Jeupape Sansónwan latrø murik køntrai marik køn

Latrø yam israelitasmera katøle taska marik tiusmeran adorap mentøpen, Jeupape tru filisteosmera israelitasmeran aship pøntrøntrai marik køn. Inchentø møilø israelitasmerape Jeupawan katøkucha untarapelø kuik køn, Manóah latawai. Nøpa nui sraimpape urekmera chikar kuikkutri, kan kualøm Jeupape kan ángelwan ørik køn tru Manóahwai srawan trenchintrai: “Ñipe kan unø tøkakøntrap køn, tru filisteosmerainukkutri israelitasmeran wesrantrapik incha kan nazareo køntrun cha”. Nazareosmerape Jeupawayasiktø latrø tap kuallipelø køp, nømui pusruwane parmøntrai merilø kuik køn.

Yantø Manóahwai nusrkai kal-lapen Sansón munchi pasrik køn. Nurap ipen Jeupape nun latrø murik køntrai marik køn, kan leónwanken nui taskatøka kuetchaptik. Kan pieje 30 filisteosmeran mu purukuimíik nøtø kuetsik køn. Inchawai filisteosmerape latrø tsalø kui asha, mantø kuetsamikwan aship menta, kan yem Sansón Gazasrø kip tsupen nømpe ciuda yaskapsrø munirantrap ampik køn, tøtram uras nun kuetchap isua. Inchen yem tøpøtaksrø Sansónpe kutra ya, ciudasrø kepampinuk nøtrø yaskap pøntrapelan wesrua, nui kiltunyu Hebrón tunsrønkatik muta yaik køn.

Trukutrimpe filisteosmerape Sansónwai ishukwan Dalila munchi taikpa waminchap ampa trentaik køn: “Sansón chintimpa latrø murik kuikwan ñi kuenta peñene latrø nu an pakaratrumøn, kakentø nun kemøra cárcelyu kertrap isuer cha”. Dalilape tru anwan tøkakøntrap isuikkutri nømun eshkantrap køtrømisrik køn. Srøtøpe Sansónpe chikucha eshkamupen, Dalilape chu urastøkucha paya mørøp mentøpen Sansónpe yantø trencha eshkaik køn: “Nape nazareo kuikkutri pusrukwane manaken parimíik kur, kakentø pusrukwan parøp kualømpe na murik kuikpe, patsøntrapik køn cha”. Sansón Dalilan øyeek eshkaikpe latrø kalø kuik køn.

Trukutrimpe Dalilape filisteosmeran trentaik køn: “¡Sansón chincha latrø murik kuikwan møimpe sí nepua ashar cha!”. Sansón nui tøm pala kip tsupen, Dalilape munkøsrøn pusrukwan partrap attrai wama, nøpe trencha trasaik køn: “¡Sansón filisteosmerape yu pøntran cha!”. Inchen Sansónpe kia kasrappe kuenta penik køn, tru nø latrø murik kuikpe yantø chikaakui. Inchen filisteosmerape nun kemøra kapkeik mara cárcelyu kekutsik køn.

Kan kualøm latrø nu filisteosmera, tru nømui tius Dagón munchi taik temployu tulutsuna kua trencha trashipelø kuik køn: “Namui tiuspe Sansónwan namui tasku tranan cha”, incha Sansónwan srua amtrua, par nøtrø pilar tøpøtak pasra, intsa aship mentøpen Sansónpe latrø mur trenchipik køn: “Tiusmanta Jeupa katøle latrø mur kømikwan trantra cha”. Inchen nui pusruk katøle wanik kuik køppe, pakatø nøtrø pilarwan latrø mur trapakuchen, yape mayelan kuetchip itøpeñen, truyu Sansónkucha kuaik køn.