-
¿Tius Nø Aship Karup Waikpe chi kø?¡Manasrønkatik kasraktø uñchun! Kan pørin kilka Biblian tør nepua ashchai purukuntrapik
-
-
KUSRENANIK 31
¿Tius Nø Aship Karup Waikpe chi kø?
Bibliape eshkapik køn, Tius Nø Aship Karup Waik mas nuik kui Tius Pirøwaimpurap chi martrap isuikwan, Tius Nø Aship Karup Waikpe martrun. ¿Tius Nø Aship Karup Waikpe chi kø? ¿Nampe mantø nepua asa Tius Nø Aship Karup Waik pølpasrik? ¿Chi marøp atru møyankatik? ¿Incha chi martrera wentøsrø? Ik paílan yu kusrenaniku løtap, katøkan pakatø kusrenaniløyukucha løtøntrun.
1. ¿Tius Nø Aship Karup Waikpe chi kø incha mu Aship Karup pasra?
Jeupa srømpalasrønkutri Aship Karup Waik køn incha Jesucriston aship karup wantrai pasrik køn (Mateo 4:17; Juan 18:36) Jesúswaimpurap waminchip trenchipik køn: “Nøbe […] managatig ashib karub wanrrun cha” (Lucas 1:32, 33). Nø Tius Aship Karup Waikwan aship waikkutri, yu Pirau mayelan aship wantrun.
2. ¿Jesúspa aship karup pøntrapelø mumera kø?
Jesús nøtø aship karup wamøn “chi misaamera[tøkuchapa], chi wam waminchibe[løpa], chi misag søtømera[pa], misaamera nørrø pønrrabelø chu pirausree[løpa], karup wantrun (Apocalipsis 5:9, 10). ¿Mamelø Jesúspa putrøntrapelø kø? Jesús yu Pirau atrikkutri, Cristoi wentautø ampupelø misrintøkucha 144.000 misakmeratø amtrap køn nøpa aship karup pøntrøntrap (leu Apocalipsis 14:1-4). Katøkan misakmera køtrømisrøpeløpe yu Pirau warøntrun (Salmo 37:29.).
3. ¿Chincha mas tapik kø Tius Nø Aship Karup Waik yu Pirau aship karupelø lataken kømø?
Yu Pirau møilø aship karup putrapelø tapelø martrap isuintøkucha kaima køn, kakentø aship karup wantrai katøkan katøkan wesruikkutri. Incha nøm martrap misrilan chishtø martrap kaiman. Jesúswane menta marmøntrun. Tius Nø Aship Karup Waikpe “manaken pinøntrapkeik” køn (Daniel 2:44) Jesús aship karup wamisren yu Pirau maya misakmeran lata ashchun. Jesús sølkantik marøpik tammay untak tøkaik kua, mayelan treek køntrai kusrenantrun (leu Isaías 11:9).
MAS NEPUA KUSREU
Tius Nø Aship Karup Waikpe chincha mas tapik kui tru yu Pirau aship karup putrapelø latailø kømuikwan ashchap.
4. Kan Aship Karup Waik marampurap maramik tøkaik Pirøwan karuntrun
Jesucristope mas tap karupik køn yu Pirau karupelø lataikken kømø. Ley Mateo 28:18, yu leinuk pinaku paílan waminchap:
¿Jesús aship karup waikpe chincha pekmay kø yu Pirau aship karup putrapeløpa?
Yu Pirau aship karup putrøntrapelø Pirø mupa kuimpurap karumelø køn, yanayutø patsapelø køn, ¿Tius Nø Aship Karup Waikpa trektøwai purep pasrøntrauta? Ley Daniel 7:14, yu leinuk pinaku paílan waminchap:
¿Tius Nø Aship Karup Waikpe manaken patsømøntrap kui nepua asikpe chincha latrø tapik kø?
¿Chincha purø tapik kø Tius Nø Aship karup Waikpe Pirø ørøpa aship karup wantrai?
5. Yu Pirau aship karup putrapelan yunømarilø køntrun
¿Chincha palailø kø yu Pirau aship karup putrapelan Tius Nø Aship Karup Waik yunømartrai? VIDEUN asay, yu videu asinuk pinaku paíkwan waminchap:
¿Chi tap kømelø marøpkø yu Pirau aship karup putrapeløpe?
Ley Eclesiastés 8:9, yu leinuk pinaku paílan waminchap:
¿Tius Nø Aship Karup Waik yu Pirau Aship Karup putrapelan yunømaramik pala chintera? ¿Chincha?
