Ikatu ñandepyʼaguapy jahasa jave umi situasión ijetuʼúva

1. ¿Mbaʼépa hína pe pyʼaguapy oúva Ñandejáragui, ha mbaʼéichapa ñanepytyvõ upéva? (Filipenses 4:6, 7).

KO MÚNDO ningo ndoikuaái pe pyʼaguapy oúva Ñandejáragui. Umi orekóva ko pyʼaguapy oiko trankílo ha oñeñandu segúro, pórke oreko peteĩ amista iporãva Ñandejárandi (elee Filipenses 4:6, 7). Ñande ningo jareko umi amígo ohayhúva Jehovápe, ha Jehová voi haʼe hína ñane amígo, pe Dios ‘omeʼẽva pyʼaguapy’ (1 Tes. 5:23). Jaikuaavévo jahávo Jehovápe, ñakonfiavéta hese. Ha ñaneñeʼẽrendúramo chupe, jarekóta pe pyʼaguapy oúva chugui. Péva pe pyʼaguapy ñanetrankilisa, ha ndajajedesesperamoʼãi jahasa jave umi situasión ijetuʼúva.

2. ¿Mbaʼéichapa jaikuaa ikatuha jareko pe pyʼaguapy oúva Ñandejáragui?

² ¿Mbaʼéichapa ikatúne jareko pe pyʼaguapy oúva Ñandejáragui ijetuʼu jave la situasión? ¿Ikatúpa ñaime trankílo oĩramo peteĩ mbaʼasy pyaʼeterei okorréva, jahasa jave desástre naturál, la hénte oiko vaipáramo oñondive térã jajepersegi jave? Ñapensáramo koʼã situasiónre ningo ikatu ñanemondýi. Péro Jesús omeʼẽ vaʼekue ko konsého isegidorkuérape g̃uarã: “Ani pekyhyje ni pejepyʼapyeterei” (Juan 14:27). Heta ñane ermanokuéra ningo osegi ko konsého Jesús heʼi vaʼekue, ha Jehová oipytyvõ rupi chupekuéra, oĩ hikuái trankílo ohasa jave umi situasión ijetuʼúvare.

OĨ JAVE PETEĨ MBAʼASY PYAʼETEREI OKORRÉVA

3. ¿Mbaʼéichapa ikatu jaju nañandepyʼaguapyvéi oĩ jave peteĩ mbaʼasy pyaʼeterei okorréva?

³ Oĩ jave peteĩ mbaʼasy pyaʼeterei okorréva ningo ikatu okambiaite la ñande rekove. Ñapensamína mbaʼeichaitépa oafekta kuri pe COVID-19 hetaiterei héntepe. Peteĩ estúdio ohechauka alamita rasa voi umi oñeenkuesta vaʼekue ndokeporãvéi hague. Pe pandémia aja ningo oĩ kuri hetaiterei umi orekóva ansieda ha depresión, hoʼu rasáva vevída ha ojedrogáva, avei oĩ umi oñemaltratáva hogapýpe ha ojesuisidaséva. Upévare, oĩramo hetaiterei hasýva ñande jaikohápe, ¿mbaʼépa ikatu jajapo ani hag̃ua jajedesespera ha jareko hag̃ua pe pyʼaguapy oúva Ñandejáragui?

4. ¿Mbaʼérepa ñandepyʼaguapy jaikuaa haguére la Jesús heʼi vaʼekue oikotaha koʼã ára pahápe?

⁴ Jesús ningo oprofetisa vaʼekue koʼã ára pahápe oĩtaha “opaichagua mbaʼasy” (Luc. 21:11). ¿Mbaʼérepa ñandepyʼaguapy jaikuaa haguére upéva? Pórke jaikuaáma voi kuri oikotaha, ha upévare nañanesorprendéi. Jahechakuaa oñekumpliha Jesús heʼi hagueichaite. Haʼe heʼi vaʼekue voi: “Ani peñemondýi”, ha ñande ñañehaʼã hína jasegi upe konsého (Mat. 24:6).

5. a) Heʼiháicha Filipenses 4:8, 9, ¿mbaʼépa ikatu jajerure Jehovápe oĩramo peteĩ mbaʼasy pyaʼeterei okorréva? b) ¿Mbaʼéichapa ñanepytyvõ ñahendúramo umi gravasión de la Biblia?

