Rotopa pe “pérla iporãitereíva”

Winston, emombeʼumína oréve mbaʼéichapa eñepyrũ kuri eheka Ñandejárape.

Akakuaa vaʼekue peteĩ família ndairrelihiósoivape peteĩ gránha oĩva Queénslandpe (Australia). Ore ningo haimete naorevesínoi voi, upévare che rogayguakuérarente ajeheʼa vaʼekue. Péro arekórõ guare 12 áño añepyrũ aheka Ñandejárape. Añemboʼe chupe ha ajerure ojekuaaukamínte hag̃ua chéve. Tiémpo rire aheja pe gránha ha aha ambaʼapo Adeláidape, opytáva sur gotyo Austráliape. Areko vaʼekue 21 áño aikuaárõ guare Pamélape, upérõ aha kuri de vakasión Sýdneype. Haʼe oñeʼẽ chéve pe israelismo británicore, umíva hína peteĩ grúpo rrelihióso heʼíva umi británico antepasádo haʼeha umi trívu de Israel ndojekuaavéivagui mbaʼeve. Ko grúpo opensa koʼã trívu haʼeha umi 10 trívu oĩ vaʼekue pe rréino del nórtepe ha ojegueraha vaʼekuépe hetãgui síglo 8-pe Jesús ou mboyve. Aha jey rire Adeláidape, amombeʼu koʼã mbaʼe peteĩ che kompañéro de traváhope. Haʼe oñepyrũ kuri ostudia umi testígo de Jehovándi. Unas kuánta oramínte añemongeta hendive, prinsipálmente umi mbaʼe oroviávagui Testigokuéra, péro añemeʼẽ enkuénta oñerrespondeha chéve pe ñemboʼe ajapo vaʼekue chemichĩme. Upérõ aaprendéma hína kuri pe añetegua oñeʼẽva che Apoharére ha Irréinore. Añetehápe ajuhu sapyʼa pe “pérla iporãitereíva” (Mat. 13:45, 46).

Pamela, nde avei nemitã reheve eñepyrũ vaʼekue eheka pe pérla iporãitereíva. ¿Mbaʼéichapa rejuhu rakaʼe?

Che família ningo irrelihióso vaʼekue. Roiko kuri pe siuda héravape Coffs Harbour (Nueva Gales del Sur). Che tuakuéra ha che avuelokuéra oguerovia vaʼekue umi enseñánsa omboʼéva pe grúpo hérava israelismo británico. Che, che ermáno imitãvéva, che ermána majór ha heta che primokuéra roaprende vaʼekue Ñandejára oguerohoryveha umi orekóvape iñantepasádo británico. Upéicharõ jepe nachekonvensepái umi enseñánsa, ha añandu ofaltaha chéve álgo añemoag̃uive hag̃ua Ñandejárare. Arekórõ guare 14 áño, aha heta iglésia oĩvape pe lugár aikohápe. Por ehémplo, avisita Iglésia Anglikána, Bautísta ha pe Adventísta del Séptimo Día. Péro lomímonte ndatopái la ahekáva.

Che hentekuéra ova Sýdneype, péicha rupi ikatu kuri akonose Wínstonpe haʼe ohórõ guare de vakasión upépe. Winston omensionáma haguéicha, roñemongeta rire rrelihiónre oñepyrũ ostudia la Biblia Testigokuérandi. Upéi, umi kárta orukávape chéve omoĩ heta téxto bíblico. Ñepyrũrã chepyʼapy kuri umíva, ha sapyʼánte chembopochy voi, péro mbeguekatúpe ahechakuaa atopa hague pe añetegua.

Ava kuri Adeláidape 1962-pe ikatu hag̃uáicha aĩ ag̃uive Wínstongui. Haʼe ojapo arréglo apyta hag̃ua aiko peteĩ matrimónio de Testígo ndive. Umi ermáno héra Thomas ha Janice Sloman, ha oservi vaʼekue hikuái kómo misionéro Papúa Nueva Guinéape. Haʼekuéra ningo imbaʼeporãiterei kuri chendive. Upérõ che areko kuri 18 áñonte, ha haʼekuéra chepytyvõ añemoag̃uive hag̃ua Jehováre. Añepyrũ astudia la Biblia ha ensegidamínte ahechakuaa ajuhúma hague pe añetegua. Winston ha che romenda rire, roiko vyʼápe Jehová servísiope ha rohasa heta mbaʼe porã. Péro rombohovái avei umi mbaʼe ijetuʼúva, upéicharõ jepe umíva ndaorejokói, romombaʼeve guei pe pérla iporãitereíva rojuhu vaʼekue.