6. Tius Nø Aship Karup Wainuk karup putrapeløpe nam chimerayutø puraampup pøntrailan nepua ashipelø køn
Jesús namui Aship Karup Wantrapik, yu Pirau øsik uñipik kuikkutri “namun lastima ashibig køn” (Hebreos 4:15). Jeupa 144.000 misakmeran ishumpurlata møkelølata yu Piraukutri wesruik køn, Jesúspa aship karup putrøntrai. Tru misakmerape “chi misaamerandøgucha, chi wam waminchibelandøgucha, chi misag søtømerandøgucha, misaamera nørrø pønrrabelø chu pirausreelø” køpen køn (Apocalipsis 5:9).
¿Jesúspa 144.000merapa namun aship karup putrøntrapelø nam lataik kui nepua ashape ñun tap mørørankarupik kuita? ¿Chincha?
Jeupape 144.000 misakmeran lawa wesruppe chi pilamerasreelø køpen, chi culturamerasreelø køpenwan Jesúspa aship putrøntrai wesruik køn.
7. Tius Nø Aship Karup Waik martrai karuiløpe yu Pirau aship karup putrapelai latailø kømøn
Yu Pirau aship karup putrapelø martrai karuiløma misakmeran kalø pumøntrai purukupelø køn. Trektøwai Tius Nø Aship Karup Waik martrai karuiløpe, misakmeran kalø pumøntrai purukuntrapeløtøwain køn. Ley 1 Corintios 6:9-11, yu leinuk pinaku paílan waminchap:
¿Ñi isuinukpe misakmera yu Pirau Tius maik karuikwan møra maren maik køntrera?a
¿Ñi isuinuk søl køpsru chintera tru Tius Nø Aship Karup Waik martrai karuilan møra maramik? ¿Ñipe chincha øyeek isupik kuku?
¿Tius martrai karuilan møra marmelø, møra martrap kui chincha nepua asha kø? (Versículo 11n ash).
Yu Pirau aship karup putrapelø martrai karuiløma misakmeran kalø pumøntrai purukupelø køn. Trektøwai Tius Nø Aship Karup Waik martrai karuiløpe, misakmeran kalø pumøntrai purukuntrapeløtøwain køn.
MØILØPE TREEK PAYIPELØ KØN: “¿Tius Nø Aship Karup Waikpe treekpe chi kera? Cha”.
¿Ñipe chi løtapsruku?
¿CHI KUSREKU?
Tius Nø Aship Karup Waikpe srømpalasrønkutri aship karup pasran, yanayutø ik Pirøwankucha aship karup pasrøntrun.
Kusreikwan katøle isuntrap
¿Tius Nø Aship Karup Wainuk aship karup putrøntrapeløpe mumera kø?
¿Tius Nø Aship Karup Waikpe chincha mas tapik kø yu Pirau aship karup putrapelø latailø kømø?
¿Tius Nø Aship Karup Waikpe nui misakmera yu Pirau warøntrapeløpe chi martrai isupik kø?
MAS NEPUA ASH
Tius Nø Aship Karup Waikpe chukutri aship karup wantrapikwan Jesús taikwan leu.
“¿Tius Nø Aship Karup Waikpe namui mantrau pasrapik kø chinta?” (jw.org yu pørilø)
¿Jeupawaiwan wamichipeløpe tru yu Pirau aship karup putrapelan kømø Tius Nø Aship Karup Waikwanmetrik chincha møra marøpelø kø?
Jeupa 144.000 misakmeran Jesúspa aship karup putrøntrapelaimpurap Biblia manchipik kuikwan ash.
Kan ishuk keerik yau wapikwan, yu Pirau søl marmuilan Tius Nø Aship Karup Waiktø tamartrap kui chincha kørewa pasraik kø.
“Kalø marilan tamarilø køntrap kui nepua kusreik køn” (¡Despertad!, noviembre 2011wai)
a Tius namui øsik amønainuk chi martrai karuilan sección 3yu mas ashchun.
-
-
¡Tius Nø Aship Karup Waikpe srømpalasrø yantø karup wan!¡Manasrønkatik kasraktø uñchun! Kan pørin kilka Biblian tør nepua ashchai purukuntrapik
-
-
KUSRENANIK 32
¡Tius Nø Aship Karup Waikpe srømpalasrø yantø karup wan!
