KUSRENANIK 25
Tiuswan adorantrap tabernáculon marik køn
Moiséswan Sinaí tunsrø Jeupa trentaik køn: “Kan tabernáculo marcha”. Ik tabernáculope israelitasmera Jeupawan adorantrai purukup chu ampiksrø trurø sruampamtik køntrapik kuik køn.
Jeupape Moiséswan trentaik køn: “Misakmeran nøm chi tøkakuiktøka tabernáculon maramik purukuik chintrik cha”. Inchakutri israelitasmerape oropa, tørpilap tsantsønpa, øskø tsantsønpa, tap srukcheløpa, upisha isik linopa, usha kalusmerapa chikøpentø sruampa tranik køn. Uñchatø køntrai srua amtrupen, Moiséspe más srua amtrumøtay taik køn.
Latrø yam møkelø ishumpurmerapa tabernáculon martrai Jeupa nui espíritu santotøka purukuik køn tru nøm kuallip kui tap wepintrai. Møiløpe isikwan kupen, møiløpe pasrik pasren, inchene møiløpe pinitap inchipelø køn, katøkaneløpe orotrawa chikøpen tapchelø maren inchen katøkaneløpe tsikmeratrawa chikøpen tapchelø marik køn.
Israelitasmerape tabernáculon Jeupa maik karuikwan treek mara, kan latrø tap telachiktrawa tabernáculo umpu pa kuartos køntrai mesraik køn: Santopa, Santísimopa wamilø køntrai. Santísimoyupe acuerdo marik kan cofre pasraik køn tru orotøka acacia tsiktrawa marik. Inchen Santo taiknupe kan kandelabro orotøka marik pasrap, kan misha tsikpa incha kan altar truyu incienso patramik pasrap intik køn. Inchen tabernáculo wampikpe, kan nu kaldero pasrapik køn øskø tsantsøntrawa marik incha kan nu altarpa. Acuerdo marik kan cofre israelitasmeran purukuntrapik kuik køn nøm tru Jeupawan møra martrap misrikwan pesannamøntrai. ¿Acuerdo taikpe chi kuik kø? Kan latrø nuik martrap misrik køn.
Jeupape Aarónwanpa nui nusrkalanpa wesruik køn, tabernáculoyu kuallip meløntrai tabernáculon aship chish marøp, truyu ushameran kuetcha Jeupawan keta tranøp intamik kuik køn. Aarón, sumo sacerdotetøwai tru santísimoyu pilayu kan piejetø kepiamik kuik køn, tru Jeupawayasik kan usha kuecha keta trantrap, nui kalø marilaimpurap nui yawelaimpurap incha israel misakmera kalø marikwankucha, Jeupa nømun ulø paymø pesannantrai.
Egiptoyukutri wetruik pila puraipentø israelitasmerape tabernáculon chap mara pasren, møimpe sí Jeupawan truyu adoramtik kuik køn.
Jeupa kan wañi tabernáculo pala pasren, nui tørkekualmapikpe truyu netsapen Jeupa latrø kasrakwai kenamarik køn. Tru wañi tabernáculo pala pasrainkatikpe israelitasmerape truyutø waramik kuik køn, inchen wañi pala punø kutrøpene tabernáculon chishtø picha, wañi chumay ipen tru wentautø ampamik kuik køn.
“Inchen tru wamisra karub wainukkurrimbe kan wam truba mur waminchib øyah taig mørøbig kur: ‘¡Au! møimbe Tius nø pasraig yabe yandø misaameraba pasran cha. Tiusbe nømba pasrønrrab pasrøben, nømgurrimbe nui misaamera kønrrun cha. Inchen Tiustøwei nøashib truyu nømba pasrøwa, nømui Tius kønrrun chibʼ” (Apocalipsis 21:3).