Winston, emombeʼumína mbaʼéichapa vaʼekue reñepyrũrõ guare reservi Jehovápe.

Amenda riremi, Jehová lomímo ke oavríva oréve pe primer “okẽ tuichaitereíva” rombaʼapove hag̃ua iservísiope (1 Cor. 16:9). Jaʼe porãsérõ g̃uarã, ermáno Jack Porter la ohechaukáva oréve upe okẽ. Haʼe oservi kuri kómo superintendénte de sirkuíto ha ovisitámi pe kongregasión michĩva roservihápe (koʼág̃a che ha ermáno Jack roservi oñondive pe Komite de Sukursál oĩvape Australásiape). Jack ha hembireko Roslyn oremokyreʼỹ rojagarra hag̃ua ore prekursorádo rregulár, ha rojapo upéva 5 áñore. Upéi, arekórõ guare 29 áño, ojejerure oréve roservi hag̃ua sirkuítope umi ísla oĩvape Pacífico Súrpe. Koʼã ísla oĩ vaʼekue sukursál de Fiyi kárgope. Rovisita umi ísla hérava Kiribati, Nauru, Niue, Samoa, Samoa Norteamericana, Tokelau, Tonga, Tuvalu ha Vanuatu.

Upe tiémpope, heta persóna oikóva umi ísla opytávape mombyryve odeskonfia Testigokuéragui. Péicha rupi tekotevẽ vaʼekue roikokuaa ha roñatende rotrata lája chupekuéra (Mat. 10:16). Umi kongregasión rovisitáva ningo michĩ ha sapyʼánte ndaikatúi omeʼẽ oréve alohamiénto. Péicha jave roheka alohamiénto umi hénte pe puevlopegua rógape. Umi persóna siémpre iñamávle vaʼekue orendive.

Winston, ndéve ningo neinteresaiterei pe traváho de traduksión, ¿mbaʼéicha rupípa upéva?

Ymave ningo umi ermáno oikóva Tóngape, oĩva pe Polinésiape, oreko vaʼekue mbovymi tratádo ha follétonte idióma tongánope. Upévare oipuru hikuái pe lívro La verdad que lleva a vida eterna idióma ingléspe ostudia hag̃ua la Biblia umi héntendi. Upéi, oiko aja pe eskuéla de ansiáno oduráva 4 semána, mbohapy ansiáno oikuaa mimíva inglés otradusi upe lívro idióma tongánope. Pamela ombohasa pe informasión mákina de eskrivírpe ha romondo Sukursál de Estados Unídospe oñeimprimi hag̃ua. Pe traváho oñetermina kuri amo 8 semánaperupi. Pe traduksión ojejapóva ndahaʼéiramo jepe la osẽ porãitereíva, lomímonte oipytyvõ heta persóna oñeʼẽvape tongano oaprende hag̃ua pe añetegua. Che ha Pamela ndahaʼéi vaʼekue traduktór, péro roreko rire ko traváho ropyta roñeinteresave pe traduksiónre.

Pamela, emombeʼumína mbaʼépepa idiferénte vaʼekue ojeiko lája umi íslape ojeiko lájagui Austráliape.

Añetehápe idiferenteterei vaʼekue. Por ehémplo, oĩ lugár umi íslape hakueterei ha iñumedaitereihápe. Umírupi omumu la ñatiʼũ, oĩ anguja, diferénte kláse mbaʼasy ha sapyʼánte ofaltapa la ojeʼu vaʼerã. Péro káda día roime aja ore fálepe romaña pe mar rehe ha orejurujái ropytávo. Idióma samoánope oñehenói fale pe óga tradisionál itécho kapiʼi ha ndaiparéivape. Pyharekue ñasaindy porã jave katu rohecha umi palméra raʼanga, ha pe jasy raʼanga ojekuaa pe márpe. Koʼã moménto iporãitéva oremomýi rojepyʼamongeta ha roñemboʼe hag̃ua, péicha noropensavéima umi mbaʼe oremokangýtavare, síno umi mbaʼe oremokyreʼỹvare.

Rohayhueterei umi mitãme, isimpátiko ha ikuriosoiterei ningo hikuái ohecha jave umi extranhéro ipire morotĩvape. Por ehémplo, rovisitárõ guare pe ísla hérava Niue, peteĩ mitãʼi opoko Winston jyva raguére ha heʼi: “Chegusta la ne plúma”. Roñemeʼẽ enkuénta primera ves ohechaha peteĩ persóna ijyva rague hetáva, upévare ndoikuaái ni mbaʼéichapa ojeʼe upévape.