Srømpalasrø Tius Aship Karup Waikpe 1914 aship karup pølpasrik køn. Tru pilatøwai yu Pirau aship karup putrøntrapelai pinisailø kømikkucha pølpasrik køn, treek purayamik yana palømøn. ¿Treekwan chincha nepua asha kø? Møi ashchap, Biblia chi puraintrap kuikwan eshkaikwan tru 1914kutri chi pup mentikwan trektøwai misakmera mailø køntrap kuikwan.
1. ¿Biblia chi chap eshkaik kø?
Biblia tru libro de Danielyu chap eshkaik køn tru Tius Nø Aship Karup Waikpe “siete pilamera” puraipen pølpasrtrap kui (Daniel 4:16, 17). Yanasrø Jesúskucha trupurap wamintik køn trenchipen “tru nømui treeg maram kwalømmera patsamnegatiitø”, ikpe kenamaran Jesús trenchipen tru kualømmerape patsømøsrø kui (Lucas 21:14). Møi ashchap kuinuk, tru siete pilamerape 1914 patsøntrap kuik køn.
2. ¿1914kutri chi purep pasra incha misakmerape mailø kø?
Jesúswai pera uniløpe treek paya mørik køn: “Øyeebe mana purainrrab kui namun eshkarra cha. Katø ñi katøle arrumigwanba, yandø srabe kwaløm punrrabigwanba asamibe ¿chitø kenamisrtrerah?—cha” (Mateo 24:3). Jesúspe nømun treek løtik køn: na srømpalasrø aship karup wamisren chikøpentø puraintrun cha. Tru pek misakmerape katøkan pek misakmerapa kuayantrun cha, parø atrumpa, pirø køniløkucha atrumpa (leu Mateo 24:7). Trektøwai Bibliayu chap eshkaik køn misakmera mailø køntrap kui treekkutri “tabguen waramga kwalømmera attrab kui” taik køn (2 Timoteo 3:1-5). 1914kutri, mas nemisrøp atrik køn.
3. ¿Srømpala Tius Aship Karup pølpasren yu Pirau chincha mas trømpøik pup pasraira?
Srømpala Jesús Aship Karup wamisren, yanayu srømpalasrø trømpøik kuayaik køn, Jesúspa Satanás nui ángelesmerapa. Jesús kanaikkutri Biblia trenchipik køn: “[Satanáswane] nui kaig ángelesmeranbañau pirau pinøbusrig køn” cha (Apocalipsis 12:9, 10, 12). Inchawai yu Pirau trømpøik pup pasran. Kakentø Satanáspe latrø namik kui wan nun pinisamik yana palømuikkutri. Treek kuintøkucha Tius Nø Aship Karup Waikpe yu Pirau trømpøik pup pasrapikwan kutike tamartrun.
MAS NEPUA KUSREU
Ashkun chincha 1914srø Tius Nø Aship Karup Pasraik pølpasrikwan incha Tius yantø Aship Karup Waik kørewa pasraik ñi kenamaramikwan.
4. Bibliape trenchipik køn Tius Nø Aship Karup Waikpe 1914srø pølpasrik kui
Nabuconodosorwan tru rey Babiloniawai, Jeupa kan piaik tøkakøntrai marik køn. Tru wentøsrøwai chi puraintrapikwan kenamartrap. Ik piaimpurap Daniel mantaikwan Bibliayu lemtik køn. Ik piakpe tør kenamarøpik køn, tru Nabuconodosorwai aship karupwaimpurap trektøwai Tius Nø Aship Karup Waimpurapkucha (ley Daniel 4:17).a
Ley Daniel 4:20-26. Trukutri nøørø tarømariktøka paílan løtøntrap:
A) ¿Nabuconodosor nui pianuk chi asik kø? (Ash versículosmera 20, 21n).
B) ¿Tusrpa chi purep intrapik kuik kø? (Ash versículo 23n).
C) ¿Tru “siete pilamera” nemisren chi purep intrap kuik kø? (Ash versículo 26n).
Piain tusrpa Tius Nø Aship Karup Waikpa
METRAPSRØNKUTRI CHAP ESHKAIK (Daniel 4:20-36)
Aship karup waik
A) Kan tusr latrø palaik
Aship karup waik pasrampuik
B) “Tusrwan paraik” incha “siete pilamera puraipasay”
Katøyu karup pølpasrik
C) “Ñipe katøyu aship karup wamisrtrun”
Nabuconodosorwan mantø nepuik kø:
D) ¿Tusrpe mu køntrap kuik kø? (Ash versículo 22n).
E) ¿Aship karup waikpe mana pasrampuik kø? (Ley Daniel 4:29-33).
