Areko enkuénta Jehovápe opa mbaʼe adesidívape

Che anase vaʼekue Líbanope el 19 de mayo de 1940, peteĩ siuda héravape Amiún. Unos kuánto áño upe rire rova pe siuda héravape Trípoli. Ore famíliape ningo enterove rojoayhu ha rovyʼa, avei roikuaa Jehovápe ha rohayhu chupe. Ore roime vaʼekue éntre 5 ermáno, mbohapy kuña ha mokõi kuimbaʼe, ha che haʼe vaʼekue la ipahague. Che tuakuérape g̃uarã la iñimportantevéva ndahaʼéi vaʼekue ogana pláta, síno rostudia la Biblia, roho rreunionhápe ha roipytyvõ umi héntepe oikuaa hag̃ua Ñandejárape.

Ore kongregasiónpe oĩ vaʼekue heta ermáno unhído. Peteĩva haʼe vaʼekue ermáno Michel Aboud, ha haʼe okondusi vaʼekue pe estúdio de lívro, ojekuaa haguéicha upe tiémpope. Haʼe oikuaa vaʼekue la verda Nueva Yórkpe ha omoñepyrũ la predikasión Líbanope áño 1921-pe. Ore kongregasiónpe ou oservi mokõi ermána imitãva oho vaʼekue Eskuéla de Galaádpe, Anne ha Gwen Beavor. Chemanduʼa porã mbaʼéichapa ermáno Michel orrespeta ha oipytyvõ vaʼekue koʼã ermánape. Haʼekuéra ningo ore amigaite vaʼekue. Heta áño haguépe avyʼaiterei ajotopárõ guare Anne ndive Estados Unídospe. Tiémpo rire ajotopa avei Gwen ndive, upérõ haʼe omendáma kuri, ha iména Wilfred Gooch ndive oservi hikuái Betel de Londres, Inglatérrape.

ROPREDIKAHA TIÉMPOPE LÍBANOPE

Líbanope ndahetái vaʼekue la Testígo che chemitãʼírõ guare. Péro ore kyreʼỹme romombeʼu vaʼekue umi héntepe umi mbaʼe roikuaáva la Bíbliagui. Ha rojapo upéva umi paʼi oñemoĩramo jepe orerehe. Koʼag̃aite peve chemanduʼa gueteri unas kuánta kósa oiko vaʼekue orerehe.

Peteĩ díape che ha che ermána Sana ropredika hína kuri peteĩ edifísio de apartaméntope. Ha peichahágui peteĩ paʼi og̃uahẽ pe píso ore ropredikahápe. Oiméne umi oikóva pe edifísiope ohenói raʼe chupe. Pe paʼi oñepyrũ iñeʼẽ arhél che ermánape, upéi ivioléntoma ha omyaña chupe pe eskalérape. Sana hoʼa ha oñelastima. Upe aja oĩ raʼe ohenóiva polisíape, ha haʼekuéra og̃uahẽvo iñamávle orendive ha ohecha oñeñatende hag̃ua che ermánare. Upéi umi polisía oraha pe paʼípe komisaríape, ha upépe opilla hikuái haʼe oreko hague peteĩ árma. Upémarõ pe komisário oporandu chupe: “¿Nde piko upéicharõ mbaʼe hína? ¿Nde piko emoakã peteĩ iglésia, térã emoakã umi patotérope?”.

Ótra vuéltape chemanduʼa porãiterei rojapo hague peteĩ viáhe ropredika hag̃ua. Ore kongregasión oalkila peteĩ kolektívo roho hag̃ua peteĩ siuda opytávape mombyry. Ore rovyʼa ha rohasa porã hína kuri. Péro upéi pe paʼi oikuaa ore ropredikaha upépe ha ombyaty heta héntepe oreataka hag̃ua. Umi hénte ningo oñepyrũ voi orejapi itápe, ha oñakãjoka hikuái che túape. Chemanduʼa mbaʼéichapa pe tuguy osyry che túa rováre. Haʼe ha che sy oho jey pe kolektívope ha upéi enterove apúrope rohopaite hapykuerikuéra. Upe rire oiko peteĩ mbaʼe núnka ndacheresaraimoʼãiva. Che sy omopotĩ aja pe tuguy osyrýva che túa rováre, heʼi: “Jehová eperdonána chupekuéra, haʼekuéra ningo ndoikuaái la ojapóva”.