⁵ Oĩramo peteĩ mbaʼasy pyaʼeterei okorréva, ikatu hína jakyhyje ndajaikuaáigui mbaʼépa ñaneraʼarõ. Upéva oiko vaʼekue Désire.b Chugui ningo omano vaʼekue itio, peteĩ iprímo ha idoktór pe COVID-19 káusare. Ha upévare haʼe opyta okyhyje hasýrõ g̃uarã ha oguerova avei isýre, ijedámava kuri. Avei okyhyje vaʼekue opytárõ g̃uarã travahoʼỹre ha nokonsegivéirõ g̃uarã pe pláta oikotevẽva oñemantene hag̃ua ha opaga hag̃ua ijalkilér. Opensaiterei rupi koʼã mbaʼe oipyʼapývare chupe, haʼe ndaikatuvéi vaʼekue ni oke. Péro upéi haʼe ipyʼaguapy jey. ¿Mbaʼéichapa ojapo upéva? Haʼe oñemboʼe Jehovápe ha espesífikamente ojerure chupe oñetrankilisa hag̃ua ha opensa hag̃ua umi mbaʼe ipositívovare (elee Filipenses 4:8, 9). Avei haʼe ohendu vaʼekue umi gravasión de la Biblia, ha péicha haʼete voi Jehová mbaʼe la oñeʼẽva chupe. Haʼe omombeʼu: “Umi oleéva ñeʼẽ ningo chetrankilisa vaʼekue, ha chepytyvõ anivéma hag̃ua añekevrantaiterei. Avei chemomanduʼa Jehová ojepyʼapyha cherehe” (Sal. 94:19).

6. ¿Mbaʼéichapa ikatu ñanepytyvõ pe estúdio personál ha umi rreunión?

⁶ Oĩramo peteĩ mbaʼasy pyaʼeterei okorréva ningo ndaikatúi jajapo heta mbaʼe. Péro ndajahejái vaʼerã ñandejoko jajapo hag̃ua ñande estúdio personál o jaha meme hag̃ua rreunionhápe. Ñane puvlikasionkuéra ha vidéope jatopa umi experiénsia ohechaukáva mbaʼéichapa ñane ermanokuéra ohasa avei peichagua situasión ha osegi ifiél Jehovápe (1 Ped. 5:9). Umi rreunión ningo ñanepytyvõ ñapensa meme hag̃ua umi mbaʼe porã heʼívare la Biblia, ha omeʼẽ avei ñandéve la oportunida ñañomokyreʼỹ hag̃ua (Rom. 1:11, 12). Ñanemanduʼa meméramo mbaʼéichapa Jehová siémpre oipytyvõ isiervokuérape hasykatu jave, okyhyje térã oñeñandu jave haʼeño, pe ñande jerovia katuete imbaretevéta ha ni michĩmi ndajadudamoʼãi ñanepytyvõtaha avei ñandéve.

7. ¿Mbaʼéichapa ikatu jasegi Juan ehémplo?

⁷ Ñandéko jajapo vaʼerã ikatúva guive jasegi hag̃ua ñañekomunika ñane ermanokuérandi. Oĩ jave peteĩ mbaʼasy pyaʼeterei okorréva ikatu ñandejoko ani hag̃ua ñakomparti hendivekuéra. Jajecháramo peichagua situasiónpe ikatu ñañeñandu apóstol Juan oñeñandu haguéicha. Haʼe ningo ohechase vaʼekue peteĩ iñamigoite héravape Gayo (3 Juan 13, 14). Péro haʼe heʼi vaʼekue peteĩ tiémpore ndaikatúi hague ojapo upéva. Upéicharamo jepe, haʼe ojapo ikatúva guive oñekomunika hag̃ua hendive, por ehémplo oenvia chupe peteĩ kárta. Ñande ndaikatúiramo jajotopa en persóna ñane ermanokuérandi, iporãta avei ñahenói mimíramo chupekuéra térã ñaenvia algún mensáhe chupekuéra. Jajapóramo upéva, ñanepytyvõta ani hag̃ua ñañeñandu ñaneañoiterei ha avei ñaime hag̃ua trankílo. Ha jahechakuaáramo jajepyʼapyetereiha, ¿mbaʼe ikatu jajapo? Ikatu ñañeʼẽ umi ansianokuérandi, ha haʼekuéra katuetei mborayhúpe ñanepytyvõta (Is. 32:1, 2).

OIKO JAVE PETEĨ DESÁSTRE

8. ¿Mbaʼéichapa ikatu eju nandepyʼaguapyvéi rehasa rupi peteĩ desástre?