F) ¿“Siete pilamera” puraipen chi purayaik kø? (Ley Daniel 4:34-36).
NABUCONODOSORWAN MANTØ NEPUIK KØ
Aship karup waik
D) Nabucodonosor, Babiloniasrø aship karup wapik
Aship karup waik pasrampuik
E) 606 Jesucristo mukapatøkutri Nabuconodosorwan tur minchen, siete pilamerakatik aship karup wantrap kaimaik køn
Katøyu karup pølpasrik
F) Nabuconodosorwan tur tammisren katøyu aship karup pølpasrik køn
Israel karup putrapelan mantø nepuik kø:
G) ¿Tusrpe mumeran køntrap kuik kø? (Ley 1 Crónicas 29:23).
H) ¿Nøm aship karup putraikpe mana patsik kø? ¿Jesús yu Pirau uñip uras nøm aship karup putrømuik kui nampe mantø nepua asa? (Ley Lucas 21:24).
I) ¿Nøpe mana pølpasrik kø katø karup incha chu?
ISRAEL KARUP PUTRAPELAN MANTØ NEPUIK KØ
Aship karup waik
G) Israelwai aship karup putrapelan Tius nø asha wesruilan
Aship karup waik pasrampuik
H) 607 Jesucristo mukapatø Jerusalénwan pinishipen; Israelwai aship karup putrapeløpe 2.520 pilamera aship karup putrømuik køn
Katøyu karup pølpasrik
I) 1914 pilasrø Tius Nø Aship Karup Wainuk Jesús aship karup pølpasrik køn
¿Bibliayupe siete pilamerape mayan kø?
Biblia nøtøwai tør marøpik køn. Por ejemplo, Apocalipsisyu wamintikpe pøn pilamera tøpøpape 1.260 kualømmera køn (Apocalipsis 12:6, 14). Truikwantøwai pamay maramuntisruantøpe 2.520 kualømmera køntrun. Kanmay Biblia waminchipik køn, kan kualøm kan pila kui lataik (Ezequiel 4:6). Trupe, siete pilamera Danielyupe wamintik: 2.520 pilamera køn.
5. 1914srønkutri mas trømpøik pup mentik køn yu Pirau
Jesúspe eshkaik køn yu Pirau maik køntrapik kuikwan nø aship karup mentøpen. Ley Lucas 21:9-11, yu leinuk pinaku paíkwan waminchap:
Yu leinuk chap eshkailøyukutri, ¿møilan asha kuku kape møra kuku?
Apóstol Pablope eshkaik køn misakmera mailø køntrap kui srape kualømmerasrø. Ley 2 Timoteo 3:1-5, yu leinuk pinaku paíkwan waminchap:
Yu maik køntrapelø kuikwan eshkaikwan, ¿ñipe møikwan asha kuku?
6. Tius Nø Aship Karup Waik pølpasrik ashape treek kui kenamarkun
Ley Mateo 24:3, 14, yu leinuk pinaku paílan waminchap:
¿Chi tap lutøtre kenamara Tius Nø Aship Karup Waik pølpasrik kui?
¿Tru lutøyu purukuntrap ñipe chi martrap?
Tius Nø Aship Karup Waikpe srømpalasrø aship karup wan incha lamøtø palan yu Pirau karup pølpasrtrai. Ley Hebreos 10:24, 25, yu leinuk pinaku paíkwan wamichap:
¿Nampe chi martrap srape “kwaløm yandø pub arri ashabe”?
Ñi kusrep uninuk katøkanelan nømui øsik amønainuk purukuntraptik kui ashape, ¿ñipe chi martrap?
MØILØPE TREEK PAYIPELØ KØN: “¿Jeupawaiwan waminchipeløpe chinchatre 1914waimpurap waminchipelø kø? Cha”.
¿Trupurap ñipe chi chipsruku?
¿CHI KUSREKU?
Metrapsrønkutri Biblia chap eshkailø, yu Pirau purep pasraikpa kenamaran Tius Nø Aship Karup Waik pølpasrik kui. Treek purep pasraik kui asha, Tius Nø Aship Karup Waimpurap waminchip ampupelø ker, incha tuluntsuniksrømay ampupelø ker kungrekasiunpa.
Kusreikwan katøle isuntrap
¿Bibliayu Daniel chap eshkainuk siete pilamera chap puraipen chi purayaik kø?
¿Chincha truikwan kørewa pasrøku 1914 Tius Nø Aship Karup Waik pølpasrik kui?
