe ojapo hag̃uápa ñamokyreʼỹ la héntepe, ha mbaʼérepa?

¹⁴ La Biblia. Ermáno Russell ha iñirũnguéra omoñepyrũ vaʼekue peteĩ sosieda ikatu hag̃uáicha oguenohẽ puvlikasionkuéra. Áño 1896-pe okambia hikuái pe sosieda réra ha oñehenói Asociación Torre de Vigía de Biblias y Tratados (Watch Tower Bible and Tract Society). Péicha ohechauka umi puvlikasión apytépe oñeguenohẽha avei la Biblia. Jaikuaaháicha pe lívro jaiporuvéva ñamombeʼu hag̃ua umi notísia porã haʼe la Biblia, upévare oĩ porãiterei pe kámbio ojejapo vaʼekue (Luc. 24:27). Ohechaukaháicha pe sosieda réra, Ñandejára siervokuéra oipotaiterei umi hénte oreko la Biblia ha omokyreʼỹ chupekuéra olee hag̃ua. Por ehémplo, 1926-pe ñaimprimi pe traduksión ojapo vaʼekue peteĩ karai hérava Benjamin Wilson. Upe traduksión oreko Mateo guive Apocalipsis peve (The Emphatic Diaglott). Áño 1942 oñepyrũvo, ñaimprimi ha ñamosarambi 700 mil Bíbliarupi hérava Versión del Rey Jacobo. Upéi dos áño haguépe ñañepyrũ ñaimprimi ótro Biblia orekóva Jehová réra 6.823 lugárpe (American Standard Version). Áño 1950-pe ñamog̃uahẽma umi héntepe mas de 250 mil Biblia.

15, 16. a) ¿Mbaʼérepa nde remombaʼe pe Traducción del Nuevo Mundo? (Ehecha pe rrekuádro “La Biblia ojetradusi pyaʼeve hetave idiómape”) b) ¿Mbaʼépa jajapo vaʼerã jaheja hag̃ua Jehovápe opoko ñane korasõre?

¹⁵ Áño 1950-pe oñeguenohẽ ingléspe pe Traducción del Nuevo Mundo de las Escrituras Griegas Cristianas. Ha 1961-pe oñeguenohẽ kompletoite pe Traducción del Nuevo Mundo de las Santas Escrituras. Ko Biblia omombaʼeguasu Jehovápe omoĩ jeývo héra umi lugár oĩ haguépe ojehai ypýrõ guare idióma evréope. Ñandejára réra oñemoĩ avei 237 vése Mateo guive Apocalipsis peve. Ko traduksión heta vésema ojerrevisa ojehecha hag̃ua ojetradusi porãpa ha ndahasýipa oñentende hag̃ua. Áño 2013-pe ojejapo jey kuri upéva ingléspe. Avei upe áñope osẽ guaraníme Ñandejára Ñeʼẽ Traducción del Nuevo Mundo (Mateo-Apocalipsis). La Biblia ojetradusi kompléto térã en párte 121 idiómape ha áño 2013-pe ojejapóma 201 millón Biblia.

¹⁶ ¿Mbaʼéichapa oñeñandu umi oleéva Traducción del Nuevo Mundo iñeʼẽtépe? Peteĩ karai Nepalgua heʼi: “Hetápe g̃uarã hasy kuri ontende hag̃ua pe Biblia nepaléspe, oiporúgui umi ñeʼẽ ymaiterei guarémava. Péro koʼág̃a oreko umi palávra rojepokuaáva roiporu káda día ha upévare rontende porãiterei”. Peteĩ kuñakarai oikóva República Centroafricánape oleévo la Biblia idióma sángope oñepyrũ hasẽ ha heʼi: “Kóva ningo oĩ che ñeʼẽtépe ha opoko che korasõre”. Ojapo haguéicha ko kuñakarai ñande avei ikatu jaheja Jehovápe opoko ñane korasõre jaleévo la Biblia ára ha ára (Sal. 1:2; Mat. 22:36, 37).

Jaagradese umi mbaʼe porãita oñemeʼẽvare ñandéve

17. ¿Mbaʼéichapa ikatu rehechauka reagradeseha umi mbaʼe oñemeʼẽva ndéve, ha mbaʼépa rehupytýta rejapóramo upéva?

¹⁷ ¿Reagradesépa Rréi Jesucristo nembokatupyry haguére? ¿Revyʼápa omeʼẽ haguére ndéve umi mbaʼe reikotevẽtava predikasiónpe? ¿Reñemotiémpopa relee hag̃ua umi puvlikasión ha reiporúpa reipytyvõ hag̃ua nde rapichápe? Rejapóramo upéicha, katuete reñeñandúta ermána Opal Betler oñeñandu haguéicha. Haʼe ojevautisa 4 de octubre de 1914, ha heʼi: “Heta áñore che ména Edward ndive roiporu pe fonógrafo ha tarhéta ojepredika hag̃ua. Ropredika umi héntepe hogaitépe ha roiporu lívro, folléto ha rrevísta. Rokorrémi avei kállere umi kartél reheve ha romeʼẽ la héntepe umi kuatia omombeʼúva notísia porã. Upéi roñehekomboʼe rojapo hag̃ua rrevisíta ha rostudia la héntendi hogaitépe. Siémpre roreko heta mbaʼe rojapo vaʼerã ha roiko vyʼápe”. Jesús heʼi vaʼekue isegidorkuéra ombaʼapo memetaha oñemitỹvo ha omonoʼõvo, ha ovyʼaitereitaha oñondivepa. Hetaiterei ermáno ikatu omombeʼu siertoiteha Jesús heʼi vaʼekue (elee Juan 4:35, 36).

18. ¿Mbaʼe tembiapo iporãitereívapa jajapo?

¹⁸ Umi ndahaʼéiva gueteri Jesús segidór ikatu heʼi Ñandejára puévlore “ilápi mbyky ha avave nomombaʼeiha chupekuéra” (Hech. 4:13). ¡Péro epensamíntena! Jesús ojevale koʼã hénte ijeskuelaʼívare ojapo hag̃ua hetaiterei puvlikasión avave ojapoʼỹ haguéicha. Otradusi hikuái hetaiterei idiómape ha umi puvlikasión oñemog̃uahẽ oparupiete. Iporãveha katu Jesús ñanemboʼe ha ñanemokyreʼỹ jaiporu hag̃ua koʼã mbaʼe ikatu hag̃uáicha ñamombeʼu umi notísia porã opaichagua héntepe. Ñande ñamboʼe la Biblia heʼíva ha ñaipytyvõ ñande rapichápe oiko hag̃ua chuguikuéra Jesús disípulo. ¡Ajépa javyʼaite jajapo haguére ko tembiapo Jesucrístondi!