⁸ Oiméramo nde rehasáma peteĩ inundasión, peteĩ terremóto o peteĩ inséndio, ikatu heta tiémpore epyta ejepyʼapy. Avei omanóramo ndehegui peteĩ rehayhúva o eperdepa umi mbaʼe erekóva, ikatu hasy asy ndéve upéva, nanembovyʼái, ha ndepochy voi epytávo. Péro upéva ndeʼiséi ndejerovia kangyha ni rehayhuetereiha umi kósa materiál. Añetehápe ehasa kuri peteĩ situasión ijetuʼuetereíva, ha normál la erreaksiona upéicha (Job 1:11). Péro tahaʼe haʼéva la situasión jahasáva lomímonte ikatu ñandepyʼaguapy. Jahechamína mbaʼéichapa ikatu jajapo upéva.

9. ¿Mbaʼéichapa Jesús heʼi vaʼekue ñanepytyvõ oikórõ g̃uarã umi desástre?

⁹ Heta persóna ningo opensa núnka ndohupytymoʼãiha chupe peteĩ desástre. Péro ñande siémpre ñanemanduʼa la Jesús heʼi vaʼekuére. Upévare jaikuaa amáske jaha hese hetavetaha umi desástre naturál, ha ikatuha ñandeafekta ñandéve avei. Jesús heʼi voi vaʼekue isegidorkuérape pe fin mboyve oikotaha umi “yvyryrýi tuicháva”, ha avei opaichagua desástre (Luc. 21:11). Haʼe oprofetisa vaʼekue avei hetavetaha umi hénte iñañáva. Ha upéva jahecha porãiterei, pórke amáske jaha heta hetave oĩ umi delinkuénte, umi ivioléntova ha umi atáke terrorísta (Mat. 24:12). Heta situasión ijetuʼúva ha desástre naturál ningo ohupyty avei Jehová siervokuéra ifiélvape. Péro Jesús ndeʼíri vaʼekue koʼã mbaʼe vai oikotaha Jehová ndojepyʼapýi rupi ñanderehe (Is. 57:1; 2 Cor. 11:25). Ikatu Jehová nañandeprotehéi hína peteĩ milágro rupive jahasa jave koʼãichagua situasión, péro si omeʼẽta ñandéve ñaikotevẽva guive ñandepyʼaguapy hag̃ua.

10. ¿Mbaʼéichapa jahechauka jajeroviaha Jehováre jajepreparáramo oiko mboyve peteĩ desástre? (Proverbios 22:3).

¹⁰ ¿Mbaʼépa ñanepytyvõta ñaime hag̃ua trankílo oúramo peteĩ desástre? Upearã iñimportánte jajeprepara porã ántema voi. ¿Péro heʼisépa upéva ndajajeroviaiha Jehová ñanepytyvõtaha? Nahániri. Jajeprepara jave oikóramo g̃uarã peteĩ desástre, jahechauka hína jajeroviaha Jehováre okuidataha ñanderehe. ¿Mbaʼérepa jaʼe upéva? Pórke la Bíbliape voi oĩ umi konsého ñanemokyreʼỹva jajeprepara hag̃ua oiko mboyve peteĩ desástre (elee Proverbios 22:3). Avei umi puvlikasión, ñane rreunionkuéra ha umi anúnsio rupive, Jehová organisasión ñanemomanduʼa jey jey jajeprepara hag̃ua oikórõ g̃uarã umi desástre naturál.c ¿Mbaʼépa jajapóta jajeroviáramo Jehováre? Koʼag̃aite jasegíta umi konsého oiko mboyve oimehaichagua desástre naturál.

11. ¿Mbaʼépa ñaaprende Margaret ehémplogui?

¹¹ Jahechamína la oiko vaʼekue peteĩ ermána héravare Margaret. Umi autorida heʼi kuri chupe osẽ hag̃ua hógagui, pórke okái peteĩ kaʼaguy oĩva ag̃ui upégui. Péro ndaikatúi ojeho pe rrúta prinsipálrupi oĩgui hetaiterei persóna osẽséva avei upégui. Tatatĩeterei rupi, Margaret opyta vaʼerã kuri hiʼáutope, péro haʼe ojesalva pórke ojeprepara porã kuri. Ikartérape oreko kuri peteĩ mápa ikatúva oipuru ojagarra hag̃ua ótra rrúta osẽ hag̃ua upégui. Ántema voi haʼe oho kuri upe rrútarupi ikatu hag̃uáicha osẽ upérupi oiko vove peteĩ desástre. Péicha ojeprepara porã rupi, haʼe ojesalva kuri upérõ.

12. ¿Mbaʼérepa jasegi vaʼerã umi instruksión oñemeʼẽva ñandéve oiko jave peteĩ emerhénsia?

