¿Mbaʼépa osignifika umi kavaju arigua?

Umi cuatro kavaju arigua ningo ikatu iñextráño ndéve ha upévare nemongyhyje, péro natekotevẽi reñeñandu upéicha. ¿Mbaʼérepa? Pórke la Biblia ha umi mbaʼe oikóva ñanepytyvõ jaikuaa hag̃ua mbaʼépa osignifika umi cuatro kavaju arigua. Ha umíva ohechaukáramo jepe oikotaha heta mbaʼe vai, ohechauka avei ñaneraʼarõha heta mbaʼe porã ñandéve ha ñane famíliape. Upévare jahechamína mbaʼépa osignifika káda uno.

PE KAVAJU MOROTĨ ARIGUA

Pe visión oñepyrũ péicha: “¡Péina!, ahecha peteĩ kavaju morotĩ, ha pe oguapýva hiʼári oreko peteĩ árko ha oñemeʼẽ chupe peteĩ koróna. Haʼe osẽ ipuʼaka hag̃ua iñenemigokuérare ha omohuʼã hag̃ua iñorairõ” (Apocalipsis 6:2).

¿Mávapa oho ko kavaju morotĩ ári? Apocalípsispe oñehenói upe kavaju ariguápe “Ñandejára Ñeʼẽ” (Apocalipsis 19:11-13). La Bíbliape oñehenói péicha Jesúspe, pórke Ñandejára ojevale hese omombeʼu hag̃ua ñandéve umi mbaʼe oipotáva jaikuaa (Juan 1:1, 14). Avei ojeʼe hese haʼeha pe “Rréi omandáva entéro rréire ha mburuvichakuéra Ruvicha”, ha ojeʼe hese haʼeha pe “Jeroviaha ha Añeteguáva” (Apocalipsis 19:11, 16). Jahechakuaa upéicharõ Jesús haʼeha peteĩ rréi orekóva tuicha autorida, ha ikatuha oñorairõ iñenemigokuéra kóntrape. Upéicharõ jepe haʼe naipyʼahatãi ni ndaikorrúptoi.

Péro, ¿mávapa omeʼẽ Jesúspe autorida oñorairõ hag̃ua? (Apocalipsis 6:2). Proféta Daniel ohecha vaʼekue peteĩ visión oñekomparahápe Jesúspe peteĩ “Yvypóra Raʼýre” ha pe “Itujaitéva”, térã Ñandejára Jehováa, omeʼẽha chupe “autorida, tekomimbipa ha goviérno” (Daniel 7:13, 14, TNM). Upéicharõ Ñandejára Todopoderóso voi la omeʼẽva Jesúspe pe autorida ogoverna ha oporohusga hag̃ua. Péro, ¿mbaʼérepa ojeʼe hese ohoha peteĩ kavaju morotĩ ári? La Bíbliape ojepuru pe kolór morotĩ orrepresenta hag̃ua pe hustísia. Upévare pe kavaju morotĩ osignifika peteĩ gérra hústa omoakãtava Ñandejára Raʼy (Apocalipsis 3:4; 7:9, 13, 14).

¿Arakaʼépa oñepyrũ raʼe ogalopea ko kavaju arigua? Jahecha haguéicha Apocalípsispe, Jesús oñepyrũ ogalopea oñemeʼẽ rire chupe peteĩ koróna (Apocalipsis 6:2). Péro, ¿arakaʼépa oiko raʼe upéva? La Biblia ohechauka upéva ndoikói hague haʼe ohomírente yvágape orresusita rire, síno ohasa raẽ peteĩ tiémpo (Hebreos 10:12, 13). Upéicharõ jepe, Jesús heʼi vaʼekue idisipulokuérape mbaʼéichapa ikatu opilla haʼe ogovernamaha yvágape. Haʼe heʼi chupekuéra upéva oiko vove, ko múndo oho vaivetaha. Omombeʼu oĩtaha gérra, ñembyahýi ha mbaʼasy oparupiete (Mateo 24:3, 7; Lucas 21:10, 11). Áño 1914-pe oñepyrũ kuri pe primera gérra mundiál, upe guive ojehecha porãiterei oñepyrũmaha pe tiémpo Jesús heʼi vaʼekue, ha ñañepyrũma jaiko “umi ára pahápe” (2 Timoteo 3:1-5).

