KUSRENANIK 60
Jeupawaim pulu ñipe mas trak kemall
Ik pørin kilkayu Bibliayuikwan, chinetø ñi nepua asik køn Jeupawayelan. Treekkkutri Tiuswan untaram kusreikkutri inchippa piu umpu ulsraintrun. Ñi piu umpu ulsrømuin køpene, ulsrøntrap isup unintrun. Trupe piu umpu ulsraikkutri manakatik Jeupawan mas trak kemallip mur pasramtik køntrun. Mantø maramikwan ashkun.
1. ¿Ñipe chincha Jeupawan mas trak kemalla pasramik kø?
Nampe Jeupawantø mas trak kemalla pøntrøntrap mur trantramik køn. ¿Chincha? “Nam amønaig mayugurri inchippa pella ambinabgunmab”. Inchippa nampe Jeupawainukkutri tarømisrøp pøntrap kun (Hebreos 2:1). ¿Chi purukuntrera Jeupawantø mas trak kemalla pøntramik? Nampe kualømmørik misakwan Tiuswaiwan waminchip, trukutri Tiuswayelan lawa marøp pøntramik køn (leu Filipenses 3:16). ¡Jeupawaiwan marøp pasraikpe latrø tapchik køn! (Salmo 84:10).
2. ¿Ñui øsik uninuk chiwantre ka metraptø marøp yamik kø?
Biblian kusrep atrinuk ik pørin kilkawan chap patsøkøp atrinkucha, Cristo latawai unamikpe ñipe møi pølpasrøp pasran. Biblia trenchipik køn Cristoi wentautø ampupeløpe “tru srøig øsig kømigwan kewa pønrray [cha]” (Efesios 4:23, 24). Ñi Biblian ka kusrep yape incha kungrekasiun tuluntsuninukmay palømø yape, Jeupa nø maik kuikwan mas nepua ashchun. Trupe Jeupa lataiwai køntrap trantrø. Chikøpen tap kømøtelø yunømaramik tøkakuape Jeupa kasrak wantrai yunømar.
3. ¿Jeupawan trak kemalamik nøpe ñun mantø purukuntrera?
Biblia trenchipik køn: Tius “nøtøwei ñimune katøle tamara pønsrøb, chiyugucha kørrønrrabgailø marøb, katø trurrigu kullaaramø murelø kønrrai marøb, yandø treeg pønrrønrrai kørrømarøb inchun [cha]” (1 Pedro 5:10). Mayelan chiyukøpen kekøtrøsrkøntrapeløpe puntrun, inchentø Jeupape namun purukuntraptøwai pasran (Salmo 139:23, 24). Trektøwai Jeupa, nø køn, tru maramikwan martrai isuntraimpa katø marøpik køntrai ñuinuk tranøp inchipikpe, tru nø maik martrai isuikwan treek marik køntrai (leu Filipenses 2:13).
MAS NEPUA KUSREU
Jeupawan trak kantø kemallchap incha Jeupa chi tapeløtø tranøpik kuikwan ashkun.
4. Ñui mas trak linchipikpa wamintamikwan elachimøta
Oración marikpa Biblian leikpa Jeupawai trak linchipik køntrai purukuik køn. Øyeelan elachimø marikpe, ¿Jeupawan mas trak kemalamik purukuntrauta? ¿Mømay purukuntrera?
Ley Salmo 62:8, yu leinuk pinaku paíkwan waminchap:
Jeupawan mas mantraukutri waminchene, nun trak lincha pasrøntrai purukuntrun. Inchentø, ¿ñipe mantø martrap?
Ley Salmo 1:2, yu leinuk pinaku paíkwan waminchap:
Biblian mas tap nepua kusrentrap inchape, Jeupawan mas trak lincha pasrøntrai purukuntrun. Inchentø, ¿ñipe mantø martrap?
¿Ñiasiktø Biblian kusrep yainuk mantø mas tør nepua ashchap? Mømaytø maramtik kui ash, VIDEUN asay. Yu videu asinuk pinaku paílan waminchap:
Videu kenamarinuk, ¿chiwan martrap isuku?
¿Chipurap mas tør kusrentrap isup waku?
5. Jeupawayelan mas martrap isu
Jeupawayelan mas martrap isupene, nun mas trak kemalamik purukuntrun. VIDEUN asay, yu videu asinuk pinaku paíkwan waminchap:
¿Cameronwan Jeupawayelan mas martrap isuikpe nun mantø purukuik kø?
Mayelø peksrømay Jeupawaimpurap waminchap amtrap kaimainkucha, søteløpa Jeupawayelan mas maramtik køn. Ley Proverbios 21:5, yu leinuk ñi chi martrap isup waikwan wamintay. Tru...
... kungrekasiunyu.
... Tiuswai Wamwan waminchip ampinuk.
¿Ik Bibliayukutri ciertonikpe mantø purukuntrera Jeupawayelan marinuk mas martrap?
¿Chi mas nepua maramtik kø?
Jeupawan mas mantraukutri waminchap intamik.
Biblian ketriku lentrap intamik.
Ñui kungrekasiun umpu søtelan nepua asamik.
Munkøpen Biblian kusrenanøp pølpasramik.
Precursor auxiliar kape precursor regular kømik.
Møk misakwaimpe, kungrekasiunyu metrap pera aship pøntrapelan purukupik misramik.
6. ¡Manasrønkatik kasraktø uñchun!
Ley Salmo 22:26, yu leinuk pinaku paíkwan waminchap:
¿Møya lata wentøsrø lata manasrønkatik kasraktø uñchappe ñipe chi maramik kø?
¿CHI KUSREKU?
Jeupawan mas trak kemalla pasrøntrap incha Jeupawayelan marinuk mas martrap inchi. Treek marape, ¡manasrønkatik kasraktø uñchun!
Kusreikwan katøle isuntrap
Ñi Jeupawayelan tarømisrmø martrai nøpe ñun purukuntrap kui, ¿chincha kørewa pasrøku?
¿Ñi Jeupapa trak lincha pasraikpe mas murik misrtrai chi martrap?
¿Chincha nui fe nurantrera Jeupawayelan mas isua martrap inchene?
MAS NEPUA ASH
¿Jeupawaimpe chi mas latrø nuik kø: kan rato latrø murik puraampinuk møra marikte, kape nam øsik amønainuk kualømmørik møra marinuk?
Jeupawan trak lincha pasrapikken kullaraik mørtrun. Mantø katøyu mur pasramikwan nepua ash.
Jeupawayelan kasraktø marøp yamik katøle mantø wetøtraik kø (5:25)
¿Jeupawayelan mas marinuk nepua marøp yamik chi paleira?
¿Tiuswai trak linchipik kømik chincha latrø nuik kø incha ikwan ñipe mantø nepupsruku?