¹² Avése ani hag̃ua jajapeligra o ani hag̃ua oiko sarambi, umi autorida heʼi jepi ñandéve japyta hag̃ua ñande rógape o ñasẽ hag̃ua pe lugár ñaimehágui. Algúna persóna ndojaposéi ko mbaʼe, pórke ndohejaséi hóga térã umi mbaʼe orekóva. ¿Péro mbaʼépa jajapo ñande kristianokuéra umi kásope? La Biblia heʼi: “Ñande Ruvicha rehehápe, peñemoĩkena entéro umi autorida yvyporakuéra omoĩva poguýpe, tahaʼe peteĩ rréi poguýpe, tuichave rupi pendehegui, térã umi governadór poguýpe” (1 Ped. 2:13, 14). Jehová organisasión ningo pyʼỹinte omeʼẽ avei ñandéve umi instruksión jajeprotehe hag̃ua oiko jave sarambi. Sapyʼánte avei ñanemomanduʼa jey ñameʼẽ vaʼerãha ñane número de teléfono o dáto de kontákto umi ansiánope, oñekomunika hag̃ua ñanendive oikórõ g̃uarã algúna emerhénsia. ¿Jajapómapa ñande upéva? Jehová organisasión ikatu avei omeʼẽ ñandéve umi instruksión jajeprotehe hag̃ua, jaheja peteĩ lugár, o ñakonsegi hag̃ua umi mbaʼe ñaikotevẽva oiko jave sarambi. Ha ikatu avei heʼi ñandéve arakaʼe ha mbaʼéichapa ikatu ñaipytyvõ ótrope oiko jave koʼã mbaʼe. Ñande nañaneñeʼẽrendúiramo koʼã instruksión oñemeʼẽvape, ikatu jajapeligra ñande voi ha avei umi ansianokuérape. Haʼekuéra ningo oñehaʼãmbaite hína ñandeprotehe hag̃ua (Heb. 13:17). Margaret heʼi voi: “Che aime segúra ajesalva hague asegi rupi umi instruksión omeʼẽ vaʼekue umi ansiáno ha pe organisasión”.

13. ¿Mbaʼépa ojapo umi ermáno osẽ vaʼekue pe lugár oikohágui ovyʼa ha ipyʼaguapy hag̃ua?

¹³ Oiko rupi sarambi, gérra o umi hénte oñorairõmba rupi oñondive, hetaiterei ermáno ova pe lugár oikohágui. Péro haʼekuéra ojapo ikatúva guive ojadapta hag̃ua upe situasión pyahúre, ha osegi hag̃ua oĩ aktívo Jehová servísiope. Okambiáramo jepe la isituasionkuéra ha koʼág̃a oiko peteĩ lugár pyahúpe, haʼekuéra ensegída oñehaʼã opredika jey ojapo haguéicha avei umi kristiáno ojepersegi vaʼekue síglo primérope (Hech. 8:4). Pe predikasión ningo oipytyvõiterei chupekuéra opensa meme hag̃ua Ñandejára Rréinore ha ani iprovlemakuérare. Upéicha rupi, siémpre osegi ovyʼa ha ipyʼaguapy hikuái.

JAJEPERSEGI JAVE

14. ¿Mbaʼérepa ikatu jaju nañandepyʼaguapyvéi jajepersegi rupi?

¹⁴ Jajepersegi jave ningo ikatu ojepeʼa ñandehegui heta mbaʼe ñanembopyʼaguapýva ha ñanembovyʼáva. Por ehémplo ndaikatuvéi ñañerreuni lívremente, japredika oimehápe o ndajajapokuaavéi umi aktivida yma jajapo vaʼekue normálmente jakyhyjeʼỹme. Oiko jave koʼã mbaʼe ikatu jajepyʼapyeterei ha jakyhyje la ikatúvagui oiko ñanderehe amo gotyove. Normál ningo la péicha ñañeñandu, péro ñañatende vaʼerã ani hag̃ua jajepersegi rupi jaju ndajajeroviavéi Jehováre, Jesús heʼi haguéicha idisipulokuérape (Juan 16:1, 2). Upéicharõ, ¿mbaʼépa ikatu jajapo siémpre ñandepyʼaguapy hag̃ua jajepersegíramo jepe?

15. ¿Mbaʼérepa ndajakyhyjéi vaʼerã jajepersegíramo? (Juan 15:20; 16:33).

