Umi diferénsia ñanepytyvõ

Jesús ningo pe Mboʼehára ikatupyryvéva oiko vaʼekue ko yvy apére. Haʼe pyʼỹinte oiporúmi porandu ha ehémplo oporomboʼe jave. Oiméne reñehaʼã avei rejapo upéicha. Péro, ¿rehechakuaápa heta vése haʼe oiporu hague mokõi mbaʼe idiferénteva ojuehegui omyesakã porãve hag̃ua pe omboʼéva?

Heta oĩ ojapóva upéva oñeʼẽ jave, ha sapyʼánte ni ndohechakuaái. Por ehémplo, ikatu ojeʼe: “Haʼekuéra heʼi kuri umi yva hiʼajumaha, péro koʼãva ndahiʼajuiete gueteri”. Térã: “Ymave haʼe ni noñeʼẽi vaʼekue, koʼág̃a katu nokirirĩvéi”.

Péicha jave pe oñeʼẽva heʼi raẽ peteĩ mbaʼe, ha upéi heʼi ótra kósa idiferénteva. Upearã oiporu umi ñeʼẽ péro, upéicharõ jepe, térã, ỹrõ, síno, upéva rangue, katu, guei, ha umícha. Sapyʼánte nañañeʼẽi mokõi mbaʼe idiferéntevare, síno jaiporu rire peteĩva koʼã palávra, ñamyesakãvénte térã ñameʼẽve informasión ohóva pe ñañeʼẽvare. Rejepokuaáramo reñemongeta upéicha, ojekuaáta reiporuha umi ñeʼẽ hendápe porã ha ndahasymoʼãi umi nerendúvape nentende hag̃ua.

Heta idiómape ndojeporuguasúi umi mbaʼe idiferénteva ojuehegui oñeñeʼẽ jave, upéicharõ jepe jahechakuaa vaʼerã umíva iñimportanteha. ¿Mbaʼérepa? La Bíbliape ojeporúgui heta hendápe. Por ehémplo, Jesús heʼi vaʼekue: “Ñamyendy rire peteĩ lámpara nañamoingéi kanásto guýpe, jahupi guei yvate”. “Che aju akumpli hag̃ua [pe Léi], ndahaʼéi ahundi hag̃ua.” “Peẽ pehendu ojeʼe hague: ‘Ndovaléi reporomoakãratĩ’. Che katu haʼe peẽme: Entéro osegíva omaña peteĩ kuñáre [...].” “Peẽ peikuaa ojeʼe hague: ‘Oimeraẽ ohesamombúva hapichápe, toñehesamombu avei chupe. Térã oitýva hapichágui hãi, tojeity avei chugui’. Che katu haʼe peẽme: Ani peñemoĩ iñañávare, upéva rangue, oĩramo nderovapetéva un ládo, emoĩ avei chupe pe ótro ládo.” (Mat. 5:15, 17, 27, 28, 38, 39, NM.)

La Bíbliape heta pártepe ojeporu umi fráse ohechaukáva mokõi mbaʼe idiferenteha ojuehegui. Umíva ñanepytyvõ ñantende porãve hag̃ua peteĩ mbaʼe, térã ohechauka hag̃ua mbaʼépa iporãve jajapo. Oimérõ nde peteĩ túva, epensamína heʼívare ko téxto: “Peẽ tuvakuéra, ani pejahéi pende raʼykuérare pembopochy hag̃uáicha chupekuéra, síno pesegi vaʼerã pemongakuaa ha pekorrehi pene famíliape Jehová oipotaháicha” (Efes. 6:4, NM). Pablo ikatúnte kuri heʼi umi túva okorrehi vaʼerãha ifamíliape Jehová oipotaháicha. Péro oiporu pe ñeʼẽ síno omyesakã porãve hag̃ua iñimportanteha ohekomboʼe ifamíliape “Jehová oipotaháicha” ‘ombopochy’ rangue chupe.

Upe rire Pablo heʼi avei: “Ñande ningo nañañorairõi yvypórandi, ñañorairõ guei umi espíritu aña yvagapeguándi” (Efes. 6:12, NM). Ko téxtope pe ñeʼẽ guei, ñanepytyvõ ñantende hag̃ua pe ñorairõ ndahaʼeiha vyrorei, ñañorairõha hína umi espíritu aña ndive, ndahaʼéi yvypórandi reínte.

MBAʼÉREPA IPORÃ ÑADIFERENSIA OJUEHEGUI MOKÕI MBAʼE

Pablo ohaírõ guare umi Efesoguápe, oiporu heta vése umi fráse ohechaukáva mbaʼépepa idiferénte ojuehegui mokõi mbaʼe. Ñapensáramo koʼãvare ikatu ñanepytyvõ ñantende hag̃ua Pablo omboʼe vaʼekue ha avei omyesakãve ñandéve mbaʼépa jajapo vaʼerã.

Páhina 4 ha 5-pe retopáta heta téxto oñeguenohẽva Efesios kapítulo 4 ha 5-gui, ohechaukáva mbaʼéichapa idiferénte ojuehegui mokõi mbaʼe. Rehesaʼỹijóramo koʼã versíkulo katuete ideprovéchota ndéve. Relee jave umi diferénsia, epensamína ndejehe ha eñeporandu: “¿Mbaʼéichapa añetehápe che apensa? ¿Mbaʼépa che ajapo aĩ jave ko situasiónpe? ¿Mbaʼépa che rapichakuéra opensa cherehe?”. Rehechakuaáramo nepytyvõtaha umi diferénsia oĩva upépe, ejapókena opa ikatúva rekambia hag̃ua tekotevẽhápe.

