David Goliatpa

Jeupa Samuelwan trentaik køn: “Jeséwai yamay intrø, kakentø nui nusrkalai utukutri kan rey wesrantrap kur cha”. Inchen Samuel ya, tru Jeséwai mayur nusrkawan asha trenchipik køn: “Ik kuintrun cha Jeupa asha wesruik”. Inchen Jeupa trenchipik køn: “Ik kømøn, kakentø nape nuik kui ashatø kømøtø, nui mantrøwankucha ashipik kur cha”.

Jesépe nui katøkan nusrkalan kenamaren Samuelpe trentaik køn: “Jeupa ilø kømui asan, ¿inchippa katøkan nusrkai tøkakømøtitru cha?”. Jesépe kan wentø nusrkai palan chipik køn tru upisha ashipik, inchen David kepatrupen Jeupape Samuelwan trenchipik køn: “¡Ik køn cha nø asha wesruik!”. Treekkutri, Samuel Davidwan turyu aceite itølushipik køn Israelsrø rey køntrai.

Yanasrømpe israelitasmera filisteosmerapa kan nu møkkølik Goliat taik tøkarpa kuayap kuik køn. Truikpe kualømmørik trenchipik kuik køn: “Napa kuayantrapik kan møk wesrua øray cha ñimui utukutri, inchen truik kanapene nam ñimui karuintik meløntrap cha, inchen na kanapene, ñimpe namui treek meløntrun cha”.

Kuayap utusrø David nui nunelan mamik pekuchap ya, Goliat trentaikwan mørape: “¡Na kuayantrur!” chipik køn, inchen rey Saúlpe: “Ñipe purø unøtik køn” chipen, nøpe trentaik køn: “Jeupa purukuntrun cha”.

Rey Saúlpe kuayainuk kewa kuikwan Davidwan kentrai tranen, nøpe iktøkape kuayantrap kaimamøntrun cha, kalus tsik sruk waya ørik wampa incha trattrøkatø sruk-urek tulisha nui ila kuinuk pusrøppa ipik køn. Inchen David pintrøke pasramisren Goliatpe trentaik køn: “Øyeek lamø unøpe amø, pitis martrumøn kau umpu ushamera, illikmeranpa mantrai”. Davidpe kørmø trentaik køn: “Ñi kuayantrap atruppe kan espada, lanzapa atrun, inchen nape Jeupawai munchiyu kuayantrap atrur cha. Ñipe nampa kuayamøtø Tiuspa kuayan trentan, yu pøntrapelø nepua ashchun Jeupa más murik kui, ñui espada ñui lanza lataken kømø, Jeupape namun kanantrai purukuntrun”.

Møimpe tru David nui kalus tsiyu sruk waya wiita kuchen, Jeupa purukuiktrawa tru srukpe Goliatwai kappaløyu wampuik køn. Tru urastø kuain peñen, maya filisteosmerape trupap ampupelø køn nømun kuetchimøntrai. Jeupawan kørewa pøntrøpene nøpe purukuntrun.