Péro, ¿mbaʼére piko ko múndo oho vaive Jesús oñepyrũ rire ogoverna 1914-pe? Pórke upérõ Jesús oñepyrũ ogoverna pe yvága, ndahaʼéi ko yvy. Avei upérõ oñepyrũ peteĩ gérra yvágape, ha Jesús oñehenóiva avei Miguel omosẽ Satanás ha idemoniokuérape upégui, ha ou hikuái ko yvy ape ári (Apocalipsis 12:7-9, 12). Upe guive Satanás ipochyeterei opytávo, oikuaa rupi mbykypaitemaha la itiémpo. Añetehápe Ñandejára koʼẽrõitéma ohundíta pe Añáme ha okumplíta hembipota ko yvy ape ári (Mateo 6:10). Péro ñaanalisamína koʼág̃a mbaʼéichapa umi ótro mbohapy kavaju arigua ñanepytyvõ jahechakuaa hag̃ua jaikomaha “umi ára pahápe”. Jahecha haguéicha, pe kavaju morotĩ ári ohóva orrepresenta peteĩ persónape, péro umi ótro kavaju arigua idiferénte, pórke umíva osignifika umi mbaʼe vai oikóva ko múndope.

PE KAVAJU PYTÃ ARIGUA

“Ha osẽ ótro, peteĩ kavaju pytã asýva ha pe oguapýva hiʼári orresivi autorida oipeʼa hag̃ua pyʼaguapy ko yvy ape árigui, ikatu hag̃uáicha umi hénte ojojukapa, ha oñemeʼẽ chupe peteĩ espáda puku” (Apocalipsis 6:4).

Ko kavaju arigua orrepresenta umi gérra. Pe versíkulo heʼi oipeʼaha pyʼaguapy ko múndo kompletoitégui voi, ndahaʼéi unos kuánto tetãguinte. Jahechakuaa upéva oiko hague 1914 guive. Upe áñope oñepyrũ vaʼekue pe primera gérra mundiál, peichagua gérra núnka ndoikóiva. Ha upe riremínte oñepyrũma pe segunda gérra mundiál, upéva katu ivaieteve vaʼekue pe primérogui. Ojekalkula 1914 guive mas de 100 millónrupi omanomaha umi gérra káusare. Ha oĩ avei hetaiterei opytáva mutiládo.

¿Mbaʼeichaite pevépa oĩ la gérra ko ñane tiémpope? Koʼág̃arupi jahechakuaa umi yvypóra orekoha la kapasida ohundipaite hag̃ua ko yvy ha oĩva guive pype. Ha oĩramo jepe organisasión ombaʼapóva oĩ hag̃ua pyʼaguapy, por ehémplo pe Naciones Unidas, ndaikatúi ojoko hikuái pe kavaju pytã ariguápe.

PE KAVAJU HŨ ARIGUA

“¡Péina!, ahecha peteĩ kavaju hũ, ha pe oguapýva hiʼári oreko peteĩ valánsa ipópe. Ahendu haʼetévaicha peteĩ oñeʼẽva umi cuatro keruvín mbytépe ha heʼi: ‘Un kílo trígo peteĩ denáriore, ha tres kílo seváda peteĩ denáriore, ha ani rehundi pe aséite de olíva ni pe víno’” (Apocalipsis 6:5, 6).

Ko kavaju arigua orrepresenta pe ñembyahýi. Koʼã téxto ohechauka tekotevẽha ojepuru porã umi hiʼupy. Ojeʼe voi 1 kílo trígo ovaletaha 1 denário. Upe tiémpope oñembaʼapo vaʼerã kuri un día pytã oñegana hag̃ua upe kantida (Mateo 20:2). Peteĩ denáriore ikatu vaʼekue avei ojejogua 3 kílo seváda, péro ko prodúkto noñemombaʼéi vaʼekue pe trígoicha. ¡Péro hasy ningo upe kantida omoyg̃uatãmba hag̃ua peteĩ família kompletoitépe! Upévare ojeʼe umi héntepe oipurukuaa hag̃ua hikuái umi aliménto vásiko jepe, por ehémplo, pe aséite de olíva ha víno. Upe épokape koʼã mbaʼe ojepuru meme vaʼekue ogapýpe.

Péro, ¿ikatúpa jaʼe pe kavaju hũ arigua ogalopeaha 1914 guive? Si, pórke síglo 20-pe haimete 70 millón omano vareʼágui. Peteĩ infórme heʼi voi: “Káda áño hetaiterei omano malária, mbaʼasy poʼi ha SIDA káusare, péro ñasumambáramo jepe umíva, oĩ hetaitereive persóna omanóva ñembyahýigui”. Ótro infórme omombeʼu 2012 guive 2014 peve oĩ hague 805 millónrupi ndokaruporãiva, upéva heʼise 1 de káda 9 persóna oĩva ko múndope. Oĩramo jepe heta oñehaʼãva omongaru hag̃ua umi hénte iñembyahýivape, ko kavaju hũ arigua osegi gueteri ogalopea.

