LA BIBLIA OMBOHOVÁI KOʼÃ PORANDU
¿Maʼerãpa ojejapo rakaʼe ñane planéta?
Ko yvy ojejapo vaʼekue jaiko hag̃ua vyʼápe
Ñane planéta ningo orekopaite umi mbaʼe tekotevẽva ojeiko hag̃ua pype. Por ehémplo, oreko heta y ñaikotevẽva jaikove hag̃ua. Avei ko yvy ojere kangy asy pe kuarahýre ha oĩ medidaitépe chugui ani hag̃ua hakueterei ha okaipa opa mbaʼe, térã hoʼysãiterei ha oñekonhelapa umi y. Ko yvy oreko avei pe atmósfera ha ambue mbaʼe oprotehéva chupe ani hag̃ua oike pype umi ita guasu guasu oúva pe espásiogui térã ótra kósa ikatúva ñanembyai. Ni umi animál ha plánta ningo noĩreíri. Umíva oipytyvõ avei ikatu hag̃uáicha yvyporakuéra oiko ha oñeñandu hogapeguáicha ko yvy ape ári. Heta hénte oikuaávo koʼã mbaʼe opensa anichéne hague ojejapo reínte ko yvy. (Elee Isaías 45:18.)
Péro ñambyasy jahechávo mbaʼéichapa ko yvy henyhẽ ihustísia ha sufrimiéntogui. Upéicha rupi, oiméne nde reñeporandu jasufrínte vaʼerã voípa péicha. (Elee Deuteronomio 32:4, 5.)
¿Oñekumplítapa Ñandejára rembipota ko yvýpe g̃uarã?
Ñandejára ojapo vaʼekue ko yvy ikatu hag̃uáicha yvyporakuéra oiko pype vyʼápe, ojogueraha porã hag̃ua oñondivepa ha ohayhu hag̃ua Ijapoharépe. Upéva ohechauka avei oñemeʼẽha yvyporakuérape peteĩ priviléhio ijojahaʼỹva. Ñande jaikuaa porã ñande Apoharépe ha ikatu avei japorohayhu ha ñanderekojoja haʼéicha. (Elee Eclesiastés 12:13 ha Miqueas 6:8.)
Ñande Apohare katuete okumplíta hembipota ko yvýpe g̃uarã. Upévare ikatu jajerovia haʼe oipeʼapaitetaha umi inhustísia ha sufrimiénto, ha ojapotaha tekotevẽva guive yvyporakuéra oiko porã jey hag̃ua ko yvy ape ári. (Elee Salmo 37:11, 29 ha Isaías 55:11.)