Avei chemanduʼa rohórõ guare ore vállepe rovisita hag̃ua ore hentekuérape. Rog̃uahẽrõ guare che avuélo rógape, upépe oĩ hína kuri peteĩ paʼi omanda guasúva. Pe paʼi oikuaa che tuakuéra Testigoha, ha upérõ arekóramo jepe 6 áñonte pe paʼi oporandu chéve: “¿Ha ndéiko mbaʼére nderejevautisái gueteri?”. Che haʼe chupe chemitãitereiha gueteri, ha ikatu hag̃uáicha ajevautisa aikuaa vaʼerãha hetave mbaʼe la Bíbliagui ha ajerovia mbarete vaʼerãha. Péro pe paʼípe ndogustái la che rrespuésta ha heʼi voi che avuélope chemaledukadoha.

Péro añetehápe saʼi la experiénsia vai roreko kuri. La majoría umi oikóva Líbanope ningo iñamávle ha orerresivi porã. Upéicha rupi pyʼỹinte roñemongeta porã vaʼekue umi héntendi ha roreko voi heta estúdio bíblico.

RODESIDI ROVATAHA ÓTRO PAÍSPE

Che aiméitirõ guare eskuélape peteĩ ermáno imitãva Venezuelagua ovisita ore país. Haʼe oho rreunionhápe ore kongregasiónpe, ha upéi oñepyrũ ojokuaa porãve che ermána Wáfandi. Tiémpo rire omenda hikuái ha oho oiko Venezuélape. Péro Wafa orerechagaʼueterei, upévare ikartakuérape oñehaʼã okonvense papápe rova hag̃ua la família kompletoite voi Venezuélape. Amo ipahápe haʼe okonsegi la oipota vaʼekue ha rova upépe.

Ore rog̃uahẽ Venezuélape 1953-pe, ha ropyta roiko Carácaspe, pe presidénte róga ypýpe. Upérõ che chemitãʼi gueteri ha igustoiterei chéve ahecha pe presidéntepe ohasa jave hiʼáuto porãitépe ichofér ndive. Péro che tuakuérape ijetuʼu kuri ojadapta hag̃ua, pórke entéro mbaʼénte voi ipyahu chupekuéra g̃uarã: Pe país, pe idióma, pe kultúra, umi tembiʼu ha pe klíma. Ha oñepyrũ javete ojepokuaa hikuái koʼã mbaʼére, oiko peteĩ mbaʼe ivaietereíva.

OIKO PETEĨ MBAʼE ROMBYASYETEREÍVA

Derrepentete che túa ou hasyete ha upéva irraroiterei kuri oréve, pórke haʼe siémpre imbarete ha hesãiva. Ni naoremanduʼái voi haʼe hasy hague. Upéi ojepilla orekoha kánser de pánkrea ha upévare ojoperámante. Péro rombyasyeterei ningo, pórke che túa omano una semána upe rire.

Ijetuʼueterei ningo amombeʼu hag̃ua mbaʼeichaitépa orereja vai upéva. Che ningo areko vaʼekue 13 áñonte. Ore norohaʼarõiete voi papa omanotaha, ha ropensa núnka ndorovyʼamoʼãveimaha. Peteĩ tiémpore mamáme ijetuʼu kuri oasepta hag̃ua iména noĩveimaha ijykére. Péro rohechakuaa ore rekove okontinua vaʼerãha, ha Jehová orepytyvõ rupi ikatu kuri rogueropuʼaka upe situasión ijetuʼuetéva. Arekórõ guare 16 áño atermina che koléhio Carácaspe, ha upéi ambaʼaposetereíma kuri aipytyvõ hag̃ua che famíliape roñemantene hag̃ua.

Upe tiémpope che ermána Sana omenda Rubén Araújore, peteĩ ermáno venezolano oho vaʼekue Eskuéla de Galaádpe ha upéi ou jeýva oservi Venezuélape. Ha omenda rire hikuái oho oiko Nueva Yórkpe. Che família odesidi aha vaʼerãha universidápe, upémarõ aha aiko che ermána ha che rovajándi Nueva Yórkpe astudia hag̃ua upépe. Haʼekuéra heta chepytyvõ añemoag̃uive hag̃ua Jehováre aiko aja hendivekuéra. Avei ore kongregasión Brooklyn Españólpe oĩ vaʼekue heta ermáno ijerovia mbaretéva. Umíva apytépe aikuaa ha ahayhueterei vaʼekue ermáno Milton Henschel ha Frederick Fránzpe. Haʼekuéra oservi vaʼekue Betel de Broóklynpe.