Ore pyʼa hoʼa yvýre rohechávo mbaʼeichaitépa imboriahu heta hénte oikóva umi íslape. Iporãiterei ningo umi lugár oikohápe hikuái, péro noñeñatendeporãi umi hénte salúre ha ijakáso la y hoʼu vaʼerã hikuái. Upéicharõ jepe, ñane ermanokuéra haʼete ku ndojepyʼapýiva umívare. Haʼekuéra ningo ojepokuaáma péicha oiko. Ovyʼa katu hikuái hiʼag̃ui rupi chuguikuéra ifamília, orekógui peteĩ lugár ikatuhápe oñembyaty oadora hag̃ua Jehovápe ha oreko haguére pe priviléhio omombaʼeguasúvo chupe. Iñehemplokuéra orepytyvõ rojesareko hag̃ua umi mbaʼe iñimportantevévare ha roiko hag̃ua sensillomínte.

Pamela, nde ningo sapyʼánte tekotevẽ kuri rekonsegi y ha reñekosina rejepokuaaʼỹháicha, ¿mbaʼéichapa reñemaneha vaʼekue umícha jave?

Heta mbaʼe areko aagradese hag̃ua papápe, haʼe ningo chemboʼe heta mbaʼe ideprovéchova. Por ehémplo, chemboʼe ambojepotakuaa hag̃ua tata ha añekosinakuaa hag̃ua, avei mbaʼéichapa ikatu añemaneha kon lo hústo. Peteĩ visíta rojapo vaʼekuépe Kiribátipe, ropyta peteĩ óga itécho kapiʼívape, ipisorã ojejapo korál pedasokuégui ha ipare katu takuáragui. Akosina hag̃ua peteĩ tembiʼu sensillomi, ajoʼo pe yvy ha aipuru umi fívra oĩva umi kóko apére ambojepota hag̃ua tata. Aru hag̃ua y katu aha aforma fíla umi ótro kuñanguéra ndive. Onohẽ hag̃ua la y oipuru hikuái peteĩ yvyra ipukúva 2 métrorupi ha omosã hese peteĩ láta. La ipínta haʼete voi umi pinda ojepurúva peskádape, péro oñemosã rangue hese peteĩ pinda, oñemosã hese peteĩ láta oñenohẽ hag̃ua y. Og̃uahẽvo itúrno, káda kuña opoi la iláta ha omonguʼe pyaʼe la ipo ha ijyvyra omoñeno hag̃ua pe láta ha sapyʼaitépe henyhẽma pype la y. Haʼetévaicha la ifasiletereíva, péro og̃uahẽvo che túrno apoi la che láta ha nosẽmoʼãi voi chéve, káda ke apoi opyta ovevýi la che láta ha ndoikéi pype la y. Ojepukapaite cherehe, péro upéi peteĩva ijapyteguikuéra ojeofrese chemboʼe hag̃ua. Umi hénte oikóva umi íslape ningo siémpre iñamávle ha orepytyvõmi vaʼekue.

Mokõivénte ningo heta pevyʼa kuri pene asignasiónpe umi íslape, pemombeʼumína peteĩ experiénsia porã pehasa vaʼekue.

Winston: Un tiémpo rire ae ningo rontende heta kostúmbre. Por ehémplo, umi ermáno oremongaru jave omeʼẽ jepi oréve la orekomíva guive. Ñepyrũrã ndoropillái kuri romohemby vaʼerãha avei chupekuéra la hoʼu vaʼerã. Upéicha rupi roʼupaitémi la omeʼẽva oréve hikuái. Péro ropilla rire la oikóva, romohembýma chupekuéra g̃uarã avei. Rojavýramo jepe, umi ermáno orentende ha ndaipochýi. Haʼekuéra ningo ovyʼaiterei roho haguére rovisita chupekuéra káda 6 méserupi pe sirkuítope. Upe tiémpope ore añoite la Testígo ótro ladogua oikuaáva hikuái.

Umi visíta rojapóva umi lugárpe oipytyvõ vaʼekue oñeñeʼẽ porã hag̃ua Testigokuérare. Por ehémplo, heta hénte opensa vaʼekue umi ermáno oinventánte hague la irrelihionrã. Péro ohechávo hikuái peteĩ minístro kristiánope ha hembireko ovisitaha ermanokuérape ambue tetãgui, ontende hikuái pe rrelihión oĩha avei ótro hendárupi ha omombaʼeterei hikuái upéva.

