“Nde pekádo oñeperdonáma”

Oparupietéma ojekuaa Jesúspe. Upévare heta hénte ou mombyrýgui ohendu hag̃ua mbaʼéichapa oporomboʼe ha ohecha hag̃ua umi milágro ojapóva. Péro unos kuánto día rire, haʼe oho jey Capernáumpe. Upépe pyaʼeterei ojekuaa Jesús ou jeymaha ha oĩ heta ohóva pe óga haʼe opytahápe. Umíva apytépe oĩ umi fariséo ha mboʼehára leipegua, oúva Galilea, Judea ha Jerusaléngui.

Hetaiterei hénte ningo oĩ pe óga Jesús oĩháme, ha ndaikatuvéima ni ojeike upépe. Upéicharõ jepe, Jesús “oñepyrũ omombeʼu chupekuéra umi marandu porã” (Marcos 2:2). Upérõ oiko peteĩ mbaʼe enterovépe osorprendéva. Jesús ojapo peteĩ mbaʼe ohechauka porãva orekoha podér oipeʼa hag̃ua pe sufrimiénto ha omonguera hag̃ua yvyporakuérape.

Jesús omboʼe aja umi héntepe, og̃uahẽ cuatro kuimbaʼe oguerúva kamíllape peteĩ paralítikope. Haʼekuéra oipota Jesús omonguera iñamígope, péro umi hénte henyhẽte pe kotýpe ha ombotypa pe entráda entéro, upévare “ndaikatúi oike [hikuái] Jesús oĩháme” (Marcos 2:4). Katuete umi kuimbaʼe ombyasy ohechávo upéva. Upémarõ haʼekuéra ojupi pe óga ári, ombokua pe técho ha omboguejy upérupi pe paralítikope hupa reheve Jesús oĩháme.

¿Ipochýpa raʼe Jesús upévare? ¡Nahániri! Ohecharamoiterei katu mbaʼeichaitépa oreko fe hikuái, upévare heʼi pe paralítikope: “Nde pekádo oñeperdonáma” (Mateo 9:2). Péro, ¿ikatúpa Jesús operdona umi pekádo? Umi mboʼehára leipegua ha fariseokuéra opensa ndaikatuiha. Upévare heʼi hikuái ipyʼapýpe: “¿Mbaʼére piko ko kuimbaʼe oñeʼẽ upéicha? Otaky hína Ñandejárare. Avave ndaikatúi operdona umi pekádo. Ñandejára añoite ikatu ojapo upéva” (Marcos 2:7).

Jesús oikuaa mbaʼépa opensa hikuái, upévare heʼi: “¿Mbaʼére piko pepensa péicha pende pyʼapýpe? ¿Mbaʼépa ndahasyive jaʼe pe paralítikope? ¿‘Nde pekádo oñeperdonáma’, térã, ‘Epuʼã eraha nde rupa ha eguata’?” (Marcos 2:8, 9). Jesús oikuaa omanotaha yvyporakuéra rehehápe oñeperdona hag̃ua chupekuéra ipekádo, upévare ikatúma operdona pe kuimbaʼépe.

Upéi Jesús ohechauka umi héntepe ha umi okritikávape hese orekoha autorida operdona hag̃ua pekádo. Upévare ojere ha heʼi pe paralítikope: “Epuʼã, ejagarra nde rupa ha tereho nde rógape”. Upepete pe kuimbaʼe opuʼã, ojagarra hupa ha oguata opavave renondépe. Umi hénte katu ijurujaipa opytávo ha ombotuicha Ñandejárape, ha heʼijoa: “Arakaʼeve ndorohecháiva koʼã mbaʼe oikoha” (Marcos 2:11, 12).

Jesús heʼíva pe paralítikope ohechauka umi mbaʼasy ouha japeka haguére, ha oñeperdona vaʼerãha ñande pekádo ikatu hag̃uáicha jakuera. La Biblia heʼi voi ñande túva ypykue Adán opeka hague, ha upévare enterovéva ñanderasy ha ñamano. Péro ág̃a Ñandejára Rréino poguýpe, Jesús operdonáta umi pekádo enterove ohayhu ha oservívape Ñandejárape. Ha upépe katu opáta pára siémpre opaichagua mbaʼasy (Romanos 5:12, 18, 19).