Amohuʼãvo ahávo pe primer áño de universida Nueva Yórkpe, añemoĩ apensa mbaʼépa añetehápe ajapo hína che rekovégui. Che alee kuri unos kuánto artíkulo osẽva rrevísta Ñemañaháme, oñeʼẽva umi mbaʼe porã ikatúvare ojehupyty Jehová servísiope, ha apyta vaʼekue apensa meme umívare. Ahecha mbaʼeichaitépa ovyʼa umi prekursór ha betelita oĩva ore kongregasiónpe, ha che avyʼase avei haʼekuéraicha. Péro upérõ che ni ndajevautisái gueteri. Ndohasái heta tiémpo ahechakuaa hag̃ua iñimportanteha añemeʼẽ Jehovápe. Upémarõ ajapo upéva ha upe rire ajevautisa el 30 de marzo de 1957.

ADESIDI HETA MBAʼE IÑIMPORTÁNTEVA

Ajevautisa rire añemoĩ apensa ikatútapa ajapo ótra kósa iñimportantetereíva: Añepyrũ che prekursorádo. Che ajaposetereíma upéva, péro ahechakuaa ijetuʼutaha chéve. Ndaikuaái kuri ikatútapa ajapo che prekursorádo ha aha avei universidápe. Che família ha che roskrivi ojupe heta kárta roñeʼẽ hag̃ua upe ajaposévare. Ha amombeʼu chupekuéra adesidi hague ahejatanteha pe universida, ha ahase jeyha Venezuélape añepyrũ hag̃ua che prekursorádo.

Junio de 1957-pe aju jey Carácaspe péro ahechakuaa naiporãieteha la ore família situasión, pórke ifáltama la pláta ha oñekotevẽve kuri peteĩ ombaʼapo vaʼerãre. Ha apensa mbaʼépa ikatu ajapo aipytyvõmi hag̃ua chupekuéra. Ojeofrese chéve traváho peteĩ vánkope, péro ajaposeterei avei che prekursorádo, pórke amo ipahápe upearã voi che aju jey vaʼekue Venezuélape. Upémarõ adesidi ajapotaha mokõivéva. Heta áñore ambaʼapo de tiémpo kompléto pe vánkope ha aservi avei de prekursór. Upe tiémpope hetaiterei cherembiapo vaʼekue, péro núnka ndavyʼáiva la peichaite peve.

Ha avyʼave hag̃ua aikuaa Sýlviape, peteĩ ermána alemana ova vaʼekue Venezuélape ituakuérandi. Haʼe ningo iporãiterei ha ohayhueterei Jehovápe. Ore romenda ha tiémpo rire mokõi orefamília, peteĩ mitãʼi rombohérava Michel (Mike), ha pe mitãkuñaʼi katu Samira. Upe tiémpope mama avei ova orendive ikatu hag̃uáicha añangareko hese. Areko rupi heta rresponsavilida che rogapýpe ahejámante la che prekursorádo, péro siémpre añehaʼã chekyreʼỹ umi prekursórcha. Sylvia ha che siémpre roñehaʼã rojapo ore prekursorádo auxiliár ija vove oréve vakasión aja.

ÓTRA DESISIÓN IÑIMPORTANTETEREÍVA

Umi mitã oĩ gueteri eskuélape oikórõ guare cherehe upe amombeʼu vaʼekue oñepyrũvo ko artíkulo. Arrekonose vaʼerã aiko porã ha areko hague heta komodida. Avei umi hénte ombaʼapóva umi vánkope cherrespeta vaʼekue. Péro che aipota haʼekuéra chekuaa aservi haguére Jehovápe, ha asegi apensa mbaʼépa tekotevẽ ajapo umi hénte cherecha hag̃ua upéicha. Upévare che ha che rembireko roguapy roñemongeta ore presupuéstore. Ahejáramo la che traváho pe vánkope oñemeʼẽta kuri chéve heta porã pláta, ha ndorodevéi rupi moõve, ropensa roiko sensillovénteramo ikatutaha roñemantene porã heta tiémpore.