PE KAVAJU SAʼYJU ARIGUA

“¡Péina!, ahecha peteĩ kavaju saʼyju, ha pe oguapýva hiʼári héra Ñemano, ha pe Sepultúra hapykueriete ou. Ha orresivi autorida oreko hag̃ua ipoguýpe peteĩ párte ko yvy ape ári, oporojuka hag̃ua espáda puku reheve, ñembyahýi, mbaʼasy oporojukáva ha mymba ñarõ ko yvy arigua rupive” (Apocalipsis 6:8).

Ko cuarto kavaju arigua orrepresenta pe ñemano oikóva umi mbaʼasy ha ambue káusare. Áño 1914 riremi, pe mbaʼasy hérava grípe españóla ojuka hetaitereípe. Ha ojekalkula voi 500 millónrupi oreko hague ko mbaʼasy, upéva heʼise upe épokape 1 de káda 3 persónape ojagarra hague pe grípe españóla.

Péro ndopái upépe. Umi karai arandu okalkula pe síglo 20 aja mas de 300 millón omano hague pe viruéla káusare. Ha oĩramo jepe sientífiko oinvestigáva omonguera hag̃ua umi mbaʼasy, millónere osegi gueteri omano pe SIDA, malária ha mbaʼasy poʼi káusare.

Jahechakuaa upéicharõ la hénte omanonteha avei tahaʼe umi gérra, ñembyahýi térã umi mbaʼasy káusare. Pe Sepultúra noponderái avavére ha hetaitereípe ombyaty ohóvo, omeʼẽʼỹre avavépe esperánsa.

¡HETA MBAʼE PORÃ ÑANERAʼARÕ!

Ko tiémpo ijetuʼuetéva jahásava opátama koʼẽrõite. Ñanemanduʼa vaʼerã 1914-pe Jesús osẽma hague “ipuʼaka hag̃ua iñenemigokuérare”. Upe áñope haʼe oity kuri Satanáspe ko yvýpe, péro upérõ haʼe nomohuʼãi gueteri iñorairõ (Apocalipsis 6:2; 12:9, 12). Koʼẽrõitéma, Armagedón aja, Jesús ohundipaitéta umi hénte añáme ha nopermitimoʼãvéima Satanás ñandeperhudika (Apocalipsis 20:1-3). Avei Jesús ipuʼakáta umi kavaju ariguáre ha osolusionambaitéta umi mbaʼe vai haʼekuéra ojapo vaʼekue. ¿Mbaʼéichapa ojapóta upéva? Jahechamína umi promésa jatopáva la Bíbliape.

Umi gérra rangue oĩta pas. La Biblia heʼi: “Ndaiporimoʼãvéima ni peteĩ gérra ko yvy ape ári, pórke Ñandejára omopẽ umi flécha ha umi lánsa, ha ohapy umi kárro ojepurúva gerrahápe” (Salmo 46:9, TNM). Umi ivuénova “opytáta ko yvy ape ári, haʼekuéra ovyʼaitereíta pórke oikóta pyʼaguapýpe ha noñekevrantamoʼãi mbaʼevete asýre” (Salmo 37:11, TNM).

Ñembyahýi rangue oĩta hetaiterei hiʼupy. Ñandejára Ñeʼẽ heʼi: “Ijyvy tahenyhẽ trígo raʼỹigui ohupyty peve sérro ruʼã” (Salmo 72:16, ÑÑB).

Oĩ rangue mbaʼasy ha ñemano, entéro hesãita ha oikóta pára siémpre. La Biblia oprometeháicha, Ñandejára “omokãmbaitéta hesaykuéra, ndaiporimoʼãvéima omanóva, oñembyasýva, hasẽva ni hasýva. Umi mbaʼe yma guare ohasapáma” (Apocalipsis 21:4).

Jesús oĩro guare ko yvy ape ári ohechauka porãiterei vaʼekue umi mbaʼe porãita ojapótava ág̃a ogoverna vove ko yvy. Por ehémplo, haʼe ndoipotái vaʼekue ojeiko vai, omongaru hetaitereípe peteĩ milágro rupive, avei omonguera umi hasývape ha umi omanóvape jepe omoingove jey (Mateo 12:15; 14:19-21; 26:52; Juan 11:43, 44).

Umi testígo de Jehová ovyʼaitereíta ohechaukárõ ndéve la Biblia rupive mbaʼépa ikatu rejapo reime hag̃ua preparádo Jesús ou vove. ¿Reaseptánepa peteĩ invitasión reaprendeve hag̃ua la Bíbliagui?