¿Ñipe mantø kenamartrap kørewa pasraik Tius Nø Aship Karup Waik pølpasrik kui?
MAS NEPUA ASH
Leu møilø historiadoresmera eshkaikwan 1914kutri yu Pirau mas trømpøik puikwan.
Mateo 24:14yu eshkainuk kan møkwan mantø purukuikwan ash.
“¡Béisbolwan purø kustapik kuik køn!” (Asha Eshkapik, No. 3 2017wai)
¿Nampe mantø nepua asa kapítulo 4 Danielyu eshkainuk Tius Nø Aship Karup Waimpurap eshkapik kui?
“¿Mana pølpasra Tius Nø Aship Karup Waik? (Primera parte)” (Asha Eshkapik, 1 octubre 2014wai)
¿Chitre kenamara kapítulo 4 Danielyu siete pilamera” patsik kui 1914 pilasrø?
“¿Mana pølpasra Tius Nø Aship Karup Waik? (Segunda parte)” (Asha Eshkapik, 1 noviembre 2014wai)
a Ik kusrenaniku “Mas nepua ash” yu srape par pørilan ashchai.
-
-
¿Tius Nø Aship Karup Waikpe chi nepua martrera?¡Manasrønkatik kasraktø uñchun! Kan pørin kilka Biblian tør nepua ashchai purukuntrapik
-
-
KUSRENANIK 33
¿Tius Nø Aship Karup Waikpe chi nepua martrera?
Tius Nø Aship Karup Waikpe yantø srømpalasrø aship karup pølpasrin pasran. Yana palømøn yu Pirau trømpøik pup pasrapikwan tamaramik. Møimpe nepua ashchun, Tius Nø Aship Karup Waikpe chi tapeløtø nepua martrap kuikwan.
1. ¿Yu Pirau katøle pishintø waramik, sølkantø amønamtik køntrai Tius Nø Aship Karup Waikpe chi martrera?
Armagedón kuayainuk Jesúspe kaik misakmeran, yu Pirau aship karupelan pinishintrun (Apocalipsis 16:14, 16). Treek puraipen, Biblia maik eshkaik trentaikwan: “Yana kømuatø kaik misakmeran pinishintrun” cha (Salmo 37:10). Øyeek mariktøka, Jesús Pirø mupa kuimpurap pishintø waramik sølkantø amønamtik køntrai martrun (leu Isaías 11:4).
2. ¿Tius yu Pirau nui isuikwan maren maik køntrera?
Tius Nø Aship Karup Waik yu Pirau aship karup pasramisren, “sølkantø marøpelø Pirøwan ketik uta, truyu manakatik øsik warøntrun” (Salmo 37:29). ¿Maik køntrera misakmera sølkantø køpen, ampukutri ikutri untak kenamaren, Jeupawan newan untaramtik køpen? Latrø tapchik køntrunau. Mukucha kuantrø misrmøwai manakatik øsik warøntrun.
3. ¿Tius Nø Aship Karup Waik kaik misakmeran chap pinishipen, chitø nepua martrera?
Kaik misakmeran chap pinisha, Jesús 1.000 pilamera purayamnekatik Nø Aship Karup Wantrun. Tru pilamerayu 144.000 aship karup putrapeløpa, maya misakmeran kaikyukutri wesrawa sølkantelø køntrai martrun. 1.000 pilamera nemisren ik Pirøwan latrø tapchik chap maren, misakmerape Jeupawan møra marøp kasraktø warøntrun trukutri Jesús nø aship karup waikwan katøle nui Møskawan purørtrun. Trektøwai Tiuswai munchin manakatikwai newan tap intik køntrun (Mateo 6:9, 10). Øyeek chap puraipen, Jeupa tap karupik kui nui misakmeran tap aship pasrapik kui tør køtrømisrtrai kenamartrun. Trukutrimpe Satanáswan nui kaik ángelesmeranpa, trektøwai nun møra martrap inchipelanpañau pinishintrun (Apocalipsis 20:7-10). Tius Nø Aship Karup Waik tapelø mariløpe manakatikwain køntrun.
MAS NEPUA KUSREU
Tru wentøsrø Tius Nø Aship Karup Waik latrø tapelø martrap kui chincha newan køremtik kuikwan ashkun.
4. Tius Nø Aship Karup Waikpe yu Pirau aship karup putrapelan pinishintrun
“Misakmeratø ampukutri ikutri aship karup pøntraikkutri muntøkucha trømpøik pupik køn” (Eclesiastés 8:9). Øyeek trømpøik pup pasrapikwan, Tius Nø Aship Karup Waikpe kutike tamartrun.