Ijetuʼu kuri añete rodesidi hag̃ua upéva, péro che rembireko ahayhuetéva ha che sy cheapoja porãiterei. Péicha ikatu jeýtama oiko chehegui prekursór, ha upéva chembovyʼaiterei vaʼekue. Ndaiporivéima kuri mbaʼeve chejokóva. Péro upe riremínte rorresivi peteĩ sorprésa.

PETEĨ SORPRÉSA IPORÃITEREÍVA

Peteĩ día ore doktór heʼi oréve Sylvia hyeguasuha. Upéva añetehápe norohaʼarõiete kuri. Rovyʼaiterei ningo, péro avei ou che akãme adesidi hague ajapotaha che prekursorádo, ha añeporandu ikatútapa gueteri ajapo upéva. Péro ensegidaiténtema voi roñementalisa ha rohaʼarõitereíma onase la veve pyahu. Upéicharõ jepe asegi gueteri añeporandu ikatútapa ajapo upe roplanea vaʼekue.

Roñeʼẽ rire umi mbaʼe rohupytysévare rodesidi rojapotanteha umi mbaʼe roplanea vaʼekue. Gabriel onase abril de 1985-pe. Upéicharõ jepe, aheja che traváho pe vánkope ha añepyrũ jey che prekursorádo rregulár junio de 1985-pe. Tiémpo rire oñemeʼẽ chéve la priviléhio ambaʼapo hag̃ua pe komite de sukursálpe. Péro pe sukursál opyta kuri 80 kilómetrorupi Carácasgui, upévare ajapómante vaʼerã upe viáhe 2 térã 3 vése a la semána.

ROVA JEY ÓTRO LUGÁRPE

Pe sukursál ningo oĩ La Victóriape, upévare rodesidi rovataha Carácasgui roiko ag̃uive hag̃ua Betélgui. Upéva ningo peteĩ kámbio tuichaitereíva oréve g̃uarã, ha amombaʼeterei che famíliape ha aagradeseterei chupekuéra, pórke haʼekuéra siémpre cheapoja ha upéva tuichaiterei chepytyvõ. Che ermána hérava Baha heʼi ikatutaha oñangareko ore sýre, Mike omendáma kuri, péro Samira ha Gabriel oiko gueteri orendive. Upévare rovárõ guare La Victóriape ohejámante vaʼerã hikuái iñamigokuéra oĩva Carácaspe. Avei che rembireko Sylvia ahayhuetéva ojepokuaa vaʼekue oiko pe kapitálpe, péro koʼág̃a ojepokuaa vaʼerã oiko peteĩ siuda michĩvape. Ha enterovéva rojadaptámante vaʼerã roiko hag̃ua peteĩ óga michĩvévape. Añetehápe heta mbaʼe okambia vaʼekue rovárõ guare La Victóriape.

Péro upéi okambia jey kuri unas kuánta kósa. Gabriel omenda ha Samira ova ógagui. Upéi 2007-pe Sylvia ha che roñeinvita roho hag̃ua Betélpe, ha koʼág̃a peve roreko pe priviléhio. Mike, pe che raʼy ypykuégui oiko ansiáno ha oservi de prekursór hembireko Mónicandi. Gabriel haʼe avei ansiáno ha oiko Itáliape hembireko Ambra ndive. Samira katu oservi de prekursóra ha ombaʼapo Betélpe g̃uarã pe oikoha guive.

AVYʼA UMI MBAʼE ADESIDI VAʼEKUÉRE

Che rekovépe ningo adesidíma heta mbaʼe iñimportánteva. Péro ni michĩmi nambyasýi umíva. Arekóramo la oportunida, adesidi jeýne la mísma kósa. Amombaʼeterei ningo entéro umi asignasión areko vaʼekue Jehová servísiope. Umi áño ohasa vaʼekuépe ahechakuaa mbaʼeichaite pevépa iñimportánte siémpre jareko peteĩ amista imbaretéva Jehovándi. Entéro mbaʼe jadesidívape, tahaʼe tuicháva térã michĩvape, haʼe ikatu omeʼẽ ñandéve pe “pyʼaguapy tuichavéva entéro mbaʼe yvyporakuéra ikatúvagui ontende”, heʼiháicha Filipenses 4:6 ha 7. Sylvia ha che rovyʼa roservi haguére Jehovápe Betélpe, ha roñandu haʼe orevendesi hague pórke siémpre roreko chupe enkuénta entéro mbaʼe rodesidívape.