Ikatu avei reiporu ko rrekuádro pejapo jave pende estúdio de família. Ñepyrurã, ikatu peleepaite umi téxto. Upe rire peteĩva ikatu olee pe primera párte ha ótro taimanduʼa mbaʼépa heʼi pe segunda párte ha tomyesakã. Pejapóramo upéicha, vyʼapópe pestudiáta ha pehecháta mbaʼéichapa ikatu pesegi umi konsého oĩva pe segunda pártepe. Ñahesaʼỹijóramo umi téxto oñediferensiahápe mokõi mbaʼe ojuehegui, ñanepytyvõta enterovévape, tahaʼe mitã térã kakuaa, jaiko hag̃ua kristiáno teéicha ñande rogapýpe ha mamo ñaimehápe.

[Nóta oĩva taʼanga ndive páhina 6] — ¿Nemanduʼápa umi mbaʼe oĩvare pe rrekuádrope segunda pártepe?

Koʼág̃a rehechakuaáma iñimportanteha rediferensia porã ojuehegui mokõi mbaʼe. Upéva nepytyvõta rehechakuaa hag̃ua la Biblia oiporu jave koʼãichagua fráse ha katuete ideprovéchota ndéve predikasiónpe. Por ehémplo, ikatu ere pe ogajárape: “Heta hénte opensa ñane álma nomanoiha, péro ehechamína mbaʼépa heʼi la Biblia”. Térã ikatu ere peteĩ estudiántepe: “Heta oĩ opensáva Ñandejára ha Jesús peteĩ personanteha. Péro, ¿omboʼépa la Biblia upéva? ¿Mbaʼépa nde repensa?”.

Upeichaite, la Bíbliape jatopa heta téxto odiferensiáva mokõi mbaʼe ojuehegui, ha umíva ñanepytyvõ jaiko hag̃ua Ñandejára rapére ha ñamboʼe hag̃ua ñande rapichápe mbaʼépa añetehápe omboʼe la Biblia.

Umi diferénsia oĩva Efesios kapítulo 4 ha 5-pe

Eñehaʼãkena eiporu ko rrekuádro restudia jave ne família ndive.

“Ndajahejamoʼãvéima avave ñanembotavy ni oletradea ñanderehe, ni ñandegueraha ápe ha pépe.” (4:14, NM.)

“[Upéva rangue] jaʼe vaʼerã pe añeteguánte ha japorohayhu, ikatu hag̃uáicha jakakuaapa opa mbaʼépe jajogua hag̃ua Crístope.” (4:15, NM.)

“[Umi tetã] oĩ pytũmbýpe [ . . . ] ndoikuaaséigui Ñandejárape ha ipyʼahatã rupi hikuái.” (4:18, 19, NM.)

“Péro peẽ napeaprendéi Cristo ojogua hague koʼãichagua héntepe, oimérõ añete pehendu raʼe chupe ha haʼe penerekomboʼe.” (4:20, 21, NM.)

“Pehejaite vaʼerã pende reko tuja ha umi mbaʼe pejapo vaʼekue yma.” (4:22, NM.)

“[Upéva rangue] akóinte pembopyahu vaʼerã pepensa lája, ha pemonde vaʼerã pe teko pyahu.” (4:23, 24, NM.)

“Pe omondáva anive omonda.” (4:28, NM.)

“Upéva rangue tombaʼapo pohýi ha tojapo iporãva.” (4:28, NM.)

“Aníkena osẽ pende jurúgui mbaʼeveichagua ñeʼẽ kyʼa.” (4:29, NM.)

“Síno umi mbaʼe iporãva ha oporomombaretétava.” (4:29, NM.)

“Aníkena pendepyʼaro, perrenega vaipa, pendepochy, pejoguerosapukái, pejojaʼo ni peneñaña.” (4:31, NM.)

“Upéva rangue penembaʼeporã vaʼerã oñondive, pejoporiahuvereko ha peñoperdona pende pyʼaite guive.” (4:32, NM.)

“Aníkena ni mbaʼevéicharõ peñeʼẽ tekovaíre, ni mbaʼeveichagua tekokyʼa, ni taryrýire.” (5:3, NM.)

“Upéva rangue peagradese vaʼerã Ñandejárape.” (5:4, NM.)

“Peteĩ tiémpope peẽ peime vaʼekue pytũmbýpe.” (5:8, NM.)

“Péro koʼág̃a peporohesape peservi rupi ñande Ruvichápe.” (5:8, NM.)

“Anive pejeheʼa umi tembiapo ovaleʼỹvare mbaʼeverã ha oĩva pytũmbýpe.” (5:11, NM.)

“Upéva rangue pehechauka vaʼerã umíva ivaiha.” (5:11, NM.)

“Peñatende porãke peiko lájare, ani hag̃ua peiko itavývaicha.” (5:15, NM.)

“Síno iñarandúvaicha. Ha peiporu porãke pene tiémpo.” (5:15, 16, NM.)

“Anive pendevýro.” (5:17, NM.)

“Upéva rangue pesegi vaʼerã pehecha mbaʼépa hína Jehová rembipota.” (5:17, NM.)

“Ani avei pekaʼu, upéva ningo ñandegueraha vai.” (5:18, NM.)

“Síno pesegi vaʼerã penerenyhẽ espíritu sántogui.” (5:18, NM.)

“Cristo ojapo upéva pe kongregasión ojajaipa hag̃ua henondépe. Haʼe oipota vaʼekue pe kongregasión imarangatu, iporãmbaite.” (5:27, NM.)

“Ani ichaʼĩ ni oreko mbaʼeve ikyʼáva.” (5:27, NM.)

“Ndaipóri ningo kuimbaʼe ndaijaʼéiva hetére.” (5:29, NM.)

“Upéva rangue oñangareko ha omokunuʼũ hete, Cristo ojapoháicha pe kongregasiónre.” (5:29, NM.)