Ley Daniel 2:44 incha 2 Tesalonicenses 1:6-8, yu leinuk pinaku paílan waminchap:
¿Jeupa nui Nusrkai, Jesúspa, yu Pirau aship karup putrapelan nømui purukupelanpañau chi martrera?
¿Ñi Jeupawaimpurap Jesúswaimpurap kusreinuk, nøm martrap kuiløpe sølkantelø køntrap kui chincha kørewa pasrøku?
5. Jesúspe sí tap aship karupik køn
Tius Nø Aship Karup Wainuk Jesús metrap pera pasrapik kuikkutri, misakmeran purukuntrap latrø tapelø martrun. Jeupa marampurap martrai traniktøka, Jesúspe misakmeran purukuntraptøwai pasraikwan ashchappe VIDEUN asay.
Jesús yu Pirau uñip uras mariløtøka Tius Nø Aship Karup Waik chi martrap kuikwan kenamarik køn. ¿Yu pørik pøntrapeløyukutri Tius Nø Aship Karup Wainukkutri møikwan mas nepui ashik køta? Ik martrap misrilø kutike Bibliayu pøntrapelan ley.
JESÚS YU PIRAU...
SRØMPALASRØNKUTRI JESÚSPE...
... latrø mur isik ichip atrupikwan wasrønchik køtrømisrtrai marik køn (Marcos 4:36-41).
... ik Pirøwan tap tamara martrun (Isaías 35:1, 2).
... nui marampurap mariktøka latrø nu misakmeran mannik køn (Mateo 14:17-21).
... parø kuapikwan pinishintrun (Salmo 72:16).
... latrø nu misakmeran kuantreelan tamarik køn (Lucas 18:35-43).
... maya misakmeran kuantrøkar chishelø køntrai martrun (Isaías 33:24).
... kuapelan øsiranik køn (Lucas 8:49-55).
... kuapelan øsiranøp, kuamikwan patsøkøntrun (Apocalipsis 21:3, 4).
6. Tius Nø Aship Karup Waikpe wentøsrø namuimpurø latrø tapelø martrun
Pølpasrøyukutri Jeupa misakmeraimpurap martrap isuikwan, Tius Nø Aship Karup Waikpe newan martrun. Latrø Tap Pirøchiku marinuk manakatikwai warøntrun. Jeupape Jesúswai purukuiktrawa mantø nepua martrap kuikwan VIDEUN asay.
Salmo 145:16, yu leinuk pinaku paíkwan waminchap:
¿“Misakmera chimeratø tøkakøntrap isuikwan” Jeupa trantrap kui nepua ashape, ñipe maik mørørai inchap?
MØILØPE TREEK ISUPELØ KØN: “Kan misak tap aship karup wapik kuikkutrimpe chishtø tamartrun cha”.
¿Misakmera martrap kaimailan Tius Nø Aship Karup waikpe sí chimerantø tamartrera?
¿CHI KUSREKU?
Tius Nø Aship Karup Waikpe martrap misrilan kutike newan martrun. Ik Pirøwan latrø tapchik marøp, misakmera latrø tammayelø køp tru Jeupawan manakatikwai adorap køntrun.
Kusreikwan katøle isuntrap
¿Tius Nø Aship Karup Waikpe Jeupawai munchin tap intik køntrai chi martrera?
¿Tius Nø Aship Karup Waikpe Bibliayu latrø tapelø martrap misriløyu chincha kørentrap?
¿Tius Nø Aship Karup Waik martrap misriløyukutri møikwan mas nepui ashik køta?
MAS NEPUA ASH
Armagedón maik køntrap kuikwan nepua ash.
“Kwalømmerawane purø trømbøig nebuinab melamig” atrupen chitø puraintrapikwan ash (Mateo 24:21).
¿Tru “kwalømmerawane purø trømbøig nebuinab melamig” attrapikpe maik kø? (jw.org yu pørik)
¿Wentøsrø Tius Nø Aship Karup Waik martrap misriløsrø yaweløpa trusrøn pøntraik lataik mantø isuntrap?
Kan møkwan Tius Nø Aship Karup Waikwan wentøsrø latrø tapelø martrap misriløpe mantø purukuikwan nepua ash: “Chipurap køpen paya mørøpik kuik køn”.
“Bibliape nømui øsik amønaikwan yunømartrai purukuik køn” (Asha Eshkapik, 1 enero 2012wai)
-