Aníke jaiko vai plátare

Apóstol Pablo heʼi 1 Corintios 6:1-8-pe mbaʼépa ojejapovaʼerã kristianokuéra oiko vai ha oñodemanda jave. Primero haʼe ipochy oĩ haguére ermáno ojogueraháva umi hués hekojeroviaʼỹva rovake (versíkulo 1). Upéi heʼi iporãveha kristianokuéra oñehaʼã oiko porã jey kongregasiónpe, oho rangue umi hués rendápe. Jahechamína mbaʼérepa Pablo heʼi upéva ha mbaʼéicha javépa natekotevẽi jajapo haʼe heʼíva.

Jaiko vaíramo ñane ermánondi plátare, ñañehaʼãvaʼerã jaarregla Jehová heʼiháicha ha ani ñande jaikuaaháicha (Proverbios 14:12). Jesús heʼivaʼekue iporãveha pyaʼe ñañehaʼã jaiko porã jey, pe provléma tuicha mboyve (Mateo 5:23-26). Ñambyasy ningo oĩ haguére umi ermáno oñorairõséva ha oñodemandáva. Pablo heʼi ‘ivaietereiha ojoavy oñondivekuéra’. Mbaʼérepa? Koʼãichagua provlémare ikatu oñeñeʼẽ vai Ñandejára rérare ha kongregasiónre. Upévare, iporãve jajapo Pablo heʼíva ha ‘jagueropuʼakánte’ upe oikóva (versíkulo 7).

Pablo heʼi avei Ñandejára omoĩha ansianokuéra oipytyvõ hag̃ua oĩ jave provléma. Haʼekuéra iñarandu ostudia meme rupi Ñandejára Ñeʼẽ. Umi ansiáno ikatupyry ohusga hag̃ua umi kristianokuéra oiko vaívape ‘umi mbaʼe yvy ariguávare’ (versíkulo 3-5, BNP). Avei Jesús ohechauka mbaʼépa jajapovaʼerã ñane ermáno ojapóramo peteĩ mbaʼe ivaietereíva ñanderehe, pór ehémplo otaky ñanderehe térã ñanemonda. Oĩ mbohapy mbaʼe jajapovaʼerã: primero ñañeʼẽvaʼerã hendive ñaneañoháme ha ñañehaʼã jaiko porã jey. Upéva ndoikóiramo, ñahenoivaʼerã peteĩ térã mokõime ohendu hag̃ua ojeʼéva; ha ipahápe ikatu ñahenói ansianokuérape (Mateo 18:15-17).

Péro umi ansiáno ndahaʼéi avogádo térã kuimbaʼe ikatupyrýva negósiope. Haʼekuéra ndeʼimoʼãi umi ermánope mboýpa térã mbaʼéichapa ojepagavaʼerã oiméramo peteĩ odeve hapichápe. Umi ansiáno oipytyvõse chupekuéra ojapo hag̃ua la Biblia heʼíva ikatu hag̃uáicha oiko porã jey. Pe provléma ijetuʼúramo ikatu oporandu superintendénte de sirkuítope térã testigos de Jehová sukursálpe. Péro oĩ vése ndaikatumoʼãiha ojejapo Pablo heʼíva. Jahechami mbaʼéicha javépa.

Heta vése pe léi voi heʼi tekotevẽha ojejapo peteĩ demánda, térã oñekotevẽ upéva ojarregla hag̃ua peteĩ mbaʼe. Pór ehémplo, umi ojedivorsiaséva, umi ndoipotáiva ojepeʼa chugui ifamília, oikotevẽva oñembohasa chupe hembiʼu repyrã, okovra hag̃ua peteĩ segúro, olegalisa hag̃ua peteĩ testaménto térã oiméramo odeve chupe peteĩ emprésa térã vánko oñembotýva. Ikatu avei peteĩ ermáno odesidi tekotevẽha oporodemanda jey oiméramo oñedemanda chupe.a

Peteĩ kristiáno ojapóramo ãichagua demánda péro ndahaʼéi oiko vaiségui hapichándi, noñemoĩri Pablo heʼivaʼekuére.b Aníke ñanderesarái koʼã mbaʼégui: jaipota Jehová réra toñembotuicha ha jaiko porãse enterovéndi kongregasiónpe. Ñande ningo Cristo remimbou ha enterove ohechavaʼerã ñande jajoayhuha. Ko mborayhu “ndohekái imbaʼerãvante” (1 Corintios 13:4, 5, BNP; Juan 13:34, 35).