¿Mávapa ojapo Ñandejárape?

Peteĩ túva heʼi itaʼýra orekóvape 7 áño: “Che raʼy, ¿ndépa reikuaa mávapa ojapo pe kuarahy, pe jasy, umi estrélla, ko yvy ha opa mbaʼe oĩva pype? Ñandejára hína upe ojapo vaʼekue opa koʼã mbaʼe”. Pe mitã opyta opensa ha upéi oporandu itúvape: “Papa... ¿ha máva ojapo Ñandejárape?”.

Itúva heʼi chupe: “Ñandejára siémprente voi oexistíva, avave ndojapói chupe”. Ko rrespuésta okonvensete voi pe mitãme. Péro okakuaávo ohóvo osegi gueteri oñeporandu mávapa ojapo Ñandejárape. Ndaikatúi ontende Ñandejára ndorekoiha ijapohare, ha opensa oĩmante vaʼerã peteĩ okreáva chupe. Ko univérso jepe oreko ijapohare, ha upévare osegi oñeporandu: “¿Moõguipa oiméne ou Ñandejára?”.

¿Mbaʼépa heʼi la Biblia? Pe túva ningo heʼi itaʼýrape avave ndojapoiha Ñandejárape, ha la Biblia omboʼe avei upeichaha. Por ehémplo, Moisés heʼi vaʼekue: ‘Ore Jára, umi sérro opuʼã mboyve, ko yvy ojejapo mboyve, ymaite guive opa ára g̃uarã nde hína Ñandejára’ (Salmo 90:1, 2). Ha proféta Isaías heʼi avei: ‘¿Ndereikuaáingaʼu piko térã nerehendúi? Jehová, upe ojapo vaʼekue opa mbaʼe oĩva ko yvy ape ári, haʼe Ñandejára opa ára g̃uarã’ (Isaías 40:28, NM). Upéicha avei Judas heʼi Ñandejára oexistiha “opa ára g̃uarã” (Judas 25).

Koʼã versíkulo ohechauka Ñandejára haʼeha hína “Rréi opa ára g̃uarã” (1 Timoteo 1:17). Jaʼe porãsérõ g̃uarã haʼe siémpre oexisti, opa mbaʼe mboyve haʼe ja oĩma vaʼekue voi ha siémpre oexistíta (Apocalipsis 1:8). Ñandejárape ningo avave ndojapói, ha upéva odiferensia chupe oimeraẽvagui.

Péro, ¿mbaʼérepa ijetuʼuete ñantende ko mbaʼe? Ñande rekove ningo mbyky, upévare idiferénte ñamedi lája umi tiémpo Jehovágui. Por ehémplo, chupe g̃uarã mil áño haʼete un díante, pórke haʼe siémprente voi oexistíva (2 Pedro 3:8). Epensamína ko mbaʼére, peteĩ tuku ningo oiko 50 díarupinte, ¿ikatúnepa upéicharõ ontende mbaʼépa heʼise oikove 70 térã 80 áño, ñande jaikoháicha? Ijetuʼu lénto, ¿ajépa? La Biblia heʼi ñande haʼeteha tuku ñañekomparáramo ñande Apoharére. Ñande kapasida nomeʼẽi ñanearandu hag̃ua Ñandejáraicha (Isaías 40:22; 55:8, 9). Upévare oĩ heta mbaʼe ndaikatumoʼãiva voínte jaikuaapa Ñandejáragui.

Ñantende porã hag̃ua mbaʼérepa jaʼekuaa Ñandejára siémprente voi oexistiha, ikatu ñapensa ko mbaʼére: oiméramo oĩ añete peteĩ persóna okrea vaʼekue Ñandejárape, upévata hína ñande Apohare. Péro la Biblia heʼi Jehová haʼeha upe ojapo vaʼekue “opa mbaʼe” (Apocalipsis 4:11). Avei ñande jaikuaa ymave ndoexistíri hague ko univérso, upévare oĩmante vaʼerã peteĩ Kreadór ojapopáva umi mbaʼe (Génesis 1:1, 2). Ha avei oĩmante vaʼerã peteĩ persóna iñaranduvéva Jesús ha umi ánhel ipoderosoitévagui okrea hag̃ua chupekuéra (Job 38:4, 7; Colosenses 1:15). Jahechakuaa upéicharõ Ñandejára oĩ hague haʼeño oñepyrũ mboyve okrea opa mbaʼe. Ndaikatúi avave okrea chupe, pórke haʼe mboyve ndoexistíri vaʼekue mbaʼeve ni avave.

Ñandejára siémprente voi oexistíva, upéicha rupieténte oexisti ko univérso ha ñande ikatu jaikove ko yvy ape ári. Haʼe oreko pe podér omomýiva hekopete umi estrélla ha galaxiakuérape ymaite guivéma, ha upéva opermiti ojeiko ko yvy ape ári. Upévare ikatu ñaime segúro siémprente voi oexisti hague Ñandejára (Job 33:4).