Lotwai srawaimpurap ñiken isu

Abrahán Lotpa Canaán pirausrø warøpen, nømui ushamera latrø yam misrikkutri yantø pirisha ampam puik køn. Inchakutri Abrahánpe Lotwan trentaik køn: “Ñi atsimay ipene, nabe kusrmay yamønrrun cha”. Abrahánpe tammay kuik køn.

Lot yaiksrømpe latrø tap pirø køp, pimera uñchatø tøkaiksrø nui yaweløpa trusrø Sodoma ciuda pulusrø warøntrap ampik køn.

Sodomapa Gomorrapa ciudayuilø misakmerape latrø kailø kuikkutri Jeupa pinishintrap isuik køn, inchentø Lotwanpa nui yawelanpa Jeupape wesruntrap isua par ángelesmera ørik køn, truyukutri mallatø wepampay chintrap, kakentø Jeupa tru ciudameran pinishintrap køn cha.

Inchentø Lotpe mallaken inchimupen ángelesmerape tasiku kemøra nunpa, srawanpa, nimpasrmeranpa lulitø wesrawa trentaik køn: “¡Lulay! ¡Keshmøtø kuamøntrappe!”.

Nøm Zóar pirausrø pupen, Jeupa Sodomanpa, Gomorranpa nakpa azufrepa puntrai øra pa ciudameran kutike chap pinisaik køn, inchen Lotwai sraimpe Jeupa karuikwan mørmø wentøpurap asikkutri tre sruk misra pasramisren, Lotpa nui nimpasrmerapape Jeupawan møra marikkutri øsik wepampik køn. Inchippa, nømpe isui intik kuintrun, Lotwai srai Jeupawan møra marmuikkutri, inchentø nømpe chi isumø pøntraik kuintrun Jeupawan møra marikkutri.