Kárta omboúva Kuérpo Governánte

Ore ermáno ha ermanakuéra rohayhuetéva:

Lívro de Apocalípsispe jatopa Jesús heʼi hague pe kongregasión de Esmírnape: “Ani rekyhyje umi mbaʼe ijetuʼúva rehasátavagui” (Apoc. 2:10). Ko Jesús heʼi vaʼekue ikatu avei ñanepytyvõ ñandéve, pórke ñande jaiko hína “ñande Ruvicha díape” (Apoc. 1:10). Ndaipóri onega vaʼerã koʼág̃arupi la situasión ‘ijetuʼu ha ipeligrosoha’ (2 Tim. 3:​1-5). Oparupiete ko múndope ñane ermanokuéra ombohovái hína umi pruéva ijetuʼuetereíva. Upéicharõ jepe haʼekuéra osegi ifiél Jehovápe ha ohechauka ojerovia ha ipyʼaguasuha. Rohechávo upéva, ¡opokoiterei orerehe!

¿Mbaʼépa ikatúne jajapo jasegi hag̃ua ñandepyʼaguasu ha jajerovia? ¿Mbaʼépa ñanepytyvõta pono jaguevi jakyhyje rupi? (Heb. 10:39). Heta vése ijetuʼúta ñanendive, pórke ikatu hína oĩ oñemoĩva ñanderehe térã ñandepersegíva. Péro amo ipahápe ñanderehe odepende jadesidi hag̃ua la jajapótava. Tahaʼe ñaneotĩ térã ñandepyʼamirĩramo jepe, enterovévante ikatu jadesidi pyʼaguasúpe jaapojataha Jehovápe ha jajapotaha iporãva. ¿Mbaʼéichapa ikatu jajapo upéva?

Ñandejára Ñeʼẽ ikatu ñanepytyvõ ñandepyʼaguasu hag̃ua. Upépe oñemombeʼu oĩ hague heta kuimbaʼe ha kuña ipyʼaguasúva. Ko lívro ojejapo ikatu hag̃uáicha restudia porã iñehemplokuéra ha rejepyʼamongeta hese. Ág̃a relee vove umi rreláto, ejerurékena Jehovápe tanepytyvõ rehechakuaa hag̃ua mbaʼéichapa iñehemplokuéra ikatu nepytyvõ koʼág̃ama voi ha avei amo gotyove. Eñehaʼãkena rehecha hag̃ua mbaʼéichapa Jehová ikatu nembopyʼaguasu ndéve avei. Koʼã kuimbaʼe ha kuña ehémplo iporãitéva ikatu nembopyʼaguasu rejapo hag̃ua koʼã mbaʼe:

Ejadapta la Jehová oipotávare (Sant. 3:17). Epensamína Jonatán ehémplore. Haʼe oiméne opensa raʼe opytataha itúa rendaguépe ogoverna hag̃ua Israel. Péro Jehová oelehi rangue chupe, oelehi Davídpe ogoverna hag̃ua, imitãvéramo jepe chugui. Jonatán oasepta la Jehová odesidi vaʼekue ha oapoja chupe. Ko situasiónpe Jonatán ohechauka vaʼekue ifiél ha ipyʼaguasuha.

Ejapo pe oĩ porãva (Heb. 11:​32-34). Ananías, Misael ha Azarías oadorase vaʼekue Jehovápe añoiténte. Upévare ikuentave vaʼekue chupekuéra omano peteĩ tatakua akúpe oadora rangue peteĩ estátua.

Eñeʼẽ pe añeteguáre (Mat. 22:16). Heta judío opensa vaʼekue Saulo de Tarso oipytyvõtaha chupekuéra opersegi hag̃ua umi kristiánope. Péro upéi Saulo okambiaite ha pyʼaguasúpe oñeʼẽ koʼã judíope Jesúsre.

Roñemboʼe ningo ikatu hag̃uáicha ko puvlikasión penepytyvõ pejeroviave ha pendepyʼaguasuve hag̃ua (Sal. 27:14). Hiʼãiterei ningo oréve Jehová tapenevendesi ikatu hag̃uáicha peipytyvõ pene famíliape ha pene kongregasiónpe ipyʼaguasuve hag̃ua. ¡Péicha kyhyjeʼỹme ikatúta peapoja Jehová goviérno!