Pamela: Ndacheresaraimoʼãi voi la oiko vaʼekuégui Kiribátipe, oĩháme peteĩ kongregasión michĩmíva. Upépe peteĩnte oĩ vaʼekue la ansiáno, ha upe ermáno héra Itinikai Matera. Haʼe ojapo la ikatúva entéro oñatende porã hag̃ua orerehe. Peteĩ díape oho ore rendápe peteĩ kanásto reheve, ha pype oĩ peteĩ ryguasu rupiʼa. Haʼe heʼi: “Kóva penembaʼerã”. Umi ryguasu rupiʼa ningo upe tiémpo ndoroʼumeméi vaʼekue. Pe ermáno ipojeraitereígui omeʼẽ oréve la orekomíva. Añetehápe opokoiterei vaʼekue orerehe upéva.

Pamela, tiémpo riremi epyta kuri nderyeguasu péro upéi eju eperde upe mitã. ¿Mbaʼépa nepytyvõ regueropuʼaka hag̃ua upe situasión ijetuʼuetéva?

Aju cheryeguasu 1973-pe, roimérõ guare Pacífico Súrpe, upémarõ roho jey Austráliape. Péro 4 mése rire aperde la che memby. Winston opyta vaieterei avei, pórke eñeimahinamíntena, pe mitã ningo imbaʼe kuri avei. Kon el tiémpo menomie hasy chéve upe oiko vaʼekue, péro añetehápe chekonsola kuri pe rrevísta Ñemañaha 15 de abril de 2009. Pype oĩ pe artíkulo “Oñeporandúva jepi”, ha la itéma kuri: “Peteĩ mitã omanóramo isy retepýpe, oikove jeýnepa Ñandejára múndo pyahúpe?”. Pe informasión heʼi upe situasión opytaha Jehová kárgope ha siémpre haʼe ojapoha hekopeguáva. Haʼe osolusionáta tahaʼe haʼéva mbaʼe vai ko múndo aña ojapo vaʼekue, upévarema voi onkarga Itaʼýrape “ohundi hag̃ua pe Aña rembiapokue” (1 Juan 3:8). Pe artíkulo orepytyvõ rosegi hag̃ua romombaʼe pe “pérla iporãitereíva” rorekóva haʼe haguére Jehová siérvo. Mbaʼémbo oiko vaʼerãmoʼã orehegui ndororekóirire pe esperánsa ojehupytýtava pe Rréino rupive.

Aperde rire che memby, roho jey roservi de tiémpo kompléto. Unos kuánto mése roĩ kuri Betel de Austráliape ha upéi roservi jey pe sirkuítope. Áño 1981-pe, roservi rire 4 áño kampañaháre Nueva Gales del Sur ha Sýdneype, roñeinvita roservi hag̃ua sukursál de Austráliape (koʼág̃a hérava sukursál de Australasia), ha koʼag̃aite peve roservi gueteri upépe.

Winston, ¿nepytyvõpa umi mbaʼe rehasáva umi ísla del Pacífico Súrpe reservi hag̃ua kómo miémbro pe Komite de Sukursál de Australásiape?

Añetehápe chepytyvõiterei. Ñepyrũrã Australia oñatende kuri pe aktivida ojejapóvare Samoa ha Samoa Norteamericánape. Upéi, pe sukursál de Nueva Zelanda oñeuni pe sukursál oĩvare Austráliape. Koʼág̃a, pe sukursál de Australasia oñatende Australia rehe, Islas Cook, Niue, Nueva Zelanda, Samoa, Samoa Norteamericana, Timor Oriental, Tokelau ha Tonga rehe. Jehová omeʼẽ chéve pe oportunida avisita hag̃ua unos kuánto koʼã lugár aservi tiémpope kómo rrepresentánte de sukursál. Umi mbaʼe aaprendéva ikatu haguére aservi umi íslape che ermanokuéra ifieletévandi, chepytyvõiterei ambaʼapo hag̃ua hendivekuéra Betel guive.

Amohuʼã hag̃ua, haʼesénte che ha Pamela rohechakuaaha de ke ndahaʼeiha umi okakuaapávante la ohekáva Ñandejárape, síno umi imitãva avei ojuhuse pe “pérla iporãitereíva”. Haʼekuéra ikatu hína oheka pe añetegua, ihentekuéra noñeinteresáiramo jepe (2 Rey. 5:2, 3; 2 Crón. 34:1-3). Añetehápe Jehová ñanderayhueterei, upéicha rupi oipota enterovéva ojesalva, tahaʼe umi imitãva térã ijedáva.

Ojapóma mas de 50 áño che ha Pamela roñepyrũ hague roheka Ñandejárape. Ha ni noroimoʼãi moõite pevépa oremog̃uahẽta kuri la ore vúskeda. Añetehápe, pe añetegua oñeʼẽva Ñandejára Rréinore haʼe hína pe pérla iporãitereíva. Upévare roĩ desidído rojapotaha ikatúva guive rokuida porã hag̃ua ko pérla ijojahaʼỹvare.