¹⁵ La Bíbliape ningo heʼi: “Enterove oadoraséva Ñandejárape ipyʼaite guive Cristo Jesús disípuloramo, ojepersegíta avei” (2 Tim. 3:12). Peteĩ ermáno hérava Andréipe ningo ijetuʼu vaʼekue oasepta hag̃ua la heʼíva péva pe téxtope ojeproivírõ guare ñande aktivida ipaíspe. Haʼe opensa vaʼekue: “Ápe ningo hetaiterei Testígo oĩ, ndaikatumoʼãingo orejagarra enterovépe”. Péro péicha opensáramo jepe, haʼe ndoikói trankílo, síno haʼe oiko oñekevrantaháre. Umi ótro ermáno katu ojerovia Jehováre, oheja ko situasión ipópe ha nopensái núnka ndojejagarramoʼãiha chupekuéra, síno oikuaa ikatuha oiko upéva. Upéicha rupi ndoikói oñekevrantaiterei hikuái Andréire oiko haguéicha. Upévare Andréi osegi koʼã ermanokuéra ehémplo ha okonfia Jehováre. Ensegidamíntema haʼe oikóma avei trankílo, ha koʼág̃a haʼe ovyʼa hetáramo jepe la provléma. Ñande avei ikatu ñañeñandu upéicha. Jesús ningo heʼi vaʼekue voi ñande jajepersegitaha, péro haʼe oasegura vaʼekue avei ñande ikatuha jasegi ñandefiél Jehovápe (elee Juan 15:20; 16:33).

16. ¿Mbaʼe instruksiónpa jasegi vaʼerã oĩ jave ñandepersegíva?

¹⁶ Ojeproivi mbaʼéramo ñande aktivida, la sukursál ha umi ansiáno omeʼẽta ñandéve umi instruksión jajekuida hag̃ua, jasegi hag̃ua jarresivi umi informasión omombaretétava ñande jerovia ha jasegi hag̃ua japredika ikatumiháicha. Iñimportánte jasegi koʼã instruksión, jepe algúna vése ikatu nañantendeporãi mbaʼérepa oñemeʼẽ (Sant. 3:17). Ha avei ñañatende vaʼerã ani hag̃ua ñamombeʼu mbaʼéichapa ñane ermanokuéra osegi opredika ha oñerreuni umi persóna natekotevẽivape oikuaa (Ecl. 3:7).

17. ¿Mbaʼéichapa ikatu jasegi umi apóstol ehémplo?

¹⁷ Satanás ningo ñandeataka meme hína koʼág̃a, pórke ñandéve oñenkarga kuri ‘pe traváho ñañeʼẽ hag̃ua Jesúsre’ (Apoc. 12:17). Péro aníkena jaheja kóva ñanemongyhyje. Ñande jasegíramo japredika jajepersegíramo jepe, upéva ñanembovyʼáta ha ñanembopyʼaguapýta. Umi autorida oproivírõ guare umi apóstolgui opredika, haʼekuéra iñeʼẽrendu Jehovápe. Upévare osegi opredika hikuái ha upéva ombovyʼa chupekuéra (Hech. 5:27-29, 41, 42). Jajepersegíramo ningo tekotevẽta añete ñañatendeve japredika jave (Mat. 10:16). Péro upéicharamo jepe ñañehaʼãmbaitéramo siémpre jajapo upéva, ñambovyʼaitereíta Jehovápe ha ikatúta ñaipytyvõ ñande rapichakuérape ojesalva hag̃ua, ha upéva añetehápe ñanembovyʼaitereíta.

“ÑANDEJÁRA OMEʼẼVA PYʼAGUAPY PENEVENDESÍTA”

18. ¿Moõguipa ou pe pyʼaguapy ñaikotevẽva?

¹⁸ Ñaimékena segúro ikatuha ñandepyʼaguapy ijetuʼúramo jepe ñanendive. Péicha jave ñanemanduʼa vaʼerã Ñandejára pyʼaguapy añoite ikatuha ñanepytyvõ. Jajeroviákena Jehováre oĩ jave peteĩ mbaʼasy pyaʼeterei okorréva, jahasa jave algún desástre naturál o jajepersegi jave. Aníkena núnka jaheja Jehová organisasión, ha siémprekena ñapensa pe esperánsa jarekóvare. Jajapóramo péicha, “Ñandejára omeʼẽva pyʼaguapy” oĩta ñanendive (Filip. 4:9). Pe artíkulo oúvape jahecháta mbaʼéichapa ikatu ñaipytyvõ ñane ermanokuérape oreko hag̃ua avei pe pyʼaguapy oúva Ñandejáragui ohasa jave umi situasión ijetuʼúva.