Leksión 2

Eñeʼẽ reñemongetarõguáicha nde rapichándi

Lucas 6:45

MBAʼÉPA HEʼISE: Ndahasýi vaʼerã oñentende hag̃ua umi mbaʼe eréva ha reñeʼẽ vaʼerã reñemongetarõguáicha ótrondi. Avei reñeʼẽ vaʼerã nde pyʼaite guive.

MBAʼÉICHAPA IKATU REJAPO

Eñemboʼe ha ejeprepara porã vaʼerã. Ejerure Jehovápe tanepytyvõ ani hag̃ua nenerviosoiterei, síno eñekonsentra hag̃ua pe mensáhe emombeʼútavare. Eikuaa porã vaʼerã avei mbaʼe rehepa reñeʼẽta ha reexplika ne ñeʼẽtépe. Upévare aníkena releénte oĩhaichaite pe puvlikasiónpe.

Elee jave la Biblia térã peteĩ puvlikasión, eñehaʼã vaʼerã rentende porã ikatu hag̃uáicha relee syryrýpe. Elee jave peteĩ persóna heʼi vaʼekue, eñehaʼã ehechauka mbaʼéichapa oñeñandu raʼe pe persóna, péro ani reexaheraiterei.
Eñeʼẽ nde pyʼaite guive. Epensa vaʼerã mbaʼérepa iñimportánte umi hénte ohendu la erétava, ha eñehaʼãkena epensa meme hesekuéra. Ejapórõ upéicha, eñemboʼy lájare, umi hésto rejapóvare, ha nde rováre ojekuaáta nesinséro ha ndekalidaha.

Iñimportanteterei ningo ñañeʼẽ ñañemongetarõguáicha umi héntendi, péro iñimportánte avei jahechauka japororrespetaha. Upearã tekotevẽ ñañeʼẽ porã ha hendaitépe.
Emaña umi nerendúvare. Rejapo jave diskúrso reñehaʼã vaʼerã remaña peteĩteĩ umi nerendúvare, ha ndahaʼéi pe grúpo kompletoitérente.